Meessanaa Qeeꞌla​—Yihowa Hagiirsiisate Lowo Geeshsha Hasiisanno Akataati

“Abbiꞌya beetti ledo giwamummoti foolannokki gede kokke qalxe amadummo. Iso shaa hasiꞌroommo.”—Pooli.

“Mine kaummorira baalaho hanqe gobba gudeemmo. Mini uduunne, qaaqquulliꞌya godoꞌlannore hattono illete leelliere baala haaꞌre uullate ganeemmo.”—Maarko.

Ninke insa geeshsha hanqineemmore ikka hoongammora dandiineemmo. Ikkirono ninke baalanka meessanaa qeeꞌla qarrissannonke woyiti no. Tini qarra ikkitannonke gede assannohu qaru coyi, umi manchi yaano Addaamiwiinni cubbo ragiꞌnoommore ikkankeeti. (Rom. 5:12) Mitoho Poolinna Maarko gede hanqo eemadha qarra ikkitannonsa. Woloota kayinni hedonsa eemadha qarrissannonsa. Insa waajjishannonsarenna hexxo mudhitanno gede assannonsare heddanno. Mitoho kayinni foortanno gede, quwa saꞌe aggannonna jingilli assitanno xagga adhitanno gede xixxiimbanninsata gargadha qarra ikkitansara dandiitanno.

Hedonsa, hasattonsanna assootensa eemadhitannokkiri qarru giddo ubbara dandiitanno. Ninke kayinni togoori iillannonkekki gede assiꞌra dandiineemmo. Hiittoonni? Albinni roore meessanaa qeeꞌlate sharramatenniiti. Hanni tennera kaaꞌlitannonketa sase xaꞌmo laꞌno: (1) Meessanaa qeeꞌlate yaa mayyaate? (2) Meessanaa qeeꞌla lowo geeshsha hasiissannota ikkitinohu mayiraati? (3) Kuni Maganu ‘ayyaani laalo’ wido ikkino akati heeꞌrannonke gede assiꞌra dandiineemmohu hiittoonniiti? (Gal. 5:22, 23) Hakkiinni mito woyite meessanaa qeeꞌla qarrissannonkeha ikkiro, maa assa dandiineemmoro ronseemmo.

MEESSANAA QEEꞌLATE YAA MAYYAATE?

Isonooto qeeꞌlanno manchi mitto coye gari-garimmo laikkinni diassanno. Togoo manchi coyiꞌrannorinna assannorinni Magano dadillisannokki gede qorophanno.

Yesuusi meessanaa qeeꞌlate yaa mayyaatero leellishino. Qullaawu Maxaafi togo yaanno: “Xontannasi qole dixonino; qarra adhanni heeꞌre halaale coyiꞌranno Maganira eeggo uyino ikkinnina, qole direewino.” (1 Phe. 2:23) Yesuusi qarru haqqira sutame heeꞌreenna diinnasi qacifattusi woyite isonooto qeeꞌlino. (Mat. 27:39-44) Isi hakkuyira albaanni haxawarrootu ammaꞌnote sooreeyye coyiꞌrino coyinni woshshaaddasira woꞌnaaltu woyite isonooto qeeꞌlannoha ikkinota dhagge ikkanno garinni leellishino. (Mat. 22:15-22) Yesuusi lowo geeshsha hanqitino Ayihudooti kinnatenni gantasira kaꞌu woyite assinori dancha lawishsha ikkannonke! Isi rabbisiꞌra agure “insara leellikkinni Qullaawu Mininni fule” haꞌrino.—Yoh. 8:57-59.

Ninke Yesuusi lawishsha harunsa dandiineemmo? Woꞌmunni woꞌma ikka hoogirono ee dandiineemmo. Soqqamaasinchu Pheexiroosi “Isi faalere ikkitinanni gede, Kiristoosi qarra adhatenni lawishsha ikkinoꞌne” yee borreessino. (1 Phe. 2:21) Guuntete xeꞌne noonkere ikkinummorono, Yesuusi faale seekkine harunsine meessanaa qeeꞌla dandiineemmo. Hatto assanke lowo geeshsha hasiissannohu mayiraati?

MEESSANAA QEEꞌLA LOWO GEESHSHA HASIISSANNOHU MAYIRAATI?

Yihowa hagiirsiisate meessanaa qeeꞌla hasiissannonke. Lowo diro Yihowara ammanamme soqqammoommore ikkinummoro nafa, assineemmorinninna coyiꞌneemmorinni meessanaa qeeꞌla hoongummoro Yihowa ledo noonke jaalooma huꞌninammora dandiineemmo.

Hanni hakkawaro “baattote aana noo manni baalunkunni roore jooga” ikkino manchiha Muse lawishsha laꞌno. (Kir. 12:3) Muse lowo diro Israeelete daga gunguntanna cince heeꞌrinoha ikkirono, mitto barra isonooto qeeꞌla hoogino. Isi Israeele waa hoongoommo yite wirro gunguntuta hanqino. “Kiꞌne haxawarrootu! Halaalinta kunni kinchi giddonni kiꞌnera waa uyinoꞌne?” yee lowo geeshsha hanqe coyiꞌrino.—Kir. 20:2-11.

Muse isonooto qeeꞌla hoogino. Isi maalaletenni waa fushshinonsahu Yihowa ayirranno gede diassino. (Far. 106:32, 33) Konnira Yihowa Muse Hexxote Gobba eara difajjinosi. (Kir. 20:12) Muse isonooto qeeꞌla hoogasinni reyi barri geeshsha gaabbanni heeꞌrinoha ikkara dandaanno.—Mar. 3:23-27.

Tenne xaggenni maa ronseemmo? Halaalu mine lowo diro keeshshinoommore ikkinummoro nafa, mannu hanqisinkero woy soꞌro loosiro ayirrinyu xeino garinni coyiꞌra dihasiissannonke. (Efe. 4:32; Qol. 3:12) Jawooꞌmineemmo woyite cincineemmore ikka roore qarrissannonketi egennantinote. Ikkirono Muse lawishsha qaaga hasiissannonke. Meessanaa qeeꞌla hoongeenna Yihowa albaanni noonkehu suꞌnaadu suꞌminke baꞌꞌara dihasiꞌneemmo. Kuni lowo geeshsha hasiisanno akati heeꞌrannonke gede maa assa dandiineemmo?

MEESSANAA QEEꞌLATE AKATI HEEꞌRANNONKE GEDE ASSIꞌRA DANDIINEEMMOHU HIITTOONNIITI?

Qullaawa ayyaana afiꞌrate huuccidhe. Mayira? Korkaatuno, meessanaa qeeꞌla Maganu ayyaani laalooti; qoleno Yihowa huuccidhannorira ayyaanasi aannonsa. (Luq. 11:13) Yihowa ayyaanisi widoonni hasiissannonke wolqa aannonke. (2 Qor. 4:7) Qoleno, isi meessanaa qeeꞌlate kaaꞌlannonkeha wole ayyaanu laalo akatta lawishshaho baxille aannonke.—1 Qor. 13:5.

Meessanaa qeeꞌla qarra ikkitanno gede assannoriwiinni xeertidhe. Lawishshaho, gara ikkinokkire leellinshanni webisayitenna boohaarshiwiinni xeertiꞌra hasiissannonke. (Efe. 5:3, 4) Qoleno gara ikkinokkire assineemmo gede assannonke coyi baalunkuwiinni xeertiꞌra hasiissannonketi egennantinote. (Law. 22:3; 1 Qor. 6:12) Lawishshaho maaeela coye assa rakkannosi manchi busha yorto kakkayissanno maxaaffanna filmuwawiinni xeertiꞌra hasiissannosi.

Tenne amaale harunsa shota ikka hooggankera dandiitanno. Ikkirono tenne amaale loosu aana hosiisate sharrammummoro Yihowa meessanaa qeeꞌlate kaaꞌlitanno wolqa aannonke. (2 Phe. 1:5-8) Isi hedonke, coyiꞌneemmorenna assineemmore eemadhineemmo gede kaaꞌlannonke. Aleenni kulliri Poolinna Maarko lawishshi tenne leellishanno; insa hanqo eemadha rossino. Hanni xa makeena kadanno woyite isonooto qeeꞌla qarrissannosiha, wole agurina wolootu ledo giwamara nafa kaꞌꞌanno rodii lawishsha laꞌno. Tennera isi maa assiyya? Isi togo yiino: “Barru baala huuccatto assiꞌreemmo. Meessanaa qeeꞌlate daafira kultanno birxichuwa xiinxalleemmo; hattono tennera kaaꞌlitannoe qummeeshshuwa qaagate woꞌnaaleemmo. Aneneeto qeeꞌlate lowo diro sharramoommoha ikkirono, soodo sooddaa kiiro, barra woꞌma aneneeto eemadha hasiissannoeta qaageemmo. Dinye heedhuero muddameemmokki gede balaxe fuleemmo.”

MEESSANAA QEEꞌLA HOONGEEMMO WOYITE

Ninke baalunku meessanaa qeeꞌla hoongeemmo woyiti no. Togoori tuncu yaannonke woyite huuccatto assiꞌra saallammora dandiineemmo. Ikkollana roorenka huucciꞌra hasiissannonkehu togoo woyiteeti. Konnira bayichonko Yihowa huucciꞌri. Maarannohe gede huucciꞌri, kaaꞌlosi hasiꞌri, hattono togoo soꞌro wirro loosattokki gede murciꞌri. (Far. 51:9-11) Yihowa gatona yaannohe gede giddokkinni huucciꞌratto huuccatto macciishshannota huluullantooti. (Far. 102:17) Soqqamaasinchu Yohaannisi Maganu “Beetti mundee cubbu baalunni keereensitannonke” yiinota deꞌnoonke. (1 Yoh. 1:7; 2:1; Far. 86:5) Yihowa soqqamaanosi woloota marro marro higge gatona yitanno gede kulinota qaango. Hakko daafira isi ninkerano hatto assannonketa addaxxa dandiineemmo.—Mat. 18:21, 22; Qol. 3:13.

Muse halalla shiima yannara ikkirono isonooto qeeꞌla hoogasinni Yihowa dadillino. Ikkirono Yihowa gatona yiinosi. Isinni Maganu Qaali Muse ammanatenni worba mancho ikkinota kulanno. (Mar. 34:10; Ibi. 11:24-28) Yihowa Muse Hexxote Gobba eannota hoolinosiha ikkirono, albillitte reyotenni kayise Gannate ikkitanno uullara hegere heeshsho aannosi. Ninkeno kuni lowo geeshsha hasiisannohu meessanaa qeeꞌlate akati heeꞌrannonke gede assiꞌneemmoha ikkiro hegere heeshsho afiꞌne hagiidhinanni heeꞌneemmo.—1 Qor. 9:25.