Maganoho Uullate Noosi Alaami Maati?

1. Maganoho uullate noosi alaami maati?

MAGANOHO uullate noosi alaami hagiirsiisannoho. Yihowa uulla hagiirraamunna fayyu manninni woꞌmitara hasiꞌranno. Qullaawu Maxaafi, “Maganu Edenete kaashshu base qixxeessi; laꞌꞌate hagiirsiissannotanna itate baxissanno haqqeno . . . fushshi” yaanno. Maganu umi labbaahanna meyaata, yaano Addaaminna Heewani kalaqi gedensaanni hakko biiffino qaera worinsa; togono yiinsa: “Ille ilamme batidhe, uulla woꞌme iseno gashshe.” (Kalaqo 1:28; 2:8, 9, 15) Konni daafira Maganu alaami mannu ooso ilanno gede, qaensa ikkitino gannate uulla woꞌmate halashshanno gedenna saada towaatanno gedeeti.

2. (a) Maganu uullate noosi alaama wonshannota mayinni anfeemmo? (b) Hegerera heeꞌra lainohunni Qullaawu Maxaafi mayyaanno?

² Maganu Yihowa mannu gannate ikkitino uulla aana heeꞌrara noosi alaama wonshannoha lawannohe? Isi, ‘Ani coyiꞌroommore wonsheemmo’ yiino. (Isayyaasi 46:9-11; 55:11) Addaho, Maganu alaamasi mitte huluullo nookkiha wonshanno! Isi ‘uulla kalaqinohu mulla ikkikki mannu oosora qae ikkitara’ ikkino gede coyiꞌrino. (Isayyaasi 45:18) Maganu uullate aana hiittoo manni heeꞌrara hasiꞌranno? Qoleno mageeshshi yanna heeꞌrara hasiꞌranno? Qullaawu Maxaafi togo yee dawaro qolanno: “Keeraano uulla ragidhanno; ise aanano hegerera heedhanno.”—Faarso 37:29; Ajuu[j]a 21:3, 4.

3. Xaa yannara uullate aana noohu dadillisanno coyi hiikkonneeti? Kunino hiitti xaꞌmo kaꞌanno gede assanno?

³ Addaho kuni xaa geeshsha diꞌꞌikkino. Xaa yannara mannu xiwamanno, reyanno; qoleno gaaramannonna mimmito shaanno. Konni daafira mittu kalaqamino qarri no yaate. Kayinnilla uullate aana xa noo ikkito heedhara Maganoho horonta alaamasi diꞌꞌikkino! Kalaqamino qarri maatiyya? Maganu alaami woꞌminokkihu mayiraati? Qarru jammarinohu iima ikkino daafira, mannu ooso borreessitinohu xaggete maxaafi giddo mittuno dawaro qolankera didandaanno.

MITTU DIINI KALAQAMI

4, 5. (a) Hamashsho horoonsiꞌre Heewani coyishiishihu ayeeti? (b) Mittu joogunna ammanamino manchi yannate gedensaanni mooraancho ikkannohu hiittoonniiti?

⁴ Kalaqote maxaafi, Edenete kaashshu base giddo mittu Magano hettisannohu kainota kulannonke. Kuni hettisamaanchi “hamashsho” ikkinota xawinsirono addu hamashsho diꞌꞌikkino. Ajuujate maxaafi iso, ‘manna duuchcha soꞌrisiisannohu Sheexaanu Daawuloosi’ yee xawisanno. Qoleno kuni diini ‘biꞌree hamashsho’ yaamamino. (Kalaqo 3:1; Ajuu[j]a 12:9) Mittu hayyichchu manchi ashangulliite coyidhanni noo gede asse coyiꞌra dandaannonte gede, kuni wolqaatamu sokkaanchi woyi illete leellannokkihu ayyaanaamu kalaqami Heewani coyishiishate hamashsho horoonsiꞌrino. Kuni ayyaanaamu kalaqami Maganu uulla mannu oosora qixxeessi wote nooti dihuluullissanno.—Iyyoobi 38:4, 7.

⁵ Yihowa kalaqami baalu guuta ikkina “Daawuloosi” woyi “Sheexaane” kalaqinohu ayeetiyya? Haranchunni, Maganunnite ayyaanaame ooso giddo mittu umosi soorre Daawuloosi ikkino. Kuni hiitto ikke ikkanno? Mitte yannara jooganna ammanaminoha ikkino manchi yannate gedensaanni mooraancho ikkara dandaanno. Hiitto ikke? Kuni manchi wodanisi giddo busha yorto kalaqiꞌrara dandaanno. Tenne bunshe assaawa agura hoogiro, hatti bunshe lophphitanni hadhara dandiitanno. Hakkiinnino coyi injiisiro tenne assaawanni keeshshino bunshe assara dandaanno.—Yaaqoobi 1:13-15.

6. Ayyaanaame Maganu ooso giddo mittu Sheexaane Daawuloosi ikkinohu hiittoonniiti?

⁶ Sheexaanu Daawuloosino hatto ikkino. Maganu, Addaaminna Heewani ooso ilanno gedenna sirchinsa uulla woꞌmanno gede kulinsa wote Sheexaanu macciishshikki digatino. (Kalaqo 1:27, 28) Sheexaanu, ‘Kuni manni baalu Magano magansiꞌrante ane mayira dimagansiꞌranno!’ yee hedikki digatino. Konni daafira wodanisira bunshe rumuxxitu. Goofimarchoho tenne bunshesi assate Maganu assinokkire assino yee Heewani dogi. (Kalaqo 3:1-5) Konninni kainohunni “Daawuloosi” yaano “Suꞌma Hunannoha” ikki. Hattono “Sheexaane” yaano “Hettisamaancho” ikki.

7. (a) Addaaminna Heewani mayira reyi? (b) Addaami ooso baalanti geedhitannohunna reyitannohu mayiraati?

⁷ Sheexaanu dogenna kaphphe Addaaminna Heewani Maganu hajajo diigganno gede assi. (Kalaqo 2:17; 3:6) Konni daafira Maganu hajajoꞌya diigginiro reyitinanni yiinonsa garinni goofimarchoho reyitu. (Kalaqo 3:17-19) Addaami cubbo loosi yannara guuntesi baꞌino daafira sirchisira baalaho cubbo sayisino. (Roomu Sokka 5:12) Tenne ikkito xawisate buddeena gannanni mixashsho lawishshu gede assine adha dandiinanni. Mixashshote hiinxa heedhuro gannanni buddeeni baalu ma haare kaꞌꞌanno? Mittu mittunku buddeenchi hattee hiinxa woyi muso adhe kaꞌꞌanno. Hatteente gede, mittu mittunku manchi Addaamiwiinni cubbu “hiinxa” ragiꞌrino. Mannu baalunuku geedhannohunna reyannohu konniraati.—Roomu Sokka 3:23.

8, 9. (a) Sheexaanu finqille kakkayisi wote, wole ragaanni mayyee hettisamino? (b) Maganu finqilaasine hakkawotenni reyitanno gede assinokkihu mayiraati?

⁸ Sheexaanu Addaaminna Heewani cubbo loossanno gede assi wote finqille kakkayisanni no. Isi hakkawote, Yihowa gashshanno gari digaraho yee hettisamanni no. Wole ragaanni Sheexaanu togo yaanni no: ‘Maganu busha gashshaanchooti. Kaphphannohonna gashshannorira danchare hoꞌlannoho. Mannu ooso Maganoho gashshama dihasiissannonsa. Bushanna dancha badate uminsa wossaꞌna dandiitanno. Ane gashshooti hunda galturo woyyannonsa.’ Maganu tenne kissera dawaro qolannohu hiittoonniiti? Mitu manni, Maganu finqilaasine hakkawotenni shoommero woyyanno yee hedanno. Ikkina tini Sheexaanu hettisammera dawaro qoltanno? Maganu gashshanno gari gara ikkasi buuxisiissanno?

⁹ Yihowa guutu taashshote akati noosiha ikkino daafira, finqilaasine hakkawotenni reyitanno gede diassino. Isi Sheexaanu hettisammera ikkado dawaro qolatenna Daawuloosi kaphphaancho ikkinota buuxisiisate yanna ee laꞌꞌate wossanino. Konni daafira Maganu, mannu ooso wossanantino yanna geeshsha Sheexaanu silxaanera woroonni ikkite umonsa gashshitara wossani. Yihowa tenne assinohu mayiraatironna Sheexaanu hettisammera dawaro qolikki kageeshshi yanna keeshshinohu mayiraatiro konni maxaafira fooliishsho 11 aana ronseemmo. Xa kayinni togo yee assaawanke danchate: Addaaminna Heewani mitto dancha coye uyinonsakkiha Sheexaane ammanansa garaho? Baalankare uyinonsaha Yihowa kaajjadohonna kaphphaanchoho yee ammanansa garaho? Ate ikkoottoro ma assatto?

10. Sheexaanu hettisammera dawaro qolate Yihowara kaaꞌla dandaattohu hiittoonniiti?

¹⁰ Xaa yannara mitti mittinkera togooti wossaꞌna hasiissanno hajo tuncu yitannonke daafira, tenne xaꞌmo seekkine wodancha hasiissannonke. Addaho, Yihowara kaaꞌlite Sheexaanu hettisammera dawaro qolatto kaayyo noohe. Yihowa Gashshaanchokki assite doodhanna Sheexaanu kaphphaancho ikkinota leellisha dandaatto. (Faarso 73:28; Lawishsha 27:11) Alamenkera biliyoonetenni kiirranni manni giddo konne doorsha doodhitannori boode manna calla ikkansa dadillissanno. Tinino mitte hasiissanno xaꞌmo kaꞌanno gede assitanno: Isi Qullaawu Maxaafi tenne alame gashshaanchi Sheexaane ikkinota rosiisanno?

TENNE ALAME GASHSHAANCHI AYEETI?

11, 12. (a) Yesuusira iillino fatani Sheexaanu tenne alame gashshaancho ikkinota xawisannohu hiittoonniiti? (b) Sheexaanu tenne alame gashshaancho ikkinota buuxisiissannoti wole hiitti taje no?

¹¹ Tenne alame gashshaanchi Sheexaane ikkinota Yesuusi huluullame diegennino. Mitte yannara Sheexaanu Yesuusira maalale ikkitino doogonni ‘alamete mangiste baala ayirrinynyinsa ledo’ leellishisi. Hakkiinnino Sheexaanu Yesuusira togo yee qaale eisi: ‘Guluphphite sagadittoeronna magansiꞌrittoero konne duuchchanka coye atera eemmohe.’ (Maatewoosi 4:8, 9; Luqaasi 4:5, 6) Hanni konne coye hedi. Sheexaanu tenne alame gashshaancho ikka hoogoommero hatto yaasi Yesuusira fatana ikkitasira dandiitanno? Tenne alame gashshooti gudisame Sheexaanunniha ikkasi Yesuusi dimoromino. Alamete gashshootira silxaane uyinohu Sheexaane ikka hoogoommero Yesuusi tenne coyiꞌrikki diaguranno.

¹² Addaho, Yihowa duuchchanka dandaanno Maganooti; xagge ikkitannota kalqete alame kalaqinohu isooti. (Ajuu[j]a 4:11) Ikkollana Qullaawu Maxaafi mittowano Magano Yihowano ikko Yesuusi Kiristoosi tenne alame gashshaanooti diyaanno. Isinni Yesuusi, Sheexaanu ‘tenne alame gashshaancho’ ikkinota xawise kulino. (Yohaannisi 12:31; 14:30; 16:11) Hakkiinni saeno, Qullaawu Maxaafi Sheexaane Daawuloosi ‘tenne alame magano’ yaanno. (2 Qorontoosi 4:3, 4) Konne diina woyi Sheexaane lainohunni Kiristaanchu hawaariya Yohaannisi togo yee borreessino: “Alame [woꞌma] Sheexaanu gashshooti woroonni ikkitino.”—1 Yohaannisi 5:19.

SHEEXAANU ALAME BAꞌANNOHU HIITTOONNIITI?

13. Haaro alame hasiissannohu mayiraati?

¹³ Diru lexxi kiiro, alamete aana bunshe roore batidhanni hadhino. Alamete aana olunni mimmito gudanno wottaaddari, awaawurtannori poletiku mannooti, insaneeto danchuulle lawisse doggannori ammaꞌnote marootinna mararro nookkihu jaddo loosanno manni woꞌmino. Tini alame woyyeessinannikki gede ikkitino. Maganu tenne busha alame isi olinni yaano Armagedooninni hunanno yanna mule ikkitinota Qullaawu Maxaafi xawisanno. Hatte yannara keeraanchimma woꞌmitinoti haaro alame tenne alame riqibbanno.—Ajuu[j]a 16:14-16.

14. Maganu Mangistesira Gashshaancho asse ayee doorino? Konne lainohunni mayine masaalloonni?

¹⁴ Maganu Yihowa iimi Mangistesira woyi gashshootisira Gashshaancho ikkara doorinohu Yesuusi Kiristoosiiti. Qullaawu Maxaafi seeda yanna albaanni togo yiino: ‘Qaaqqu ilaminonkena labbaa qaaqqo uyinoonninkena; gashshootu qotisira ikkanno; suꞌmasino Keeru Woma yinanni. Gashshootisira qacce, keerisira dannu diheeꞌranno.’ (Isayyaasi 9:6, 7) Konne gashshoote lainohunni Yesuusi rosaanosi, ‘Mangistekki daggo. Fajjokki iima ikkitino gede, uullano ikkito’ yite huuccidhanno gede rosiisino. (Maatewoosi 6:10) Albaange konni maxaafira ronseemmonte gede, Maganu Mangiste tenne alame gashshoote baala hunte insa bayichcho amaddanno. (Daanieeli 2:44) Hakkiinnino uulla gannate assitanno.

HAARO ALAME DAATE MULE NO!

15. ‘Haaro uulla’ maati?

¹⁵ Qullaawu Maxaafi, ‘Ninke keeraanchimma heedhannota haaro iimanna haaro uulla hexxote qaali garinni agadhineemmo’ yee buuxisiisanno. (2 Pheexiroosi 3:13; Isayyaasi 65:17) Mito wote Qullaawu Maxaafi “uulla” yaanno qaale horoonsiꞌrannohu uullate aana heeꞌranno manna xawisateeti. (Kalaqo 11:1) Konni daafira, keeraancho ‘haaro uulla’ Maganu albaanni ayirrinynye afiꞌrino manni dagoomaati.

16. Maganu albaanni ayirrinynye afiꞌrino mannira uyinanniti muxxe ikkitino elto maati? Tenne elto afiꞌrate maa assa hasiissannonke?

¹⁶ Yesuusi daggannote haaro alame giddo Maganu albaanni ayirrinynye afidhinori baalu “hegere heeshsho” afidhanno yee qaale eino. (Maarqoosi 10:30) Hanni Qullaawa Maxaafakki faꞌnite, Yesuusi hegere heeshsho afiꞌrate assa hasiissannonkere lainohunni Yohaannisi 3:16 nna 17:3 aana yiinore nabbawi. Xa hanni uullate aana gannatete giddo tenne hagiirsiissannota Maganu elto afiꞌrate gabbaꞌꞌannonsa manni afiꞌranno atoote lainohunni, Qullaawu Maxaafi mayyaannoro laꞌno.

17, 18. Konni kaꞌa uulla woꞌmate aana keerunna geꞌne heedhannota mayinni anfeemmo?

¹⁷ Bunshe, olu, jaddonna finqille diheedhanno. “Bushu manchi digeedanno . . . Shooshaqootu kayinni uulla ragidhanno.” (Faarso 37:10, 11) ‘Maganu uullate qaccenni uullate qacce geeshsha ola hunanno’ daafira, keeru heeꞌranno. (Faarso 46:9; Isayyaasi 2:4) Hakkiinnino, “keeraano lattanno; aganu bayichchisinni hoꞌla geeshsha [hegerera] keeru batiꞌranno.”—Faarso 72:7.

¹⁸ Yihowa magansidhannori yaaddo nookkiha teesse heedhanno. Biꞌre Isiraeelete gosa Maganoho hajajantu diro baala yaaddo nookkiha geꞌe heedhino. (Zelewaawuyaani 25:18, 19) Konne lawanno garinni konni kaꞌa Gannatete giddo geꞌꞌe heeꞌra tashshi assitanno!—Isayyaasi 32:18; Mikiyaasi 4:4.

19. Maganu abbannotera haaro alamera sagale woꞌmitannota mayinni anfeemmo?

¹⁹ Sagalete anje diheedhanno. Faarsaanchu, “Uullate aana gidu woꞌmanno; ilaallate sammorano dayyaꞌꞌanno” yee faarsino. (Faarso 72:16) Maganu Yihowa keeraanosi maassiꞌranno; qoleno “uulla gumase uyitanno.”—Faarso 67:6.

20. Woꞌma uulla gannate ikkitannota huluullammeemmokkihu mayiraati?

²⁰ Uulla gudisidhe gannate ikkitanno. Mitte yannara cubbaataamu manni hunino uulla aana biifaddanna haaruudde minna minnanni; qoleno hagiirsiissannoti kaashshu base halaꞌlitanno. (Isayyaasi 65:21-24; Ajuu[j]a 11:18) Yanna saꞌu kiiro mannu heeꞌrannoti uullate base halaꞌlitanni hadhannohura, uulla woꞌmanti Edenete kaashshu base gede biiffanno hattono lattanno. Qoleno Maganu ‘angasi fane heeshsho noonsarira baalaho halchonsa wonshanno.’—Faarso 145:16.

21. Saadanna mannu mimmito gawajjannokkita leellishannohu maati?

²¹ Mannunna saada mimmito digawajjitanno. Mini saadanna gaxigalu mitteenni itanno. Xa gawajjanno gaxigala hatte yannara qaaqqu nafa diwaajjanno.—Isayyaasi 11:6-9; 65:25.

22. Haaro alamera xiwanu hiikkanno?

²² Xiwanu diheeꞌranno. Yesuusi iimi Mangiste Gashshaancho ikke hursanno hurre uullate aana noo waro hursino hurrenni roortanno. (Maatewoosi 9:35; Maarqoosi 1:40-42; Yohaannisi 5:5-9) Konni daafira “hakko [haaro alamera] heeꞌrannohu, ‘Xiwamoommo’ diyaanno.”—Isayyaasi 33:24; 35:5, 6.

23. Kao wodananke tashshi assitannohu mayiraati?

²³ Reyinohu banxeemmo manni hegerera heeꞌrate hexxo afiꞌre kaꞌꞌanno. Reyotenni fooliishshidhe noorinna Maganu qaagannonsari gudisante kaꞌanno. Isinni ‘cubbaataammuno keeraanono reyotenni kaꞌanno.’—Soqqamaanote Looso 24:15; Yohaannisi 5:28, 29.

24. Uullate aana Gannatete heeꞌrattota hedatto wote mayi macciishshamannohe?

²⁴ Bayiru Kalaqaanchinke Yihoware rosanna isira soqqama hasidhannorira baalaho hagiirsiissanno yanna agartannonsa! Yesuusi qotesiinni sutaminohura jaddo assino manchira, ‘Ane ledo gannatete heeꞌratto’ yee qaale eisi wote yiinositi uullate aana ikkitanno gannateeti. (Luqaasi 23:43) Konne atoote baala afiꞌneemmo gede faro faninonkehure Yesuusi Kiristoosire roorsine rosa hasiissannonke.