XIINXALLO 14

Qara Hedo Xabbe Leeltanno Gede Assa

Ibiraawoota 8:1

ASSA HASIISSANNOHERE: Macciishshaano lallawo shiqishatto woyite harunsitannohe gede assi; mitte mittenti qara hedo rosu cuꞌmo ledo mayi xaadooshshe afidhinoro xawisi.

KONNE ASSA DANDAATTO GARA:

Rosu mixo wodanchi. Lallawote mixo maatiro hedi; mitte lallawo egenno leddannota, ammansiissannota woy macciishshaano loosoho kakkayissannota ikkitara dandiitanno. Baalanti qara hedo lallawokki mixo wonshitannota ikkase buuxi.

Ateneeto togo yite xaꞌmi: ‘Macciishshaanote tenne hajo daafira mayitanno xaꞌmo heedhansara dandiitanno? Tenne xaꞌmora dawaro afidhu gedensaanni, aantete mayite xaꞌmitara dandiitanno?’ Hakkiinni, qara qara hedo hattee aante garinni qixxaawi; hatto assakki, macciishshaano roso harunsitannonna huwattanno gede hattono ammante adhitanno gede kaaꞌlitanno.
Lallawote cuꞌmo luphi assi. Lallawo hanaffe gudatto geeshsha, cuꞌmonnita qara qaalla wirro wirro qummi assitanni woy addaarricho tiro afidhino qaalla horoonsidhanni rosu cuꞌmo luphi assi.
Qara qara hedo xabbe leeltanno gede assi. Rosu cuꞌmo ledo xaadooshshe afidhinotanna uyinoonnihe yanna giddo dancha gede assite xawisa dandaattota qara hedo calla doori. Qara hedo batissooti, mitte mittenta qara hedo xawisse kuli, hattono mitte qara hedo xawisse wolete saꞌꞌatto woyite taxxi yii.

Macciishshaano harunsa dandiitanno gede qara qara hedo bitimaho kuli; woy macciishshaano qaaga dandiitanno gede, lallawote jeefora galagalte qummi assi.