Tonne gaꞌrehu Israeelete gashshootira batinye busha mootoolla mookkino; insa giddo rooru bushi kayinni Akiaabiti. Isi Elzaabeeli yinannita Baꞌꞌaali magansidhanno mancho adhino; ise busha manchooti. Akiaabinna Elzaabeeli lowo manni Baꞌꞌaali magansiꞌranno gede assino, hattono Maganu masaalaano shiino. Yihowa tennera ma assinoro afootto? Isi Eeliyaasi yinanni masaalaanchi Akiaabira mare sokkasi kulanno gede assino.

Eeliyaasi Moote Akiaabira mare togo yii: ‘Busha coye assootto daafira, Israeelete gobbara xeena digananno.’ Sase saꞌꞌanno diro gidu laalinokki daafira, mannu hudiꞌri. Yannate gedensaanni Yihowa galagale Eeliyaasi Akiaabiwa soyi. Moote Akiaabi Eeliyaasi, ‘Israeelete manni togo ikke qarramanno gede assoottohu ateeti!’ yii. Eeliyaasi kayinni togo yee qoli: ‘Moolle abboommohu dianeeti. Baꞌꞌaali magansidhe moolle dagganno gede assoottohu ateeti. Halaalaanchu Magani ayetiro laꞌneemmona, manna baalanna Baꞌꞌaali masaalaano Qermeloosi Ilaalira gamba assi.’

Israeelete manni Qermeloosi Ilaalira gamba yii. Hakkiinni Eeliyaasi togo yiinsa: ‘Lame wodana ikkitinoonte. Yihowa halaalaancho Maganootiro Yihowa magansidhe. Baꞌꞌaali halaalaancho Maganootiro Baꞌꞌaali magansidhe. Halaalaanchu Magani ayetiro anfeemmo. Baꞌꞌaaliti 450 masaalaano kakkalo kakkalte maganonsa woshshidhona; anino kakkalo kakkale Yihowa woshshiꞌreemmo. Giira soye dawaro qolannohu hakku halaalaancho Maganooti.’ Mannuno maahoyye yii.

Baꞌꞌaali masaalaano kakkalo qixxeessitu. Insa barra woꞌma maganonsa Baꞌꞌaali, “Baꞌꞌaali, eeggatena macciishshinke!” yitanni woxarattanni hossu. Baꞌꞌaali sammi yee giwita, Eeliyaasi togo yaanni qacifati: ‘Qoonqoꞌne naggi assitine huuccidhe! Goxe nooha ikkannona kayissesi.’ Hawarro geeshsha Baꞌꞌaali masaalaano maganonsa woshshiꞌra diagurtino. Huuccattonsa macciishshinohu kayinni dino.

Eeliyaasi kakkalosi kakkallanni darga wore waa aanaho duni. Hakkiinni togo yee huucciꞌri: ‘Yihowa, ballo ati halaalaancho Magano ikkoottota mannu afanno gede assi.’ Hakkawoyintenni Yihowa iiminni giira dirriseenna giira kakkalo ittu. Mannu qoonqonsa naggi asse, ‘Halaalaanchu Magani Yihowa callaati!’ yii. Eeliyaasi kayinni, ‘Baꞌꞌaali masaalaano mittuno gattukki shiiyye!’ yii. Hakko barra, 450 Baꞌꞌaali masaalaano shinoonni.

Baaru giddonni shiimu gomichi fulita, Eeliyaasi Akiaabi togo yii: ‘Biite xeena ganaraatina faradi-gaarekki biddi assidhe minira haꞌri.’ Gomichu gordo kolishshiishi gedensaanni barada xeena gani. Hakkiinni moolle baꞌu. Akiaabi faradi-gaaretenni hadaraasanni xooqi! Eeliyaasi Yihowa kaaꞌleennasi, dode faradi-gaare balaxi! Kayinni hatto yaa Eeliyaasira hakkunni gedensaanni qarru diꞌꞌiillinosi yaateni? Aante noo xaggera tenne daafira ronseemmo.

Elzaabeeli Baꞌꞌaali masaalaano shine gundoonnita macciishshite lowo geeshsha hanqitu. Ise togo yite Eeliyaasira sokka sokku: ‘Ateno gaꞌa tenne masaalaano assini gede asseemmahe.’ Eeliyaasi lowo geeshsha waajjino daafira halallira xooqi. Isi, ‘Xaate ikkinoena shiie’ yee Yihowa huucciꞌrino. Hakkunni gedensaanni lowo geeshsha daafurino daafira haqqichote hunda goxi.

Hedeweelcho sokkaasinchu daye kise, ‘Kaꞌe sagale iti’ yiisi. Eeliyaasi kae laꞌꞌanno woyite mulesi kinchu aana raino timinna maaqqete wayi noota afi. Eeliyaasi sagale itinna waa agi gedensaanni galagale goxi. Sokkaasinchu galagale daye, ‘Haꞌratto doogo seedatena kaꞌe sagale iti’ yiisi. Hakko daafira Eeliyaasi sagale lexxe iti. Hakkiinni Siina Ilaali geeshsha 40 barranna 40 hashsha haꞌrino. Eeliyaasi galara mittu godi giddora ei. Hakkiinni Yihowa togo yiisi: ‘Eeliyaasi, kowiicho massitanni nootto?’ Eeliyaasi togo yee qoli: ‘Israeelete manni ate ledo eino gondooro diigino. Kakkalote dargakkino diigino, masaalaanokki baala shee gudino. Kune aneno shaaera hasanni no.’

Yihowa Eeliyaasi, ‘Hakkiinni fulte ilaalu aana uurri’ yiisi. Umo, lowo bubbe dagge goda gante saꞌu. Hakkiinni baatto huxidhu, hattono giira dirritu. Goofimarchoho Eeliyaasi shiima huuro macciishshi. Hakkiinni uddanotenni alba diphe godu xullichira uurri. Hakkiinni Yihowa Eeliyaasi ‘Xooqqanni noottohu mayiraati?’ yee xaꞌmisi. Eeliyaasi qole, ‘Masaalaanokki shine gundeenna ani calla gatoommo’ yii. Yihowa kayinni togo yiisi: ‘Gatoottohu diate callaati. Israeelete giddo ane magansiꞌrannohu 7,000 ikkanno manni no. Hadhe ate darga Elsai buuri.’ Hakkiinni Eeliyaasi hakkawoyintenni Yihowa hajajinosire assara haꞌri. Yihowa hajajinonkere assinummoro isi kaaꞌlannonkeha lawannohe? Ee, kaaꞌlannonke. Hanni xa moollete yannara ikkinoha mitto coye laꞌno.