Kiristaanu Heeshshonna Soqqanshote Xiinxallote Maxaafichora Qummi Assinoonni Borro—Badheessa 2021
BADHEESSA 1-7
MAGANU QAALI GIDDO NOOTA MUXXE JIRO | KIIRO 7-8
“Israeelete Kaampenni Ronseemmo Roso”
it-1 497 guf. 3
Songo
Israeelete roorrooti duucha woyite Israeelete manna riqibbe mito coye assitanno. (Iz 10:14) Konnira, ‘Israeelete gaꞌre roorrooti’ xaadooshshu dunkaana uurrinsihu gedensaanni afansha shiqishshino. (Ki 7:1-11) Hattono Nehimiya waro eꞌnoonni sheemaatira kakkalaasine, ‘Leewaawootunna roorrootu’ farrantino. (Ne 9:38–10:27) Israeele halalla hadhanni noo yannara ‘egennantinori manna gashshitannori’ no; insa giddo 250 ikkitannori Qore, Daataani, Aberooninna Ooni ledo buusante Musenna Aarooni aana kaꞌino. (Ki 16:1-3) Muse Maganu uyinosi biddishshi garinni, “mannu qarra” callisi duqqannokki gede kaaꞌlitasira Israeelete giddonni 70 roorroota doorino. (Ki 11:16, 17, 24, 25) Leewaawoota 4:15 “gosate geerri” daafira kultanno; qoleno Israeelete daga riqibbannori geerra, albisoota, daanyootanna olu hajajaano ikkitukkinni digattino.—Ki 1:4, 16; Iy 23:2; 24:1.
it-2 796 guf. 1
Roobeeli
Israeelete kaampera Roobeeli gaꞌre, Simiooninna Gaadi gaꞌre ledo xaadooshshu dunkaanira wodiidoonni dukkaꞌnitanno. Dukkaꞌnitinowiinni hadhanno woyite Roobeeli sirchi massagannoti tini sasenti gaꞌre, Yihudu, Yisaakoorinna, Zaabilooni gaꞌre harunsite hadhanno. (Ki 2:10-16; 10:14-20) Xaadooshshu dunkaana maassiinsi barrano mitte mittenti gaꞌre afansha shiqishshinohu hakko garinniiti.—Ki 7:1, 2, 10-47.
w04 8/1 25 guf. 1
Kiirote Maxaafita Qara Qara Hedo
8:25, 26. Leewaawootu loossanno loosi garunni loosamanno gede assate, geedhitinori fooliishshidhannonna xurata fultanno gede assinanni. Ikkirono insa uminsa fajjonni woloota Leewaawoota kaaꞌla dandiitanno. Xaa yannara Maganu Mangiste dudubbannori konni loosinni xurata fultannokkiha ikkirono, konni seerinni lowore ronseemmo. Mittu geedhino Kiristaanchi geedhimmatenni kainohunni uyinoonnisiha mito looso loosa hoogiro, isi loosa dandaannoha wole looso uyinasira dandiinanni.
Maganu Qaalinni Ronseemmore
it-1 835
Umo Ilaminoha, Umo Qalaminoha
Israeelete umo ilantanno labballi maatete umo ikkitannore ikkitino daafira Israeelete daga woꞌma riqibbanno. Isinni Yihowa, woꞌma Israeelete daga, “bayira beettoꞌyaati” yiino; isi hatto yiinohu insa Abirihaami ledo eꞌino gondoori widoonni bayira daga ikkitino daafiraati. (Fu 4:22) Yihowa insa heeshsho gatisino daafira, “Israeelete manni giddonni umo ilaminohunna saadate giddonnino umo qalaminohu baalu” isiha ikkanno gede kulinonsa. (Fu 13:2) Konnira umo ilamannohu labbaa beetti Maganoho uyinanniho.
BADHEESSA 8-14
MAGANU QAALI GIDDO NOOTA MUXXE JIRO | KIIRO 9-10
“Yihowa Mannasi Massaganno Gara”
it-1 398 guf. 3
Kaampe
Tini halaꞌlado kaampe bayichunni bayicho hadhanno gari (Muse Kiirote maxaafa fooliishsho 33 insa dukkaꞌnitinoha 40 ikkanno bayicho qummi assino) insa dhagge ikkanno garinni qinaabbinota leellishshanno. Gomichu xaadooshshu dunkaanira iimanni keeshshanno yanna baala kaampe noowa keeshshitanno. Gomichu dunkaanu aaninni kae haꞌranno yannara, Israeeleno noowiinni hadhanno. “Baxxisidhannohuno hadhannohuno Kaaliiqi Musera hajajino hajajo garinniiti.” (Ki 9:15-23) Kaampete Yihowa hajajo kullannihu birra daashshine seekkinoonnihu lamu xurumbinniiti. (Ki 10:2, 5, 6) Mannu dunkaana diiqqe haꞌranno gede kulate ufuunfannihu baxxino garinniiti. Konni garinni umo ufuunfoonnihu “layinki diro [1512 K.A.] layinki aganira lemiikki” barraati. Albaanni gondooru taawooti haꞌranno; hakkiinni Yihudu sirchi massagannoti sase gaꞌre hadhanno; insanni aanchite Yisaakoori gaꞌre hakkiinni Zaabilooni gaꞌre hadhanno. Hakkiinni Gershooninna Meraari ilama insara gaammoonniha xaadooshshu dunkaani uduunne dukke hadhanno. Aantete Roobeeli sirchi massagannoti sase gaꞌre hadhanno; umo Roobeeli gaꞌre fultanno hakkiinni Simiooninna Gaadi gaꞌre hadhanno. Insanni aanchite Qehaati ilama qullaawa uduunne dukke hadhanno; hakkiinni Efireemi sirchi massagannoti sase gaꞌre hadhanno; umo Efireemi gaꞌre, hakkiinni Minaasenna Biiniyaami gaꞌre fultanno. Goofimarchoho, Daani sirchi massagannoti sase gaꞌre yaano Daaniti, Aseeritinna Niftaaleemi gaꞌre agartanni woꞌmunkura badheenni hadhanno. Tini leellishshannonte gede albaanninna badheenni hadhannori lowo kiiro afidhinoreetinna wolqaataammaho.—Ki 10:11-28.
w11 4/15 4-5
Maganu Massaganni Noonketa Leellishshanno Taje Huwattinoonni?
Maganu biddishsha naandeemmota leellisha dandiineemmohu hiittoonniiti? Soqqamaasinchu Phaawuloosi togo yiino: “Gashshite nooꞌnerira [“albisa ikkitinorira,” NW] hajajantinanni, yitannoꞌne gede ikke.” (Ibi. 13:17) Mito woyite tenne assa shota ikka hooggara dandiitanno. Hanni mitto lawishsha laꞌno: Hanni Muse waro nootto Israeelaawichaati yine hendo. Mito geeshsha haꞌritto gedensaanni gomichu heelliicho noowa uurritu. Uurritinowa mageeshsha keeshshitanno? Mitto barra? Mitte lamalanso lowo agana? ‘Nooe uduunnicho tittire bayicho bayichoho wodha hasiissannoe?’ yite hedattoha ikkara dandaanno. Umi qara roore hasiisannohe uduunne calla fushshiꞌrattoha ikkara dandaanno. Kayinni shiimu barri gedensaanni mito uduunne hasidhanni caaccaawittohu gedensaanni, noohe uduunne baala fushshatto. Uduunnekki baala tittirte gudattora kaꞌe heedheenna gomichu heelliicho bayichisenni kaꞌꞌa hanaffuta, haaro ikkite uduunnekki gamba assiꞌrattora higitto! Togo assa shota ikka hooggahera woy injaa hoogahera dandaanno. Ikkirono Israeele noowiinni bayichonkonni kaꞌe haꞌra hasiissannonsa.—Kir. 9:17-22.
Ikkina ninke Maganu biddishsha aannonke woyite maa assineemmo? Bayichonkonni harunsate woꞌnaalleemmonso alba ronsoommo garinni assineemmo? Qullaawu Maxaafi xiinxallo xiinxallisate, wole afoo coyiꞌranno mannira farciꞌrate, maatete magansiꞌra ganye assiꞌrate, Hospitaalete Ledo Xaadissanno Komite ledo kaaꞌlamate, jajjabbu gambooshshiwa danchu amanyooti noonketa leellishatenna wolere kuri lawinori daafira muli yannara uyinoonninke biddishsha seekkine huwantoommo? Qoleno uyinanninke amaale macciishshine Maganu aannonke biddishsha naandeemmota leellinsheemmo. Hawa gede laꞌnannikki coye assate kaꞌneemmo woyite uminke hayyo addaxxantenni Yihowanna dirijjitesi uyitannonke biddishsha harunsineemmo. Mittu qaaqqi biite xeena gananno woyite annisiwanna amasiwa xooqannonte gede, ninkerano tenne alame qarri xeenimma dirrannonke woyite agarooshshe afiꞌrate Yihowa dirijjitewa gamba yineemmo.
Maganu Qaalinni Ronseemmore
it-1 199 guf. 3
Gambooshshe
Gambooshshu Hasiisannohu Mayiraati? Yihowa qixxeessino gambooshshuwanni ayyaanaamittetenni woꞌma horo afiꞌrate daafira, dirunni mitte hinge ayirrinsannihu Faasiku Ayyaani ledo xaadinse kulloonni. Lagaawinokkihunna doogo haꞌrinokki labballi baalu konne ayyaana ayirrisa hoogiro shinanni. (Ki 9:9-14) Moote Hiziqiyaasi Yihudahonna Israeelete heeꞌranno manni Faasiku Ayyaana ayirrisate Yerusaalame daanno gede woshshi woyite soyino sokka giddo gama togo yitanno: “Israeelete manna! . . . Annuwaꞌne gede haxo mokkookkitinoonte. Kaaliiqira hajajamme; hegerera qullaawa assinohuwa Qullaawu Minisiwa Yerusaalame amme. Buwanni nooha hanqosi aaniꞌnenni hoolanno gede Maganoꞌne Kaaliiqa magansidhe. . . . Maganiꞌne Kaaliiqi shaqqadonna mararannoha ikkino daafira, kiꞌne isiwa higginiro, isino alba higannoꞌne.” (2 Du 30:6-9) Anfanni heeꞌnenni konne gambooshshe gata Magano agurate gedeeti. Kiristaanu Faasiku Ayyaana ayirrisannokkiha ikkirono, Phaawuloosi Maganu manni assiꞌranno gambooshshe ganye assiꞌra agurannokki gede jawaachishasi garankolla; isi togo yiino: “Baxille afiꞌratenna dancha looso loosate mimmitonke kakkayinso. Mitu mitu agurtunte gede, ronsoommoha xaadonke agurroonke. Roorenka Mootichu daanno barri gamba yiinota qaagginanna, mimmitonke albinni roorsine jawaachinsho.”—Ib 10:24, 25; SONGO yaannoha lai.
BADHEESSA 15-21
MAGANU QAALI GIDDO NOOTA MUXXE JIRO | KIIRO 11-12
“Gunguma Hasiissannonkekkihu Mayiraati?”
w01 6/15 17 guf. 20
Macciishshitine Habbinannire Ikkitinoonte
20 Rooru Kiristaani amanyootu maaeellera diqeelamanno. Kayinni Magano dadillinseemmo gede assannonkehu gungumate akati heeꞌrannonkekki gede qoropha hasiissannonke. Phaawuloosi togo yee amaalinonke: “Insa [Israeelete manni] giddonni mitu mitu Magano fonqolteenna hamashshu idde gudinona; ninkeno hatto assine Magano fonqolloonke. Insa giddonni gamisu Maganoho gungunteenna hunanno sokkaasinchi gudinonsana; ninkeno Maganoho gungummoonke.” (1 Qorontoosi 10:9, 10) Israeelete daga Museranna Aaroonira gunguntino; insa Maganu maalaletenni uyinonsa menna nafa mishshe Isira gunguntino. (Kiiro 16:41; 21:5) Yihowa insa gunguma foorretenni ajishe lainoni? Qullaawu Maxaafi gunguminoha batinye manna hamasu qase shiinota kulanno. (Kiiro 21:6) Hakkuyira albaanni 14,700 saꞌꞌannohu gunguminohu finqilu manni goofino. (Kiiro 16:49) Hakko daafira Yihowa qixxeessinonke qixxaawo minshe Yihowa fonqolloonke.
w06 7/15 15 guf. 7
‘Gunguntinoonte’
7 Israeelete akati lowo geeshsha soorramino! Umi qara Gibitsetenni fulansanna duumo baara tayisse saꞌe gatansa Yihowa faarsotenni guwisidhanno gede assitinonsa. (Fulo 15:1-21) Halallaho coyi injaa hooginsatanna Kanaꞌꞌaani manna waajjituti kayinni galattannore ikkansa agurte noonsarinni kassi yitannokkire ikkitino. Insa afidhino wolaphora Magano galata agurte, afiꞌra hasiissannonsa coye hoolinonsahu gede assite hedde iso bushiishshino. Gungumansa Yihowa assinonsarira galatu noonsakkita leellishshanno. Konnira Maganu togo yiino: “Kuni bushu manni mamari geeshsha anera gungumanni heeꞌranno? Tenne busha gururaꞌꞌansano macciishshoommo.”—Kiiro 14:27; 21:5.
it-2 719 guf. 4
Gururaꞌꞌa
Gunguma. Gunguma hexxo mudhinanninna wolqa baꞌnanni gede assitanno. Israeele Gibitsetenni fultuhunni shiima yanna gedensaanni Yihowara gunguntino; gunguntinohu Yihowa soqqamaanosi Musenna Aarooni widoonni aannonsa biddishsha mishsheeti. (Fu 16:2, 7) Insa gunguntinotera gedensaanni Muse lowo geeshsha hexxo mudhe reyo nafa halchino. (Ki 11:13-15) Gungumanno mancho tini ikkitosi lowo geeshsha gawajjitara dandiitanno. Yihowa Musera gungumi manni Isira finqilinohu gede asse laino. (Ki 14:26-30) Soꞌro xinqisiisiꞌrino daafira lowo manni goofino.
Maganu Qaalinni Ronseemmore
it-2 309
Menna
Xawishsha. “Mennaho yinanni sagale, dimbilaalete yinanni qimame guma labbanno, danisino waajjo haphaayyo gedeeho.” Happaayyo inqu yinanni shiilo labbannotenna xawaabba sayisa dandiitannote. Kunni menni “Intanni woyiteno zayitetenni liinsoonni timi gede” coommanno. Daanke woy udulle bullee assinihu gedensaanni ganfanni woy tima gaꞌninanni.—Fu 16:23, 31; Ki 11:7, 8.
BADHEESSA 22-28
MAGANU QAALI GIDDO NOOTA MUXXE JIRO | KIIRO 13-14
“Ammana Worbuulle Ikkineemmo Gede Assitannonkehu Hiittoonniiti?”
w06 10/1 16-17 guf. 5-6
Ammananna Magano Waajja Worbuulle Assitanno
5 Qotaanote giddonni lamu yaano Iyyaasunna Kaaleebi kayinni Hexxote Gobba eate lowo geeshsha quqquxantino. Insa Kanaꞌꞌaani “manna mittu qarri nookkiha qeelleemmo; . . . Kaaliiqi ledonke noo daafira magannansa shawwu yitinona waajjitinoonte” yitino. (Kiiro 14:9) Iyyaasunna Kaaleebi togo yitinohu mulla kaꞌeetini? Deeꞌni! Insa Israeelete daga ledo Yihowa wolqaataame Gibitsenna magannansa Tonnu Qoomaminni shollishino gara laꞌino. Qoleno Yihowa Feriooninna wolqaataame olantosi Duumu Baari giddo hunanna laꞌino. (Faarso 136:15) Hakko daafira tonne qotaanonna insa yitinore macciishshe waajji manni beebballa qece yiino. Yihowa tennera xissiisiꞌrinota coyiꞌranni, “Kuni manni . . . tenne maalale baala assanni heeꞌreennanni ammanannoekkihu mamari geeshshaati?” yiino.—Kiiro 14:11.
6 Yihowa konni manni qarri maatiro afino; insa waajjite qece yitinohu ammana ajjinonsa daafiraati. Ee, ammananna worbimma lowo xaadooshshe afidhino; konnira soqqamaasinchu Yohaannisi Kiristaanu songonna ayyaanaamittete oli daafira coyiꞌranni togo yee borreessino: “Tenne gobba [alame] qeeltannotino ammanankeeti.” (1 Yohaannisi 5:4) Xaa yannara Iyyaasunna Kaaleebite gedee ammana noonsahu lee miliyoone saꞌꞌannohu ajuno akkaluno, dhuka afiꞌrinohuno afiꞌrinokkihuno, Yihowa Farciꞌraasine ikkino manni Maganu Mangisteha dancha duduwo duduwanni no. Tenne bayiranna worba olanto sammi assa dandiino diini dino.—Roomu Sokka 8:31.
Maganu Qaalinni Ronseemmore
it-1 740
Maganu Israeelete Uyino Gobba
MAGANU Israeelete uyino gobba lowo geeshsha danchate. Muse Hexxote Gobba balaxe qotannonna boode laalcho abbanno gede soyino manni, roomaanetenna balasete laalo hattono woyinete laalo hunduruurro abbino; woyinete laalo lowota ikkitino daafira lamu manchi dawaayyichoho worte dukke abbitino! Qotaano ammana ajjinonsa daafira waajjitinoha ikkirono, “[baatto] adonna malawu woꞌminote” yitino.—Ki 13:23, 27.
“Ammanatenni Kaajjitine Uurre”
8 Maganu eino qaale wonshannota bashsho gede ammaneemmonso huluullameemmo? Lawishshaho, Maganu tenne busha alame hunara qaale eino. Ikkina tenne alamehu bacu boohaarshi hedonke bebbeehantanno gede asseenna Yihowa eino qaale huluullama hananfoommokka? Hatto ikkiro, goofimarchu gambise dayinota huluullammammora dandiineemmo. (Imb. 2:3) Hanni tenne wole lawishsha laꞌno. Maganu wodote kakkalo widoonni cubbonke gatona yaara qaale eino. Ikkollana alba loonsoommo soꞌro calla hendeemmoha ikkiro, Yihowa cubbonke baala ‘hayishshe hoolinota’ huluullammammora dandiineemmo. (Soq. 3:19) Hatto ikkiro, soqqanshonkenni hagiirre hoongammoranna ayyaanaamittetenni daafurrammora dandiineemmo.
9 Bashshoꞌya gede ikke Maganoho diinaggaawe soqqamanni noommo? Hawaariya Phaawuloosi Yihowara diinaggaawe soqqama, “woꞌmunni woꞌma adda ikkitino hexxo” jeefote geeshsha cuꞌmiꞌneemmo gede kaaꞌlitannonketa coyiꞌrino. Ikkina meessi hajo aana calla illachinsheemmoha, lawishshaho lowo damooza afiꞌnanniha kayinni Yihowara gari geeshsha soqqammeemmokki gede assannonke looso amandeemmohalla ikki? Hatto ikkiro ammananke shoshshoggitara dandiitanno; hattono ‘ceeꞌmaleeyye ikkinammora’ woy wolqanke assitu deerrinni Maganoho soqqammummokki gantammora dandiineemmo.—Ibi. 6:10-12.
10 Wolootu koffi assitannoe wote gatona yaa qarrissannoe? Mannu koffi assannonke woy baddalannonke wote, hanqine afiinke abbita coyiꞌnammora woy insa horonta coyishiisha gimbeemmoha ikkara dandaanno. Hatto ikka agurre gatona yineemmoha ikkiro kayinni, Yihowa ammaneemmota leellinsheemmo. Hiitto? Cubbinkenni kainohunni ninkera Yihowara baanteemmo asali noonkente gede, baddalannonke mannirano ninkera baattanno asali noonsa. (Luq. 11:4) Konni daafira, baddaltinonkere gatona yineemmoha ikkiro Magano addaxxinoommo yaate; korkaatuno konne assine afiꞌnannihu Maganu atooti baddalinonke manchi asalesi baaxxanno gede assatenni rooranno. Yesuusi hawaariyaate baddalino manna gatona yaate ammana hasiissannota huwattino. Yesuusi duucha hige baddalinonsa manna nafa gatona yaa hasiissannonsata kulinsata, insa “Ammana ledinke” yite huuccidhino.—Luq. 17:1-5.
11 Qullaawa Borro aana xintantino amaale uyinannie wote caaccaaweemmo? Uyinoonninke amaale kaaꞌlitannonke gara heda agurre amaalete giddo noota mite soꞌro woy amaale uyinke manchi xeꞌne xinqisiisiꞌneemmoha ikkara dandaanno. (Law. 19:20) Tini qolte, hedonke Maganu hedo ledo sumuu yitanno gede assiꞌneemmo faro gatte baꞌannonke gede assitara dandiitanno.
12 Songote giddo noori shoomantino roduuwira gungumeemmo? Isiraeele ammana noonsakkiri tonne qotaano haadhe dagginohu kaphu duduwi aana illachishshu yannara Musenna Aaroonira gunguma hanaffino. Hakkiinnino Yihowa Muse togo yee xaꞌmino: “Insa ane ammantannokkihu mamooti geeshshaati?” (Kir. 14:2-4, 11) Ee, Isiraeele gungumansa Musenna Aarooni shoomino Magano addaxxitannokkita leellishshannote. Hatteente gede, Maganu mannasi massagate horoonsiꞌranno roduuwira gungumate rosichi noonkeha ikkiro, tini isira noonke ammana shoshshoggitinota leellishanno malaate diꞌꞌikkino?
BADHEESSA 29–DOTTEESSA 4
MAGANU QAALI GIDDO NOOTA MUXXE JIRO | KIIRO 15-16
“Naaxxanna Quwa Saꞌine Kiꞌneneeto Addaxxa Qorophe”
w11 9/15 27 guf. 12
Yihowa Ate Afinohe?
12 Ikkollana, Israeele Hexxote Gobba eate hadhanni heedheenna, Qore Maganu qixxeessino qixxaawo xeꞌne noota ikkitinohu gede asse hedino. Hakkiinni daga massaggannori 250 manni Qorera halante coye woyyeessineemmo yite kaꞌino. Qorenna isira halantinori Yihowa insa ledo noohu gede assite heddinoti dihuluullissannote. Insa Musera togo yitino: “Kiꞌne quwa mayira saꞌinanni? Mannu baalunku qullaawaho. Kaaliiqi ninke ledono noowe.” (Kir. 16:1-3) Kuni manni insaneeto quwa sae addaxxinonna horo naaxxino! Muse, Yihowa ‘Isiha ikkinohu ayetiro badanno’ yiino. (Kiiro 16:5 nabbawi.) Layinki barra hawarro, Qorenna isira halante finqiltinori baalu gooffino.—Kir. 16:31-35.
w11 9/15 27 guf. 11
Yihowa Ate Afinohe?
11 Yihowa qixxaawonna biddishsha ayirrisate daafira Museranna Qorera noonsa lao lowo geeshsha babbaxxitinote. Insa assitinori Yihowa aye ledo nooro anfanni gede assino. Qore Qehaati ilama ikkino Leewaawichaati; isi lowo qoosso afiꞌrinoho, lawishshaho Israeelete daga Duumo Baara tayisse saꞌanna lainoha, Yihowa Siina Ilaalira finqiltino Israeelera yoo yii woyite kaaꞌlaminohanna gondooru taawoota bayichunni bayicho haaꞌre haꞌra kaaꞌlinoha ikkara dandaanno. (Ful. 32:26-29; Kir. 3:30, 31) Isi lowo diro Yihowara ammaname soqqaminoha ikkikki digatino; tini Israeelete manni ayirrisannosi gede assitino.
Maganu Qaalinni Ronseemmore
w98 9/1 20 guf. 1-2
Balaxa Hasiissanno Coye Balaxisiisse
Yihowa konne coye mulluri gede asse dilaino. Qullaawu Maxaafi “Hakkunni gedensaanni Kaaliiqi Musera, ‘Manchu reyona’” yiinota kulanno. (Kiiro 15:35) Yihowa manchu assinore mulluri gede asse lainokkihu mayiraati?
Mannu haqqe hiiqqiꞌratenna hasiisannonsare wolere yaano sagale, uddanonna galannowa afiꞌrate lee barra loosiꞌra dandaanno. Lamalki barri kayinni ayyaanaamittete coye calla assinanniho. Haqqe hiiqqiꞌra soꞌro ikka hooggurono Yihowa magansiꞌrate gaammoonni yanna konni loosira horoonsiꞌra soꞌrote. Kiristaanu Muse Seerinni galannoha ikka hoogirono, tini xagge ninkeno xaa yannara balaxa hasiissanno coye balaxisiisa hasiissannonketa dirosiissannonke?—Filiphisiyusi Sokka 1:10.
Sheexaanu Ledo Olantine Qeela Dandiitinanni!
5 Ninke uminke woy ninkewa gamba yaanno manni danchare assanno wote woy danchare afiꞌranno wote fenjeejjanke woy hagiidhanke gimbannire diafidhino. Hawaariya Phaawuloosi Teselonqe Kiristaanira togo yee borreessino: “Iillanni nooꞌne dartenna qarra dandiitine, jawaanteꞌnenna ammanaꞌne leellishshinoonni daafira ninke uminke Maganu songuwa mereero kiꞌnenni kainohunni fenjeejjine coyiꞌneemmo.” (2 Tes. 1:4) Konni daafira, wolootu danchare assitinohura hagiidha woy uminke assinoommorinni mito geeshsha fenjeejja busha ikka hooggara dandiitanno. Ilammoommo maate, budinke woy lophinoommo qooxeessi saalfanteemmo coye diꞌꞌikkino.—Soq. 21:39.
6 Ikkollana, naaxxa wolu manninna Yihowa ledo noonke aante huntara dandiitanno. Togoo naaxxa hasiissannonke amaale uyinanninke wote koffi yineemmo gedenna adha gimbeemmo gede assitankera dandiitanno. (Far. 141:5) Naaxxa “meessaneeto quwa saꞌne kaffi kaffi assate” woy “ani wole manna rooreemmo yee hedanno manni leellishannoho booꞌnate akataati.” Yihowa togoo naaxxa noonsare tiyyire giwanno. (Hiz. 33:28; Amo. 6:8) Ikkollana, Sheexaanu naaxxaleessa ikkino daafira mannu naaxxannonna booꞌnanno wote hagiidhanno. Lawishshaho Naamiruudi, Feriooni, hattono Abeseloomi booꞌni yannara Sheexaaneho kawoote lowo geeshsha tashshi yiinosi! (Kal. 10:8, 9; Ful. 5:1, 2; 2 Sam. 15:4-6) Qaaeelino Maganu ledo noosi fiixooma huꞌnanno gede assitinoti naaxxate. Isi lowo geeshsha naaxxino daafira Maganu umisi amaalinosi amaale diadhino. Mokkookke Yihowa seejjo lashshi asse agure cubbo loosino.—Kal. 4:6-8.
DOTTEESSA 5-11
MAGANU QAALI GIDDO NOOTA MUXXE JIRO | KIIRO 17-19
“Iqqikki Aneeti”
w11 9/15 13 guf. 9
Yihowa Iqqaꞌne Ikkanno Gede Assidhinanni?
9 Hanni baatto iqqinoonninsakki Leewaawoota hendo. Insa halaalu magansiꞌra balaxisiissanno daafira, hasiisannonsare afiꞌrate “Iqqikki aneeti” yee qaale einonsa Magano addaxxitanno. (Kir. 18:20) Ninke Kakkalaasinetenna Leewaawootu gede qullaawu mini giddo soqqammeemmoha ikka hoogirono, Yihowa hasiisannonkere wonshannonketa addaxxine, insa lawishsha harunsa dandiineemmo. Goofimarchu albinni roore gambisanni dayi kiiro, Maganu hasiisannonkere wonshate wolqa noosita addaxxanke lowo geeshsha hasiissannote.—Aju. 13:17.
w11 9/15 7 guf. 4
Iqqiꞌya Yihowaati
4 Leewaawootu konne looso ma garinni laꞌanno? Insa iqqa ikkitannonsa baatto diadhitino; hatteentenni Yihowa iqqansa ikkannonsata kulinonsa; insara taalle nookkita soqqanshote qoosso uyinoonninsa. Insara iqqinsa kakkalaasine ikkite Yihowara soqqamate. (Iya. 18:7) Kiiro 18:20te qooxeessira noo hedo insa hasiisannonsaha maalaamittete coye hooggannokkita leellishshanno. (Kiiro 18:19, 21, 24 nabbawi.) “Soqqantanno yannara daafurinsara ikkanno gede Israeele abbitannoha tonnunni mitto Leewaawootaho iqqa” assine uyinanni. Israeele laalchinsanninna lexxitanno saadansa giddonni xibbunni tonne anga Leewaawootaho uyitanno. Leewaawootu qolte uyinoonninsahu giddonni tonne anga “fila ikkinoha” kakkalaasine loossanno looso kaaꞌlate uyitanno. (Kir. 18:25-29) Qoleno Israeele Magano magansiꞌnanniwa abbitannoha “baxxino fushshaate baala” kakkalaasinete uyinanni. Kakkalaasine ikkite soqqantannori Yihowa hasiisannonsare wonshannonsata addaxxa dandiitanno.
Maganu Qaalinni Ronseemmore
g02 6/8 14 guf. 2
Maxine Muxxe Coyeeti
Maxine lowo yanna keeshshannorenna geedannore kulateno horoonsiꞌnanni. Hakko daafira Qullaawu Maxaafi giddo soorramannokki qaale “maxinete gondooro” yinoonni; qaale eino manni maxine worroonni sagale mitteenni ite eino qaale kaajjishanno. (Kiiro 18:19) Muse Seeri, kakkalote bayicho shiqinshanni kakkalora maxine wora hasiissannota kulanno; tini, kakkalo muso woy xeꞌne afidhinokkita ikkitinota leellishshanno.
Baalunkuri Noosi Maganira Maa Aa Dandiineemmo?
4 Yihowara uyineemmohu iso banxeemmo daafiraatinna assinonkerira galatateeti. Yihowa assinonkere baala hendeemmo wote dhagge assiꞌneemmo. Moote Daawiti, qullaawa mine mina hasiissannota kuli yannara, baalankare uyinonkehu Yihowa ikkinotanna uyineemmosiri baalu isiwiinni afiꞌnoommore ikkinota coyiꞌrino.—1 Duduwo 29:11-14 nabbawi.
5 Aa Yihowara shiqishiꞌneemmo magansiꞌra kifileeti. Soqqamaasinchu Yohaannisi ajuujatenni iima nooti Yihowa soqqamaasine togo yitanna macciishshino: “Mootichankenna Maganonke! Baalanka kalaqoottona, kalaqamanno gede assoottohunna, heeshsho oottohu ateetina, atera ayirrinyu, guweenyunna wolqa ikkitohe!” (Aju. 4:11) Noonke coyi giddo umo ikkinore Yihowara uyine iso ayirrisanna guwisiꞌra hasiissanno yiniro sumuu diyaatto? Yihowa Muse widoonni Israeele dirunni sase ayyaana ayirrissanno gede hajajinonsa. Insa hatte yannara Yihowara uyitannori no; konne ayyaana ayirrissanno wote “mulla anganni” isi albira shiqa dihasiissannonsa. (Mar. 16:16) Xaa yannarano baxillunni aa magansiꞌranke kifileeti; uyineemmoha ikkiro Yihowa assinonkerira iso galanteemmota leellinsheemmo, hattono Yihowa dirijjiteti uullayidi kifile loossanno looso kaaꞌlineemmo.
6 Aa ninkeneetirano kaaꞌlitannonke. Woꞌmanka wote adhineemmore calla ikkantenni baxillunni aano danchate. (Soqqamaasinete Looso 20:35 nabbawi.) Annisinna amasi mitore hidhi yee aannosi saante codhe insara mitore hire aanno qaaqqo heda dandiineemmo. Annisinna amasi konne aamamooshshe lowo geeshsha naadanno! Anninsanna amansa mine heedhe suwisaano ikkite soqqantanno wedelli, anninsanna amansa mitore hidhanno gede shiima woxe aara dandaanno. Annuwunna amuuwu oosonsa togo assitannonke yite heddannokkiha ikkirono, insa galattannore ikkitara hasidhanno daafira uyitannonsa aamamooshshe adhitanno. Yihowano, noonkeha muxxe coye isira aanke ninkeneetira kaaꞌlitannonketa afino.
DOTTEESSA 12-18
MAGANU QAALI GIDDO NOOTA MUXXE JIRO | KIIRO 20-21
“Fonqolo Ikkannori Iillannoꞌne Woyite Jooguulle Ikkaꞌne Leellishshe”
Yihowa Hagiidhanno Gede Jooguulle Ikke
19 Jooguulle ikkanke soꞌro loonseemmokki gede kaaꞌlitannonke. Hanni wirro Muse xagge laꞌno. Muse lowo diro jooga ikke Yihowa hagiirsiisino. Ikkollana, Israeele halalla hadhinoha 40 diro jeefissara rakke noo yannara, Muse joongille leellishikki gatino. Rodoosi reyiteenna Qaadeesi yinanniwa madaarrinku shiima yannalla saꞌino; Gibitsete gobbara heeshshosi gatissinoti ise ikkitukki digattino. Xa qole Israeelete daga hasiisannonkere diafiꞌnoommo yite wirro gunguma hanaffino. Insa agganno waa hooggino daafira, ‘Muse ledo giwantino.’ Yihowa Muse widoonni lowo maalale loosino; Museno umisi horo agure lowo diro Israeelete daga massaganni keeshshino; ikkollana Israeelete daga tenne baala affinoha ikkirono, gunguma diagurtino. Insa gunguntinohu waa hoogginohura calla ikkikkinni waa hoogganno gede assinohu Muse ikkinohu gede assite hedde isirano gunguntino.—Kir. 20: 1-5, 9-11.
Yihowa Hagiidhanno Gede Jooguulle Ikke
20 Muse lowo geeshsha hanqino daafira, albi gede joongille leellishikki gatino. Yihowa hajajinosi garinni kinchoho coyiꞌra agure, mannaho hanqino; hattono maalale loosinohu iso ikkinohu gede asse coyiꞌrino. Hakkiinni kincho lame hige ganita wayi dhoohe fulino. Naaxxanna hanqu shota ikkitinokki soꞌro loosanno gede assinosi. (Far. 106:32, 33) Muse joongille leellishikki gatino daafira, Hexxote Gobba eannota hoolloonnisi.—Kir. 20:12.
21 Tenne xaggenni lowore ronseemmo. Umihunni, jooguulle ikkine heeꞌrate woꞌmanka woyite sharrama hasiissannonke. Shiima yanna nafa deꞌnummoro, naaxxa giddonke mudheenna gara ikkinokkire coyiꞌnammora woy assinammora dandiineemmo. Layinkihunni, fonqolo ikkannori iillannonke woyite joongille leellisha roore qarra ikkitankera dandiitanno; konnira togoo coyi iillannonke woyiteno jooguulle ikkate sharrama hasiissannonke.
w09 9/1 19 guf. 5
Woꞌmanka Woyite Gara Ikkinore Assanno Daanya
Umihunni Maganu, Muse manna finqilaasinete yaannota agurina insa coyishiishanno gede nafa dihajajinosi. Layinkihunni Musenna Aarooni ayirrinye Maganoho uyitukkinni gattino. Maganu, “Qullaawa ikkaꞌya [diegensiissinoonni]” yiinonsa. (Kiiro 12) Muse, “Kiꞌnera waa uyinoꞌne?” yee waa maalaletenni fushshinohu Magano ikkikkinni isonna Aarooni ikkitinohu gede asse coyiꞌrino. Sayikkihunni, Yihowa insara yiino yoo hakkuyira albaanni mannaho yiino yoo ledo mittu garite. Yihowa hakkuyira albaanni heedhinota finqiltino ilama Kanaꞌꞌaani eꞌannota hoolinte gede Musenna Aaroonino hoolino. (Kiiro 14:22, 23) Shoolkihunni, Musenna Aarooni Israeelete daga massaggannoreeti. Lowo qoosso noonsari Maganu albaanni roore xaꞌmantanno.—Luqaasi 12:48.
Maganu Qaalinni Ronseemmore
Mannu Laanfe Laꞌinannihu Yihowa Laꞌꞌanno Garinniiti?
12 Tenne baalante yannara Yihowa Aarooni bayichonko qaxxaasa dandaanno. Isi kayinni Aarooni busha mancho ikkinokkita huwatino. Aarooni soꞌro loosinohu qarrisanno coyi giddora eino daafiraatinna wolootu xixxiibbinosihuraati. Ikkollana soꞌrosi ammanino, hattono Yihowa firde maahoyye yee adhino. (Ful. 32:26; Kir. 12:11; 20:23-27) Yihowa illachishinohu Aarooni ammananna maaro easi aanaati. Lowo diri sai gedensaannino, Aarooninna gaꞌresi qaangoonnihu Yihowara ammanantino soqqamaano ikkitino gede assineeti.—Far. 115:10-12; 135:19, 20.
g 1/15 9
Hanqo Eemadha Dandeemmohu Hiittoonniiti?
ASSA DANDAATTORE
Mixo fushshiꞌri. “Ani bashshonni togooho” yaantenni mito geeshshi yanna lawishshaho lee agana gaaꞌmite woyyeessiꞌrate woꞌnaali. Hattee yanna giddo woyyeessiꞌroottore borreessite amaxxi. Hanqokki eemadha qarra ikkitannohe yanna baalantera (1) kalaqaminori maatiro, (2) hakkawoyite ati ma assoottoro, (3) ma assoottoro woyyannohu bainoronna hatto yoottohu mayiraatiro borreessite amaxxi. Wole woyite togoori tuncu yaannohe yannara woyyanno yoottore assate mixo fushshiꞌri. Qiniinohere borreessite amaxxi. Ateneeto eemadhito gedensaanni macciishshantinoheta dancha hedo borreessite amaxxi.—Qullaawu Maxaafiha xintu seera: Qolasiyaasi Sokka 3:8.
Coyiꞌrate muddantooti. Mittu manchi woy mituri hanqisannohe woyite, dayinohere baala coyidhooti. Hattetennni taxxi yii. Hasiisannoha ikkiro foole tugge fooli. Eerikki yinannihu 15 diri beetti togo yiino: “Foole tuge foola, gedenaa gaabbeemmokki gede coyiꞌreemmore woy asseemmore balaxe hedeemmo gede kaaꞌlitannoe.”—Qullaawu Maxaafiha xintu seera: Lawishsha 21:23.
Heeshshi gotti assite hedi. Mito woyite hanqattohu ate xissiisinohe coye calla hedootto daafira ikkara dandaanno. Coye gura qiniite laꞌꞌate woꞌnaali. Jesika yinanni wedellitte togo yitino: “Mannu lowo bunshe assiro nafa, shiima geeshsha taxxi yine hendummoro mararreemmonsa gede assannonkeri dihooganno.”—Qullaawu Maxaafiha xintu seera: Lawishsha 19:11.
Hasiisannoha ikkiro, qooxeessunni agurte haꞌri. Qullaawu Maxaafi, “gibbo kaꞌukkinni coyiꞌransho aguri” yaanno. (Lawishsha 17:14) Kuni qummeeshshi kulannonte gede, gibbo kaꞌanno yannara mito woyite agurre haꞌra danchate. Hakko coye heddanni roore giiramantenni diinaggaabbe wolere loosi. Daaniyeli yinanniti wedellitte beetto togo yitino: “Ispoorte loosa yaachishannore hooꞌlatenna hanqo eemadhate kaaꞌlitinoe.”
Facci assite agura rosi. Qullaawu Maxaafi togo yaanno: “Hanqa hanqena, cubbolla loossinoonte; . . . wodaniꞌnenni sammi yitine malle.” (Faarso 4:4) Qummeeshshu kulannonte gede hanqa soꞌro diꞌꞌikkitino. Kayinnilla hakkiinni aane mayi ikkara dandaanno? Richaardi yinanni wedellichi togo yiino: “Wolootu assitannori hanqite fooggalatto gede assahera wodhittoro, insa wolqissannohe gede assidhanni nootto. Gikki yiino mancho ikkatenna coye lashshi assite agurate mayira diwoꞌnaalatto?” Hatto assattoha ikkiro hanqo eemadhattoha ikkatto ikkinnina hanqu diwolqisannohe.
DOTTEESSA 19-25
MAGANU QAALI GIDDO NOOTA MUXXE JIRO | KIIRO 22-24
“Yihowa Rumo Maassote Soorranno”
bt 53 guf. 5
“Yesuusiha Dancha Duduwo” Duduwa
5 Umi xibbi diri Kiristaaninte gede xaa yannarano Maganu mannira iillannonsa darti sabbakkannokki gede diassinonsa. Xagge leellishshannonte gede, duucha hinge Kiristaana usurre bayichunni bayicho woy mite gobbanni wole gobba haꞌranno gede assinoonni; tini wolu qooxeessira heeꞌranno manni Maganu Mangiste sokka macciishshanno gede assitino. Lawishshaho Layinkihu Alamete Oli yannara, Naazite usuru kaampera Yihowa Farciꞌraasine dancha gede farcidhino. Hakkiicho Yihowa Farciꞌraasine ledo xaadinohu mittu Yihudichi togo yiino: “Usuru mine noote Yihowa Farciꞌraasinera noonsa jawaante, ammanansa Qullaawa Borro aana xintantinota ikkitinota ammaneemmo gede assitinoe; konnira anino Yihowa Farciꞌraasincho ikkoommo.”
it-2 291
Macharaaro
Yihowa giwa macharaarate. Masaalaanchu Beleaami, Moaabi Moote Baalaaqiwiinni woxe adhara hede, gowwe Israeele rumate kaino; Yihowa kayinni assinori qinaannokki gede hoolino. Soqqamaasinchu Pheexiroosi Beleaami daafira togo yiino: “Coyiꞌra dandiitannokki harricho mannu qaalinni coyidhe himanaanchu macharaarre ittissino.” Soqqamaasinchu Pheexiroosi Beleaami macharaarre kulate, parafironiya yaannoha Giriikete Afii qaale horoonsiꞌrino; kuni qaali “macharaaraamu gede ikka” yitanno hedo sayisanno.—2Ph 2:15, 16; Ki 22:26-31.
Maganu Qaalinni Ronseemmore
w04 8/1 27 guf. 2
Kiirote Maxaafita Qara Qara Hedo
22:20-22—Yihowa Beleaami lowo geeshsha hanqinohu mayiraati? Yihowa masaalaanchu Beleaami Israeele ruma hasiissannosikkita kulinosi. (Kiiro 22:12) Ikkirono masaalaanchu Israeele rumate hede Baalaaqi manni ledo haꞌrino. Beleaami Moaabi moote hagiirsiisanna isiwiinni afansha adha hasiꞌrino. (2 Pheexiroosi 2:15, 16; Yihuda 11) Beleaami Israeele rumantenni maassiꞌranno gede hajanjoonnisiha ikkirono, moote hagiirsiisa hasiꞌrino daafira, Baꞌꞌaali magansiꞌranno meenti Israeelete labballo soꞌrisiisanno gede assinara amaalino. (Kiiro 31:15, 16) Konnira Maganu masaalaancho Beleaami lowo geeshsha hanqinohu quwa sae hafuurino daafiraati.
DOTTEESSA 26–ONKOLEESSA 2
MAGANU QAALI GIDDO NOOTA MUXXE JIRO | KIIRO 25-26
“Mittu Manchi Assannori Lowo Manna Kaaꞌlara Dandaanno?”
“Foorretewiinni Xooqqe!”
QULXUꞌME woshshaadanno manchi isi hasiꞌranno qulxuꞌme heedhanno base maranno. Manxaqqosira qulxuꞌme baxxannore wori gedensaanni wayi giddora tuganno. Hakkiinni cince agare, qulxuꞌme worinore ittanno woyite, manxaqqotenni amade goshooshe fushshanno.
2 Mannuno konni garinni woshshaadotenni amadamara dandaanno. Lawishshaho, hanni Israeele Hexxote Gobba ea rakke heedhe Moaabi Xawira dukkaꞌnite heedheenna ikkinore laꞌno. Moaabi gobba moote Baalaaqi, Beleaami yinanni manchira Israeele rumiro lowo woxe aasira qaale eino. Gedensaanni, Beleaami Israeele uminsara rumo abbidhanno gede assanno doogo qixxeessi. Isi woshshaado ikkannore doorino. Beleaami Israeelete labballo soꞌrisiisanno gede Moaabiha aja meento soyino.—Kiiro 22:1-7; 31:15, 16; Yohaannisi Ajuuja 2:14.
“Foorretewiinni Xooqqe!”
4 Kageeshshihu Israeelete manni Beleaami woshshaadonni amadaminohu mayiraati? Insa hakka woyite yortonsa wonshiꞌrate daafira calla heddino; qoleno Yihowa assinonsare baalankare habbino. Woleteemmero Israeele Maganoho hajajama hasiissannonsa; korkaatuno isi lowore assinonsa. Isi Gibitsete borojjimmanni fushshinonsa, halalla heedheenna itisinonsa, hattono Hexxote Gobba gamira keerunni iillishinonsa. (Ibiraawoota 3:12) Insa kayinni foorretenni dogantino. Soqqamaasinchu Phaawuloosi togo yee borreessino: “Insa giddonni gamisu ikkitunte gede, ninkeno foorrete cubbo loonsoonke.”—1 Qorontoosi 10:8.
Maganu Qaalinni Ronseemmore
it-1 359 guf. 1-2
Danna
Israeelete dagara baatto beenkoonnihu lamu seeri garinniiti: kunino hixa tungeetinna gaꞌrete batinye laꞌneeti. Hixa tungannihu mitte mittenti gaꞌre iqqa adhitanno raga murate calla ikkikki digatino; lawishshaho baatto adhitannohu aliyyeenni woy wodiidoonni, soojjaatoonni woy galchimaanni, hattono baaru qaccera woy ilaalu qooxeessira ikkinoronna teꞌee murrannihu hixunniiti. Hixu fulanno gede assannohu Yihowa ikkino daafira tini, mitte gaꞌre wole hinaassannokkinna heewo kaꞌannokki gede assitanno. (La 16:33) Konni garinni Maganu mitte mittenti gaꞌre iqqansa Yaiqoobi reyara kae heeꞌre Kalaqama 49:1-33 aana qullaawu ayyaaninni coyiꞌrino masaalo garinni adhitanno gede assino.
Mitte gaꞌre iqqansa adhitannohu hiikkaanniitiro hixunni murrihu gedensaanni, layinki seerinni yaano mitte gaꞌre batinye laꞌne mageeshshi baatto adha hasiissannonsaro murranni. Qullaawu Maxaafi togo yaanno: “Baatto gaꞌre gaꞌrentenni hixunni beeqqitine adhe. Kiiro haammattinorira halaꞌlishshine, kiiro ajjannorira kayinni ajishshine uuyye.” (Ki 33:54) Mitte gaꞌre iqqa adhitanno raga murrannihu hixunni ikkirono, adhituhu gedensaanni mito coye biddi assinara dandiinanni. Lawishshaho Yihudu gaꞌrera uyinoonni iqqi lowo geeshsha batiꞌrino daafira gama haaꞌne Simiooni gaꞌrera uyinoonni.—Iy 19:9.
w04 4/1 29
Nabbawaano Xaꞌmitanno Xaꞌmo
Kiiro 25:9 foorino daafira mitto barra reyino manni 24,000 ikkinota kultannoha ikkina 1 Qorontoosi 10:8 reyino manni kiiro 23,000 yitannohu mayiraati?
Konni lamunku qummeeshshira kulloonni kiiro babbaxxitanno gede assino korkaati duucha ikkara dandaanno. Gara ikkitino kiiro 23,000 nna 24,000 mereero noote; kiiro woꞌma assate mitte kiiro aaninni xeinsoonniha woy mitte kiiro aana lendoonniha ikkara dandaanno.
Hanni wole korkaata hendo. Soqqamaasinchu Phaawuloosi Shixiimi heedhino Israeele xagge qummi assinohu, Qorontoosi heeꞌranno Kiristaana qorowisiisateeti; kuni katami amanyootu maaeellenni battaawinoho. Isi togo yee borreessino: “Insa giddonni gamisu ikkitunte gede, ninkeno foorrete cubbo loonsoonke. Kunni coyinni insa giddonni mitto barra lemiina sasu kumi reyino.” Phaawuloosi foortino daafira Yihowa qoominori calla 23,000 ikkitinota coyiꞌrino.—1 Qorontoosi 10:8.
Ikkirono Kiiro fooliishsho 25 togo yitanno: “Israeele Fegoori gobba magano Baꞌꞌaali magansidhu. Kunni daafira Kaaliiqi lowo geeshsha hanqi.” Hakkiinni Yihowa Muse, ‘Roorrootansa shii’ yee hajajinosi. Hakkiinni Muse daanyootu tenne hajajo wonshitanno gede kulinonsa. Jeefote, Finihaasi Miidiyaami gaꞌre ikkitino beetto adhe dunkaana dayino Israeelaawicha bayichonkonni shiita, “Israeele gudanni noo qoomami” uurrino. Qummeeshshu jeefote “24,000 manni qoomamino” yaanno.—Kiiro 25:1-9.
Kiirote maxaafira kulloonni kiiro, daanyootu shitino roorrootanna Yihowa qoominoreno xaphi assite amaddinota ikkitukki digattino. Daanyootu shitino roorrooti kiiro mitto kume meddi yitara dandiitanno; tini xaphoomunni reyino manni kiiro 24,000 ikkitanno gede assitino. Kuri roorrooti woy finqille kakkayissinori, insa uminsa foortinoha, kaphu maganna ayyaanna ayirrissinoha, woy wolootaho fajjitinoha ikkono ikkano hoogo, ‘Fegoori gobba Magano Baꞌꞌaali magansidhino [“buusantino,” NW]’ daafira qorichinshoonninsa.
Mittu Qullaawa Maxaafa xawisanno maxaafi “buusama” yaanno qaali, “mittu manchi ledo quraanyama” yitanno tiro afiꞌrinota xawisino. Israeele heeshshonsa Yihowa calla magansiꞌrate sayisse uyitinore ikkiturono, insa kayinni ‘Fegoori gobba magani Baꞌꞌaali ledo buusantino;’ konni daafira Yihowa ledo noonsa jaalooma huꞌnitino. Yihowa 700 meddi yaano diri gedensaanni, masaalaanchu Hosei widoonni Israeelete daafira togo yee coyiꞌrino: “Baꞌꞌaali-Fegoori daggu woyite kayinni, Baꞌꞌaalira kumbuultino. Insano, hakkunni baxxannohu kaphu magani gede tiyyiꞌnannire ikkitino.” (Hoosei 9:10) Tenne assituri baalunkura Maganu qorichi hasiisannonsa. Konnira Muse Israeelete manna togo yee qorowisiisino: “Kaaliiqi . . . assinore illeꞌnenni laꞌinoonni. Maganiꞌne Kaaliiqi hakkiicho Baꞌꞌaali magansidhannore baala mereeriꞌnenni hunino.”—Marro 4:3.