Iyyoosiyaasira Dancha Jaalla Noosi

Danchare assa qarrissannoha lawannohe?— Lowo mannira hatto lawannonsa. Qullaawu Maxaafi biꞌree waro danchare assa roore qarrissinohu Iyyoosiyaasi yinanni beetti noota kulanno. Kayinni konni beettira dancha jaalla noosi. Hanni Iyyoosiyaasinna jaallasi xagge ronso.

Iyyoosiyaasi anni Amooni, Yihudu nugusaati. Amooni busha manchooti, qoleno kaphu maganna ammanannoho. Iyyoosiyaasi annisi reyita, Yihudu nugusa ikki. Hakkawote kayinni sette dirolla ikkinosi! Isi annisi gede busha ikkannoha lawannohe?— Deeꞌni, isi danchaho!

Iyyoosiyaasi shiinqu heeꞌre nafa Yihowara hajajama baxannoho. Hakko daafira isi jaalooꞌminohu Yihowa baxanno manni ledo callaati. Tini jaallasi danchare assanno gede kaaꞌlitinosi. Iyyoosiyaasi jaalla giddo gamu ayeooti?

Jaallasi giddo mittu Sofooniyaasiiti. Sofooniyaasi masaalaanchoho; isi Yihudu manna, kaphu maganna magansidhiniro bushuri iillannoꞌnena qorophe yiino. Iyyoosiyaasi Sofooniyaasi yiinore macciishshe, kaphu maganna giwe Yihowa magansiꞌrino.

Wolu Iyyoosiyaasi jaali kayinni Ermiyaasiiti. Lamunku darawote, lophitinohuno mittu qooxeessiraati. Insa jaalla ikkitino daafira, Ermiyaasi Iyyoosiyaasi reyenna lowo geeshsha dadillinota kulate borro borreessino. Ermiyaasinna Iyyoosiyaasi danchare assatenna Yihowara hajajamate mimmito kaaꞌlitino.

Iyyoosiyaasi xaggenni maa rositto?— Iyyoosiyaasi shiimu heeꞌre nafa danchare assa baxanno. Isi Yihowa baxanno manni ledo calla jaalooꞌma hasiissannosita afino. Atino Magano baxannohanna danchare assatto gede kaaꞌlannohe manna jaalla assiꞌri!