ROSO 11
Jajjabba Gambooshshe Haꞌneemmohu Mayiraati?
Meksiko
Jarmane
Bootiswaana
Nikaraguwa
Ixaaliya
Kuni manni togo hagiidhinohu mayiraati? Jawa gambooshshe dayinohuraati. Hundiri Maganu soqqamaano dirunni sase higge jajjabba gambooshshe hadhanno; insante gede ninkeno, jajjabba gambooshshe quqquxamme agadhineemmo. (Marro 16:16) Diru dirunku sasu jajjabbu gambooshshi noonke; kurino: lamu mittu barrihu woradu gambooshshinna sasu barriho qoqqowu gambooshsheeti. Togoo gambooshshi maaho kaaꞌlannonke?
Mereeronke noo rodiimma jawaattanno gede assanno. Hundi Isiraeele “songote mereero” Yihowa galaxxitannonte gede, ninkeno iso jajjabbu gambooshshiwa mitteenni magansiꞌra lowo geeshsha banxeemmo. (Faarso 26:12; 111:1) Togoo gambooshshi wole songo roduuwi ledo, mito wote isinni wole gobba roduuwi ledo xaandeemmo faro fanannonke. Barru taali iillanno woyite, gambooshshu basera mitteenni sagaꞌlineemmo; tini qolte mereeronke baxillunna hagiirru heeꞌranno gede assitanno. (Soqqamaanote Looso 2:42) Togoo gambooshshi yannara, alamete deerrinni “woꞌma roduuwu maamaranke” mitto assino baxille illenkenni laꞌneemmo.—1 Pheexiroosi 2:17.
Ayyaanaamittetenni lophineemmo gede kaaꞌlannonke. Biꞌre Isiraeele gamba yitinowa Qullaawa Borro xawinsanna macciishshite “huwattanno.” (Nehimiya 8:8, 12) Ninkeno jajjabbu gambooshshiwa Qullaawu Maxaafinni rosiinsanni roso macciishsha hagiirsiissannonke. Mittu mittunku gambooshshi Qullaawa Borronni haaꞌnoonni cuꞌmo afiˈrino. Shiqqanno lallawo, simpooziyemenna loonse leellinshanni ikkito widoonni heeshshonke giddo Maganu fajjo wonsha dandiineemmo gara ronseemmo. Qoleno Kiristaana ikkansanni tenne busha yannara iillannonsa qarra dandiite heedhanno roduuwi woꞌnaalsha macciishshineemmo woyite jawaanteemmo. Qoqqowu gambooshshiwa shiqanno diraami, Qullaawu Maxaafi xagge surrenkera qaꞌmitanno gede assanno, hattono heeshshonkera kaaꞌlannore rosiisannonke. Insaneeto Maganoho sayisse uyitinota leellisha hasidhannori jajjabbu gambooshshi yannara cuuantanno.
Jajjabbu gambooshshi wogga hagiirsiissannota assannori maati?
Ati jajjabba gambooshshe haꞌrittoro maa afiˈratto?