Bunshe Hunate Maganu Maa Assanno?

Yihowanna Beettisi Yesuusi Kiristoosi, Sheexaanu Daawuloosi abbino qarra hoolate maa assitannoro Qullaawu Maxaafi xawise kulanno. Togo yaanno: “Maganu Beetti [Yesuusi] xawanno gede assinoonnihu konni alaamira yaano Daawuloosi looso diigaraati.” (1 Yohaannisi 3:8) Hafuurre, gibbonna bushu assooti woꞌminoti tini alame diigantanno. Yesuusi, “tenne alame gashshaanchi” Sheexaanu Daawuloosi “gobbara tugamannota” coyiꞌrino. (Yohaannisi 12:31) Bunshete widira xixxiiwannohu Sheexaanu baeenna, keeraanchimma woꞌmitinoti haaro alame dagganno, hattono uulla salaamete bayicho ikkitanno.—2 Pheexiroosi 3:13.

Wodana kaajjite heeshshonsa biddi assiꞌra gibbannorinna bunshe assa agura hasidhannokkiri hiikkitannoyya? Maganu Qaali togo yee xawise kulanno: “Uullate aana suwaddu manni calla heeꞌranno; qoleno mishsho noonsakkiri ise aana gattanno. Bushuullu kayinni uullate aaninni qocci yitanno; qoleno hantaalaammu ise aaninni hoꞌlitanno.” (Lawishsha 2:21, 22) Bushare assinanni gede xixxiiwannohu bushu manni diheeꞌranno. Salaame woꞌmitinote hattee yannara, hajajantannori mannu ooso ragidhino cubbinni galte hossanni keeraaꞌmitanno.—Roomu Sokka 6:17, 18; 8:21.

Daggannote haaro alamera Maganu bunshe hunannohu hiittoonniiti? Isi tenne assannohu doodhate qoosso kade manna maashinete gede ikkanno gede asse diꞌꞌikkino. Hatteentenni, isi mannaho doogosi rosiise gara ikkitinokki hedonninna assootinni xeertiꞌranno gede kaaꞌlanno.

Maganu hedeweelcho dagganno dano hiissannoyya? Isi Mangistesi muli yannara uulla woꞌma illaallissannota coyiꞌrino. Maganu shoominohu hatte Mangiste Nugusi Yesuusi Kiristoosiiti; isira xiwantinore hursate wolqa noosi. (Maatewoosi 14:14) Qoleno, Yesuusira kalaqamu wolqa hajajate dandoo noosi. (Marqoosi 4:35-41) Hakko daafira, “yannanna hendoonnikki ikkito” abbitanno gawajjo diheedhanno. (Mekibibi 9:11) Kiristoosi gashshooti yannara, mannu oosora dano horonta diꞌꞌiillitanno.—Lawishsha 1:33.

Addi addi danonni reyinohu lowo miliyoone ikkannohu beebbaataamu manni hiikkannoyya? Yesuusi jaalasi Alaazaari reyotenni kayisara albaanni togo yiino: “Ani kaotenna heeshshote.” (Yohaannisi 11:25) Ee, Yesuusira reyitinore kayisate woy galagalte heeshsho afidhanno gede assate wolqa noosi!

Danchu mannira bushu coyi iillannokki alamera heeꞌnannita kultanno hexxo baxoottoha ikkiro, halaalaanchu Maganinna alaamisi daafira afate Qullaawa Maxaafa mayira dixiinxallatto? Qooxeessikkira noori Yihowa Farciꞌraasine tenne egenno afiꞌratto gede kaaꞌlitannohe. Ballo insa shiqqe coyishiishi, woy tenne metseete qixxeessaanora sokka borreessite soyi.