Tini borro hirrannita diꞌꞌikkitino. Alamete doyichora Qullaawa Maxaafa rosiisate looso kaaꞌlate fajjotenni fushshinanni fushshonni qixxaabbinote. Woxe fushshate, donate.jw.org daaꞌꞌati.

Bande kulloonniha ikkiro ikkinnina, tenne borro giddo noo qummeeshshuwa haaꞌnoonnihu, 2007 M.D. Sidaamu Afiinni qixxeessinoonnihu Qullaawu Maxaafinniiti. Mite qummeeshshuwa haawiissine borreessinoommori ninkeeti. “NW” yaannohu heeꞌriro, qummeeshsha haaꞌnoonnihu Qullaawa Borrote Haaro Alame Tironniiti yaate.

Qullaawa Maxaafa nabbambeemmo woyite, ayyaanaamittete jiro afiꞌrate xiinxalla dandiineemmo. Ikkina woꞌmunni woꞌma horo afiꞌra dandiineemmohu hiittoonniiti?

Qullaawu Maxaafi xagge unte xiinxalli. Lawishshaho xagge borreessinohu ayetiro hattono ayera woy mamoote borreessinoonniro afate woꞌnaali. Hakka woyite ikkino coyi maati? Hakkuyira albaanni woy hakkuyi gedensaanni mayi ikkino?

Aante noo xaꞌmuwa daafira xiinxallite maa rosattoro hedate woꞌnaali: ‘Xaggete giddo kulloonni mannira mayi macciishshaminonsa? Insara hiikkuri akatta noonsa? Ani kuri akatta lossiꞌra woy hooꞌla hasiissannoehu mayiraati?’

Rosoottore loosu aana hosiisi; soqqanshonniwa woy wolu manni ledo heeꞌratto woyite hatto assa dandaatto. Hatto assattoha ikkiro Qullaawu Maxaafi kulannonte gede Maganu aanno hayyo nooheta leellishatto; Qullaawu Maxaafi, “Egennaammu [hayyootu] baalu konne coye huwatto” yaanno.—Far. 107:43.

• Kaaꞌlitanno hedo: Kiristaanu Heeshshonna Soqqansho Gambooshshi yannara shiqqannoti Maganu Qaali Giddo Noota Muxxe Jiro yitanno kifilera noo borro ronsoommore loosu aana hosiisate kaaꞌlitannonke gara hedate woꞌnaali. Konni gafira duucha woyite ninkeneeto xaꞌmineemmo xaꞌmuwa, hiincineemmo hedo hattono seekkine hendeemmo lawishshuwa heedhanno.