Yihowa Farciꞌraasinehu Aliidi Bisi Ayeti?

Aliidi Bisi ayyaanaamittetenni gikki yiino Kiristaani gaamooti; tini shiima gaamo alamete deerrinni Yihowa Farciꞌraasinera biddishsha uytanno. Loosinsa lame danaati:

• Insa Yihowa Farciꞌraasine borro aana, gambooshshinkewa, hattono rosu minnankewa shiqannoha Qullaawu Maxaafi aana xintamino roso lainohunni biddissa uytanno.—Luqaasi 12:42.

• Qoleno sabbakate loosonkenna fushshotenni gamba assinoonni woxe horoonsiꞌnanni gara lainohunni biddissa uytanno; konni garinni tini gaamo, Yihowa Farciꞌraasine alame woꞌmate aana loossanni noo looso illaallissanno.

Aliidi Bisi umi xibbi diro heedhino ‘soqqamaasinenna cimeeyye’ faale haꞌranno; hakkawaro soqqamaasinenna cimeeyye, Kiristaanu songo woꞌmate afoo ikkite jajjabba coyibbara biddissa uytanno. (Soqqamaasinete Looso 15:2) Kuri ammanantino labballinte gede, Aliidi Bisi miillano dirijjitenkera murroota diꞌꞌikkitino. Insa, Maganu Yihowa Yesuusi Kiristoosi songote Umo asse shoominota affino daafira, Qullaawu Maxaafinni biddissa afiꞌrate woꞌnaaltanno.—1 Qorontoosi 11:3; Efessooni 5:23.

Aliidi Bisi miilla ayeooti?

Aliidi Bisi miilla ikkite soqqantanni noori Keneez Kuuk, Geej Filiigel, Saamueeli Herd, Jeefirii Jaakisen, Jodiy Jeedil, Istiifen Leet, Geerit Loosh, Jeekoob Remf, Maark Sandersen, Deevid Ispileen, hattono Jeefirii Winderiiti. Kuri roduuwi Yunaytidi Isteetisete, Niwu Yoorki quchumira Woorwiiki noote qara biironkera loossanno.

Aliidi Bisi loosannohu hiittoonniiti?

Aliidi Bisi dirijjitenke giddo addi addi loosira biddissa aate, lee komite xintino; mittu mittunku Aliidi Bisi miili mitte woy hakkiinni saꞌino komitta giddo loosanno.

• Qineessaanote Komite: Tini komite higgete ledo xaadooshshe afidhino haja lainohunni biddissa uytanno; qoleno kalaqamu dano iillitanno woyte, ammanate roduuwinke ammanansanni kainohunni darantanno woyte, hattono Yihowa Farciꞌraasine kisannohu muddanno coy tuncu yaanno woyte hasiisannore assitanno.

• Personeelete Komite: Tini komite Beetelete maatera qixxeessinanni qixxaawo lainohunni biddissa uytanno.

• Attamate Loosi Komite: Tini komite Qullaawu Maxaafi aana xintantino borronke attamatenna hodhisate looso aliidimmatenni towaattanno; qoleno gambooshshu base, tirote loosi biironna sinu biiro minate looso laꞌanno.

• Soqqanshote Komite: ‘Maganu Gashshootiha Dancha Duduwo’ duduwate loosonke aliidimmatenni towaattanno komiteeti.—Maatewoosi 24:14.

• Rosu Komite: Gambooshshunniwa, rosu minnankewa, qoonqotenni, hattono viidiyotenni fulannohu ayyaanaamittete rosi qixxaawanno gara lainohunni biddissa uytanno.

• Borro Qixxeessitanno Komite: Attammeenna fulannohu hattono webisaytenke aana fulannohu ayyaanaamittete rosi qixxaawanno gara lainohunni biddissa uytanno; qoleno tirote loosonke aliidimmatenni towaattanno.

Aliidi Bisi tenne komitta giddo loosanno loosono agurranna, dirijjitenkera hasiisannore lainohunni hasaawate lamalate kiiro gamba yaanno. Konni gambooshshiwa, Qullaawa Borro maytannoro hasaabbanno, hattono Maganunnihu qullaawu ayyaani massagansara maahoyye yitanno; qoleno hasaabbanno coye mittu wodaninni afoo xaadde murate woꞌnaaltanno.—Soqqamaasinete Looso 15:25.

Aliidi Bisi kaaꞌlaano ayeooti?

Aliidi Bisi komitera kaaꞌlaano ikke soqqamannohu ammanamino Kiristaani no. (1 Qorontoosi 4:2) Kuri roduuwi kaaꞌlitanno komite loossanno looso seekkite egentino, hattono woꞌnaalshu noonsareeti; qoleno hatte komitehu lamalate gambooshshira ledo gamba yitanno. Kuri roduuwi muro murtannore (biddissa uytannore) ikka hooggurono, kaaꞌlitanno amaalenna mashalaqqe shiqishshanno, komite murtino coye loosu aana hosiissanno, hattono hatti hajo ma deerra marturo faana gantanno. Qoleno Aliidi Bisi kore roduuwa wole gobba hadhe roduuwanke towaattanno gedenna diru gambooshshiwa woy Giiliyaadi maassowa lallawo shiqishshanno gede worara dandaanno.