Manni Gobba Mannira Danchare Assa Habbinoonte

1, 2. (a) Yannankera manni gobbara heedhannorira mayi qarra ikkannonsa? (Hanafote noo misile lai.) (b) Soqqamaasinchu Phaawuloosi Kiristaana mayyee amaalino? Konninni aanchine hiikkuri xaꞌmuwa laꞌneemmo?

OOSE^[1] yinannihu 30 diri albaanni Gaanu gobbanni Awuroppa haꞌrino; hatte yannara isi Yihowa Farciꞌraasincho diꞌꞌikkino. Isi hakkawarita qaage togo yiino: “Hakka maranni heeꞌrenni rooru manni ane caaqqi yee laꞌꞌannokkita huwatummo. Hakkiicho ayyareno waajjishshannote. Horophillunni dirranni heeꞌreenna qiidu qucuccishieta wiꞌlummo; hattoo qiidi horo gane diegenninoe.” Oose hakkiicho coyiꞌnanni afoo dandaannokkihura dancha looso afiꞌrikkinni mitto diro saꞌanno yanna keeshshino. Isi maatesiwiinni xeertiꞌre heeꞌrannohura callatino; hattono insa qalli yiino.

² Ati Oose ikkoottoro mannu maa assahera hasiꞌratto? Mangistete Addaraashe maratto wote mannu gobbakki woy danakki laikki anga fane haarihero tashshi diyaannohe? Isinni, Qullaawu Maxaafi Kiristaana “Wosina adha habbinoonte” yee amaalanno. (Ibi. 13:2) ‘Wosina adha’ yaannohu hundi qaali manni gobbanni dagginorira danchare assa yitanno tiro afiꞌrino. Hakko daafira hanni konninni aanchine aante noo xaꞌmuwa laꞌno: Yihowa wole gobbanni dagginore ma garinni laꞌꞌanno? Manni gobbanni dagginorira noonke lao biddi assiꞌra hasiissankera dandiitannohu mayiraati? Wole gobbanni songonke daanno manni borsannokki gede kaaꞌla dandiineemmohu hiittoonniiti?

YIHOWA WOLE GOBBANNI DAGGINORE MA GARINNI LAꞌꞌANNO?

3, 4. Fulo 23:9 yitanno garinni Maganu Israeele wolewiinni dayino manna ma garinni laꞌara hasiꞌranno? Mayira?

³ Yihowa mannasi Gibitsete borojjimmanni fushshihu gedensaanni, Israeele ikkinokkihu ledonsa heeꞌranno mannira danchare assitanno gede kultanno higge uyinonsa. (Ful. 12:38, 49; 22:21) Duucha wote manni gobba manna miincanninsa daafira, Yihowa baxillunni kakkae insara kaaꞌlitanno qixxaawo qixxeessino. Tenne qixxaawo giddo mitte wolewiinni dayino manni qarme xinqiranno gede uyinonsa qoossooti.—Lew. 19:9, 10.

⁴ Yihowa Israeele wolewiinni dayino manna ayirrissanno gede hajajantenni, insa manni gobbara noowarita heddanno gede assinonsa. (Fulo 23:9 nabbawi.) Insa manni gobbara heeꞌne mageeshsha ‘qarrammanniro’ affino. Wole agurina Ibiraawootu borojje ikkitara albaanni nafa, Gibitsete manni sirchonsa gotti asse laꞌꞌannohura woy Ibiraawootu ammaꞌno baxxitinota ikkitinohura lowo geeshsha giwannonsaha ikkara dandaanno. (Kal. 43:32; 46:34; Ful. 1:11-14) Israeele manni gobbara noowaro beebba assiꞌnoonninsaha ikkirono, Yihowa insa wolewiinni dayino manna “fiixinsa” gede assite laꞌanno gede kulinonsa.—Lew. 19:33, 34.

5. Manni gobbanni dagginorira Yihowa gede danchare assate mayi kaaꞌlannonke?

⁵ Xaa yannarano, songote gambooshshe daannoha wole gobba manna Yihowa taashshe laꞌꞌannota dihuluullammeemmo. (Mar. 10:17-19; Mil. 3:5, 6) Togoo mannira fonqolo ikkannonsare lawishshaho, mannu allaggisannonsatanna manni afoo coyiꞌra qarra ikkitannonsata hendeemmoha ikkiro, insara danchare assate faro hasiꞌneemmo; hattono insa qarra ninkehu gede assine laꞌneemmo.—1 Phe. 3:8.

MANNI GOBBANNI DAGGINORIRA NOONKE LAO BIDDI ASSIꞌRA HASIISSANNONKE?

6, 7. Umi xibbi diro heeꞌrino Kiristaani hatte yannara rumuxxite noota manna mulla kaꞌne gimbannita qeeꞌlate sharraminohu hiittoonniiti?

⁶ Umi xibbi diro heeꞌrino Kiristaani Ayihudete manni mereero rumuxxe keeshshinoha manna mulla kaꞌne giwate rosicho qeeꞌlate sharramino. Yerusaalamete heeꞌranno Kiristaani 33 M.D. Phenxeqosxete ayyaani barra babbaxxitino gobbanni dagge Kiristaana ikkitinorira danchare assino. (Soq. 2:5, 44-47) Yihudaho heeꞌranno Kiristaani babbaxxitino gobbanni dayino roduuwinsara baxillunni kakkae tenne assansa, “wosina adha” yaa wole gobba mannira danchare assa ikkitinota huwatinota leellishshanno.

⁷ Ikkollana, umi xibbi diriti Kiristaanu songo lexxitanni hadhuta mittu qarri kalaqami. Giriikete Afoo coyidhanno Yihudooti, gunnootinke baddalamino yite coyiꞌrantu. (Soq. 6:1) Soqqamaasine mittu manchino baddalamannokki gede assite konne qarra tirate, lamala labballo doortu. Kuri labballi Giriikete suꞌmuwa afidhinore ikkansa, miteekke soqqamaasine hundi Kiristaani mereero gobbate babbadooshshinni kalaqamino qarra ajishate hasidhinota leellishannoha ikkara dandaanno.—Soq. 6:2-6.

8, 9. (a) Manna mulla kaꞌne giwate akati noonketa woy ninke sircho woluwiinni roorsine laꞌneemmota leellishannori maa ikkara dandaanno? (b) Wodaninke giddonni maa fushshine hooꞌlate sharrama hasiissannonke? (1 Phe. 1:22)

⁸ Ninke anfummorono afa hoongummorono budinke hedonke soorrara dandaanno. (Rom. 12:2) Qachinkera heeꞌranno manni, ledonke loossannori woy rossannori wolu manni gaꞌre woy dana mishshe coyidhanna macciishshineemmoha ikkara dandaanno. Ikkina tini, ninkeno konne manna insa laꞌꞌanno garinni laꞌneemmo gede assitannonke? Mittu manchi gobbakki daafira lawishshaho mito budekki kayise ikkinokki geeshsha asse haariimannoha ikkiro mayi macciishshamannohe?

⁹ Soqqamaasinchu Pheexiroosira Ayihude ikkinokki mannira gara ikkitinokki lao noosi woti nooha ikkirono, gale hose isi tenne hedo wodanisi giddonni fushshe hooꞌlino. (Soq. 10:28, 34, 35; Gal. 2:11-14) Hatteente gede, ninkeno manna mulla kaꞌne gimbeemmota woy ninke sircho woluwiinni roorsine laꞌneemmota huwantummoro tenne hedo wodaninke giddonni fushshe hooꞌlate sharrama hasiissannonke. (1 Pheexiroosi 1:22 nabbawi.) Gobbanke ikkitutano ikkituro, baalunku guuntete xeꞌne noonkehura gato afiꞌra hasiissannonke yineemmore ikkinoommokkita heda hasiissannonke. (Rom. 3:9, 10, 21-24) Ikkina, ninkeneeto woluwiinni roorsine laꞌneemmo gede assannonkeri mayi no? (1 Qor. 4:7) Ninkeno soqqamaasinchu Phaawuloosite gedee hedo heedhannonke gede assiꞌra hasiissannonke; isi buuramino Kiristaana xaate “Kiꞌne . . . Maganu fiixaati ikkinnina, wosinanna manni gobba manna diꞌꞌikkitinoonni” yee amaalinonsa. (Efe. 2:19) Wole gobba manna mulla kaꞌne gimbeemmokki gede qorophate sharramanke, haaro mannimma uddiꞌrate kaaꞌlitannonke.—Qol. 3:10, 11.

WOLE GOBBA MANNIRA DANCHARE ASSA DANDIINEEMMOHU HIITTOONNIITI?

10, 11. Booeezi Moaabi gare ikkitinote Ruutira assinori Yihowara manni gobbanni dagginorira noosi lao leellishannohu hiittoonniiti?

¹⁰ Booeezi Moaabi gaꞌre ikkitinote Ruutira assinori Yihowara manni gobbanni dagginorira noosi lao leellishanno. Booeezi gide middannore towaatara mari yannara, Ruuti gide gamba assitannorira hoode hadhanni qarme xinqidhanna laiti ise worba loosaasincho ikkitinota huwatino. Ruuti qarme xinqirate qoosso nooseha ikkirono fajjishiishidhe xinqidhino; Booeezi tenne macciishshiti nadallate giddonni nafa xinqidhanno gede fajjinose.—Ruuti 2:5-7, 15, 16 nabbawi.

¹¹ Booeezi hakkiinni aanche coyiꞌrinori, isi Ruutira hedannotanna wole gobbanni dagginota ikkitinohura tuncu yaannose fonqolo afinota leellishanno. Booeezi gide middannori kissannosekki gede, Ruuti seennu loosaasinesi ledo hossanno gede assino. Wole agurina Booeezi qaxarante loossannorira assannonte gede Ruutino sagalenna waa adhitanno gede assino. Qoleno, Booeezi tenne anga ajjinosete manni gobba beettora mishe coyiꞌra agure jawaachishinose.—Rut. 2:8-10, 13, 14.

12. Manni gobba mannira danchare assanke insa kaaꞌlitara dandiitannohu hiittoonniiti?

¹² Booeezi Ruutira danchare assanno gede kakkayisinosiri, ise ballose Naaoomira bagamannokki baxille leellishshinohura calla ikkikkinni, Yihowa magansidhannota ikkitinohuraati. Booeezi Ruutira danchare assasi, Yihowa Ruuti lowo geeshsha baxannota leellishshanno; Ruuti ‘qoolisi giddo amadasera’ Yihowa daggino. (Rut. 2:12, 20; Law. 19:17) Xaa yannara ninkeno danchumma leellishanke, duuchunku gari manni halaale macciishshannonna Yihowa lowo geeshsha baxannonsata huwatanno gede kaaꞌlitanno.—1 Xim. 2:3, 4.

13, 14. (a) Mangistete Addaraashe daannoha manni gobba manna keere haaꞌrate woꞌnaala hasiissannonkehu mayiraati? (b) Wole bude afiꞌrino manna shiqe coyishiisha qarra ikkituhero maa assa dandaatto?

¹³ Manni gobbanni Mangistete Addaraashe daanno manna faasiinqe keere haaꞌneemmoha ikkiro, danchare assinanni heeꞌnoommo. Mito wote manni gobbanni dagginori waajjitannorenna mannunniwa shiqa qarrissannonsare ikkitinota huwantoommoha ikkara dandaanno. Lophitino gari woy dagoominsanni kainohunni insaneeto wolu sirchinni woy gobbanni ajishshe laꞌannoha ikkara dandaanno. Hakko daafira insawa shinqe faasiinqe hasaawisanna insa daafira hendeemmota leellisha hasiissannonke. JW Laanguweeji Appi yinanni pirogiraame kiꞌne coyidhinanni afiinni qixxaabbinoha ikkiro, wole gobba manna dadhino afiinni keere haꞌnanni gara rosate woꞌnaalle.—Filiphisiyusi Sokka 2:3, 4 nabbawi.

¹⁴ Wole bude afiꞌrino manna shiqe coyishiisha shota ikka hooggahera dandiitanno. Togoo mancho shiqqe hasaawisate ate daafira mitore kulattosira dandaatto. Tenne assittoro, mereeroꞌne noo badooshshinni roore mitto assannoꞌnehu lowo coyi nootanna mittu mittunku budira umisihu danchunna dancha ikkinokki coyi noosita huwatatto.

BORSITANNOKKI GEDE ASSENSA

15. Wolewiinni dagge gobbanke rosate woꞌnaaltannorira hendeemmonsata leellishate mayi kaaꞌlannonke?

¹⁵ Songote giddo manni gobbanni dagginori borsitannokki gede assate ninkeneeto, ‘Ani wolewa haꞌroommoro mannu ma assaera hasiꞌreemmo?’ yine xaꞌma hasiissannonke. (Mat. 7:12) Wolewiinni dagge kiꞌne gobba rosate woꞌnaaltanni noore cincatenni amaddensa. Umi qara, heddanno garanna ikkitonsa woꞌmunni woꞌma afa hoongammora dandiineemmo. Ikkollana, insa ninke bude rossanno gede calla agadha agurre, insa budeno rosate mayira diwoꞌnaalleemmo?—Roomu Sokka 15:7 nabbawi.

16, 17. (a) Wole bude afiꞌrino manniwa roore shiqate maa assa dandiineemmo? (b) Wole gobbanni dagge songonkera heedhannore kaaꞌla dandiineemmohu hiittoonniiti?

¹⁶ Wolewiinni dagginori gobbanna budi daafira anfummoro, insa ledo hasaawa shota ikkitankera dandiitanno. Maatete magansiꞌra assiꞌneemmo yannara, songonkera woy qoqqowinkera heeꞌrannohu seekkine anfoommokki manni daafira xiinxalla dandiineemmo. Manni gobbanni dagginoriwa roore shiqa dandiineemmoti wole doogo insa mininkera sagalete koyisate. Yihowa “dagate ammanate” waalcho fanino; ikkina ninke manni gobbanni dayinohu “ammaꞌnino mannira” woy roduuwinkera waalchonke fana dihasiissannonke?—Soq. 14:27; Gal. 6:10; Iyo. 31:32.

¹⁷ Manni gobbanni daggino maate ledo yanna sayinseemmoha ikkiro, insa ninke bude rosate sharrantanno sharro huwanteemmo. Ikkirono, tenne yannara insa ninke qaale rossanno gede mitore assine kaaꞌla hasiissannonketa anfammora dandiineemmo. Qoleno, dancha looso woy mine afidhanno gede kaaꞌlinammonsara dandiineemmo. Tenne assanke roduuwinkera lowo geeshsha kaaꞌlitansara dandiitanno.—Law. 3:27.

18. Xaa yannara manni gobbara heedhannori ayirrissannorenna galattannore ikkate ayi lawishsha harunsa dandiitanno?

¹⁸ Manni gobbanni dagginorino xa noo gobba bude rosate dandiiture baala assa hasiissannonsati egennantinote. Ruuti tennera dancha lawishsha ikkitanno. Qarme fajjishiishidhe xinqirase martino gobba manni bude ayirrissannota leellishshanno. (Rut. 2:7) Qarme xinqira qoossose ikkitinohu gede assite woy mannu hasiisannosere aa hasiissannonsahu gede assite diheddino. Qoleno, ise danchare assinoseha bayichonko galattino. (Rut. 2:13) Manni gobbanni dagginori tenne assitannoha ikkiro, qooxeessinsara heeꞌranno manninna roduuwinsa ayirrissannonsa.

19. Manni gobbanni dagginore anga fanne haꞌneemmo gede assannonkeri maati?

¹⁹ Yihowa bagamannokki baxillisinni kakkae babbaxxino gari manni dancha duduwo macciishshanno gede assasi lowo geeshsha hagiirsiissannonke. Insa alba gobbansara noo yannara Qullaawa Maxaafa xiinxallate tunceenya afidhinokkiha woy Yihowa manni ledo hasidhu gede gambooshshe assiꞌra dandiitannokkiha ikkara dandaanno. Xa kayinni, insa ninke ledo gambooshshe assiꞌrate tunceenya afidhino; ikkina insa ninke mereero heedhe borsitannokki gede assa dihasiissannonke? Woxunni woy wolere uyine kaaꞌla hoongummuro nafa, insara danchare assate sharrammeemmoha ikkiro Yihowa baxannonsata huwattanno. ‘Magano lambeemmore’ ikkinoommohura manni gobbanni dagginore anga fanne haaꞌrate dandiinummore baala assino.—Efe. 5:1, 2.