Kiristaanu Heeshshonna Soqqanshote Xiinxallote Maxaafichora Qummi Assinoonni Borro—Bocaasa 2021
BOCAASA 1-7
MAGANU QAALI GIDDO NOOTA MUXXE JIRO | IYYAASU 18-19
“Yihowa Baatto Hayyotenni Beehino Gara”
it-1 359 guf. 1
Danna
Israeelete gaꞌrera baatto beenkoonnihu lamu garinniiti: hixunninna gaꞌre mageeshshitero laꞌneeti. Hixu mitte mittenti gaꞌre hiikkiido ragidhannoro leellishannoha calla ikkikki digatino; lawishshaho hixu mitte gaꞌre baatto aliyye widiido ragidhannoronna wodiidi widoonni ragidhannoro, woy soojjaati widiido ragidhannoronna galchimi widoonni ragidhannoro, woy xeichaame baatto ragidhannoronna ilaalaame baatto ragidhannoro leellishino. Hixa tunganni gede assinohu Yihowaati; konni garinni hixu Israeelete gaꞌre mereero hinaasonna gibbo heedhannokki gede kaaꞌlino. (La 16:33) Qoleno Maganu konni garinni, Yaiqoobi reyara kae heeꞌre Kalaqama 49:1-33 qullaawu ayyaaninni coyiꞌrino masaalo mitte mittente gaꞌrera woꞌmitanno gede coye qineessino.
it-1 1200 guf. 1
Ragge
Raggete baatto. Israeelete oosora ragidhanno baatto uyinohu Yihowaati; insa ragidhanno baatto mama marte qasidhannoro Musera kulinohuno isooti. (Ki 34:1-12; Iy 1:4) Gaadi oosora, Roobeeli oosora, hattono Minaase gaꞌre daratira baattote beehache uyinohu Museeti. (Ki 32:33; Iy 14:3) Wole gaꞌrera kayinni Iyyaasunna Aliaazaari ragge hixunni beekkinonsa. (Iy 14:1, 2) Yaiqoobi Kalaqama 49:5, 7 aana coyiꞌrino masaalo garinni, Simiooninna Leewi gaꞌrera addinni uyinoonni ragge dino. Simiooni gaꞌrera baatto (katammano mitteenni) uyinoonnihu Yihudu gaꞌre iqqi mereerooti (Iy 19:1-9); Leewi gaꞌrera kayinni, Israeelete gobbara addi addi bayicho heedhannota 48 katamma uyinoonninsa. Leewaawoota xaadooshshu dunkaanira qullaawa soqqansho soqqantara shoommoonni daafira, iqqinsa Yihowa ikkinota kulloonninsa. Insa soqqantanno soqqanshora tonnunni mitto (asaraate) qeechansa woy raggensa assine uyinanninsa. (Ki 18:20, 21; 35:6, 7) Mitte gaꞌre giddo noote addi addi maatera, hattee gaꞌre iqqa beenkanni. Maatete kiiro lexxitanna labballu ooso iqqansa adhitanno woyite, baattonsa ledde ledde ajjanni hadhanno.
it-1 359 guf. 2
Danna
Hixa tunge mitte gaꞌre baatto hiikkiido ragidhannoro anfihu gedensaanni, gaꞌre mageeshshitero laꞌne, hatti gaꞌre ragidhanno baatto mageeshshita ikka hasiissannosero murranni. “Baatto gaꞌre gaꞌrentenni hixunni beeqqitine adhe. Kiiro haammattinorira halaꞌlishshine, kiiro ajjannorira kayinni ajishshine uuyye.” (Ki 33:54) Mitte gaꞌre hiikkiido ragidhannoro hixunni kullinsahu gedensaanni, hakko bayichinni dikayinsanninsa; kayinni gaꞌrensa geeshsha laꞌne, raggensa lendara woy ajinshara dandiinanni. Konnira, Yihudu gaꞌre adhitino ragge hasiisannonsahura aleenni ikkitinohura gama Simiooni gaꞌrera beenke ajinshoonni.—Iy 19:9.
Maganu Qaalinni Ronseemmore
it-1 359 guf. 5
Danna
Yordaanoosi Wayira galchimaanni noo baatto beenkoonni gara kultanno xagge leellishshannonte gede, umo Yihudu gaꞌrera (Iy 15:1-63), Yooseefi (Efireemi) oosora (Iy 16:1-10), hattono Minaase gaꞌre daratira (Iy 17:1-13) Yordaanoosira galchimaanni baattonsa danna kulle, katammano kiirre iqqa uyinoonninsa. Hakkuyi gedensaanni, baatto beeha agurrikki digantoonni; mayira yiniro, Israeelete kaampe Galgalunni Seelo massinoonnita xawinsoonni. (Iy 14:6; 18:1) Israeele hakkiicho mageeshshi yanna keeshshitinoro kulloonnikkiha ikkirono, Iyyaasu gattinoti lamala gaꞌre gattino baatto ragidhukki keeshshitinohura hanqe coyiꞌrino. (Iy 18:2, 3) Tini lamala gaꞌre baatto ragiꞌra keeshshitanno gede assinonsahu bacu korkaati noota xawinsoonni; mite xiinxallaano yitanno gara ikkiro, Israeele gobba horritu woyite lowore gudhitino daafira, hattono gawajjansara dandaannohu Kanaani manni qooxeessaho nookki daafira tini lamala gaꞌre gattino baatto amadate hakkeya muddama dihasiissanno yite heddino. Insa wolqaataamma diinnansa ledo olama waajjitinoha ikkara dandaanno; tinino baatto ragidhukki keeshshitanno gede assitinonsaha ikkara dandaanno. (Iy 13:1-7) Qoleno, kageeshsha beenkoonninsa baatto hendiro, Hexxote Gobbara Yordaanoosi Wayira galchimaanni noo baatto daafira garire affinokkiha ikkara dandaanno.
BOCAASA 8-14
MAGANU QAALI GIDDO NOOTA MUXXE JIRO | IYYAASU 20-22
“Coye Buunxikki Assinoonnire Kultanno Xaggenni Ronseemmore”
w06 4/15 5 guf. 3
Galtekki Ledo Hasaawate Kaaꞌlitannohe Amaale
Noore fanne hasaawa, coyi kawa kaꞌaa higannota hoolatenna wolootu heddinokkire hendeemmokki gede kaaꞌlitanno. Hunda Israeelete waro Yordaanoosi Lagira soojjaatoonni heedhannori Roobeeli gaꞌre, Gaadi gaꞌre, hattono Minaase gaꞌre darati Yordaanoosi mule “maalaꞌlinanniha lowoha kakkalote darga” seekkidhino. Wole gaꞌre kayinni insa heddinokkire heddino. Galchimi widoonni noo gaꞌre Yordaanoosira widoonni noo roduuwinsa Magano kaaddino yite heddino daafira, insa ledo olamate qixxaabbu. Ikkollana insa olaho fultara albaanni, soojjaatoonni noo roduuwansa hasaawisate manna sokku. Hatto assansa hayyote! Insa hakku kakkalote dargi, shilqote kakkalo woy wole kakkalo shiqishate hende qixxeessinoonniha ikkinokkita huwattu. Hatteentenni, soojjaatoonni noo gaꞌre albillitte wole gaꞌre, “Kiꞌnera Israeelete Magani Kaaliiqi ledo mayi xaadi nooꞌne?” yitannonke yite waajjitino. Hakko daafira, kuni kakkalote dargi insano Yihowa magansidhannore ikkitinota leellishanno malaateeti. (Iyyaasu 22:10-29) Konni kakkalote dargira suꞌma Malaate yite fushshitino; hatto yitinohu hakku kakkalote dargi Yihowa insara halaalaancho Magano ikkinota leellishanno malaate ikkinohura ikkikki digatino.—Iyyaasu 22:34.
w08 11/15 18 guf. 5
“Mannu Ledo Keere Heeꞌnanni Gara . . . Haꞌrate Diinaggaambo”
Mitu Israeelete manni, ‘Cubbo loonsoonnita leellishshanno taje noonke daafira, hedeweelcho marre qansummoro ninke manni hakkeya digawajjamanno’ yee hedinoha ikkara dandaanno. Ikkollana, Yordaanoosira galchimaanni noo gaꞌre muddante olaho fulantenni, kalaqamino qarri daafira roduuwinsa ledo hasaawate manna sokkino. Insa togo yite xaꞌmitino: “Kaaliiqi aana busha assitinoonni; hoodesino dihadhinoonni; kunni garinni Israeelete Magani aana konne busha coye mayira assitini?” Kakkalote darga seekkitu gaꞌre kayinni konne assitinohu bunshe hedde diꞌꞌikkino. Ikkina, bunshe assitinoonni yitunsa gaꞌrera insa mayite qolta ikka? Hanqite boolaqidha ikka? Woy insara morkite gibba ikka? Beebba bushiinshi gaꞌre awu afiinni qoltino; qoleno kakkalote darga seekkidhinohu Yihowara soqqama hasidhino daafira ikkinota xawisse kultino. Insa konni garinni qolansa Yihowa ledo noonsa jaaloomi baꞌꞌannokki gede assitino; hattono shoonna reyo gatissino. Wodanaaꞌme hasaawansa kawa kaꞌaa higino coye tiratenna keeru kalaqamanno gede assate kaaꞌlitino.—Iya. 22:13-34.
Maganu Qaalinni Ronseemmore
it-1 402 guf. 3
Kanaani
Israeele gobba horritu woyite batinyu Kanaani manni gargadhe gatinoha ikkirono, Yihowa “akaakkansara aara xaarinonsa baatto baala, Israeelootaho” uyinonsa, “baatto baalate keere” uyinonsa, hattono Yihowa “Israeelete mannira uyinoha mitto mittonka hexxote qaale wonshinonsa” yaa dandiinanni. (Iy 21:43-45) Israeelete qooxeessira noo diinna baalanti waajjite huxidhino daafira, Israeele yaaddanno gede assannori dino. Maganu, baatto hedeweelcho onteenna moyichu batiꞌrannokki gede Kanaani daga “shiimu shiimunni” fushshe gudeemmo yiino. (Fu 23:29, 30; Mar 7:22) Kanaani dagara shaaꞌꞌa ikkinokkihu olu uduunni lawishshaho siwiilu faradi gaare noonsaha ikkirono, Israeele mito qooxeessa amada hoogginohu Yihowa qaalesi wonsha hoogino daafira diꞌꞌikkino. (Iy 17:16-18; Ej 4:13) Hatteentenni, Qullaawu Maxaafi xagge kultannonte gede, Israeele mito bayicho qeelantinohu insa uminsa ammanama hoogansanniiti.—Ki 14:44, 45; Iy 7:1-12.
BOCAASA 15-21
MAGANU QAALI GIDDO NOOTA MUXXE JIRO | IYYAASU 23-24
“Iyyaasu Israeelete Daga Jeefote Amaalino Amaale”
it-1 75
Namooma
Israeelete daga Hexxote Gobba yaano Kanaani eꞌinohu kayinni konni garinni diꞌꞌikkino. Woꞌmunkura Aliidi Magani, akaakkansara eino qaali garinni hattee baatto Israeelete gudise uyinonsa. Hakko daafira, insa hatte gobba eꞌinohu manni gobba manni gede ikkite diꞌꞌikkino; qoleno Yihowa insa hatte gobbara heedhannori Magano affinokki daga ledo namoontannokki gede kulinonsa. (Fu 23:31-33; 34:11-16) Israeelete daga Maganu seerinninna wodhonni gala hasiissannonsa ikkinnina, albinsanni shorrinanni daga woga harunsa dihasiissannonsa. (Le 18:3, 4; 20:22-24) Roorenkanni, insa hattee daga ledo adhantannokki gede qorowisiinsoonninsa. Konni garinni namooꞌmituro, Magano afinokki meenti ledo calla ikkikkinni Magano afinokki fiixinsa ledo, hattono kaphu ammaꞌnonsanna budinsa ledo quraanyantanno; tini qolte kaadaasine ikkitanno gede assitannonsa hattono woshshaado ikkitannonsa.—Mar 7:2-4; Fu 34:16; Iy 23:12, 13.
w07 11/1 26 guf. 19-20
Yihowa Coyiꞌrino Qaali Woꞌmikki Digatanno
19 Addanko, ninkeno illenkenni laꞌnoommori togo yineemmo gede assannonke: “Maganiꞌne Kaaliiqi uyinoꞌne hexxo garinni assinoꞌneha dancha coye baalanka kiꞌne mittu mittunku godowiꞌnenni seekkitine egentinoonni; isi uyinoꞌne hexxo giddonni mitteno gattukkinni baalanti [woꞌmitino].” (Iyyaasu 23:14) Yihowa soqqamaasinesi gatisanno, agaranno, hattono towaatanno. Yihowa coyiꞌreenna yannasira woꞌmikki gatino qaali nooni? Horonta dino! Hakko daafira, Maganu Qaale addaxxanke hayyote.
20 Albillittena? Yihowa ninke giddo rooru mannira, gannate ikkitinote biifado baattora heeꞌneemmo gede hexxo uyinonke. Ninke giddo boodu mannira kayinni gordoho Kiristoosi ledo moohate hexxo noonsa. Hexxonke ikkitutano ikkituro, Iyyaasu gede ammanamme heeꞌneemmo gede assannonke korkaati noonke. Hexxonke woꞌmitanno yanna dagganno. Hatte yannara, Yihowa uyinonke hexxo baalanta hende, ninkeno ‘Isi uyinonke hexxo giddonni mitteno gattukkinni woꞌmitino’ yineemmo.
Maganu Qaalinni Ronseemmore
w04 12/1 12 guf. 1
Iyyaasu Maxaafita Luphi Yitino Hedo
24:2—Abirihaami anni Taara kaphu maganna magansiꞌrannoho? Taara umi qara, Magano Yihowa magansiꞌrannoha diꞌꞌikkino. Isi Uuri gobbara batinyu manni assannonte gede, agana magansiꞌrannoha ikkikki digatino; hatte gobbara konne magano Siini yinanni. Ayihudete xagge kultanno garinni, isi kaphu maganna seekkannoha nafa ikkikki digatino. Ikkollana, Abirihaami Maganu fuli yeenna Uurinni fuli woyite, Taara ledosi Kaaraani haꞌrino.—Kalaqama 11:31.
BOCAASA 22-28
MAGANU QAALI GIDDO NOOTA MUXXE JIRO | EJJEETTO 1-3
“Worbimmanna Hayyo Leellishshanno Xagge”
w04 3/15 31 guf. 3
Naoodi Gadadisanno Diini Qambara Hiiqqino
Naoodira hedinori qiniinosihu, isi busule ikkino daafira woy diinu shashino daafira diꞌꞌikkino. Maganu hedo woꞌmitannohu mannu wolqanni diꞌꞌikkino. Naoodira qinaannosi gede kaaꞌlinosihu qaru coyi, Maganu irkooti; isi Maganu mannasi wolassate hedino hedo ledo sumuu yaannore assino. Mannasi kaaꞌlanno gede Naoodi kayisinohu Maganoho; ‘Kaaliiqi [mannisira] albisannoha kayisinsa kiironni, hakku albisira Kaaliiqi ledosi ikkanno.’—Ejjeetto 2:18; 3:15.
w04 3/15 30 guf. 1-3
Naoodi Gadadisanno Diini Qambara Hiiqqino
Naoodi balaxe ‘bise tunsiisiꞌrino’; tunsiisiꞌrino bise lamu qaritenna uddiꞌrino uddanora giddoonni maaxiꞌrate haraꞌmite injiitinote. Isi fattanshayie yee hedinoha ikkara dandaanno. Qiniiti anganni fushshiꞌrate injaanno daafira, roore anga bise qodhinannihu gurachu midaadiraati. Naoodi guracho ikkino daafira, bisesi “uddanosi giddoonni qiniitichu tafira [qodhino]”; mootete agaraasine hakkiido hakkeya geya laꞌꞌa hooggara dandiitanno. Hakko daafira, mittuno huluullamisikkinni giwire “Moaabi mootera Egiloonira haaꞌre haꞌri.”—Ejjeetto 3:16, 17.
Naoodi Egilooni noowa mootete minira umo ei woyite ikkinore Qullaawu Maxaafi tittire dikulanno. Qullaawu Maxaafi “Naoodino giwire uyihu gedensaanni, giwire duhe marino manna haꞌranno gede assi” calla yaanno. (Ejjeetto 3:18) Naoodi giwire oye kae, giwire duhe dayino manna Egilooni qaenni xeertise geegiissihu gedensaanni, galagale higino. Mayira? Isi konne manna anga adhe dayinohu gawajjotenni agarannosi gedeeti? Woy mootete minira marranni woyite hatto assinanni daafiraatinso, kuni manni giwire duhanno gede callaati? Insa balaxe haꞌrisinohu isi hedinore assanno woyite insa mite ikkitannokki gedeeti? Isi hedinori ikkire ikkirono, mittoreno waajjikki callisi agure higino.
“[Naoodi] Galgala Kinna boncanniwa iillihu gedensaanni galagale hige mootenniwa mare, ‘Moote, maaxe kuleemmoheri heeꞌreenna galagale higoommo’ yiisi.” Isi Egilooni noowa wirro hiitto ikke ea dandiinoro Qullaawa Borro giddo dikulloonni. Agaraasine ‘Isi wirro mayira higinokka?’ yite huluullantinokkihu mayiraati? Insa ‘Mittichu Israeelichi mootenke ma asse afanno?’ yite heddinokka? Naoodi callisi higino daafira, insa isi mannasi kaade ninkewa higanni no yite heddinokka? Ikkihano ikkiro, Naoodi moote callisi noowa hasaawisa hasiꞌrino; hasattosino woꞌmitino.—Ejjeetto 3:19.
Maganu Qaalinni Ronseemmore
w05 1/15 24 guf. 7
Ejjeettote Maxaafita Luphi Yitino Hedo
2:10-12. Yihowa ‘galata woy assinore hambeemmokki gede,’ Qullaawa Maxaafa ganyine xiinxallineemmo pirogiraame fushshiꞌra hasiissannonke. (Faarso 103:2) Annuwunna amuuwu Maganu Qaali halaali oosonsa wodanira qaꞌmanno gede assa hasiissannonsa.—Marro 6:6-9.
BOCAASA 29–SADAASA 5
MAGANU QAALI GIDDO NOOTA MUXXE JIRO | EJJEETTO 4-5
“Yihowa Lame Meenti Widoonni Mannasi Gatisino”
“Israeelete Ama Ikke Kaꞌꞌamma Geeshsha”
Sisaara suꞌma gannanni woyite nafa Israeelete gobbara mannu waajje qece yaanno. Kanaani daga budinna magannansa magansidhanno woyite assitannori mararro nookkireeti; insa oosonsa kakkalo assite shiqishshanno, hattono magansidhanno galmira foortanno. Kanaani gobbahu olantote roorrichinna olantosi gobbate annatte noo yannara, mannu mageeshsha qarraminokka? Diboora faarsitino faarso leellishshannonte gede, mannu bayichunni bayicho hasiꞌri gede dihaꞌranno; dooggano ontino. (Ejjeetto 5:6, 7) Mannu huxxu nookki qachuwara heeꞌranna baatto loosiꞌra waajje, cittate giddonna goddate maaxaminoha ikkara dandaanno; qoleno insa gawajjinanninke, oosonke qafande adhinanni hattono meentonke giddeessine bushiinshanni yee waajje doogo fulikki heeꞌrannota heda dandiineemmo.
“Israeelete Ama Ikke Kaꞌꞌamma Geeshsha”
Yihowa mokkookku mannisi heeshshonsa biddi assiꞌrate qixxaawino yee heda geeshsha, woy Dibooranna Baaraaqi qullaawu ayyaaninni faarsino faarso kultannonte gede, Diboora ‘Israeelete ama ikkite kaꞌa geeshsha’ mannu 20 diro waajje shabbaramanni heeꞌrino. Lefidooti yinanni manchi galte Diboora, oosote ama ikkasenna teꞌee dianfoommo; ikkollana kowiicho “Israeelete ama” yinoonnihu lawishshu yaattonniiti. Yihowa Diboora kayisinohu mannasi amate gede ikkite agartanno gedeeti. Yihowa ise, jawaata ammana noosiha Baaraaqi woshshite Sisaara ledo olamanno gede biddishsha uyitasira soyinose.—Ejjeetto 4:3, 6, 7; 5:7.
“Israeelete Ama Ikke Kaꞌꞌamma Geeshsha”
Iyaeeli maa assitannoro rakke heda hasiissinose. Ise Sisaara dunkaanise giddora eꞌꞌe fooliishshiꞌranno gede kultusi. Sisaara, mannu iso hasanni dayiro isi hakko noota mittohono kultannokki gede hajajise. Iyaeeli isi goxita uddano dibbe maaxxusi; hakkiinni waa uyie yiita, ado uyitusi. Hakkiinni Sisaara natare goxi. Tenne Iyaeeli, hakkawaro dunkaanaho galanno meenti woꞌmanka woyite horoonsiꞌrannoha lame uduunnicho yaano dunkaanu cifichonna meencho haadhu. Hakkiinni Sisaarawa umaalloonni higge shiqqi yitu; ise xa Yihowa yoo wonshate waajjishanno coye assitaraati. Hakkawoyite shiima geeshsha huluullama woy hobbi ruxxi yaa nafa lowore daaffara dandiitanno. Ise hakkawoye Maganu manni qarranna kuni manchi lowo diro insa gadadisino gara heddinokka? Woy Yihowa wido ikka lowo qoosso ikkitinota heddinokka? Qullaawu Maxaafi tenne teꞌenne diyaanno. Ikkirono ise heddinore bayichonko assitino. Sisaara shitino!—Ejjeetto 4:18-21; 5:24-27.
Maganu Qaalinni Ronseemmore
w05 1/15 25 guf. 5
Ejjeettote Maxaafita Luphi Yitino Hedo
5:20—Gordoho noo beeddahe Baaraaqira kaaꞌlite olantinohu hiittoonniiti? Tini yaatto sokkaasine Baaraaqi kaaꞌlitinota, iiminni jajjabba kinna xeenimma dirritinota (Sisaara hayyoole tenne busha daggannota leellishanno malaateeti yitanno), woy Sisaara ayyaanto beeddahe laꞌe masaaltinori kapho ikke gatinota leellishshannota ikkasenna hoogase Qullaawu Maxaafi bade dikulanno. Ikkirono, Maganu mereero eꞌꞌe Baaraaqira kaaꞌlinoti dihuluullissannote.
SOQQANSHOTE DANDOOKKI WOYYEESSIꞌRI
w06 3/1 28-29
Nabbawaano Xaꞌmitanno Xaꞌmo
Soqqamaasinchu Phaawuloosi meentu songote giddo “sammi yoona” yaasi mayyaate?
Phaawuloosi Qorontoosi noote Kiristaanu songora togo yee sokka borreessino: “Keeraanote xaadiwa baala ikkannonte gede, meentu beetekiristaannate sammi yoona. Seeru yaannonte gede, meentu hajajamanno gede ikkinnina coyiꞌrara difajjinoonni.” (1 Qorontoosi 14:33, 34) Tenne hedo garunni huwatate, Phaawuloosi borreessino amaalera qooxeessaho noo hedo xiinxalla kaaꞌlitannonke.
Phaawuloosi 1 Qorontoosi fooliishsho 14te, Kiristaanu songo gambooshshi ledo xaadooshshe afidhino hajo daafira borreessino. Isi togoo gambooshshiwa maa hasaawa hasiissannoronna gambooshshe ma garinni massaga hasiissannoro borreessino. (1 Qorontoosi 14:1-6, 26-34) Qoleno Phaawuloosi, Kiristaanu gamba yaannohu songo “dhaawantanno gede” ikkinota luphi asse kulino.—1 Qorontoosi 14:4, 5, 12, 26.
Phaawuloosi 1 Qorontoosi fooliishsho 14 giddo sase bayicho “sammi yoona” yee borreessino. Isi sasenka bayicho sammi yoona yiinohu addi addiha songote miila ikkirono, amaalino korkaati kayinni mittoho; hakkuno, “baalunku coyi seerunninna amanyootunni” ikkanno gedeeti.—1 Qorontoosi 14:40.
Umihunni, Phaawuloosi togo yiino: “Haaru afiinni coyidhannori heedhuro, lamu woy batiꞌriro sasu bado bado coyidhona; insa coyidhannoha wolu kayinni tirona. Tirannohu hoogiro kayinni, haaru afiinni coyiꞌrannohu beetekiristaanete giddo sammi yee, umisiranna Maganoho calla coyiꞌrona.” (1 Qorontoosi 14:27, 28) Hatto yaa kayinni, kuni manchi gambooshshunniwa horonta dicoyiꞌranno yaa diꞌꞌikkino; hatteentenni, sammi yaa hasiissannosi yanna no yaate. Qoleno, aleenni laꞌnummonte gede Kiristaanu gamba yaannohu mimmito dhaawateeti; kayinni kuni manchi wolootu affinokki qaale coyiꞌrannoha ikkiro, coyiꞌrannori songo dhaawara didandaanno.
Layinkihunni, Phaawuloosi togo yiino: “Maganu sokka kultannori lame woy sase ikkite coyidhona; insa coyidhuha, macciishshanno manni hiince laona. Xaadunniwa noo manchira goꞌlino coyi leellisiro, balaxe coyiꞌranni noohu sammi yoona.” Hatto yaa kayinni, balaxe coyiꞌranni noo masaalaanchi gambooshshunniwa coyiꞌra qorophanno yaa diꞌꞌikkino; hatteentenni, mito woyite sammi yaa hasiissannosi yaate. Hakkiinni, goꞌlino coyi leellinosi manchi songote coyiꞌranno; konni garinni gambooshshunniwa noohu ‘duuchunku jawaata’ dandaanno.—1 Qorontoosi 14:26, 29-31.
Sayikkihunni, Phaawuloosi Kiristaana ikkino meento bade amaalino; togo yiino: “Meentu beetekiristaannate sammi yoona. Seeru yaannonte gede, meentu hajajamanno gede ikkinnina coyiꞌrara difajjinoonni.” (1 Qorontoosi 14:34) Phaawuloosi meento togo yee hajajinohu mayiraati? Songote giddo amanyootu heeꞌranno gedeeti. Isi togo yiino: “Afara hasiꞌranno coyi heeꞌriro, mine galtensa xaꞌmona. Meyati beetekiristaanete giddo coyiꞌra seerimalete.”—1 Qorontoosi 14:35.
Hakkawaro miteekke mitu meya roduuwi, songote giddo rosiinsanni woyite hettisannoha ikkara dandaanno. Phaawuloosi borreessino amaale, meya roduuwi togoohu bushu amanyootiwiinni xeertiꞌre, hattono umonsa heeshshi asse Yihowa qixxeessinota umimmate silxaane hakko iso minaanninsa silxaane ayirrisanno gede kaaꞌlitannonsa. (1 Qorontoosi 11:3) Qoleno meentu sammi yaannoha ikkiro, songote giddo rosiisaano ikkate halcho noonsakkita leellishanno. Phaawuloosi Ximootewoosira sokka borreessi woyite, meentu rosiisaano ikka hasiissannonsakkita xawisino; togo yee borreessino: “Meyati gaꞌlabbi yito; rosiissara woy labbaahu aana mookkara difajjeemmo.”—1 Ximootewoosi 2:12.
Hatto yaa meya roduuwi songote gambooshshi yannara horonta dicoyiꞌranno yaate? Hatto yaa diꞌꞌikkitino. Phaawuloosi waro, meya roduuwi qullaawu ayyaani kakkayiseennansa huuccatto assino woy masaalo coyiꞌrino woyiti no. Insa hatto assanno woyite umonsa gugguꞌlanno;a konni garinni, bayichonsa afinore ikkinota leellishanno. (1 Qorontoosi 11:5) Qoleno, Phaawuloosi yannarano ikko yannankera, meya roduuwi labballu roduuwi ledo hexxonsa faajjete coyiꞌranno gede jawaachinshoonni. (Ibiraawoota 10:23-25) Meya roduuwi qanchu soqqansho fulannotano agurranna, songote gambooshshiwa dawaro qolara koyinsanninsa woyite dancha dawaro qole, hattono loonse leellinshanni ikkitonna rosaanote kifilla shiqishe hexxonsa faajjete duduwanno hattono woloota jawaachishanno.
Konni daafira, meya roduuwi labballu bayicho adhe songo rosiisate diwoꞌnaalanno; konni garinni ‘sammi yaanno.’ Qoleno insa heewo kayissanno xaꞌmo xaꞌmanni songo rosiisate silxaane noonsare dihettisanno. Meya roduuwi songote giddo noonsa qeecha garunni wonshannoha ikkiro, keeru heeꞌranno gedenna songote gambooshshiwa ‘baalunkuri dhaawannoha ikkanno’ gede lowore kaaꞌlanno.—1 Qorontoosi 14:26, 33.
SADAASA 6-12
MAGANU QAALI GIDDO NOOTA MUXXE JIRO | EJJEETTO 6-7
“Noohe Wolqanni Haꞌri!”
w02 2/15 6-7
Maganunnihu Xintu Seeri Kaaꞌlannohe
Hundi Ibiraawootira albisa ikkinohu Gedewooni, laanfesinna jawaantesi afinohonna umisira quwa saꞌinokki lao noosi manchooti. Isi Israeelete gashshaancho ikkate dihedino. Ikkollana, Gedewooni Maganu gashshaancho ikkara doorisi woyite, ani ikkado diꞌꞌikkoommo yiino. Isi togo yiino: “Mootichaꞌya, ayiddiꞌya Minaase gaꞌre giddo hooffayidiho. Ani qole mininke giddo woꞌmunkura woriidiho.”—Ejjeetto 6:12-16.
w05 7/15 16 guf. 3
“Bagadinkenni Kaaliiqiranna Gedewoonira Olammeemmo!”
Xa Midiyaamootu masse qece yitino! Sase xibbe maaqquwa hiiqqinita, 300 xurumba ufuunfita, hattono 300 manni adawadhanni cancita, gobba luulo ikkitu. Midiyaamootu hakko iso mannu “Bagadinkenni Kaaliiqiranna Gedewoonira olammeemmo!” yaanni koocanna macciishshite lowo geeshsha massino daafira, insano raaranna kooca hanaffu. Ragu bainonsa daafira, insa jaalansanna baarigaaransa bada didandiitino. Sasu xibbi manni noowa heeꞌreennanni, Maganu diinna uminsa bagadinni mimmito guddanno gede assino. Hakkiinni Israeelete manni diinu olanto masse xooqqanno gede asse, fultanno doogo cufe, hattono xooqqinore shorre amadenna shee Midiyaamootu higgeno higgannokki gede assino. Konni garinni lowo diro keeshshinoha kadote gashshoote aaninsanni hooꞌlitino.—Ejjeetto 7:19-25; 8:10-12, 28.
Maganu Qaalinni Ronseemmore
w05 1/15 26 guf. 6
Ejjeettote Maxaafita Luphi Yitino Hedo
6:25-27. Gedewooni gibbannosire doogimale hanqisannokki gede, assannore wodanchatenni assino. Ninkeno dancha duduwo dudumbeemmo woyite, coyiꞌneemmo gari manna doogimale hanqisannokki gede qoropha hasiissannonke.
SADAASA 13-19
MAGANU QAALI GIDDO NOOTA MUXXE JIRO | EJJEETTO 8-9
“Naaxxantenni Umo Heeshshi Assa Woyyitanno”
w00 8/15 25 guf. 3
Kawa Kaꞌaa Higino Coye Tirtinannihu Hiittoonniiti?
Gedewooni Midiyaamootu ledo olamanni heeꞌre, kaaꞌlitannosi gede Efireemi gaꞌre woshshino. Ikkollana, olu goofihu gedensaanni Efireemi gaꞌre ‘Olaho umonni mayira diwoshshoottonke?’ yite Gedewooni hanqite boroortu. Qullaawu Maxaafi insa “giwantara aaraabbe kaꞌu” (NW) yaanno. Gedewooni kayi togo yee qolinsa: “Ani assoommohunni kiꞌne assitinoonnihu dirooranno? Ninke gamba assinoommo jajjinni kiꞌne qarme xinqitinoonnihu dirooranno? Maganu Midiyaamootu sooreeyye Hereebinna Zeebi angaꞌnera sayise uyino. Hatto ikkina, ani hakkeeshshire asse afeemmo?” (Ejjeetto 8:1-3) Gedewooni dancha qaale doore awu afiinni coyiꞌrasi, gaꞌrete mereero shoonna reyo kaꞌannota gatissino. Efireemi gaꞌre wido ikkitinori ninke ikkannohu ayi no yitannorenna naaxxitannore ikkitukki digattino. Ikkirono, insa akati Gedewooni keeru heeꞌranno gede assate sharramannota dihoolinosi. Ninkeno hatto assa dandiineemmo?
Dhukanke Anfe Heeꞌra Hasiissannohu Mayiraati?
15 Dhukasi afe heeꞌrino manni giddo mittu Gedewooniiti. Isi Yihowa sokkaasinchi umo coyishiishisi yannara, noore coyiꞌre deerrasi afinoha ikkinota leellishino. (Eje. 6:15) Isi Yihowa uyinosi looso adhihu gedensaanni nafa, assa hasiissannosire seekke buuxino; qoleno Yihowa biddishsha hasiꞌrino. (Eje. 6:36-40) Gedewooni waajjannokkihonna worba manchooti. Ikkirono, assannore seekke qorophenna alba badhe layiꞌre assannoho. (Eje. 6:11, 27) Isi uyinoonnisi looso irkiꞌre maccaha ikkate diwoꞌnaalino. Hatteentenni, isi Yihowa uyinosi looso loosihu gedensaanni qaesi haꞌrino.—Eje. 8:22, 23, 29.
w08 2/15 9 guf. 9
Yihowa Doogo Hadhe
9 Maganu jaala ikkate, “jooguulle” woy umonke heeshshi assineemmore ikka hasiissannonke. (1 Phe. 3:8; Far. 138:6) Ejjeetto fooliishsho 9 noo xagge, umo heeshshi assa lowo geeshsha hasiissannota ikkitinota leellishshanno. Gedewooni beetti Iyoaataami togo yiino: “Mitto barra haqqe gashshannonsaha moohisidhara [fultino].” Tenne xagge giddo, ejersu haqqicho, balasete haqqichonna woyinete haqqicho kulloonni. Tini haqqe, Israeele gashsha dandee heeꞌrenni roduuwinsara mooha hasiꞌrinokki manni lawishshaati. Giidhate calla horoonsiꞌnanni uti kayinni, naaxxaleessu Abemeleeki gashshooti lawishshaati; isi wolootaho annata hasiꞌrannohonna lubbo shaannoho. Abemeleeki ‘Israeele 3 diro gashshinoha’ ikkirono, yanniweelo reyino. (Eje. 9:8-15, 22, 50-54) Addanko ‘jooguulle ikka’ woy umo heeshshi assa woyyitanno!
Maganu Qaalinni Ronseemmore
it-1 753 guf. 1
Gagasu Uddano (Efuude)
Gedewooni, Yihowa Israeelete uyino qeelle qaagatenna Magano ayirrisate hede assinore ikkirono, seekkinoti gagasu uddano (efuude) “Gedewooniranna maatesira woshshaado ikkitu”; mayira yiniro, Israeele hattee gagasu uddano magansidhe ayyaanaamittetenni foortino. (Ej 8:27) Ikkollana, Qullaawu Maxaafi Gedewooni umisi hattee gagasu uddano magansiꞌrino diyaanno; hatteentenni, soqqamaasinchu Phaawuloosi iso hundi waro heedhinori “batiꞌru gomichi gede” ikkitinori ammanantinori Yihowa soqqamaasine ledo kiirinosi.—Ib 11:32; 12:1.
SADAASA 20-26
MAGANU QAALI GIDDO NOOTA MUXXE JIRO | EJJEETTO 10-12
“Yofitahe Ayyaanaamo Manchooti”
Ammanama Magano Hagiirsiinsanni Gede Assitanno
9 Yooseefinna wolu ammanamino manni lawishshino Yoftahera gara ikkitino hedo heedhannosi gede kaaꞌlinosiha ikkara dandaanno; Yooseefi roduuwisi ‘gibbinosiha’ ikkirono gatona yiinonsa. (Kal. 37:4; 45:4, 5) Yoftahe tenne xagge hiincasi Yihowa hagiirsiisannore assanno gede kaaꞌlitusikki digattino. Roduuwisi [assitinori] koffi assinositi egennantinote; ikkirono tini Yihowaranna mannisira soqqamannokki gede ataawe ikkitasira diwodhino. (Mes. 11:9) Yoftahera mannu ledo kawa kaꞌaa higino coyi nooha ikkirono, isi baalunku coyinni roorse Yihowa suꞌmira gaaramino. Isi Yihowara ammanaminoha ikkate murciꞌre kaino; tini qolte isirano wolu mannirano kaaꞌlitino.—Ibi. 11:32, 33.
it-2 27 guf. 2
Yofitahe
Yofitahe chaachaara mancho ikkino daafira, silxaanesi bayichonko horoonsiꞌra hanafino. Isi Amooni mootewa manna soye, Israeelete baatto horrinohu mayiraatiro xaꞌmino. Amooni moote kayinni Israeele wonanni baatto ninketa adhitino yii. (Ej 11:12, 13) Yofitahe hatte yannara coyiꞌrinori, isi xagge afinokkiha mulla olamaancho calla ikkikkinni, albi xagge hakko iso Maganu mannisira assinore seekke afinoha ikkinota leellishanno. Yofitahe, Amooni moote yiinori gara ikkinokkita leellishate (1) Israeele Amooni, Moaabi woy Edoomi baatto horritinokkita xawisino (Ej 11:14-18; Mar 2:9, 19, 37; 2Du 20:10, 11); (2) Israeele gobba horritu waro aleenni yini baatto Amoonootu anga noota ikkitinokkita coyiꞌrino; mayira yiniro, hakkawaro hatti baatto Amooraawootunnite; Maganuno Amooraawootu moote Sewooninna baattosi Israeelete angara sayise uyino; (3) Amooni daga 300 diri geeshsha Israeele amaddino baatto daafira coyiꞌrante egentinokkita kulino; hatto ikkina, xa ninkete yitannohu mayi leelleennansaati?—Ej 11:19-27.
it-2 27 guf. 3
Yofitahe
Yofitahe tini hajo magansiꞌrate ledo xaadooshshe afidhinota ikkitinota xawisino. Isi tenne baatto Israeelete uyinohu Magano Yihowa ikkino daafira, kaphu maganna magansidhanno gosara ise aaninni hilita nafa diuyineemmo yiino. Yofitahe Kamooshi Amoonootu magano ikkinota coyiꞌrino. Mitootaho tini soꞌro labbannonsa. Ikkollana, Amoonootaho Milkoomi yinanni magani noonsahanna Kamooshi Moaabi daga magano ikkirono, fiixooma xaaddannoti tini daga duucha maganna magansidhannoreeti. Isinni Selemooni wole gobba meento adhino daafira doogame Israeelete gobbara mannu Kamooshi magansiꞌranno gede assino. (Ej 11:24; 1Mo 11:1, 7, 8, 33; 2Mo 23:13) Hakkiinni saeno, mite fullahaano yitanno garinni “Kamooshi” yaa “Qeelinoho” yaate. (S. Tirigelis 1901nni tirinoha Gesenius’s Hebrew and Chaldee Lexicon yinanni maxaafa qool. 401 lai.) Yofitahe konni magani daafira coyiꞌrinohu, Amoonootu kuni magani wole daga ‘qeele’ baatto aannonkeho yitanno daafira ikkara dandaanno.
Maganu Qaalinni Ronseemmore
it-2 26
Yofitahe
Yofitahe Baana Diꞌꞌikkino. Yofitahe ama alba “foora manchooti”; hatto yaa kayinni Yofitahe baanaho woy foorretenni ilaminoho yaa diꞌꞌikkitino. Reaabi alba foora mancho ikkiturono gedensoonni Salmoonira assidhinonte gede, Yofitahe amano foora mancho ikkite heedhinohu annisira Geleaadira assidhara albaanniiti. (Ej 11:1, NW; Iy 2:1; Mt 1:5) Geleaadi umi galtesinni ilinori Yofitahe roduuwi iso ‘Iqqa ninke ledo dibeeqqatto’ yite shorransa, Yofitahe baana ikkinokkita leellishshanno. (Ej 11:2) Qoleno, gedensoonni Geleaadi manni Yofitahe roorrichansa assiꞌrino (konni manni giddo albisootu Yofitahe roduuwa ikkitukki digattino). (Ej 11:11) Hakkiinni saeno, isi xaadooshshu dunkaani giddo Maganoho kakkalo shiqishino. (Ej 11:30, 31) Isi baana ikkoommero aleenni yinire baalankare assa didandaanno; mayira yiniro, Muse Seeri xawise togo yaanno: “Baanu Yihowa songo eoonke. Wole agurina tonnikki ilama geeshsha nafa, sirchisi Yihowa songo eoonke.”—Mar 23:2, NW.
SADAASA 27–ARFAASA 2
MAGANU QAALI GIDDO NOOTA MUXXE JIRO | EJJEETTO 13-14
“Maanuhenna Minaamasi Xaggenni Annuwunna Amuuwu Maa Rosanno?”
w13 8/15 16 guf. 1
Annuwanna Amuuwa—Oosoꞌne Muꞌruullu Heedheenna Qajeelse
Hanni Daani ilama ikkinohu, hundi Israeelera Tsoria yinanni katamira heeꞌrinohu Maanuhe lawishsha laꞌno. Yihowa sokkaasinchi ilte egentinokkita Maanuhe galte labbaa qaaqqo ilatta yiinose. (Eje. 13:2, 3) Ammanaminori Maanuhenna galtesi tenne macciishshe lowo geeshsha hagiidhinoti dihuluullissannote. Ikkollana, huluullinonsa coyino no. Hakko daafira Maanuhe togo yee huuccatto assiꞌri: “Kaaliiqaꞌya ballo, soottohu Maganu manchi ilamanno qaaqqo lossineemmo gara kulannonke gede galagale dayona soyinke.” (Eje. 13:8) Maanuhenna minaamasi qaaqqonsa lossiꞌranno gara afa hasiꞌrino. Insa qaaqqinsara Samisonira Maganu seera rosiissinoti dihuluullissannote; daafurinsano mulla digatino. Qullaawu Maxaafi, “Kaaliiqi Ayyaani [Samisonira] wolqa wonshisi” yaanno. Hakko daafira, Samisoni Israeelete albisa ikke dhagge ikkannoha batinye coye assino.—Eje. 13:25; 14:5, 6; 15:14, 15.
w05 3/15 25-26
Samisoni Yihowa Uyinosi Jawaantenni Qeelle Adhino!
Samisoni lophanni haꞌri; “Kaaliiqino maassiꞌrisi.” (Ejjeetto 13:24) Mitto barra Samisoni annisiwanna amasiwa daye, “Temina mitte Filisxeemitte beetto layiꞌroommona haadheꞌꞌe” yiinsa. (Ejjeetto 14:2) Insa tenne macciishshe mageeshshi geeshsha masinoro heda dandaatto. Beettinsa Israeele gadadissannori anganni gatisa agure, seennensa adhe insa ledo aante kalaqiꞌra hasiꞌrino. Magano magansidhannokki daga giddonni seenne adha Maganu Seera diigate. (Fulo 34:11-16) Hakko daafira, annisinna amasi togo yee giwi: “Fiixikkinna gosakki mereero atera ikkitanno beetto dinoni? Maganiweelo gosa giddonni seenne adhate mayira halchitto?” Samisoni kayinni, “Ane ise baxisinoena isella haadheꞌꞌe” yii.—Ejjeetto 14:3.
Maganu Qaalinni Ronseemmore
w05 3/15 26 guf. 1
Samisoni Yihowa Uyinosi Jawaantenni Qeelle Adhino!
Samisoni tenne Filisxeemitte beetto ‘baxisinosihu’ mayiraati? Maykilintokinna Istrongi Sayikilopiidiyi yaanno garinni, Samisoni tenne beetto “xuma, laꞌne halchinannita, woy leqexicho” ikkase lae baxinoha ikkikkinni, “hedinori noo daafiraati.” Isi hedinori maati? Ejjeetto 14:4 kultannonte gede, Samisoni “Filisxeemete ledo gibbo kalaqantanno” doogo hasiꞌranni no. Isi tenne beetto hasiꞌrinohu tenne hajaraati. Samisoni lophe anjicho egemminoha ikkita, “Kaaliiqi Ayyaani wolqa wonshisi” woy loosoho kakkayisinosi. (Ejjeetto 13:25) Konni daafira, Samisoni hendoonnikki bayichinni seenne haadheꞌꞌe yaanno gedenna Israeelete albisa ikke lowo looso loosanno gede kakkayisinosihu Yihowa ayyaanaati. Samisoni hasiꞌrino injo afiꞌriyya? Hanni balanxe Yihowa isira ledosi noota leellishino gara laꞌno.
[Lekkaalliidi qaagiishsha]
a Dirinkerano, ayyaanaamittetenni gikki yiinori meya roduuwi songote giddo cuuantino labballi loossanno looso loosa hasiissannonsa woyite konne lawishsha harunse umo gugguꞌlanno.—Maaja 15, 2002 Agarooshshu Shae (Amaaru Afoo), qoola 26 lai.