Moollete yannara Yihowa Eeliyaasi togo yiisi: ‘Seraphita yinanni katama haꞌri. Hakkiicho mitte gunnitte mancho sagale uyitannohe.’ Eeliyaasi katamu xullicho iillanno woyite, mitte gunnitte mancho haqqe hiiqqidhanna lai. Isi, “Ballo ageemmo waa abbie” yiise. Mancho waa abbitasira hadhanni heedheenna Eeliyaasi, “Ballo shiima timano anga haadhe amoe” yiise. Mancho kayinni togo yitusi: ‘Eemmahe timi dinoewe. Mitto hoowo ikkitanno bulleenna hilicci zayite calla nooe. Hattenne noota aneneetiranna qaaqqiꞌyara tima gaꞌnammaraati.’ Eeliyaasi manchote togo yii: ‘Anera tima uyittaero, Yihowa “baattote aana xeena gana geeshsha bulleekkinna zayitekki digooffanno” yiino.’

Konni daafira, mancho minira hadhe Yihowa masaalaanchira tima gantusi. Yihowa yiinonte gede, isenna qaaqqise moollete yannara sagale dihoogino. Bullee gambayichunni, zayiteno maaqqete giddonni digooffinose.

Mitto barra hattenne gunnitte manchora qarru iillise. Shiimu qaaqqise xiwame reyi. Konni daafira ise Eeliyaasi kaaꞌlie yite huuccidhu. Eeliyaasi qaaqqo angasenni haaꞌre fooqete iimira fuli. Isi qaaqqo daallasaho goxise togo yee huucciꞌri: ‘Yihowa, eeggatena kuni qaaqqi galagale lubbotenni heeꞌranno gede assi.’ Yihowa tenne assasi dhagge ikkitannohu mayiraatiro afootto? Korkaatuno hakkuyira albaanni reyotenni kae egenninohu dino. Qoleno gunnitte manchonna qaaqqise Israeelete gaꞌre diꞌꞌikkino.

Ikkirono qaaqqu reyotenni kae foola hanafi! Hakkiinni Eeliyaasi manchote togo yii: ‘Kuneeti! Qaaqqikki reyotenni kaino.’ Iseno lowo geeshsha hagiidhite Eeliyaasi togo yitu: ‘Ati Maganu manchooti. Korkaatuno ati Yihowa coyiꞌri yiinohere calla coyiꞌratto; hattono woꞌmanka woyite coyiꞌroottori woꞌmannota afoomma.’

Mitto barra Moote Akiaabi Iyiziraeeli katamira noohu mootimmate minesi heeꞌre, maskootete widoonni qole woyinete kaashshi base lai; tini kaashshu base Naabute yinanni manchite. Akiaabi tenne base adha hasiꞌrino daafira Naabute ‘Anera hirie’ yii. Naabute kayinni hira giwi; korkaatuno Yihowa ‘Ragidhinoonni baatto hirtinoonte’ yiino. Akiaabi Naabute gara ikkinore assino daafira naadinosi? Dinaadinosi. Akiaabi lowo geeshsha hanqi. Isi lowo geeshsha hanqe goxinowiinni kaꞌꞌa giwi, sagaleno ita giwi.

Akiaabi minaama busha Mootitte Elzaabeeli iso togo yitu: ‘Ati Israeelete moote ikkootto daafira, hasiꞌrittore assa dandaatto. Naabuteta woyinete kaashshi baatto ani haaꞌreemmahe.’ Hakkiinni Elzaabeeli katamu geerrira togo yite sokka borreessite sokku: ‘Naabute Magano xonino yitine kinnatenni gantine shiiyye.’ Katamu geerri Elzaabeeli yitinonsare assi; hakkiinni Elzaabeeli Akiaabi togo yitu: ‘Xa Naabute reyinona hadhe isita woyinete kaashshi baatto adhi.’

Elzaabeeli beebbate shitinohu Naabute calla diꞌꞌikkino. Ise Yihowa baxannoha lowo manna shitino. Ise kaphu maganna magansidhanno; wole busha coyeno assitanno. Yihowa Elzaabeeli assitannoha busha coye laino. Isi ma assiyya?

Akiaabi reyi gedensaanni, beettisi Iyoraami moohi. Yihowa Elzaabelinna minise manna shee gudanno gede Iyu yinanni mancho soyi.

Iyu faradi-gaaresi gulufe Elzaabeeli heedhannowa haꞌri. Iyoraamino faradi-gaaresi koodhe Iyunni xaadara fuli; hakkiinni isi Iyu ‘Maaho dikeereho?’ yee xaꞌmi. Iyu togo yee dawari: ‘Amakki Elzaabeeli busha coye assitanni heedheenna mayi keeri heeꞌranno!’ Iyoraami xooqe baꞌꞌara faradi-gaaresi badhera qoꞌli; hakkiinni Iyu Iyoraami qalaccotenni qase shiino.

Hakkiinni Iyu Elzaabeeli heedhannohu mootimmate miniwa mari. Elzaabeeli Iyu daanni noota macciishshituti, kuula buudhitenna umo amaxxite fooqete aana heedhe maskootete giddoonni qolte laꞌanni agartu. Iyu minisewa iillita, Elzaabeeli fenjeejjite coyidhu. Hakkiinni Iyu mulese uurrite noo soqqamaanose, “Elzaabeeli woro qoltine tugge!” yiinsa. Insa Elzaabeeli maskootete widoonni uulla qolte tuggeenna uullate gaꞌnite reyitu.

Hakkunni gedensaanni Iyu 70 Akiaabi ooso shiino, hattono Baꞌꞌaali magansiꞌranno manna shee gudino. Yihowa assinannire baala laꞌꞌannotanna busha coye assitannore qorichishannota afitto?