Agarooshshu Shaeta INTERNEETETE LAYIBIRERE
Agarooshshu Shae
INTERNEETETE LAYIBIRERE
Sidaamu Afoo
  • QULLAAWA MAXAAFA
  • ADDI ADDI BORRO
  • GAMBOOSHSHE
  • mwbr22 Arfaasa qool. 1-12
  • “Kiristaanu Heeshshonna Soqqanshote Xiinxallote Maxaafichora” Qummi Assinoonni Borro

Doodhootto borrora viidiyo dino.

Hasi'rootto viidiyo fa'nama didandiitino.

  • “Kiristaanu Heeshshonna Soqqanshote Xiinxallote Maxaafichora” Qummi Assinoonni Borro
  • Kiristaanu Heeshshonna Soqqanshote Xiinxallote Maxaafichora Qummi Assinoonni Borro—2022
  • Cinaancho Birxichuwa
  • ARFAASA 3-9
  • ARFAASA 10-16
  • ARFAASA 17-23
  • ARFAASA 24-30
  • SOQQANSHOTE DANDOOKKI WOYYEESSIꞌRI
  • ARFAASA 31–AMMAJJE 6
  • AMMAJJE 7-13
  • AMMAJJE 14-20
  • AMMAJJE 21-27
  • AMMAJJE 28–BADHEESSA 6
Kiristaanu Heeshshonna Soqqanshote Xiinxallote Maxaafichora Qummi Assinoonni Borro—2022
mwbr22 Arfaasa qool. 1-12

Kiristaanu Heeshshonna Soqqanshote Xiinxallote Maxaafichora Qummi Assinoonni Borro

ARFAASA 3-9

MAGANU QAALI GIDDO NOOTA MUXXE JIRO | EJJEETTO 15-16

“Kaada Saala Baꞌꞌate!”

w12 4/15 8 guf. 4

Kaada Yannankera Ikkannore Leellishanno Malaateeti!

4 Hanni balanxe xagaraame Daliila assitinore laꞌno; Qullaawu Maxaafi Samisoni ise baxinota kulanno. Samisoni Maganu mannira halame Filisxeemete manna qasate hedino. Onte Filisxeemete mootoolla Daliila Samisoni godowinta baxxannokkita affino daafira, isi ayino dandaannokki wolqa afiꞌrinohu hiittoonniitiro kultunsaro lowo woxe uyitannoseta kultinose. Daliila konne woxe adhate yite insa yitinotera maahoyye yitino; ikkollana ise Samisoni tenne wolqa afiꞌrino gara afate sase higge woꞌnaalte hooggino. Ise, “kunni garinni uurranna ofolla hoꞌlite reyo halchanno gede assitusi.” Hakkiinni isi umo horo meexxe egenninokkitanna hatto assiro wolqasi baꞌannota kulise. Daliila tenne affuti, Samisoni giwoodise aana goxisse umosi meeddu; hakkiinni diinnasi baxxuta assidhanno gede iso insara sayisse uyitu. (Eje. 16:4, 5, 15-21) Ise lowo geeshsha xagaraamete! Daliila woxeho hafuurtannota ikkitino daafira baxannose mancho sayisse uyitino.

w05 1/15 27 guf. 5

Ejjeettote Maxaafita Luphi Yitino Hedo

14:16, 17; 16:16. Wiꞌlinanni mitto mancho uurranna ofolla hoꞌla isi ledo noo jaalooma huntanno.—Lawishsha 19:13; 21:19.

w12 4/15 11-12 guf. 15-16

Kaada Yannankera Ikkannore Leellishanno Malaateeti!

15 Minaanninna minaama mimmitoho ammaname heeꞌra dandaannohu hiittoonniiti? Maganu Qaali togo yaanno: “Galtekkinni tashshi yoohe; qeedhichimmakki galte ledo hagiidhi. Ayiddaamakki [woy ayiddaannakki] baxi; ledose hagiidhi.” (Law. 5:18; Ros. 9:9) Minaanninna minaama dirinsa lexxanni haꞌranno woyite, albinni roore mimmitunniwa gamba yee ‘woꞌmunni woꞌma mimmito illachisha’ hasiissannonsa. Hatto assate mimmitoho hasiisannore seekke hedanna mitteenni yanna sayisa hasiissannonsa. Insa adhamansanna Yihowa ledo noonsa jaalooma kaajjishannore assa hasiissannonsa. Tenne assate Qullaawa Maxaafa mitteenni xiinxalla, ganye mitteenni soqqansho fulanna Yihowa atoote afiꞌrate mitteenni huuccatto assiꞌra hasiissannonsa.

YIHOWARA AMMANANTINE HEEDHE

16 Songote giddo noori mitootu jawa cubbo loossino daafira, “woꞌma ammana heedhannonsa gede” kaajjinshe seejjinoonninsa. (Tit. 1:13) Mitoota amayootinsa bohantanno gede assinonsa. Uyinoonninsa seejjonni ‘roso’ afidhinori kayinni galagalte ayyaanaamittetenni jawaatino. (Ibi. 12:11) Fiixinke woy jaalinke bohaminohalla ikki? Tini ammanammeemmohu ayeraatiro anfanni gede assitanno; kayinni ammanama hasiissannonkehu Maganohooti ikkinnina mannaho diꞌꞌikkino. Yihowa bohaminohu ayi manchi ledono xaadeemmokki gede hajajinonke hajajo agadhineemmotanna teꞌee laꞌꞌanno.—1 Qorontoosi 5:11-13 nabbawi.

Maganu Qaalinni Ronseemmore

w05 3/15 27 guf. 6

Samisoni Yihowa Uyinosi Wolqanni Qeelino!

Samisoni woꞌmunni woꞌma illachishinohu Filisxeemete ledo olamanno olaati. Isi Gaaza heedhannote mitte fotaancho mancho minira einohu Maganu diinna ledo olamara hedeeti. Samisoni hakkunni diinu katami giddo umo worannowa afiꞌra hasiꞌrino; isi galannowa afiꞌra dandaannohu fotaancho mancho mine callaati. Samisonira foorate hedo dinosi. Isi hashshu mereero kae, katamu xullichi cufana haaꞌre, lamenka waalchono waawannate ledo buqqi asse fushshi. Hakkunni gedensaanni, qoteho wodhe 60 km xeertiꞌre noohu Kebiroonira albaanni noo ilaali geeshsha haꞌri. Isi tenne assinohu Maganu uyinosi wolqanniiti.—Ejjeetto 16:1-3.

ARFAASA 10-16

MAGANU QAALI GIDDO NOOTA MUXXE JIRO | EJJEETTO 17-19

“Maganu Seerira Hajajama Giwa Qarra Abbitanno”

it-2 390-391

Miika

1. Efireemi gobba mancho. Miika Maganunnite tonne hajajo giddo settikkita diigino (Fu 20:15); isi amasiha 1,100 kinchu birra moorino. Miika moorinota kule birrase qoliseta ise, “Rumo beettiꞌyara iillitannokki gede, birraꞌya daashshine misile seekkinanni gede Kaaliiqira oomma” yitino; hattono ‘Birra daware atera eemmahe’ yitinosi. “Amasi aaninni 200 birra haadhe birra tumannohura uyitu. Birra tumannohuno haqqa bonce aanaho birra xallinoonni misile seekki. Misileno Miika mine heedhu.” Miikara magansiꞌnanni dargi noosi; isi mini magannanna gagasu uddano seekkiꞌre oososi giddonni mittu kakkalaancho ikke soqqamannosi gede assiꞌrino. Isi assinori iimi adda laꞌnanni woyite Yihowa ayirranno gede assannore lawanno; kayinni kuni assooti digaraho; mayira yiniro, isi Yihowa kaphu maganna magansiꞌnannikki gede hajajino hajajo diigino (Fu 20:4-6); hattono Yihowa iso magansiꞌnanni gede qixxeessino qixxaawo mishino. (Ej 17:1-6; Mar 12:1-14) Gedensoonni isi, Muse beetti beetti, Gershoomi ilinohu Yoonaataani yinannihu wedellichu Leewaawichira woxe baatanni kakkalaancho ikke soqqamannosi gede assiꞌrino. (Ej 18:4, 30) Miika assinori gara laweennasi beebba hagiidhe “Kaaliiqi danchare assannoeta xa afoommo” yiino. (Ej 17:7-13) Yoonaataani kayinni Aarooni sircho ikkinokki daafira kakkalaancho ikke soqqama didandaanno; tinino Miika soꞌrooti.—Ki 3:10.

it-2 391 guf. 2

Miika

Shiima yanna gedensaanni Miikanna ledosi noo manni hordofe Daani gaꞌre mare iilli. Miikanna mannisi mare iillita, Daani manni maaho makkitto? yee xaꞌmita, Miika togo yii: “Mayira maikkitto yitinannie? Seekkiꞌroommota magannaꞌyanna qeesichaꞌya adhitine hadhinoonni, hanni anera mayi gatinoe?” Hakkiinni Daani gaꞌre, Miika cancanni insa hordofa agura giwiro gawajjitannosita kulte qorowisiissinosi. Miika Daani manni isi ledo noo manninni roore jawaata ikkinota afiti agure qaesi higino. (Ej 18:22-26) Hakkunni gedensaanni, Daani manni Layishi yinanni katama diige giire hune hakko bayicho uminsa katama miꞌnino; katamu suꞌmano Daani yiino. Yoonaataaninna oososi Daani mannira kakkalaano ikkite soqqantino; “Kunni garinni, Maganu mini [xaadooshshu dunkaani] Seelo heeꞌreennanni Daani gaꞌre Miika misile magansidhanni heedhino.”—Ej 18:27-31.

Maganu Qaalinni Ronseemmore

w15 12/1 14-15 guf. 6

Xabbe Leeltannota Qullaawu Maxaafi Tiro

6 Maganu suꞌma Qullaawu Maxaafi giddo basesira eessa hasiissannota buuxissanno taje lexxitannilla no. Haaroonsine 2013nni qixxeessinoonnite Haaro Alame Tirora Maganu suꞌmi 7,216 basera no; 1984nni fultino tirora noohano agurranna wole 6 basera konne suꞌma eessinoonni. Lende eessinoonni base giddo onte, 1 Saamueeli 2:25; 6:3; 10:26; 23:14, 16 noote. Tenne ontente basera Maganu suꞌma qolle eessinanni gede assinohu qaru korkaati, Ibirayisxete afiite Maasooreeti borrora 1,000 saꞌꞌanno diri albaanni qixxaabbinoti Reyote Baari Xaaxo tenne qummeeshshuwa aana konne suꞌma amaddinota ikkaseeti. Qoleno, Mesaafinti 19:18 aana mitte basera qolle eessinoonnihu angatenni borreessinoonnita hundi borro lende xiinxallinihu gedensaanniiti.

ARFAASA 17-23

MAGANU QAALI GIDDO NOOTA MUXXE JIRO | EJJEETTO 20-21

“Yihowa Biddishsha Hasiꞌra Agurtinoonte”

w11 9/15 32 guf. 2

Qarru Tuncu Yaannoꞌne Woyite Finihaasi Lawishsha Harunsitinanni?

Biiniyaami gaꞌre wido ikkinohu Gibia manni mittu Leewaawichi galte seyate beebba assiꞌre shiino; hakkiinni wole gaꞌre Biiniyaami gaꞌre qassara kaꞌino. (Eje. 20:1-11) Insa olaho fultara albaanni kaaꞌlansara Yihowa huuccidhinoha ikkirono, lame higge qeelantino. (Eje. 20:14-25) Insa huuccattonke kaaꞌlitinori dino yite heddino ikka? Insa kalaqamino qarrira rabbisiꞌrate kaꞌinota Yihowa dibaxino yaateni?

w11 9/15 32 guf. 4

Qarru Tuncu Yaannoꞌne Woyite Finihaasi Lawishsha Harunsitinanni?

Tenne xaggenni ninke maa rosa dandiineemmo? Cimeeyye diinaggaabbe loossannohanna Maganu kaaꞌlannonsa gede huuccatto assidhannoha ikkirono, mitu qarri songote giddonni baꞌꞌa hoogara dandaanno. Togoori kalaqamanno woyite cimeeyye Yesuusi togo yee coyiꞌrinore qaagganno: “Agurtinikki huuccidhe, uyinanniꞌnena; agurtinikki hasidhe, afidhinannina; agurtinikki waalcho ganganne, fannanniꞌnena.” (Luq. 11:9, NW) Albisa ikkite soqqantannori huuccattonsara dawaro higgukkinni keeshshitinoha lawinsarono, Yihowa yannasira dawaro qolannota dihuluullantanno.

Maganu Qaalinni Ronseemmore

w14 5/1 11 guf. 4-6

Ati Tenne Afootto?

Hundi waro corqaayye olaho horoonsiꞌnoonnihu hiittoonniiti?

Daawiti jigeessa Gooliyaadi shiinohu corqaayyetenniiti. Daawiti corqaayye ollanni gara rosinohu shiimu heeꞌre geꞌreewo allaalanni ikkikki digatino.—1 Saamueeli 17:40-50.

Hundihu Gibitsetenna Asooru manni loosino misilera corqaayye no. Corqaayyete mereeroho gogunni woy hoccunni loonsoonnihu kincho worranni bayichi no; lamenka ragaanni qaccenna qaccete siiwo no. Corqaayye olanno manchi corqaayyete giddo hojjanna godowa 5-7.5 saanti meetire hattono geeshsha 250 giraame ikkannoha qunqumado kincho woranno. Hakkiinni corqaayye wirri wirri asse mitte siiwo amadinowiinni agure, kincho hasiꞌrino dhaawa qole wijji asse olanno.

Mereerimu Soojjaatira hundi waro corqaayyete worre olaho horoonsiꞌnannita batinye kinna umme fushshinoonni. Fullakkino olamaano oltanno kinna mitte saate giddo 160te kayisse 240 km geeshsha hadhanno. Mitu egennaammi corqaayyetenni ollanni kinchi digaanunni ollanni maxxichi haꞌranno teertinyi ledo taalo ikkasi huluullantanno; ikkirono, digaanu maxxichi gede corqaayyete kinchino manna shaara dandaanno.—Ejjeetto 20:16.

ARFAASA 24-30

MAGANU QAALI GIDDO NOOTA MUXXE JIRO | RUUTI 1-2

“Bagamannokki Baxille Leellishshe”

w16.02 14 guf. 5

Yihowara Muli Jaala Ikkino Manni Faale Hadhe

5 Ruuti hasidhuro towaatasera dandaanno ayiddise, yaano amasenna wolu fiixise noowa Moaabi gobba higa dandiitanno. Moaabi ise ilante lophitino gobbaati. Hatte gobba budi, mannu coyiꞌranno afii, hattono hakko heeꞌranno manni ise affinoho. Naaoomi isera Beeteleemete togoo coye afiꞌratta yite diaffanno. Isinni ise, Ruuti Moaabi heedhanno gede kultinose. Naaoomi konni oosose seennira minaanna woy heeꞌranno mine hoogeemma yite yaaddino. Ruuti ma assituyya? Ise doodhitinori Orfa doodhitinorinni baxxinoho; Orfa “mannisewanna magannasewa higgino.” (Rut. 1:9-15) Ruuti gobbase manni magansiꞌranno magannawa higa hasidhinoni? Dihasidhino.

w16.02 14 guf. 6

Yihowara Muli Jaala Ikkino Manni Faale Hadhe

6 Ruutira alba minaannise woy Naaoomi Maganu Yihoware kultusekki digattino. Ise Yihowa Moaabi maganna gedeeha ikkinokkita affino. Ruuti Yihowa baxanna magansiꞌra hasiissannoseta huwattino. Egenno calla kayinni diguddanno. Ruuti doodha hasiissinose. Ise Yihowa Maganose ikkanno gede doodhitakka? Ruuti woyyannore doodhitino. Ise Naaoomi togo yitino: “Mannikki mannaꞌya, Maganikkino Maganoꞌya ikkanno.” (Rut. 1:16) Ruuti Naaoomi baxxanno gari dhagge ikkankera dandaanno; ikkirono ise roorsite baxxannohu Yihowaati. Gedensaanni Booeezi Ruuti Yihowa qoola golo assidhinohura galatinose. (Ruuti 2:12 nabbawi.) Ise assitinori mittu caacurrichi amasinna annisi qooli giddo maaxame gawajjotenni gatannota qaagiissankera dandaanno. (Far. 36:7; 91:1-4) Yihowa Ruutira hattoo anna ikkinose. Ammana noose daafira isi kiisinose; qoleno ise doodhitinorinni horonta digaabbitino.

Maganu Qaalinni Ronseemmore

w05 3/1 27 guf. 1

Ruuti Maxaafita Luphi Yitino Hedo

1:13, 21—Naoomi heeshsho qaraartannonna qarru amadannose gede assinohu Yihowaatini? Deeꞌni. Naoomi hatto yitinohu Maganu bushiishate hedde diꞌꞌikkino. Ikkirono ise lowo qarri amadinose daafira Yihowa alba shawwu yiinoe yite heddino. Ise caaccaabbino hattono hexxo mudhitino. Qoleno hatte yannara ooso ila Maganu maasso gede, ila hooga qole rumote gede assine laꞌnanni. Naoomi lame labballi oosose shiidhino daafiranna oosose ooso ilanteenna laꞌꞌa hooggino daafira Yihowa shollishinosehu gede assite heddino.

SOQQANSHOTE DANDOOKKI WOYYEESSIꞌRI

ia 43-44 guf. 5-9

Maatete Yaa Mayyaate?

5 Ruuti gamba assidhino gide cuukkidheenna mitto gimboola ikkise. Gaꞌnitino gidi, 14 kiilo balla ikkikki digatino! Gide hoccoho wodhite usudhituhu gedensaanni duqqite minira hadhu; ise Beeteliheme iillitinohu siphi siphi yaannaati.—Rut. 2:17.

6 Naaoomi lubbora baxxannoti beettise beetto Ruuti dagganna laꞌe hagiidhitu; Ruuti lowo gide duqqite dagganna laꞌe Naaoomi dhagge assidhukki digattino. Ruuti, Boeezi loosaasinete shiqishino sagalenni bande uyineennase ittanna gattinota minira adhite daggino; lamenti hattee sagale beeqqe itino. Naaoomi, “Konne duucha mamiinni gudhitta? Aye gatinni xinqiꞌritta? Togo elihe mancho Maganu maassiꞌrosi!” yitu. (Rut. 2:19) Naaoomi xiinxalla manchooti; konnira, Ruuti duqqite noo gide laꞌuti, lainosehunna elle assinosehu noota huwattino.

7 Ruuti Naaoomira Boeezi danchumma hasaabbuse. Naaoomi hagiidhite, “Nooriranna reyitinorira uyino hexxo wonshanno Magani iso maassiꞌrosi” yitu. (Rut. 2:20) Naaoomi, Boeezi danchumma assanno gede kakkayisinosihu Yihowa ikkinota wodanchitino; Yihowa, soqqamaanosi shaqqadda ikkitara hasiꞌranno; qoleno mannisi assanno danchummara kiiseemmo yee qaale eino.—Lawishsha 19:17 nabbawi.

8 Boeezi, Ruuti gatesi dagge xinqiꞌra agurtannokki gede kulise; hattono gide middannori seyattannosekki gede minisi seenniwiinni faffe hadhannokki gede amaalinose; Naaoomino Ruuti tenne amaale macciishshitanno gede amaaltinose. Ruutino ballose amaale macciishshitino. Qoleno ise ‘ballosewiinni baxxitukkinni keeshshitino.’ (Rut. 2:22, 23) Tini yaatto, Ruutira bagamannokki baxilli nooseta luphi assite xawissanno. Ruuti lawishshi, ninkeneeto togo yine xaꞌmineemmo gede assannonke: ‘Hasiissanno yanna baalantera miniꞌya manna kaaꞌle, Yihowa xintino maate ayirriseemmota leellisheemmo?’ Yihowa woloota bagamannokki baxillinni banxeemmonsata laꞌꞌanno.

9 Naaoominna Ruuti calla maatete yaa dandiinanni? Mitootu, maatete yaa minaanni, minaama, ooso, ahaahunna ahaahe noote yite heddanno. Naaoominna Ruuti lawishshi kayinni, Yihowa soqqamaano wodanansa waraꞌa assite fananna shiima maate giddo nafa baxillunna danchumma heedhanno gede assa dandiitannota leellishanno. Ati maatekki naadatto? Kiristaanu songo, maate noonsakkirira nafa maate ikka dandiitannota Yesuusi harunsaanosira kulinonsa.—Maq. 10:29, 30.

ARFAASA 31–AMMAJJE 6

MAGANU QAALI GIDDO NOOTA MUXXE JIRO | RUUTI 3-4

“Suꞌnaado Suꞌma Afidhine Heedhe”

ia 47 guf. 18

‘Mannu Baalu Danchummase Afino’

Boeezi Ruuti hasaawisinohu shaqqillunninna sheshifachishanno garinni ikkinoti dihuluullissannote. Isi togo yiinose: “Beettoꞌya, Kaaliiqi maassiꞌrohe! Xaa geeshsha dureessu woy buxichu qeedhichira assiꞌra agurte, kune albinni roore ayiddimmate halaale wonshootta.” (Rut. 3:10) Boeezi “albinni roore” yiinohu, Ruuti Naaoomi ledo Israeelete gobba dagge ise towaattinota kulateeti. “Kune” yiinohu kayinni hakko hashsha assitinore kulateeti. Boeezi, Ruuti hasidhuro dureessano buxichono ikkiro aju beettira assiꞌra dandiitannota afino. Ruuti kayi Naaoomi minaanni sirchi saꞌꞌanno gede assite, Naaoomira calla ikkikkinni Naaoomi minaannira danchumma assa hasidhino. Ruuti umiseta calla heda agurte assitinori Boeezira dhagge ikkinosihu iseraati.

ia 48 guf. 21

‘Mannu Baalu Danchummase Afino’

Ruuti, Boeezi ‘Mannu baalu danchummakki afino’ yiinoseta heddanno woyite lowo geeshsha hagiidhitinoti egennantinote! Ise suꞌnaado suꞌma afidhanno gede assinosehu, Yihowa afatenna isira soqqamate noose halcho ikkitinoti dihuluullissannote. Qoleno Ruuti affinokki budenna woga rosate maahoyye yite, Naaoominna dagase ayirrissannota leellishshino. Ninkeno Ruuti gede, wole manna mararatenna budensa ayirrisate sharrammeemmo. Hatto assinummoro, ise gede suꞌnaadu suꞌmi heeꞌrannonke.

ia 50 guf. 25

‘Mannu Baalu Danchummase Afino’

Boeezi Ruuti adhino. Hakkunni gedensaanni “[ise] Kaaliiqi kaaꞌleennase godobbe labbaa beetto iltu.” Hakkiinni Beetelihemete meenti hagiidhe Naaoomi maassiꞌrise; hattono Ruuti Naaoomira lamala labballi oosonni nafa roortinose daafira insa ise galatinose. Gedensoonni, Ruuti iltino beetti Moote Daawitira ahaaho ikkino. (Rut. 4:11-22) Qoleno Yesuusi Kiristoosi ilaminohu Daawiti ayiddi widoonniiti.—Mat. 1:1.

Maganu Qaalinni Ronseemmore

w05 3/1 29 guf. 3

Ruuti Maxaafita Luphi Yitino Hedo

Ru 4:6—Raggete aanannohu ragiꞌrasi, ‘oososira iqqiꞌrannori ajanno’ gede assitannohu hiittoonniiti? Umihunni buxino manchi baattosi hiꞌrinoha ikkiro, ragiꞌranno manchi aananno Iyyoobeeliyu ayirrisate gatino diro hende xaꞌminanni woxe baate baatto hidha hasiissannosi. (Leewaawoota 25:25-27) Tini qolte noosi woxi ajannosi gede assitanno. Qoleno Ruuti labbaa qaaqqo ilturo, hatte baatto ragiꞌrannohu hidhino manchi fiixa ikkikkinni ilamanno qaaqqooti.

AMMAJJE 7-13

MAGANU QAALI GIDDO NOOTA MUXXE JIRO | 1 SAAMUEELI 1-2

“Huuccattotenni Giddoꞌneta Yihowara Hasaaphe”

ia 55 guf. 12

Giddoseta Huuccattotenni Maganoho Hasaaphitino

12 Haanna lawishshinni huuccattote daafira lowore ronseemmo. Mittu qaaqqi shaqqado annasi addaxxe dhiwinosire baala kuꞌlannonte gede, Yihowano mittoreno huxuxxi yinummokki giddonketa fushshine isira hasaaphinammora koyisinonke. (Faarso 62:8 nna 1 Teselonqe 5:17 nabbawi.) Soqqamaasinchu Pheexiroosi Yihowa huucciꞌrate daafira ayyaanunni togo yee jawaachishannore borreessino: “Kiꞌnere malannohu isootina, qarrisannoꞌnere baala isi aana tuqqe.”—1 Phe. 5:7.

ia 55-56 guf. 15

Giddoseta Huuccattotenni Maganoho Hasaaphitino

15 Haanna giddoseta Yihowara hasaaphasenna xaadooshshu dunkaanira iso magansiꞌrase kaaꞌlitinosehu hiittoonniiti? Maganu Qaali togo yaanno: “Hakkiinni kaꞌe hadhe sagaleno ittu. Hakkunni gedensaanni albisera dadillu dileellino.” (1 Sam. 1:18) Haanna xa fooliishsho afidhino. Ise duha ikkitinoseta wodanise xisso, lowo geeshsha wolqaataamo ikkinohu iimi Annise aana tuqqitino. (Faarso 55:22 nabbawi.) Yihowa wolqara aleenni ikkino qarri nooni? Horonta dino.

Maganu Qaalinni Ronseemmore

ia 57, saaxine

Umi Saamueeli Maxaafita Luphi Yitino Hedo

2:10—Haanna hatte yannara Israeelete moote nookkiha ikkirono, Yihowa ‘mootenna buuraminohu’ daafira huuccitinohu mayiraati? Haanna Maganu ‘buudhino moote’ daafira coyidhinori masaalo ikkikki digatino. Ise coyidhino qaalinna “mesihicha” yine tirroonni qaali mittoho. Qullaawu Maxaafi giddo, albillitte daannoha buuramino moote kulate konne qaale coyidhinoti umi mancho Haannaati.—1 Sam. 2:10.

AMMAJJE 14-20

MAGANU QAALI GIDDO NOOTA MUXXE JIRO | 1 SAAMUEELI 3-5

“Yihowa Mannaho Hedannoho”

w18.09 24 guf. 3

Yihowa Woꞌmanka Dandaannoha Ikkirono Wolootaho Hedanno

3 Saamueeli qullaawu dunkaani giddo Yihowara “soqqama” hanafinohu qaaqqu heeꞌreeti. (1 Sam. 3:1) Mitto hashsha Saamueeli goxe heeꞌreenna mittu haaru coyi ikkino. (1 Saamueeli 3:2-10 nabbawi.) Isi “Saamueeli!” yitanno huuro macciishshino. Saamueelira hatti Kakkalaanote Biili Eeli huuro labbeennasi Eeliwa dodanni mare, “Woshshittoeni? Kune dayummowe!” yiino. Eeli “diwoshshoommohe” yiinosi. Kuni coyi lame hige ikkita, Eeli Saamueeli woshshanni noohu Magano ikkinota huwatino. Konnira, Saamueeli maa assannoro kulinosi; Saamueelino Eeli yiinosire assino. Yihowa sokkaasinchu widoonni hasaawisanni noosita umonni Saamueelira kulinosikkihu mayiraati? Qullaawu Maxaafi tenne daafira dikulanno; ikkirono Yihowa hatto assinohu Saamueelira hedino daafira ikkara dandaanno? Hatto yineemmohu mayiraati?

w18.09 24 guf. 4

Yihowa Woꞌmanka Dandaannoha Ikkirono Wolootaho Hedanno

4 Umi Saamueeli 3:11-18 nabbawi. Yihowa Seeri qaaqquullu jajjabba manna hakko iso roorroota ayirrisa hasiissannonsata kulano. (Ful. 22:28; Lew. 19:32) Ikkina qaaqqu Saamueeli soodo gute kae Maganu Eeliranna maatesira yiinota waajjishshanno yoo waajjikkinni Eelira kula dandaannoha lawannohe? Didandaanno! Isinni Qullaawu Maxaafi Saamueeli “waajjino daafira laino ajuuja Eelira dikulino” yaanno. Ikkollana Maganu, Saamueeli hasaawisinota Eeli huwatanno gede assino. Konnira Eeli, Saamueeli “[Yihowa] kulinohere mittoreno maaxxootie” yiino. Saamueelino Eelira hajajame “mitto coyeno maaxikkinni gudise” kulinosi.

Maganu Qaalinni Ronseemmore

w05 3/15 21 guf. 6

Umi Saamueeli Maxaafita Luphi Yitino Hedo

3:3—Saamueeli goxinohu Qullaawu Holgiraati? Deeꞌni. Saamueeli Leewaawicha ikkirono, kakkalaano ikkate qoosso noonsakkiri Qehaati ilama widooti. (1 Duduwo 6:33-38) Hakko daafira iso “qullaawu uduunniwa” shiqara horo difajjinannisi. (Kiiro 4:17-20) Saamueeli ea dandaannohu xaadooshshu dunkaani hoowe callate. Isi goxinohuno hakko ikkinoti dihuluullissannote. Elino goxinohu xaadooshshu dunkaani hoowera ikkikki digatino. “Gondooru Taabooti noowa” yitanno yaatto xaadooshshu dunkaani qooxeessa kultannota ikkitara dandiitanno.

AMMAJJE 21-27

MAGANU QAALI GIDDO NOOTA MUXXE JIRO | 1 SAAMUEELI 6-8

“Kiꞌne Moote Ayeti?”

it-2 163 guf. 1

Maganu Gashshoote

Israeelete Manni Moote Moohinsansara Xaꞌmiꞌrino. Israeele Gibitsete gobbanni fultuhunni mitu 400 diri gedensaanninna Yihowa Abirahaami ledo qaalu gondooro eihunni 800 saꞌꞌanno diri gedensaanni, Israeele wole daga gede moote moohinsansara xaꞌmidhino. Insa moote moohinsansara xaꞌmiꞌransa Yihowa mootensa ikkara hasidhinokkita leellishshanno. (1Sa 8:4-8) Hige mannu, Maganu Abirihaamiranna Yaiqoobira eino qaali garinni Mangistesi xintanno yanna agadhansa garankolla. Yaiqoobi reyara kae heeꞌre Yihuda daafira coyiꞌrino masaalo (Ka 49:8-10), Yihowa Israeele Gibitsete gobbanni fultuhu gedensaanni coyiꞌrino qaali (Fu 19:3-6), Seeru gondoori (Mar 17:14, 15), hattono Maganu masaalaanchu Beleaami coyiꞌranno gede assinoti mite masaalo (Ki 24:2-7, 17), Israeelete manni tenne Mangiste roore hexxanno gede assitannote. Ammanantino mancho Saamueeli ama Haanna huuccattotenni tenne hexxo xawissino. (1Sa 2:7-10) Ikkirono, Yihowa Mangistesi daafira dahaawinoha qullaawa coye woꞌmunni woꞌma dixawisino; hattono tenne Mangiste xintate hirqino yanna daggannohu mamarootiro leellishannori dino; qoleno tini Mangiste ma garinni xintantannoro, xintantannohu iimatironso uullaatiro leellishannori dino. Hakko daafira Israeelete manni moote moohinsansara xaꞌmiꞌransa soꞌrote.

ia 72-73 guf. 18

Dadillisanno Coyi Heeꞌrirono, Cince Saino

18 Saamueeli tenne hajo daafira Yihowa huucciꞌrita, Yihowa mayyee qolinoro wodanchi: “Moote ikkeemmonsakki gede anella mishshinota ikkinnina ate dimishshinona, yitannohere baala haaꞌri.” Saamueeli tenne macciishshiti lowo geeshsha sheshifatinoti egennantinote! Ikkollana, Israeele hatto yaansa Woꞌmanka Dandaanno Magano xonate gedeeti. Yihowa masaalaanchisi Israeelete mookkannonsa mootoolla eltannonsakkita kule qorowisiisannonsa gede kulinosi. Saamueeli Yihowa yiinore kulinsata, insa “Deeꞌni, ninke moote hasiꞌneemmo” yitino. Hakkiinni, woꞌmanka woyite Maganisira owaatannohu Saamueeli haꞌre Yihowa doodhino mancho moote asse buurino.—1 Sam. 8:7-19.

w10 1/15 30 guf. 9

Yihowa Gashshanno Gari Gara Ikkinoti Leeltino!

9 Yihowa aanno qorowishshi gara ikkinoti hundinni kayisse xabbe leeltino. Israeelete mannu gashshooti qarra abbinonsa; hakko iso moote Maganoho ammanaminokkiha ikkiro baasa qarrantanno. Israeelete xagge hendeemmo woyite, Yihowa afinokkihu gashshannoti mannu Mangiste, mannaho geedannoha dancha coye assa hoogansa dhagge diꞌꞌikkitannonke. Mite Poletiku gashshaano keerenna geꞌne abbate assitannore maasiꞌrannonsa gede Magano huuccidhanno; ikkollana Maganu isi gashshootira maahoyye yee galannokki manna hiitto asse maassiꞌranno?—Far. 2:10-12.

Maganu Qaalinni Ronseemmore

w02 4/1 12 guf. 13

Cuuama Hasiissannohu Mayiraati?

13 Cuuamme Yihowa Farciꞌraasine ikkate balanxe soorrama hasiissanno. Soorramate yaa Kiristoosa Yesuusa woꞌmu wodanisinni harunsate murciꞌrino manchi umisi fajjonni assannoreeti. Togoo manchi alba assannoha busha assoote agure Maganu albaanni dancha coye assate murciꞌranno. Qullaawu Borro giddo soorrama yaanno qaale kulate einohu Ibiraawootunna Giriikete Afii qaali badhe wodha woy shawwu yaa yitanno tiro afiꞌrinoho. Kuni assooti busha doogo agurre Maganunniwa higa kulannoho. (1 Mootoolla 8:33, 34) Soorramate, ‘aagintaamboonnita’ leellishannore assa hasiissanno. (Soqqamaasinete Looso 26:20) Tenne assate kaphu ammaꞌno agura, Maganu hajajo ledo sumuu yaannore assanna Yihowa calla magansiꞌra hasiissanno. (Marro 30:2, 8-10; 1 Saamueeli 7:3) Soorrama hendeemmo gara, hasattonkenna akatanke biddi assiꞌneemmo gede kaaꞌlitannonke. (Hiziqeeli 18:31) Maganu giwanno akatta ‘agurre’ haaro mannimma uddiꞌneemmoha ikkiro, soorrammoommo yaa dandiineemmo.—Soqqamaasinete Looso 3:19; Efesooni Sokka 4:20-24; Qolasiyaasi Sokka 3:5-14.

AMMAJJE 28–BADHEESSA 6

MAGANU QAALI GIDDO NOOTA MUXXE JIRO | 1 SAAMUEELI 9-11

“Saaooli Umi Qara Isonooto Heeshshi Assannohonna Dhukasi Afinoho”

w20.08 10 guf. 11

Umoꞌne Heeshshi Assitinenna Dhukaꞌne Affine Maganu Ledo Qaaffe

11 Hanni Moote Saaoolira iillinore laꞌno. Umi qara isi dhukasi afino manchooti. Isi dhukasi afino daafira silxaane uyinisita adha waajjino. (1 Sam. 9:21; 10:20-22) Ikkollana isi gedensaanni booꞌnaleessa ikkino. Saaooli moote ikkihunni shiima yanna gedensaanni kuni bushu akati noosita leellishino. Mitte yannara isi masaalaancho Saamueeli cince agara hoogino. Saaooli umosi heeshshi asse Maganu mannasi gatisannota addaxxa agure giirre kakkallanni kakkalo shiqishino; isira hatto assate qoosso dinosi. Konninni kainohunni Yihowa dadillisino hattono gedensoonni mootimmasi hoogino. (1 Sam. 13:8-14) Tenne xaggenni essannonkekkiwa ea hasiissannonkekkita ronseemmo.

w14 3/1 9 guf. 8

Meessi Xiqime Agurate Akatinke Baꞌꞌannota Agadhineemmo Gara

8 Nugusu Saaoolihu bushu lawishshi, umonke baxate akati meessi xiqime agurate akatanke hunara dandaannota leellishanno. Saaooli Nugusa ikki yannara, isonooto kaffi asse laꞌꞌannokkihonna shooshaqaho. (1 Sam. 9:21) Isi nugusimmasi mishino manna qorichisha dihasiꞌrino; Maganu uyinoe silxaane mishshinore qaxxaasa hasiissannoe yee heda dandaannoha ikkirono, hatto diassino. (1 Sam. 10:27) Nugusu Saaooli Isiraeele Amooni gosa ledo olante qeeltara marrae Maganu ayyaani uyinosi biddishshira hajajamino. Hakkiinnino booꞌna agure, afiꞌrino qeellera ayirrinyu hasiisannosihu Yihowa ikkinota coyiꞌrino.—1 Sam. 11:6, 11-13.

w95 12/15 10 guf. 1

Amoonootu Assinoonninsahu Danchu Coyira Bushare Assite Qoltino

Xaano Amoonootu Yihowa assinonsa danchummara bushare assite qoltino. Yihowa insa assitino bunshe sammi yee diagurino. “Saaooli konne [Naoosi] coye macciishshita Maganu Ayyaani dirre wolqa wonshisi; isino lowo geeshsha hanqi.” Saaooli Maganu ayyaani massageennasi 330,000 ikkitanno olanto anga adhe, “gattinori mittu mittunku” Amoonooti xooqqe baꞌa geeshsha shorrino.—1 Saamueeli 11:6, 11.

Maganu Qaalinni Ronseemmore

w05 3/15 22 guf. 8

Umi Saamueeli Maxaafita Luphi Yitino Hedo

9:9—“Hundi waro goꞌlinore afanno” mancho yinanniha, xa “himanaancho” yinannihu mayiraati? Tini yaatto Saamueelinna Israeelete mootoolla yannara himanaano roore egennantanni dagginota leellishshannota ikkitara dandiitanno; hakko daafira ‘alba goꞌlinore afannoha’ yinanniha “himanaancho” yinoonnihu isera ikkara dandaanno. Mite yine himanaancho yinoonnihu Saamueeliiti.—Soqqamaasinete Looso 3:24.

SOQQANSHOTE DANDOOKKI WOYYEESSIꞌRI

w15 4/1 11-12 guf. 16-20

Woloota Danchu Garinni Qajeelsate Kaaꞌlannoha Qara Coye

16 Xiixantinikki baxillunni qajeelse. Saamueeli Isiraeele illete leellanno nugusi heeꞌransara hasidhinota umo macciishshi wote, koffi yiino; qoleno mishaminohu gede ikke macciishshaminosi. (1 Sam. 8:4-8) Isinni Saamueeli Isiraeelete daga yitinore assate xiixame giwino daafira Yihowa insa yitinore assanno gede sase hige kulinosi. (1 Sam. 8:7, 9, 22) Ikkirono, Saamueeli isi bayicho amadanno mancho dihinaasino woy isira dihanqino. Kuni masaalaanchi Yihowa Saaooli buuranno gede kulisita hajajame buurino; konne assinohu gidde ikkeennasi xiixamanni ikkikkinni baxillunniiti.

17 Saamueeli gede, yannankera temokkiro noonsa cimeeyyeno roduuwa qajeelsitannohu baxillunniiti. (1 Phe. 5:2) Tini shaqqadda cimeeyye woloota rosiisa digibbanno; qolteno insara mite songote qoosso aa diwaajjitanno. Insa kore roduuwa ‘ledonsa loossannorenna’ songote muxxe elto ikkitinohu gede assite laꞌanno. (2 Qor. 1:24; Ibi. 13:16) Tini shaqqadda rosiisaano rosaano afidhino dandoo horoonsidhe songo kaaꞌlitanna laꞌanno wote lowo geeshsha hagiidhitanno!—Looso 20:35.

18 Rosiisaano calla ikkikkinni jaalla ikkensa. Saamueeli Saaooli ledo xaadi barra, isinni xaadanni heeꞌrenni bayichonko zayitete uduunnicho haaꞌre Saaooli buure haꞌrisa dandaanno; hatto assoommero Saaooli buuraminoha ikkirono halaafinateho kayinni qixxaawinokkiha ikkanno. Saamueeli kayinni shaqqillunni Saaooli wodana dirimu dirimunni qixxeessino. Isi Saaooli buurinohu lamunku dancha sagale ittu, doogo mitteenni hadhu, seeda yanna hasaabbunna dancha gede fooliishshidhu gedensaanniiti.

19 Hatteente gede, xaa yannarano mittu rosiisaanchi qajeelsha jammarate rosaanchu ledo yanna sayisanna jaalooma kalaqiꞌra hasiissannosi. Mittu cimeessi qajeelsanno rodii ledo danchu xaadooshshi heeꞌrannosi gede assiꞌrate assanno coyibba gobba gobbate noo budi garinni babbaxxitara dandiitanno. Ikkirono, aye gobbarano heeꞌrittoro, loosu batiꞌre heeꞌreennahenni rosaanchu ledo sayisatto yanna gaaꞌmattoha ikkiro, wole yaattonni “Ani ate kaffi asse laeemmohe” yitanni noottosihu gedeeti. (Roomu Sokka 12:10 nabbawi.) Konni garinni yanna uyite baxille leellishattoha ikkiro rosaano tenne lowo geeshsha naaddanno.

20 Cimeeyye ikkitinoonni roduuwa tenne qaagge: Kaajja rosiisaanchooti yinannihu woloota qajeelsa baxannoha calla ikkikkinni qajeelsanno manchono baxannoho. (Yohaannisi 5:20 ledo heewisiisi.) Rosiisaanchu kuni akati noosiha ikkiro rosaanchu tenne rahe huwatanno; qoleno kuni akati rosaanchu uyinannisi qajeelsha dancha gede adhanno gede assanno. Konni daafira cimeeyye, roduuwa qajeelsitinanni wote, rosiisaano calla ikkikkinni jaalla ikkensa.—Law. 17:17; Yoh. 15:15.

    Sidaamu Afii Borro (1995-2025)
    Fuli
    Ei
    • Sidaamu Afoo
    • Woleho Soyi
    • Addi Addi Doorsha
    • Copyright © 2025 Watch Tower Bible and Tract Society of Pennsylvania
    • Sheemaate
    • Foju Biddishsha
    • Privacy Settings
    • JW.ORG
    • Ei
    Woleho Soyi