Nabbawaano Xaꞌmitanno Xaꞌmo

Rosiisaancho 5:8 kultannohu uulla gashshaasinereetinso Yihowareeti?

Qummeeshshu togo yaanno: “Mitte gobbara buxane beebba assiꞌnannanna halaale dawinsanna affe dhaggeeffattooti. Rooreho rooru no; insa woꞌmunkura aleenni hige laꞌꞌannohu no.”—Ros. 5:8.

Tenne hajo lainohunni Yihowara noosi lao heda hoongummoro, kuni qummeeshshi kulanni noohu uulla gashshaanore calla lawara dandaanno. Ikkollana kuni qummeeshshi Yihowa daafirano kulannoho; tini qolte jawaantenna shesho uyitannonke.

Rosiisaancho 5:8 buxane beebba assiꞌrannonna halaale dawisanno gashshaanchire kultanno. Kuni gashshaanchi isita roortino silxaane afiꞌrinohu laꞌꞌanni noosita qaaga hasiissannosi. Isinni isi roorichinni nafa roortino silxaane noonsari heedhara dandiitanno. Uullate gashshooti giddo silxaane noonsari baalunku bushuulle ikkitara dandiitanno; konnira addi addi silxaane noonsari manna gadadissara dandiitanno.

Kaaꞌlannohu noonkekkiha lawinkerono, Yihowa uullate gashshooti giddo lowo silxaane noonsare laꞌꞌanni noota afanke sheshifanteemmo gede assitannonke. Maganu kaaꞌlannonke gede huucciꞌranna duhanke isi aana tuqqa dandiineemmo. (Far. 55:22; Fil. 4:6, 7) Yihowa “Isira gudisante aamantinore jawaachishate, . . . baatto baala” illaallisannota anfoommo.—2 Dud. 16:9.

Hakko daafira, Rosiisaancho 5:8 uullate gashshooti hiittoohoro qaagiissitannonke; woꞌmanka woyite rooreho rooru no. Hakkiinnino sae qummeeshshu, baalunkunni roore silxaane noosihu Yihowa ikkinota qaangeemmo gede kaaꞌlannonke. Isi xa Mangistesira Moote asse shoominohu Beettisi Yesuusi Kiristoosi widoonni gashshanni no. Woꞌmanka Dandaanno Maganiwiinni goꞌlinori horo dino; isino Beettisino halaale didawissanno.