Kiristaanu Heeshshonna Soqqanshote Xiinxallote Maxaafichora Qummeessinoonni Borro
© 2025 Watch Tower Bible and Tract Society of Pennsylvania
ARFAASA 5-11
MAGANU QAALI GIDDO NOOTA MUXXE JIRO ISAYAASI 17-20
“Mulqidhannonkeri . . . Hatto Ikkitanno”
‘Ane Gashshooti Tenne Alameha Diꞌꞌikkino’
16 Ninkeno insa gede soorramme biddi yaa hasiissannonke! Qullaawu Maxaafi mannu ooso keeru nookkihunna shafamannohu baaru dambali ledo taashshanno. (Isa. 17:12; 57:20, 21; Aju. 13:1) Poletiku hajo mannu mereero babbadooshshe kalaqqaranna finqille kayissara dandiitanno; ninke kayinni keerinkenna mittimmanke baꞌannokki gede sharrama hasiissannonke. Qoleno tenne bebbeehantino alame giddo, Yihowa dagasi mereero mittimma noota laꞌꞌanno woyite lowo geeshsha hagiidhannoti egennantinote.—Soffooniyaasi 3:17 nabbawi.
Bebbeehantino Alamera Anga Wodhitinikki Heedhe
4 Heeꞌnoommo gobba gashshooti salaame noohanna addu magansiꞌrara injaannoha ikkara dandaanno. Ikkollana, Sheexaanu alame baꞌanno yanna shiqqanno wote poletiku hajora anga wodha giwa shota ikka hoogankera dandiitanno. Tini alame ‘sumuu yaannokkinna’ “ani yoommoti calla ikkito” yaanno manni woꞌminota ikkitinohura bebbeehantinotenna gosoomu woꞌminote. (2 Xim. 3:3, 4) Mite gobbara noo roduuwinke gobbansa gashshooti heddukkinni soorrameenna poletiku hajora anga wodha giwa qarra ikkitinonsa. Poletiku hajora anga wodha hoogate xaanni murciꞌra hasiissannonkehu mayiraatiro huwatitto? Fonqolu tuncu yaanke geeshsha sammi yine agadhinummoro hatte yannara Maganu seera lashshi assineemmohanna poletiku hajora anga wodhineemmoha ikkara dandaanno. Ikkina bebbeehantino alame giddo poletiku hajora anga wodhinummokki heeꞌrate qixxaawa dandiineemmohu hiittoonniiti? Hanni tenne assate kaaꞌlitannota shoole qara coyibba laꞌno
ip-1 198 guf. 20
Yihowa Daga Qorichishino Gara
20 Tini may guma abbituyya? Isayaasi togo yiino: “Hashsha hedeweelcho masille kalaqqanno; soodanno woyite kayinni mittuno dargaho diheedhanno. Mulqidhannonkerinna horritannonkeri hatto ikkitanno.” (Isayaasi 17:14) Batinyu manni Yihowa daga mulqiꞌrino, beebba assiꞌrino hattono shollishshino. Addu Kiristaani alamete noote jajjabba ammaꞌno wido diꞌꞌikkino woy ikka dihasiꞌranno; hakko daafira ammaꞌnonsara laalaattannorinna gibbannonsari tidhitinokkiri gede assite laꞌannonsa. Ikkirono Maganu manni qarrinsa baꞌꞌannoti ‘soodimaru’ yanna rakke dagganni noota addaxxanno.—2 Teselonqe 1:6-9; 1 Pheexiroosi 5:6-11.
Maganu Qaalinni Ronseemmore
Ati Tenne Afootto?
Masaalaanchu Isayaasi 2,500 saꞌꞌanno diri albaanni, “Itiyophiyu Wayibbara widoonni noo gosa” “sokkaano haqalunni seekkinoonni markaawe gulufisiisse” sokkannota borreessino. Yannate gedensaanni masaalaanchu Ermiyaasi Meedooninna Faarisi gosa Baabiloone horritanno yannara, Baabiloonootu xooqqe fultannokki gede “haqalunni seekkinoonni yowolonsa” giirtannota masaalino.—Isa. 18:1, 2; Erm. 51:32, NW.
Hundi waro haqalunni yowolo seekkinannita umme fushshinoonni taje leellishshanno; ninke Maganu ayyaaninni borreessinoonniha Qullaawa Maxaafa xiinxallineemmore ikkinoommo daafira tini xagge diꞌꞌikkitinonke. (2 Xim. 3:16) Arkiyolojete xiinxallaano affinori maati? Insa hunda Gibitsete gobbara haqalunni yowolo seekkinannita leellishshanno taje affino.
Lallawo
lmd guwuursha A naxiwe 14
Maganu iso huucciꞌnammora hasiꞌranno.—Far. 62:8; 65:2; 1 Phe. 5:7.
ARFAASA 12-18
MAGANU QAALI GIDDO NOOTA MUXXE JIRO ISAYAASI 21-23
Shebinara Iillinorinni Ronseemmore
Maganu Seejjannonkehu Baxannonke Daafiraati
7 Seejjo kaaꞌlitanno gara huwatate konninni aanchine Yihowa seejjinonsahu lamu manni lawishsha laꞌneemmo. Umihu Moote Hiziqiyaasi diro heeꞌrinoho Shebinaati; wolu yannankera nooho Rodoo Girehaamiiti. Shebina ‘mootete mini gashshaancho’ ikkino daafira lowo silxaane noosiho. (Isa. 22:15) Ikkollana isi naaxxe umisira ayirrinye afiꞌra hasiꞌrino. Wole agurina Shebina isiniitira biifado waamma seekkiꞌrino, hattono ‘faradi gaaretenni’ haꞌranno.—Isa. 22:16-18.
8 Shebina umisira ayirrinye hasiꞌrino daafira, Maganu ‘mootimmate aaninni dirrise,’ isi bayicho Eeliyaaqeemi worino. (Isa. 22:19-21) Kuni ikkinohu Sooriyu Moote Senaakireemi Yerusaalame qasate hedanni no yannaraati. Shiima yanna gedensaanni Senaakireemi Hiziqiyaasinna Yihudu manni waajje anga aanno gede assitara roorrootasi lowo olanto ledo soyino. (2 Mot. 18:17-25) Hatte yannara kuri roorroota hasaawisanno gede Eeliyaaqeemi sonkoonni; kayinni isi callisi dihaꞌrino. Isi lamu manni ledo haꞌrino; insa giddo mittu Shebinaati; hatte yannara isi borreessaancho ikke no. Tini Shebina seejjinoonnisi daafira hanqinokkitanna umosi heeshshi asse uyinoonnisita albitenni ajjanno qoosso adhinota leellishshanno. Ikkina, isi xaggenni maa ronseemmo? Hanni tenne xaggenni ronseemmoha sase coye laꞌno.
9 Umihunni Shebina qoossosi hoogino. Isi lawishshi “booꞌna baote widira haadhe hadhanno; boollaqiꞌrano uwate widira qolte massitanno” yaanno qorowishsha qaangeemmo gede assannonke. (Law. 16:18) Songote giddo qoosso noonkeha ikkara dandaanno; tenne qoossonni kainohunni ayirrinsanninkeha ikkara dandaanno; tenne yannara umonke heeshshi assineemmo? Noonke dandoora woy loonsoommohu danchu loosira galatu hasiisannosihu Yihowa ikkinota ammanneemmo? (1 Qor. 4:7) Soqqamaasinchu Phaawuloosi togo yee borreessino: “Mitti mittiꞌne Maganu uyinoꞌne ammaꞌna bikkinni umoꞌne heeshshi assitine laꞌe ikkinnina, hasiisannohura aleenni heddinanni [booꞌnitinoonte].”—Rom. 12:3.
Maganu Seejjannonkehu Baxannonke Daafiraati
10 Layinkihunni Yihowa Shebina seejjasi ‘Xaate isi biddi diyaannoho’ yee hedinokkita leellishshanno. (Law. 3:11, 12) Kuni yannankera songote giddo noonsa qoosso hoogginorira dancha lawishshaati! Insa qoossonsa hooggino daafira hanqa woy koffi yaa agurte seejjinoonninsa seejjo Maganu baxannonsata leellishshannohu gede assite laꞌꞌanna dandiitu deerrinni Yihowara woꞌmu wodaninni soqqamate sharrama dandiitanno. Anninke Yihowa umonke heeshshi assinummoro, ‘Horonta soorrante biddi diyitanno’ yee hedannokkita qaagi. (1 Pheexiroosi 5:6, 7 nabbawi.) Maganu baxillunni kae aannonke seejjo soorramme biddi yineemmo gede kaaꞌlitannonke; konnira Maganu angara shaqqadu dori gede ikka hasiissannonke.
Maganu Seejjannonkehu Baxannonke Daafiraati
11 Sayikkihunni, Yihowa Shebinara assinori seejjo seejjate qoosso noonsarira lawishshaho annahonna amate, hattono songote cimeeyyera dancha lawishsha ikkannonsa. Insa maa rosa dandiitanno? Yihowa seejjanno seejjo isi cubbo giwannota calla ikkikkinni cubbo loosino manchira hedannota leellishshanno. Ati ooso iloottoha ikkiro, woy songote cimeessaatiro seejja hasiissannohe yanna heedhara dandiitanno; tenne yannara busha coye giwattota calla ikkikkinni soꞌro loosino manchira hedattota leellishshe Yihowa faale haꞌratto?—Yih. 22, 23.
Maganu Qaalinni Ronseemmore
w06 12/1 11 guf. 2
Isayaasi Maxaafita Luphi Yitino Hedo—Gafa 1
21:1—“Baaru gami halallitte” yinihu hiikkonne qoqqowooti? Baabiloonete mule baaru nookkiha ikkirono, konni garinni kulloonnihu diru kiiro Efiraaxisinna Xeegiroosi lagi woꞌme daye qooxeessa amade garino waa woy ‘baara’ ikkannohuraati.
Lallawo
lff roso 48, bitima nna naxiwe 1-2
Jaalla Hayyotenni Doodhi
Muli jaalla faffote yannara ledonke hagiidhitanno; qarru yannarano kaaꞌlitannonke. Ikkollana Qullaawu Maxaafi dancha jaala ikkannohu baalanka manna ikkinokkita kulanno. Ikkina dancha jaalla doodha dandaattohu hiittoonniiti? Hanni aante noo xaꞌmuwa laꞌno.
1. Doodhatto jaalla seekkitahera woy huntahera dandiitannohu hiittoonniiti?
Duucha woyite, ledo honseemmo manni gede ikka rakkannonke. Hakko daafira, mitteenni xaandeno ikko Interneetete widoonni ledo honseemmo manni seekkankera woy hunankera dandaanno. Qullaawu Maxaafi yaannonte gede, “Egennaamu ledo hosannohu egennaamo ikkanno; hawanyootu [Yihowa baxxannokkiri] jaali kayinni qarru aana uwanno.” (Lawishsha 13:20) Yihowa baxxannorenna iso magansidhannore jaalla assiꞌrittoro, isiwa gamba yite heeꞌratto gedenna gara ikkinore doodhatto gede kaaꞌlitannohe. Yihowa baxxannokkiri ledo muli jaalooma kalaqiꞌra kayinni isiwiinni xeertiꞌneemmo gede assitannonke. Qullaawu Maxaafi jaalla hayyotenni doodhineemmo gede amaalannonkehu iseraati. Magano baxxannore jaallanke assiꞌnummoro, kuni jaaloomi insarano ninkerano kaaꞌlannonke. Togoo jaaloomi ‘mimmito jawaachinsheemmonna dhaambeemmo’ gede kaaꞌlannonke.—1 Teselonqe 5:11.
2. Doodhatto jaaloomi Yihowa hagiirsiisara woy dadillisara dandaannohu hiittoonniiti?
Yihowa jaalla qorophe doodhanno. “Ayirrissannosirira baalaho Kaaliiqi [“Yihowa,” NW] jaalansaati.” (Faarso 25:14) Yihowa baxxannokkire jaallanke assiꞌnummoro, isira mayi macciishshamannosi? Lowo geeshsha dadillanno! (Yaiqoobi 4:4 nabbawi.) Busha jaalooma gimbeemmoha ikkironna isiwanna iso baxxannoriwa gamba yine heeꞌneemmoha ikkiro kayinni, Yihowa hagiidhanno.—Faarso 15:1-4.
ARFAASA 19-25
MAGANU QAALI GIDDO NOOTA MUXXE JIRO ISAYAASI 24-27
“Isi Maganonkeeti”
cl 15 guf. 21
“Isi Maganonkeeti”
21 Mittu shiimu qaaqqi jaallasira annisi daafira kulanni, hagiidhe fenjeejjanni, “Ane annaatiwe” yaanna affe egenootto? Hakko qaaqqinte gede, Yihowa soqqamaano isinni fenjeejjitanno gede assannonsari lowori no. Qullaawu Maxaafi ammanamino manni, “Isi Maganonkeeti” yaanno yanna daggannota kulanno. (Isayaasi 25:8, 9) Yihowa akatta daafira roore affanni haꞌritto kiiro, isi gedee Anni nookkita albinni roore huwatatto.
Yesuusi Maalaletenni Daabbo Batisinota Kultanno Xaggenni Ronseemmore
14 Yesuusi “Techota barru sagale uyinke” yine huucciꞌneemmo gede rosiisinke woyite, “Fajjokki iima ikkitanni noonte gede, uullate aanano ikkito” yine huucciꞌneemmo gedeno rosiisinonke. (Mat. 6:9-11) Hatte yannara heeshsho hiittoota ikkitannoha lawannohe? Qullaawu Maxaafi Maganu fajjo uullate aana ikkitanno woyite dancha sagale afiꞌneemmotano kulanno. Isayaasi 25:6-8 kultanno garinni, Yihowa Gashshootira falakkinoti dancha sagale heedhanno. Faarso 72:16 togo yitanno: “Baatto gide laashshito; ilaallate aana jajju woꞌmo.” Konni gidinni baxatto sagalenna wole sagale loosiꞌrate quqquxamootto? Hatteeno agurranna woyine kaasidhe laalose ittanni hagiidha dandaatto. (Isa. 65:21, 22) Hakko heeꞌranno manni baalu kuri coyibbanni hagiidha dandaanno.
Yihowa Baxilli Kaaꞌlannonke Gara
11 Hanni Gannate ikkitino uullara hiittoo heeshsho heeꞌrattoro hedi. Dhiwammeemmo woy reyineemmo yine diyaandeemmo. (Isa. 25:8; 33:24) Yihowa gara ikkitino hasattonke baala wonshanno. Hatte yannara maa rosa hasiꞌratto? Saadate daafira, muuziiqa godoꞌlinanni gara hattono misile kayinsanni gara rosa hasiꞌrattoha ikkara dandaanno. Hakkiicho akeeka fushshinanni gara, mine minnanni garanna baatto loonsanni gara afino manni hasiisannoti dihuluullissannote. Qoleno addi addi looso loosannohu, lawishshaho sagale qishannohu, addi addi uduunne seekkannohunna uulla biifisanno manni hasiisanno. (Isa. 35:1; 65:21) Albillitte hegerera heeꞌneemmo daafira hasiꞌnummo dandoo lossiꞌneemmo yanna heedhannonke.
12 Reyotenni kaꞌꞌannore anga fane haaꞌra lowo geya hagiirsiissanno! (Soq. 24:15) Hanni Yihowa kalaqinohu, batinyu kalaqami daafira xiinxalline isi daafira albinni roore rosa mageeshshi geeshsha hagiirsiissannorono hedi. (Far. 104:24; Isa. 11:9) Wolu baalunkunni roore kayinni horo ninkeneeto bushiinshummokkinni Yihowa magansiꞌra lowo geeshsha hagiirsiissanno! ‘Cubbunni afiꞌnannihunni yannate geeshshi hagiirrira’ yine konne baala atoote hooga hasiꞌneemmo? (Ibi. 11:25) Hasiꞌneemmokkiti egennantinote! Konne atoote afiꞌrate yine xaa yannara agurreemmohu aye coyino gaabbisannoha diꞌꞌikkino. Gannate ikkitino uullara heeꞌra hexxo calla ikkite gattannokkita qaagi. Muli yannara tini hexxo woꞌmitanno. Yihowa baxillunni, Beettosi aa hoogoommenkero konne atoote afiꞌra didandiineemmo!
Maganu Qaalinni Ronseemmore
Shesho Afiꞌrate Alba Yihowawa Higge
15 Yihowa mannasi albillitte iillannonsa coyirano qixxeessinonsa. Isi Isayyaasi maxaafi giddo dagasira togo yee kulinonsa: “Mannaꞌya, miniꞌnera eꞌine cufana cufidhe; hanqu saꞌꞌa geeshsha shiima yanna maaxamme.” (Isa. 26:20) Tini masaalo umo woꞌmitinohu Moote Qiroosi Baabiloone horre qeeli yannara ikkikki digatino. Mittu hundihu Giriikete xagge borreessaanchi, Qiroosi Baabiloone ei yannara “[olantosi] gobba affu manna baala shitanno gede hajajinota” coyiꞌrino. Hanni Baabiloonete heeꞌranno manni mageeshshi geeshsha waajjinoro hedi! Qafadote giddo noohu Yihudu manni kayinni Yihowara hajajamino daafira gatinoha ikkara dandaanno.
Loonse Leellinshanni Ikkito
ijwbq birxicho 160
Yesuusa Maganu Beettooti Yinoonnihu Mayiraati?
Qullaawu Maxaafi mayyaanno?
Qullaawu Maxaafi duucha basera Yesuusa “Maganu Beetto” yaanno. (Yohaannisi 1:49) “Maganu Beetto” yaamamasi, Yesuusirano ikko wolu baalunku kalaqamira heeshsho uyinohu Magano ikkinota leellishshanno. (Faarso 36:9; Yohaannisi Ajuuja 4:11) Qullaawu Maxaafi, Maganu mannu gede ooso ilannota dikulanno.
Qullaawu Maxaafi sokkaasineno “Maganu ooso” yaanno. (Kalaqama 6:2) Qoleno Qullaawu Maxaafi umi mancho Addaami “Maganu Beettooti” yaanno. (Luqaasi 3:38, Haaro Gondooro) Ikkollana, Maganu kalaqami giddo Yesuusi umiha ikkino daafira, hattono Maganu xaaddotenni kalaqinohu iso ikkino daafira Qullaawu Maxaafi Yesuusi Maganunniha bayira Beetto ikkinota kulanno.
Yesuusi uullara daye ilamara albaanni heeꞌrannohu iimaati?
Yesuusi uullara daara albaanni maa assanno?
Yesuusi uullara daye ilamara albaanni heeꞌrannohu iimaati?
Ee. Yesuusi uullara daye mancho ikke ilamara albaanni iima ayyaanu kalaqo ikke heeꞌrino. Yesuusi umisi, “Ani gordunni dayoommo” yiino.—Yohaannisi 6:38; 8:23.
Maganu wole baalankare kalaqara albaanni balaxe Yesuusa kalaqino. Qullaawu Maxaafi Yesuusi daafira togo yaanno:
◼ “Isi kalaqamu baalunkura umiidiho.”—Qolasiyaasi Sokka 1:15.
◼ Isi “Maganu kalaqino kalaqamira kaimaho.”—Yohaannisi Ajuuja 3:14.
“Hundinni kayise hegerera ikkannohu” yine masaalloonni masaalo Yesuusi aana woꞌmitino.—Mikiyaasi 5:2; Maatewoosi 2:4-6.
Yesuusi uullara daara albaanni maa assanno?
Isira iima lowo silxaane noosi. Yesuusi “Annaꞌya, kalqe kalaqantara albaanni, atewa nooe ayirrinyinni xaano ayirrisie” yee huucciꞌri yannara iima noosi silxaane kulino.—Yohaannisi 17:5.
Isi Annisi wole baalanka kalaqama kalaqi woyite looso kaaꞌlino. Yesuusi “qara loosaasincho ikke” Maganu ledo loosino. (Lawishsha 8:30, NW) Qullaawu Maxaafi Yesuusi daafira kulanni togo yaanno: “Maganu [wole] baalanka coye kalaqinohu isinniiti.”—Qolasiyaasi Sokka 1:16.
Maganu wole baalanka kalaqama kalaqinohu Yesuusi widoonniiti. Kalqete alamenna sokkaasine kalaqinohuno isi widoonniiti. (Yohaannisi Ajuuja 5:11) Mito widoonni laꞌniro, Maganunna Yesuusi mitteenni loossino gari, maandisootunna gimbanyootu loossanno garinniiti. Maandisootu akeeka fushshitanno, gimbanyootu kayinni hakko akeeki garinni looso loossanno.
Yesuusi Qaale ikke soqqamino. Qullaawu Maxaafi Yesuusi mancho ikkara albaanni ‘Qaale’ ikkinota kulanno. (Yohaannisi 1:1) Tini yaatto Maganu wole ayyaanu kalaqora hedosinna biddishshasi kulate Beettosi horoonsiꞌrinoha ikkara dandaanno.
Qoleno Yesuusi Magano riqiwe uullate aana heeꞌranno mannira sokka sayisikkinni digatino. Maganu Edeni gannatete Addaaminna Heewanira biddishsha uyi woyite Yesuusa Qaale asse horoonsiꞌrikkinni digatino. (Kalaqama 2:16, 17) Qoleno halalla Israeelete daga massagihunna qaalisira hajajantara kullinsa sokkaasinchi Yesuusa ikkikkinni digatino.—Fulo 23:20-23.
ARFAASA 26–AMMAJJE 1
MAGANU QAALI GIDDO NOOTA MUXXE JIRO ISAYAASI 28-29
Afiiꞌnenninna Wodaniꞌnenni Yihowa Ayirrisse
ip-1 299 guf. 23
Isayaasi Yihowa Loosannohu “Anfe Egenninoonnikki” Loosi Daafira Masaalanno
23 Yihudunniti ammaꞌnote murrooti ayyaanaamittete coye wodanchitannore ikkitinota coyidhannoha ikkirono Yihowa agurtino. Insa garanna gara ikkinokkiri daafira uminsata soꞌrote hedo rosiissanno; ammana noonsakkita leellishanno assootensa, amanyootu maaeellensa hattono mannu Maganu ayirrinye hooganno gede assa qarra afidhinokkihu gede assite coyidhanno. Yihowa “maalaꞌlinanni coye” assenna ‘anfe egenninoonnikki’ looso loose insa assitino bunshera loosinsa guma mixxitanno gede assanno. Isi togo yiino: “Tini gosa afuunni ayirrissannoe; wodanunni kayinni anewiinni faffe no. Magansidhannoehuno mannu woga wonshateeti. Kunnira, maalaꞌlinanni coye hoode hoodete abbanni dhaggeeffattanno gede asseemmonsa. Egennaammu egenno huneemmo; hayyoolete hayyo diigeemmo.” (Isayaasi 29:13, 14) Yihowa Alamenniha Wolqaataamo Gashshoote Baabiloone horoonsiꞌre kaadaasine woꞌmitinota Yihudu ammaꞌno fee hunate coye injeessanno woyite, insa noonke yitino hayyonna wodanchano baꞌanno. ‘Ninke hayyootaho’ yitannori umi xibbi diro heedhinori Yihudu ammaꞌno massagaano mannu ballehanno gede assitu yannara togoori ikkino. Xaa yannara heeꞌrannohu kaphu Kiristaanirano togoori iillannonsa.—Maatewoosi 15:8, 9; Rooma 11:8.
Keeraanchu Manchi Gufiꞌranno Gede Assasira Dandaannori Dino
7 Yesuusi lawisiisaano ikkitinore ammaꞌnote murroota, mannu Yihowa garunni magansiꞌranno gede rosiissannokki daafira waajjikkinni boroorino. Lawishshaho isi, Farisootu annuwansanna amuuwansa towaatantenni roore, anga hayishshiꞌnanni gari huluullannonsa daafira insa lawisiisaano ikkitinota anfanni gede assino. (Mat. 15:1-11) Yesuusi rosaano isi coyiꞌrinore dhagge assidhinoha ikkara dandaanno. Insa iso “Konne coyiꞌritto coye macciishshite Farisootu soꞌrantinota afoottoni?” yite xaꞌmitino. Yesuusi togo yee qolino: “Gordu Anniꞌya kaasinokki kaashshi baalu buqqisamanno. Insa illiweelte heedhe illiweeloota massaggannoreetina agurre. Illiweelu illiweelo massagiro lamunku balete ubbanno.” (Mat. 15:12-14) Ammaꞌnote murrooti Yesuusi coyiꞌrinorira hanqitinoha ikkirono, isi kayinni halaale kula diagurino.
Hegerera Yihowa Wosina Ikkitine Heedhe!
8 ‘Wodaninsanni halaale coyidhannori’ mannu noowa Maganoho hajajantannore labbe badheenni seerasi didiigganno. (Isa. 29:13) Insa doga qorophitanno. Doganno manchi Yihowa aanno biddishshi woꞌmanka woyite kaaꞌlannoha ikkasi huluullamanno. (Yai. 1:5-8) Isi mittu coyi hakkeeshshi geeshsha dihasiisannoho yee hedannoha ikkiro Yihowara hajajama hoogara dandaanno. Hakkiinni isi Yihowa seera diigasi qarra abbitannosikkiha lawisiro roore bunshe assa hanafanno; tini magansiꞌrasi Yihowa albaanni waaga afidhinokkita ikkitanno gede assitanno. (Ros. 8:11) Ninke kayinni baalunku coyinni ammanammoommore ikka hasiꞌneemmo.
Maganu Qaalinni Ronseemmore
Ago Agate Daafira Maganu Aanno Amaale Harunsi
Ago ageemmohu worba ikkoommota leellishateeti? Mitu budira ago duucha hinge woy quwa sayinse aga rosantinotenna qarra diafidhinote. (1 Phe. 4:3) Kayinni 1 Qorontoosi 16:13 togo yite jawaachishshannonke: “Baqqi yitinoonnire ikke; ammanatenni uurre; jawaatte; kaajje.” Addinta ago aga mittu manchi worba ikkanno gede kaaꞌlitanno? Horonta dikaaꞌlitanno. Ago aga mittu manchi garunni hedannokki gedenna dancha doorsha doodhannokki gede assitanno. Hakko daafira ago quwa sayise aga worbimma ikkitukkinni gowwimmate. Isayaasi 28:7 ago quwa sayise aganno manchi doogo hawannotanna dimbe gaggawannota kultanno.
AMMAJJE 2-8
MAGANU QAALI GIDDO NOOTA MUXXE JIRO ISAYAASI 30-32
Yihowa Qooli Giddo Goꞌle
w01 11/15 16 guf. 7
Yihowa Golonkeeti
7 Yihowa golonke assiꞌnoommohura aante noo hedo jawaante ikkitannonke: “Qoolisinni golannohe; towatannohe daafira keere heeꞌratto; halaalisi haꞌlannohe; agarannohe.” (Faarso 91:4) Qoolase wanga assite caacurrese agadhitanno ceicho gede, ninkeno Maganu agarannonke. (Isayaasi 31:5) Isi ‘Qoolisinni golannonke.’ Qoollasenni cea caacurrese hanqaffe itannonsariwiinni agartannonsa. Ceate caacurri qoolise giddo beꞌe yiikkinni heeꞌrannonte gede, ninkeno Yihowahu lawishshu qooli hunda beꞌe yinummokkinni heeꞌneemmo; mayira yiniro heeꞌneemmohu addu Kiristaani noote Yihowa dirijjite giddooti.—Ruuti 2:12; Faarso 5:1, 11.
Qarru Yannara Yihowa Kaaꞌlannohe
13 Assa hasiissannonkere. Wolootunniwa gamba yaate sharrami. Wolootunniwa gambo gimbummoro halashshine heda hoongammora, uminke daafira calla hendammoranna iillanni noonke qarra calla illachinshammora dandiineemmo. Hatto ikkiro, dancha doorsha doodha qarra ikkitankera dandiitanno. (Law. 18:1) Hige roorenkanni buutote qarri amadannonke woyite mito woyite calluwinke heeꞌra hasiꞌneemmoha ikkara dandaanno. Ikkirono seeda yanna callootinke heeꞌneemmoha ikkiro, Yihowa ninke kaaꞌlate horoonsiꞌranno faro gatte baꞌannonke. Hakko daafira shota ikka hoogirono qarru yannara miniꞌne manni, jaallakki woy songote cimeeyye kaaꞌlitannohe woyite maahoyye yii. Yihowa ate kaaꞌlate insa horoonsiꞌranni noohu gede assite hedi.—Law. 17:17; Isa. 32:1, 2.
Yihowa “Kaajjishannoꞌne”—Hiittoonni?
19 Hexxokki kaajjishiꞌra dandaattohu hiittoonniiti? Lawishshaho hexxokki hegerera uullate aana heeꞌra ikkituro, Qullaawu maxaafi Gannatete daafira kulannore nabbawi hattono hiinci. (Isa. 25:8; 32:16-18) Haaro alamera heeshsho hiittoota ikkitannoro hedi. Hakko noottohu gede assite hedi. Ayeoonni xaadattoro, hiittoo huuro macciishshattoronna hakka woyite mayi macciishshamannohero hedi. Konni garinni hiinca dandaatto gede, borruwankera fultinota gannate ikkitino uulla leellishshanno misilla woy Haaro Alame Dagganno, Yanna Gambissino, hattono Hatte Yanna Hedi yitannota muuziiqu viidiyo lai. Haaro alamera heeꞌneemmo heeshsho woꞌmanka woyite hendeemmoha ikkiro, xa iillannonke qarri ‘shiimanna saꞌꞌannoha’ ikkinota qaangeemmo. (2 Qor. 4:17) Yihowa uyinohe hexxo widoonni jawaachishannohe.
Maganu Qaalinni Ronseemmore
Yihowa Cincitine Agadhitinanni Woyite Hagiirraamma Ikke
Qullaawu Maxaafi togo yaanno: “Kaaliiqi maaraꞌnera qixxaawe [“cince agadhe” NW] no. Kaaliiqi taashshanno Magano ikkino daafira, mararinoꞌne; kunnira Kaaliiqa hexxitannori baꞌraadhinoreeti.” (Isa. 30:18) Isayyaasi tenne hedo borreessinohu haxawarrootu Ayihudete manniraati. (Isa. 30:1) Ikkirono Ayihudete manni giddo mitu ammanaminoho; tini hedo insara hexxo heedhannonsa gede assitannote. Tini hedo xaa yannara noote ammanantinote Yihowa soqqamaanorano hexxo heedhannonsa gede assitannote.
Yihowa cince agadhe noo daafira ninkeno cincine agadha hasiissannonke. Isi tenne busha alame hunanno yanna hirqe no; qoleno hakku barrinna saate iillita geeshsha cince agadhe no. (Mat. 24:36) Hatte yannara Sheexaanu Yihowanna iso magansidhannore kassasino kisse kapho ikkase xabbe leeltanno. Hakkiinni Yihowa Sheexaanenna isi wido ikkitinore baala hunanno; ‘ninke kayinni maarannonke.’
AMMAJJE 9-15
MAGANU QAALI GIDDO NOOTA MUXXE JIRO ISAYAASI 33-35
“Techo Geeshsha Heeꞌrankera Kaiminke Isooti”
Qarru Yannara Yihowa Kaaꞌlannohe
7 Qarra ikkannonke coye. Buutote qarri amadannonke woyite, hendeemmo gari, ikkitonkenna akatinke soorramara dandaanno. Gara ikkitinokkiti addi addi hedo dagganni waaddankera dandiitanno. Aleenni kulliti Aana minaannise Luwiisi reyihu gedensaanni addi addi hedo waaddinoseta coyidhino. Ise togo yitino: “Mito woyite quwa sae yaadeemma; hattono aneneeto busha asseemma. Qoleno isi reyino daafira giirameemma.” Hakkii saeno Aanara callimma macciishshantannose; hattono konni albaanni Luwiisi dancha gede loosanno looso xa ise loosa hasiissannose daafira caaccaabbanno. Mito woyite ise dambalu shafanno baari giddo noohu gede assite heddanno. Ninkeno togoo hedo waaddannonke woyite Yihowa kaaꞌlannonkehu hiittoonniiti?
8 Yihowa kaaꞌlannonke gara. Isi teesiisannonketa buuxisinonke. (1 Pheexiroosi 5:10 nabbawi.) Baaru aana dambalu kaꞌꞌanno woyite markaawe lowo geeshsha shashshafantara dandiitanno. Togoori kalaqamannokki gede batinye markaawera kaꞌanna kawaanni markaawe shashshafantannokki gede assannore worranni. Kuni worranni coyi markaawe lowo geeshsha shashshafantannokki gede assanno; hattono markaawete gidde noo manni beꞌe yiikkinni haꞌra dandaanno. Ikkollana markaawe shashshafantannokki gede assanno uduunnichi roore kaaꞌlannohu markaawe alba higge hadhanno woyiteeti. Hatteente gede ninkeno qarru amadannonke woyite Yihowara ammanamme soqqama agurreemmokkiha ikkiro, isi teesiisannonke.
Fonqolu Iillinkerono Hagiirrinke Baꞌꞌannokki Gede Assiꞌra Dandiineemmohu Hiittoonniiti?
10 Mala: Yihowa hayyo aannohe gede huucciꞌri. Iillannonke qarra dandiine saꞌꞌate, gara ikkinore assineemmo gede hayyo aankera balanxe Yihowa huucciꞌra hasiissannonke. (Yaiqoobi 1:5 nabbawi.) Yihowa huuccattonkera bayichonko dawaro qolinokkiha lawinkero ma assa hasiissannonke? Agurrummokkinni huucciꞌra hasiissannonke. Yihowa hayyo aannonke gede agurrummokkinni huucciꞌneemmotera dicaaccaawanno. Hattono dihanqannonke. Iimi Anninke iillinonke fonqolo dandiine saꞌꞌate kaaꞌlitannonke hayyo aannonke gede huucciꞌnummoro aannonke. (Far. 25:12, 13) Isi iillinonke fonqolono afino daafira mararannonke, hattono ninke kaaꞌlate quqquxamanno. Tini hagiidhineemmo gede assitannonke! Ikkina Yihowa hayyo aannonkehu hiittoonniiti?
11 Yihowa Qaalisi widoonni hayyo aannonke. (Law. 2:6) Tenne hayyo afiꞌrate Qaalesinna Qullaawu Maxaafi aana xintantino borro xiinxalla hasiissannonke. Ikkollana egenno gamba assiꞌratenni sainore assa hasiissannonke. Maganu aannonke amaale loosu aana hosiinse isi hayyo harunsa hasiissannonke. Yaiqoobi, “Qaalesi guuttinannire ikke ikkinnina, . . . macciishshaasine calla ikkitinoonte” yiino. (Yai. 1:22) Maganu aannonke amaale harunsineemmoha ikkiro, keere banxeemmore, owaatanna gatona yineemmore ikkineemmo. (Yai. 3:17) Tini akatta hagiirrinke baikkinni iillannonke fonqolo baala dandiine saꞌneemmo gede kaaꞌlitannonke.
ip-1 352-355 guf. 21-22
‘Hakko Heeꞌranno Manni Giddo, “Dhiwamoommo” Yaannoha Dianfanni.’
21 Ikkirono Isayaasi masaalo yannankerano woꞌmitanni no. Xaa yannarano Yihowa manni ayyaanaamittetenni huranni no. Insa kaphu rosinni lawishshaho lubbo direyitanno, Maganu Sillaaseeti yaannohunna gaannaamete giira daafira kullannihu kaphu rosinni keere fultino. Insara amanyoote bainore assatewiinni xeertidhanno gedenna dancha doorsha doodhitanno gede kaaꞌlannonsahu amanyootu biddishshi noonsa. Yesuusi Kiristoosi wodote kakkalo ikkinonsa daafira, insara Maganu albaanni danchu suꞌminna keeraanchu tiiꞌꞌi noonsa. (Qolaasiyaasi 1:13, 14; 1 Pheexiroosi 2:24; 1 Yohaannisi 4:10) Tini ayyaanaamittete hurre fayyimmateno kaaꞌlitanno. Lawishshaho amanyootu maaeellenna sijaara aga qorophanno Kiristaani, siimu xaadooshshinni taraawannonna mitu garihu kaanserete dhibbinni gatanno.—1 Qorontoosi 6:18; 2 Qorontoosi 7:1.
22 Kayinni Isayaasi 33:24 noo hexxo Armagedooni gedensaanni Maganu abbannote haaro alamera woꞌmunni woꞌma woꞌmitanno. Buuraminohu gashshooti hunda mannu ooso ayyaanaamittete hurrenna taalle nookkita ordu fayyimma afidhanno. (Yohaannisi Ajuuja 21:3, 4) Sheexaanu alame baꞌuhunni shiima yanna gedensaanni, Yesuusi uullate aana heeꞌre loosino gedee maalale uulla woꞌmate aana loosannoti dihuluullissannote. Ballootu laꞌanno, macciweelootu macciishshitanno, hattono naafootu lekkansanni hadhanno! (Isayaasi 35:5, 6) Tini, quuxxote qarra gatte saꞌannori baalu uulla gannate assate loonsannihu taalle nookki loosira kaaꞌlantanno gede assitannonsa.
Maganu Qaalinni Ronseemmore
‘Qullaawa Doogora’ Haꞌra Agurtinoonte
8 Mitootu togo yite heddannoha ikkara dandaanno: ‘Tini dhagge ikkitannote; kayinni lowo dirira albaanni Ayihudete mannira iillinori xaa yannara ninkera kaaꞌlannonkeri no?’ Ee kaaꞌlannonke; mayira yiniro ninkeno ‘Qullaawa Doogora’ haꞌnanni heeꞌnoommo. Buurammoommore woy wolu geꞌreewi widono ikkinummoro, ‘Qullaawa Doogonni’ fullummokkinni heeꞌra hasiissannonke; tini xaa yannara Yihowa magansiꞌnanni heeꞌneemmo gedenna albillitte Maganu Gashshooti abbanno atoote afiꞌneemmo gede assitannonke. (Yoh. 10:16) Lowo miliyoone ikkanno labballi, meentinna qaaqquulli 1919 M.D. hanafe Bayira Baabiloone yaano alamete doyichote kaphu ammaꞌno giddonni fule tenne lawishshu doogora haꞌra hanafino. Atino insa wido ikkoottoha ikkara dandaanno. Mannu tenne doogora haꞌra hanafinku mito 100 diro ikkinoha ikkirono, tenne doogo qixxeessa hananfoonnihu kayinni lowo dirira albaanniiti.
Lallawo
lmd guwuursha A naxiwe 15
Qullaawu Maxaafi huuccatto assiꞌneemmo gara rosiisannonke.—Mat. 6:7-13; Luq. 11:1-4.
AMMAJJE 16-22
MAGANU QAALI GIDDO NOOTA MUXXE JIRO ISAYAASI 36-37
“Xontinoe Xono Daafira Waajjitooti”
it “Hiziqiyaasi” Kir. 1 guf. 14
Hiziqiyaasi
Senaakireemi Yerusaalamete qeelamino gara. Hiziqiyaasi hedinonte gede, Senaakireemi Yerusaalame qasate murciꞌre kaino. Senaakireemi olantosi ledo Lakiishiha qiishote katama qasate gaangeesse amade heeꞌre, olantosi giddo gama hajajaanonsa ledo Yerusaalamete manni anga aanno gede xaꞌmitara soyino. Tenne gaamora afoo ikke coyiꞌrannohu Rabishaaquuti (kuni suꞌmi olantonniho suusu suꞌmaati ikkinnina mannu suꞌma diꞌꞌikkino); isi Ibiraawootu afoo mooshshe coyiꞌrannoho. Isi Hiziqiyaasi qacifatino hattono Israeelete Magani Yihowa wole dagate kaphu magannante gede, mannasi Asooru moote anganni gatise diafanno yee mishino.—2Mo 18:13-35; 2Du 32:9-15; Is 36:2-20.
ip-1 387 guf. 10
Mootete Noosi Ammana Baꞌraassinosi
10 Hakkiinni Rabishaaqu Ayihudete olanto insa hendiro wolqiweeloota ikkitinota kulinonsa. Isi togo yee booꞌnatenni yekkeeramino: “Gulufa dandaanno manni heeꞌrihero 2,000 farado eemmohe.” (Isayaasi 36:8) Noore coyiꞌniro Yihudaho qajeeltino faradaasine kiiro shiima woy lowota ikka tirtannoni? Deeꞌni; Yihudu manni gatannohu olantote wolqanni diꞌꞌikkino. Lawishsha 21:31 tenne daafira kultanni togo yitanno: “Farado olaho qixxeessinanni; qeelle aannohu kayinni Kaaliiqaati.” Hakkiinni Rabishaaqu Yihowa massiꞌranni noohu Asooru manna ikkinnina Yihudu manna ikkinokkitanna hatto ikka hoogoommero Asoorootu Yihudu qoqqowira noo gobbuwa qeeltanni kageeshsha daa dandiitannokkita coyiꞌrino.—Isayaasi 36:9, 10.
ip-1 388 guf. 13-14
Mootete Noosi Ammana Baꞌraassinosi
13 Coyiꞌre hashuu yaannokkihu Rabishaaqu xaano wole urdete gede qasanno qaale coyiꞌra hanafi. Isi Yihudu manna, Hiziqiyaasi “Kaaliiqi gatisannonke” yaanni coyiꞌrannore ammantinoonte yiino. Rabishaaqu Ayihudootaho, Samaarootunniti kaphu maganna Israeelennita tonne gare Asoorootu anganni gatisa dandiitinokkita qummi assino. Asoorootu qeeltinoti wole daga magannano, insa gatissinonsakkita kulanni togo yiino: “Hamaatinna Arfaadi maganna mama nooyya? Sefariwayimi maganna hiikka higguyya? Insa giddonni Samaariya ane anganni gatisihu nooni?”—Isayaasi 36:18-20.
14 Kaphu maganna magansiꞌrannohu Rabishaaqu, kaadaasine ikkitino Samaarootinna Hiziqiyaasi gashshannohu Yerusaalamete manni mereero noo badooshshe huwatinokkiti egennantinote. Samaariyunnite kaphu magannara tonne gare amadino gashshoote gatissanno wolqa dinonsa. (2 Mootoolla 17:7, 17, 18) Hiziqiyaasi gashshooti hunda noohu Yerusaalamete manni kayinni, kaphu maganna facci asse agure Yihowara soqqamate higino. Ikkirono, Yihudu manna riqibbinori sasu mannooti Rabishaaqura tenne daafira xawisate diwoꞌnaaltino. “[Insa] moote Hiziqiyaasi hajajinonsante gede mittoreno didawartino.” (Isayaasi 36:21) Eeliyaaqeemi, Shebinanna Yoaahi Hiziqiyaasiwa dagge Rabishaaqu yiinore gudisse kultinosi.—Isayaasi 36:22.
Maganu Qaalinni Ronseemmore
Yihowa Agarannohe—Hiittoonni?
14 Kiirre gundannikkiri wolqaataamma sokkaanono kaaꞌlitannonke. Mittu sokkaanchi calla mageeshshi wolqa afiꞌrinoro heda dandiineemmo! (Isa. 37:36) Hatto ikkiro wolqaataammu batinye sokkaano mageeshshire assa dandiitannoro hanni hendo. Yihowate wolqaataame olanto ledo taalamanno manchi woy agaaninte dino. Mittu ammanamino Kiristaanchi Yihowa ledosi heeꞌriro diinnasi baxxu geeshshitano ikkituro qeela dandaanno. (Eje. 6:16) Tini halaaleho! Ledoꞌne loossannori, ledoꞌne rossannori woy Yihowa Farciꞌraasine ikkinokki fiixiꞌne kiꞌne waajjishiishate woꞌnaalanno woyite tenne qaagge. Konne ola calluwiꞌne olantinanni heedhinoonnikkita qaagge. Yihowa biddishsha harunsitinanni heedhinoonni daafira isi kaaꞌlannoꞌne.
Loonse Leellinshanni Ikkito
ijwbq birxicho 110 guf. 1-4
Cuuamate Yaa Mayyaate?
Qullaawu Maxaafi mayyaanno?
Cuuamate yaa wayi giddora gudisame eꞌꞌe fulate. Qullaawu Maxaafi giddo cuuaminota kulloonnihu batinyu manni no. (Soqqamaasinete Looso 2:41) Kuri giddo mittu Yesuusaati; isi cuuami woyite wayi giddora gudisame lixe fulino. (Maatewoosi 3:13, 16) Yannate gedensaanni, mittu Itiyophiyu manchi haꞌranni noo doogora mule noo “wayi” giddo eꞌꞌe cuuamino.—Soqqamaasinete Looso 8:36-40.
Yesuusi, isi rosaano ikkitannori cuuama hasiissannonsata rosiisino. (Maatewoosi 28:19, 20) Soqqamaasinchu Pheexiroosino tenne xawise coyiꞌrino.—1 Pheexiroosi 3:21.
Cuuamate tiro
Cuuama, mittu manchi cubbisira maaro einotanna aye coyino tuncu yiisiro Maganu fajjo wonshanni heeꞌrate qaale einota mannaho leellishate assannoreeti. Cuuamino manchi woꞌmanka woyite Yihowaranna Beettisi Yesuusira owaate hajajamanni heeꞌranno. Qoleno cuuantannori hegere heeshshowa massitanno doogo haꞌra hanaffino yaate.
Wayi giddo cuuama, mittu manchi heeshsho soorrantinota leellishannoho dancha malaateeti. Hiitto? Qullaawu Maxaafi, cuuama madaaramate ledo heewisiisanno. (Roomu Sokka 6:4; Qolasiyaasi Sokka 2:12) Mittu manchi cuuamanni wayi giddo lixanno woyite, albi heeshshosira reyinota leellishanni no. Wayi giddonni fulanno woyite kayinni, heeshshosi Maganoho sayise uyino Kiristaancho ikke haaro heeshsho heeꞌra hanafinota leellishanni no.
AMMAJJE 23–BADHEESSA 1
MAGANU QAALI GIDDO NOOTA MUXXE JIRO Isayaasi 38-40
“Allaalaanchu Gede Hoshshasi Towatanno”
Qullaawu Maxaafi Konne Maxaafa Borreessiisinohu Daafira Maa Kulannonke?
3 Isayaasi 40:8 nabbawi. Lowo kume diro, ammanamino labballinna meenti Maganu Qaalinni kaajja amaale afiꞌranni keeshshino. Kuni ikka dandiinohu hiittoonniiti? Lowo diri albaanni Qullaawa Borro borreessinoonnihu, mulenni baꞌꞌara dandaanno uduunnichi aanaati; hakko daafira hakkawaro borreessinoonniti hundi borro xaa yannara dino. Kayinni Yihowa mannu tenne borro galchanno gede assino. Tenne borro galchituri guuntete xeꞌne noonsare ikkiturono lowo geeshsha qorophite galchitino. Ibiraawootu Afiite Qullaawa Borro daafira mittu fullahaanchi togo yee borreessino: “Tenne borro geeshsha sokkase baꞌukkinni keeshshitinoti wole hundi borro dino yaa dandiinanni.” Hakko daafira tenne borro borreessininku lowo yanna saꞌinoha, borreessinoonnihu mulenni baꞌꞌara dandaannori aana ikkirono hattono galchituri guuntete xeꞌne noonsare ikkiturono, xaa yannara nooti Qullaawu Maxaafi sokka borreessiisino Maganihu Yihowata ikkitinota addaxxa dandiineemmo.
4 Yihowa “dancha eltonna woꞌmu atooti baalu” Buichooti. (Yai. 1:17) Yihowa uyinonkete kaajja elto giddo mittu Qullaawa Maxaafaati. Mittu manchi mitore uyinkero tini isi ninkenna hasiisannonkeri daafira afinota leellishshanno. Qullaawa Maxaafa uyinonke Maganino ninkenna hasiisannonkeri daafira afino. Yihowa uyinonketa tenne elto xiinxalline isi daafira lowore ronseemmo. Isi ninkenna hasiisannonkeri daafira seekke afinota ronseemmo. Konni birxichira Qullaawu Maxaafi giddo kulloonnite sase Yihowa akattanni maa ronseemmoro laꞌneemmo; insano hayyote, taashshotenna baxilleho. Hanni balanxe Qullaawu Maxaafi Maganu hayyo daafira kulannonkehu hiitte doogganniitiro laꞌno.
cl 70 guf. 7
‘Golonke Ikkinohura Maganoho’ Agarate Noosi Wolqa
7 Yihowa isonooto allaalaanchu ledo heewisiise ninke agara godowinta hasiꞌrannota buuxisinonke. (Hiziqeeli 34:11-16) Konni maxaafira Fooliishsho 2te qummi assinoonnihu Isayaasi 40:11 Yihowa mayinoro qaagge: “Allaalaanchu gede hoshshasi towatanno; wiliiꞌle isiwa gamba asse hanqafanno; amuuwansano wodaninni shiikkanno.” Wiliiꞌlichu allaalaanchu hanqafannosi gede assiꞌrannohu hiittoonniiti? Wiliiꞌlichu allaalaanchunniwa shiqara wole agurina lekkasi kikkisara dandaanno. Ikkirono allaalaanchu wiliiꞌlicho heeshshi yee haaꞌre shaqqado anganni hanqafa hasiissannosi. Kuni, Bayiru Allaalaanchinke ninke golanna agara hasiꞌrannota leellishannoho kaajja lawishshaati!
Yihowa “Daafurtinorira Jaawaante Aanno”
4 Isayaasi 40:26 nabbawi. Kalqete alame giddo noo beeddahe kiira dandaanno manchi dino. Sayinsete fullahaano Milki Weyi yinannite ninke gaalaakse giddo calla 400 biliyoone meddi yitanno beeddahe noota kultanno. Yihowa kayinni mitte mittente beeddakkora suꞌma fushshino. Ninke tennenni maa ronseemmo? Yihowa heeshsho nookki kalaqama seekke afinoha ikkiro, umikki fajjonni soqqantanni noottohu ate daafira hedannota huluullantooti. (Far. 19:1, 3, 14) Anninke Yihowa ninke seekke afino. Uminke “dananchi baalu nafa kiirreenna no.” (Mat. 10:30) Qoleno faarsaasinchu Yihowa “keeraano towaatanno” yee coyiꞌrino. (Far. 37:18) Ee, isi iillannohe qarra baala afino, hattono iillannohe qarra baala dandiite saꞌꞌatto gede jawaante aannohe.
5 Isayaasi 40:28 nabbawi. Yihowara taalle nookki wolqa noosi. Hanni lawishshaho, Maganu arrishshote mageeshshi wolqa uyinoro hendo. Deevidi Boodaanisi yinannihu sayinsete fullahaanchi togo yiino: “Arrishshote giddonni mittu sokondi giddo calla fultanno wolqa lowo biliyoone ikkannohu atomete bombi afiꞌrino wolqa ledo taalote.” Wolu fullahaanchi qole “Arrishshote giddonni mittu sokondinni calla fultanno wolqa mannu ooso baala 200,000 diri geeshsha heeꞌrate hasiissannonsa wolqa afiꞌrate ikkitannote” yiino. Arrishshote kageeshshi wolqa uyino Magani, ninke qarra dandiine heeꞌneemmo gede jawaante diaannonke?
6 Isayaasi 40:29 nabbawi. Yihowara soqqama lowo geeshsha hagiirsiissanno. Yesuusi rosaanosira “Qambaraꞌya qotiꞌnera dukke” yii gedensaanni “Lubboꞌnerano fooliishsho afidhinanni. Qambariꞌya diayirranno; duhiꞌyano shotaho” yiinonsa. (Mat. 11:28-30) Yesuusi yiinori halaaleho! Mito wote songote gambooshshe haꞌneemmonna soqqansho fulleemmo wote daafursankera dandaanno. Ikkollana songo woy soqqansho haꞌne hingeemmo wote jawaante afiꞌneemmo; tini iillannonke qarra dandee heeꞌrate kaaꞌlitannonke. Ee, Yesuusi qambari ayirrannoha diꞌꞌikkino!
Maganu Qaalinni Ronseemmore
Yihowa Suꞌmi Qullaawanno Gede Assineemmo Gara
12 Yihowa suꞌmira halammeemmo woyite Yesuusi lawishsha haꞌrunsinanni heeꞌnoommo. Qoleno Isayyaasi mittu manchi ‘Kaaliiqira doogo seekkannota’ masaalino. (Isa. 40:3) Tini masaalo woꞌmitinohu hiittoonniiti? Cuuaanchu Yohaannisi Yesuusira doogo qixxeessino; Yesuusi qole dayinohuno coyiꞌrinohuno Yihowa suꞌminniiti. (Mat. 3:3; Maq. 1:2-4; Luq. 3:3-6) Qoleno tini masaalo, “Kaaliiqi ayirrinyi leellanno” yitanno. (Isa. 40:5) Kaaliiqi ayirrinyi leellinohu hiittoonniiti? Yesuusi uullara dayi woyite guutu garinni Yihowa riqiwino daafira Yihowa umisi uullara dayinohu gedeeti.—Yoh. 12:45.