Addaaminna Heewani kaashshu basenni fultu gedensaanni haammata ooso iltino. Bayiru beettinsa, Qaaeeli baatto loosiꞌrannoha ikkino; layinki beettinsa Abeeli kayinni saada allaaꞌlannoha ikkino.

Mitto barra Qaaeelinna Abeeli Maganoho kakkalo kakkaltu. Kakkalo maatiro afootto? Kakkalo Maganoho uyiꞌnannireeti. Yihowa Abeeli kakkalo adhino; Qaaeeli kakkalino kakkalo kayinni diadhino. Qaaeeli, Maganu kakkalosi adha giwino daafira lowo geeshsha hanqino. Yihowa Qaaeeli hanqisi bushare assanno gede kakkayisannosita kule qorophi yiinosi. Qaaeeli kayinni Maganu yiinore dimacciishshino.

Qaaeeli Abeeli, “Amo xawo haꞌnona” yiino. Insa xawoho callootinsa noowa Qaaeeli rodoosi gane shiino. Yihowa Qaaeeli ma assiyya? Yihowa Qaaeeli qorichishate maatesiwiinni baxxe xeertowa haꞌranno gede assino. Isi Qaaeeli qaera galagale daannokki gede assino.

Tenne xaggenni maa ronseemmo? Mittu coyi hendoommo gede ikka hoogiro, hanqisankera dandaanno. Kayinni hanqinoommoti leeltunkero woy wolu manni hanqinoommota kulinkero, hakka wontenni hanqa agura hasiissannonke.

Abeeli Magano baxanno daafiranna danchare assino daafira, Yihowa iso ayewoteno qaagannosi. Yihowa uulla gannate assanno yannara Abeeli reyotenni kayisannosi.

Gedensaanni mannu uullate aana batiꞌri. Hakko manni giddo rooru bushare assannoho. Hakkawaro iima heedhannoti mite sokkaasine nafa bushare assitino. Insa iima qaensara heeꞌra agurte uullara daggino. Insa uullara dagginohu mayiraatiro afootto? Uullara dagginohu mannu biso uddidhe seenne adhitaraati.

Hatti busha sokkaasine adhitino seenni ooso ilino. Tini ooso lophite wolqaataamma ikkite manna waajjishiishshannore ikkitino. Insa manna gawajjitanno. Yihowa bunshe hatte gedee heedhara sammi yee diagurino. Konni daafira Maganu busha manna lolahunni gudara kai.

Kayinni hakkawaro mittu danchu manchi no. Isi Yihowa baxannoho. Konni manchi suꞌmi Nohiiti. Isira minaama noosi; hattono sase ooso noosi. Insa suꞌmi Seemi, Kaaminna Yaafeetiiti; insano seenne adhitinoreeti. Yihowa Nohinna maatesi Baote Wayinni gattanno gede, Nohi jawa markaawe seekki yiinosi. Markaawe jawa saaxine labbanno; qoleno markaawe wayi aana haꞌra dandiitanno. Hakkiinni Yihowa Nohi ‘Saadano reyite gooffannokki gede markaawete giddora eessi’ yiino.

Nohi hakkawontenni markaawe seekka hanafi. Nohinna maatesi mitu 50 diri giddo markaawe seekkite guddu. Insa markaawe Yihowa seekke yiinonsa garinni seekkitino. Hatte yannara Nohi, ‘Baote Wayi daanni noona qorophe’ yee mannaho kulino. Kayinni isi yiinore mittuno dimacciishshino.

Hakkiinni markaawete giddora eꞌnanni yanna iillitu. Aanchine hakkunni gedensaanni ikkinore ronseemmo.