1-3. Reyote daafira mannu mayyee xaꞌmanno? Mite ammaꞌno tenne xaꞌmuwara mayite qoltanno?

QULLAAWU MAXAAFI ‘reyo heedhannokki’ yanna daggannota kulanno. (Yohaannisi Ajuuja 21:4) Fooliishsho 5te, wodo hegere heeshsho afiꞌneemmo gede kaaꞌlitannonketa ronsoommo. Ikkirono xaano mannu reyannilla no. (Rosiisaancho 9:5) Konni daafira, ‘Isi mannu reyanno wote hiikkanno?’ yine xaꞌmanke digattanno.

² Hakko iso shiiꞌneemmo wote tenne afa hasiꞌneemmo. Hakko daafira togo yine hendeemmo: ‘Xa isi hiikko no ikka? Ninke laꞌꞌanni no ikka? Ninke kaaꞌle afanno? Galagalle isinni xaandeemmo ikka?’

³ Batinye ammaꞌno tenne xaꞌmuwara babbaxxitino dawaro qoltanno. Mite ammaꞌno, danchu manni reyanno wote iimira haꞌranno, bushuullu kayinni sioolete giirantanno yitanno. Mite kayinni, mannu reyiro ayyaana ikke alba reyino fiixinsa ledo heeꞌranno yite rosiissanno. Mittu manchi reyenna yoo yinisihu gedensaanni, wole mancho ikke woy saada ikke galagale ilamanno yitanno ammaꞌnono no.

4. Rooriidi ammaꞌno mitto assannonsa rosi hiikkonneeti?

⁴ Duucha ammaꞌno rosiissanno rosi lowo geeshsha babbaxxinoho. Ikkollana, rooriidi ammaꞌno mitto assannonsahu mittu rosi no. Roore ammaꞌno, mittu manchi reyanno wote lubbosi woy foolisi direyanno yite rosiissanno.a Ikkina tini halaaleho?

REYINO MANNI HIIKKO NO?

5, 6. Reyineemmo wote hiikkineemmo?

⁵ Yihowa mannu reyanno wote hiikkannoro afino; isi mittu manchi reyanno wote heeshsho nookkiha ikkannota kulinonke. Reyo heeshshote gurchooti. Konni daafira, mittu manchi reyanno wote giddosinni fule wolewa mare heeꞌranno fooli woy ayyaani dino. Reyinummo gedensaanni, laꞌꞌa, macciishshanna heda didandiineemmo.

⁶ Qullaawu Maxaafi, “reyitinori . . . mittoreno diaffanno” yaanno. Reyino manni baxano giwano didandaanno; qoleno reyini gedensaanni “loosu, hedo, egennonna hayyo dino.” (Rosiisaancho 9:5, 6, 10 nabbawi.) Qullaawu Maxaafi Faarso 146:4 aanano, mannu reyanno wote “hedonsa” baꞌannota kulanno.

YESUUSI REYOTE DAAFIRA MAYYIINO?

7. Yesuusi reyote daafira mayyiino?

⁷ Yesuusi, muli jaalisi Aliaazaari reyi yannara rosaanosira togo yiino: “Jaalinke Aliaazaari goxino.” Yesuusi kayinni Aliaazaari fooliishshiꞌrara yee goxino yaasi diꞌꞌikkino. Isi lede togo yiino: “Aliaazaari reyino.” (Yohaannisi 11:11-14) Konni daafira Yesuusi reyo goxichu ledo heewisiisino. Isi Aliaazaari iimira woy alba reyino fiixisiwa haꞌrino diyiino. Qoleno Aliaazaari sioolete giiramanni no woy wole mancho woy saada ikke ilamanni no diyiino. Aliaazaari horo takki yee goxinohu gedeeti. Yesuusi wole woteno reyo goxichu ledo heewisiisino. Isi Iyairoosi qaaqqo reyotenni kayisi wote, “Beetto [goxxino] ikkinnina direyitino” yiino.—Luqaasi 8:52, 53.

8. Maganu manna kalaqinohu reyara ikkinokkita mayinni anfeemmo?

⁸ Maganu Addaaminna Heewani kalaqinohu insa gedensaanni hige reyanno gedeeti? Deeꞌni! Yihowa insa kalaqinohu guuta ordu fayyimma afiꞌre hegerera heeꞌraraati. Yihowa manna kalaqi wote, giddonsa hegerera heeꞌrate hasatto worino. (Rosiisaancho 3:11) Annuwunna amuuwu, oosonsa xiwantannotanna reyitannota horonta dibaxxanno; Yihowano ninkera hattooti. Maganu hegerera heeꞌnammora kalaqinkena reyineemmohu mayiraatiyya?

REYINEEMMOHU MAYIRAATI?

9. Yihowa Addaamiranna Heewanira uyino hajajo diqarrissannote yineemmohu mayiraati?

⁹ Yihowa Edenete kaashshu basera Addaamira togo yiino: “Edeni Gennetete noo haqqe baalate laalo ita dandaatto. Bushanna dancha bade afate egenno uyitanno haqqicho laalo kayinni ittooti; tenne haqqicho laalo itootto barra, halaalinta reyatto.” (Kalaqama 2:9, 16, 17) Maganu xawise coyiꞌrinoti tini hajajo wonshate qarrissannota diꞌꞌikkitino; qoleno Addaamiranna Heewanira danchanna busha bade kulate qoosso noosihu Yihowaati. Insa Yihowara hajajante, roorresi ayirrissannota leellisha dandiitanno. Qoleno assinonsa coyi baalunkura lowo geeshsha galattannota leellisha dandiitanno.

10, 11. (a) Sheexaanu, Addaaminna Heewani Maganoho hajajama giwanno gede assinohu hiittoonniiti? (b) Addaamiranna Heewanira hajajama qarrissannonsa gede assannori dino yineemmohu mayiraati?

¹⁰ Hige ma assinanni, Addaaminna Heewani Yihowara hajajama giwa doodhitino. Sheexaanu Heewani togo yee xaꞌmino: “Halaalintanni Maganu Edeni Gennetete noo haqqe baalante laalo ittinannikki gede hoolinoꞌneni?” Hakkiinni ise togo yite qoltu: “Edeni Gennetete noo haqqe laalo ita dandiineemmo; ikkollana Maganu, ‘Edeni Gennetete giddo [woy, mereero] noo haqqicho laalo ittinoonte; kissinoonte; gibbine kissiniro kayinni reyitinanni’ yiinonke.”—Kalaqama 3:1-3.

¹¹ Hakkiinni Sheexaanu togo yii: “Reyo nafa direyitinanni; Maganu hatto yiinohu, hattenne haqqicho laalo ittinanni barra illeꞌne faꞌnitannotanna isi gede danchanna busha baddine affinannire ikkitinannita afinohuraati.” (Kalaqama 3:4-6) Sheexaanu, Heewani bushunna danchu maatiro ani umiꞌya afiꞌra dandeemma yite heddara hasiꞌrino. Qoleno, ise hajajama hoogguro ikkitannori nookkita kule kaphinose. Heewani, Sheexaanu direyatta yiinose daafira, haqqichote laalo adhite itte minaanniserano uyitino. Addaaminna Heewani, Yihowa hatte haqqicho laalo ittinoonte yiinonsata afino. Insa hattee laalo ite, Maganu xawise coyiꞌre uyinonsata qarrissannokki hajajo diigino. Assootinsa insa baxillaancho iimi Annansa ayirrissannokkita leellishanno. Insa hajajama hooganno gede asse qarrisinonsari horo dino!

12. Addaaminna Heewani Yihowara hajajama giwansa lowo geeshsha dadillissannote yineemmohu mayiraati?

¹² Umi anninna amanke Kalaqaanchonsa ayirrisa hoogansa lowo geeshsha dadillissannote! Daafurte lossiꞌrootto oosokki atera hajajama gibbe assitinoonte yite kuloottore assituro mayi macciishshamannohe? Tini lowo geeshsha didadillissannohe?

13. Yihowa Addaami “galagalte bushsha higatto” yaasi mayyaate?

¹³ Addaaminna Heewani hajajama gibbino daafira hegere heeshsho gatte baꞌinonsa. Yihowa Addaami togo yiino: “Ati bushshahona, galagalte bushsha higatto.” (Kalaqama 3:19 nabbawi.) Hatto yaa, Addaami wirro bushsha ikkanno daafira albanni nookkihu gede ikkanno yaate. (Kalaqama 2:7) Addaami cubbo loose reyino daafira xa mittowano dino.

14. Reyineemmohu mayiraati?

¹⁴ Addaaminna Heewani Maganoho hajajamoommero, xa nafa lubbote heeꞌranno. Insa kayinni hajajama giwe cubbo loosino daafira reyino. Cubbu umi anninkenna amankewiinni ragiꞌnoommoho buutote xiwanaati yaa dandiinanni. Ninke baalunku cubbaataamma ikkine ilammoommo; reyineemmohu iseraati. (Roomu Sokka 5:12) Maganu mannaho hedinori kayinni konne diꞌꞌikkino. Maganu mannu reyara horonta dihasiꞌranno; qoleno Qullaawu Maxaafi reyo ‘diinaho’ yaanno.—1 Qorontoosi 15:26.

HALAALU KEERE FUSHSHANNONKE

15. Halaalu keere fushshannonkehu hiittoonniiti?

¹⁵ Reyote daafira halaale afanke batinyu kaphu rosinni dogammeemmokki gede agartannonke. Qullaawu Maxaafi reyino manchi xissiisiꞌrannokkita woy dadillannokkita kulanno. Reyino manna coyishiisha didandiineemmo; insano ninke coyishiishshe diaffanno. Reyino mancho kaaꞌline dianfeemmo; isino ninke kaaꞌle diafanno. Reyino manchi lubbote noore gawajje afannokki daafira, reyitinore waajja dihasiissannonke. Ikkollana, batinye ammaꞌno reyino manni wolewa haꞌre heeꞌranni noo daafira qeesootaho woxe uyinummoro insa kaaꞌla dandiineemmo yite rosiissanno. Reyote daafira halaale anfummoro kayinni, togoo kaphinni didogammeemmo.

16. Batinye ammaꞌno reyino manni daafira mayite kaphitanno?

¹⁶ Sheexaanu kaphu ammaꞌno horoonsiꞌre reyino manni xaano heeshshote no yine hendeemmo gede asse dogankera hasiꞌranno. Lawishshaho, mite ammaꞌno mannu reyanno wote lubbo woy foolu fule wolewa heeꞌranno ikkinnina direyanno yite rosiissanno. Ati harunsatto ammaꞌnono hatto yite rosiissannonso, Qullaawu Maxaafi yaannore yitanno? Sheexaanu manna Yihowawiinni xeertisate kapho tareessanno.

17. Mannu sioolete giiramanno yee rosiisa Yihowa xonate yineemmohu mayiraati?

¹⁷ Batinye ammaꞌno rosiissanno rosi biso shorodhi assannoho. Lawishshaho, mite ammaꞌno bushu manni sioolete hegere geeshsha giiramanno yite rosiissanno. Kuni kaphi Yihowa xonate. Isi horontanni manna togo asse diqorichishanno! (1 Yohaannisi 4:8 nabbawi.) Ilino qaaqqo anga giirate duwe qorichishanno mancho hiittooho yite hedatto? Godowa lowo geeshsha kaajjadoho yite hedattoti egennantinote. Togoo manchira jaala ikka hasiꞌrannohu dino. Sheexaanu Yihowano hattooho yine hendammora hasiꞌranno!

18. Reyino manna waajja hasiissannonkekkihu mayiraati?

¹⁸ Mite ammaꞌno, mannu reyi gedensaanni ayyaana ikkanno yitanno. Togoo ammaꞌno, tini ayyaanna dancha jaalla woy kaajjado baarigaara ikkitanno daafira insa ayirrisanna waajja hasiissannonke yitanno. Batinyu manni konne kapho ammananno. Kuni manni reyino manna waajjanno daafira Yihowa agure insa magansiꞌranno. Reyino manni mittoreno afannokkita qaagi; hakko daafira, insa waajja dihasiissannonke. Kalaqaanchinke Yihowaati. Halaalaanchu Magani isooti; konni daafira iso calla magansiꞌra hasiissannonke.—Yohaannisi Ajuuja 4:11.

19. Reyote daafira halaale afanke kaaꞌlitannonkehu hiittoonniiti?

¹⁹ Reyote daafira halaale afanke, ammaꞌno kaphitanno kaphinni keere fushshitannonke. Qoleno kuni halaali, Yihowa konni kaꞌira uyinonketa dhagge ikkitanno hexxo addaxxineemmo gede kaaꞌlannonke.

20. Aante noo fooliishshora maa ronseemmo?

²⁰ Lowo diri albaanni Iyyoobi yinannihu Maganu manchi, “Mannu reyotenni kae, lubbotenni heeꞌrannoni?” yee xaꞌmino. (Iyyoobi 14:14) Reyino manchi addinta galagale heeshshote heeꞌra dandaanno? Maganu Qullaawu Maxaafi giddo tenne xaꞌmora qolino dawaro dhagge ikkitannote. Aante noo fooliishshora tenne ronseemmo.

1-3. Ninke baalunku maaho usuranya ikkinoommo? Yihowa konni usurinni fushshannonkehu hiittoonniiti?

HANNI hunoottori nookkiha beebba yoo yine usurroonnihe yine hendo. Heeshshokki diro woꞌma usuramatto gede yoo yinoonnihe daafira hakkiinni fulatto gari dino. Albillittete heeshshokki hexxo noota dilabbanno; qoleno tennera ati assite afattori dino. Kayinni hexxo mudhite ofolte heedheenna, usuru mininni fushshahera dandaannohu mittu manchi noota kullihe; qoleno hakku manchi kaaꞌlahera hasiꞌrinota macciishshitto! Hakkawote hiitto ikkatto?

² Ninke baalunku reyote usuranyaati. Aye coyeno assinummoro, konni usurinni fulleemmo gari dino. Ikkollana Yihowara reyote usurinni gatisannonke wolqa noosi. Qoleno isi ‘diina ikkitinoti reyo goofimarchoho baꞌannota’ coyiꞌrino.—1 Qorontoosi 15:26.

³ Hanni reyineemmo yine yaandeemmokki yanna dagganno wote hagiidhineemmo gara hedi! Yihowa reyo hune calla agurannoha diꞌꞌikkino. Isi reyino manni galagale heeshsho afiꞌranno gedeno assanno. Tini mayyaatero hanni hedi. Yihowa “[reyitinore kayise] lubbotenni heedhanno gede assanno.” (Isayaasi 26:19) Qullaawu Maxaafi kaote yaannoti tenneeti.

SHIIꞌNEEMMO WOTE

4. (a) Shiiꞌneemmo wote shesho afiꞌra dandiineemmohu hiikkiinniiti? (b) Yesuusi jaalla giddo gamu ayeooti?

⁴ Mininke manni woy muli jaallanke giddo mittu reyiro, lowo geeshsha xissiisiꞌneemmo. Hattoo yannara ragu tunsannonke. Reyinohu galagale heeꞌranno gede assineemmo gari dino. Ikkollana, Qullaawu Maxaafi addu shesho aannonke. (2 Qorontoosi 1:3, 4 nabbawi.) Hanni Yihowanna Yesuusi shiiꞌnoommo manna reyotenni kayisa mageeshshi geeshsha hasidhannoro huwanteemmo gede kaaꞌlannonke lawishsha laꞌno. Yesuusi uullate aana noo yannara, duucha wote Aliaazaarinna roduuwisi Maartanna Maariyaamiuu minira haꞌranno. Sasunku Yesuusira jaallate. Qullaawu Maxaafi togo yaanno: ‘Yesuusi Maartanna rodoose Maariyaami, hattono rodoonsa Aliaazaari baxanno.’ Kayinni mitto barra Aliaazaari reyi.—Yohaannisi 11:3-5.

5, 6. (a) Yesuusi, Aliaazaari roduuwinna jaallansa wiꞌlitanna laiti hiitto ikki? (b) Yesuusa reyo xissiissinota afanke sheshifachishshannonkehu mayiraati?

⁵ Yesuusi Maartanna Maariyaami sheshifachishara insata haꞌri. Maarta Yesuusi daanni noota macciishshite, iso haadhara doogora shiqqu. Yesuusinni xaadde hagiidhitinoha ikkirono, iso togo yitu: “Ati kawiicho heeꞌroottoha ikkoommero rodiiꞌya direyanno.” Maarta, Yesuusi insa kaaꞌlanno yanna saꞌino yite heddino. Hakkiinni Yesuusi, rodoose Maariyaami wiꞌlitanna lai. Hakko noo manni wiꞌlanna laiti, isino xissiisiꞌre wiꞌli. (Yohaannisi 11:21, 33, 35) Yesuusino, ninke shiiꞌnummoro xissiisiꞌneemmo gede ikke xissiisiꞌrino.

⁶ Yesuusi dadillinotanna xissiisiꞌrinota afanke sheshifachishshannonke. Tenne afanke, Yesuusinna Annisi Yihowa reyo gibbannota buuxissannonke. (Yohaannisi 14:9) Yihowara reyo hegerera hunate wolqa noosi; qoleno muli yanna giddo konne assanno.

“ALIAAZAARI, AMO FULI!”

7, 8. Maarta Aliaazaari madaarroonni waamma aaninni kincho hoollara hasidhinokkihu mayiraati? Ikkirono Yesuusi maa assino?

⁷ Yesuusi Aliaazaari madaarroonni waammawa maranno wote, waammate afooho lowo kincho worre cunfoonni. Yesuusi, “Kincho hoolle!” yii. Maarta kayinni kincho hoollara dihasidhino. Korkaatuno reeshsha madaarrinku shoole barra ikkino. (Yohaannisi 11:39) Ise, Yesuusi rodoose kaaꞌlate maa assara hedinoro diaffino.

⁸ Yesuusi Aliaazaari, “Amo fuli!” yii. Hakkiinni aane ikkinori lowo geeshsha dhaggete. Aliaazaari “waammate giddonni angano lekkano usurre kafannoonni gedeenni heeꞌre fuli.” (Yohaannisi 11:43, 44) Aliaazaari galagale heeshsho afiꞌri! Isi minisi manninna jaallasi ledo galagale xaadino. Xa insa iso shiqqe amadanna hasaawisa dandiitanno. Hiittoo maalaleeti! Yesuusi Aliaazaari reyotenni kayisino.

“TEE BEETTO GOTTI YII YEEMMOHE!”

9, 10. (a) Yesuusira manna reyotenni kayisanno gede wolqa uyinosihu ayeti? (b) Reyotenni kaino mannire kultanno xagge kaaꞌlitannonkehu hiittoonniiti?

⁹ Yesuusi manna reyotenni kayisinohu umisi wolqanniiti? Deeꞌni. Isi Aliaazaari reyotenni kayisara albaanni, Yihowa huucciꞌrino; hakkiinni Yihowa wolqa oyennasi Aliaazaari kayisino. (Yohaannisi 11:41, 42 nabbawi.) Reyotenni kainohu Aliaazaari calla diꞌꞌikkino. Qullaawu Maxaafi mitte 12 diri qaaqqo lowo geeshsha xiwantinota kulanno. Annise Iyairoosi, lowo geeshsha masillaawe, qaaqqosi hursara Yesuusa huucciꞌri. Isira noosi qaaqqo ise callaati. Isi Yesuusa coyishiishanni heeꞌreenna, minisinni dayino manni togo yiisi: “Qaaqqo reyitinona, xa rosiisaancho mayira daafursatto?” Yesuusi kayinni Iyairoosi, “Ammani ikkinnina, waajjitooti!” yiisi. Hakkiinni Yesuusi Iyairoosi qae mari. Insa qaera shiqqanni martanno wote, wiꞌlanno manni huuro macciishshantanno. Yesuusi wiꞌlanni noo mannira, “Qaaqqo goxxinota ikkinnina direyitino” yii. Qaaqqote anninna ama, Yesuusi mayyaanni nooro huluullantukki digattino. Yesuusi mannu baalunku mininni fulanno gede asse kae qaaqqote anninna ama ledo qaaqqote reeshshi noowa ei. Hakkiinni qaaqqote anga amade togo yii: “Tee beetto gotti yii yeemmohe!” Qaaqqo bayichonko gotti yite haꞌra hanaffuta annisenna amase mageeshshi geeshsha hagiidhinoro hanni hedi! Yesuusi qaaqqonsa reyotenni kayisino. (Maarqoosi 5:22-24, 35-42) Hakko barrinni kayise insa qaaqqonsa lai kiiro Yihowa Yesuusi widoonni assinonsare qaagannoti egennantinote.a

¹⁰ Yesuusi reyotenni kayisino manni gedensoonni galagale reyino. Kayinni konni mannire kultanno xagge addu hexxo heedhannonke gede assitanno daafira kaaꞌlitannote. Yihowa reyino manna kayisa hasiꞌranno; qoleno kayisanno.

REYOTENNI KAINO MANNIRE KULTANNO XAGGENNI RONSEEMMORE

11. Rosiisaancho 9:5 Aliaazaari reye noo yannara noo gara kultannonkehu hiittoonniiti?

¹¹ Qullaawu Maxaafi “reyitinori . . . mittoreno diaffanno” yee xawise kulanno. Hakko daafira Aliaazaari noo garino hattooti. (Rosiisaancho 9:5) Yesuusi yiinonte gede, Aliaazaari goxe noohu gedeeti. (Yohaannisi 11:11) Isi waammate giddo noo yannara, ‘mittoreno diafino.’

12. Aliaazaari addinta reyotenni kainota buuxisannori maati?

¹² Yesuusi Aliaazaari reyotenni kayisi wote lowo manni laino. Wole agurina Yesuusi baarigaarra nafa isi tenne maalale loosinota affino. Hakkawote Aliaazaari reyotenni kae lubbote no; hakko daafira isi kao huluullammannita diꞌꞌikkitino. (Yohaannisi 11:47) Qoleno lowo manni Aliaazaari mare laino; konni daafira, mannu Yesuusa Maganu soyinota ammana hanafino. Yesuusi baarigaarra tenne baxxinokki daafira Yesuusano Aliaazaarino shitara maꞌlitu.—Yohaannisi 11:53; 12:9-11.

13. Yihowa reyitinore kayisannota buuxisannori maati?

¹³ Yesuusi, “waammate giddo noori” reyotenni kaꞌannota coyiꞌrino. (Yohaannisi 5:28) Hatto yaasi, Yihowa qaagannonsa manni baalunku galagale heeshsho afiꞌranno yaate. Reyino mancho kayisate kayinni, Yihowa hakkunni manchi daafira woꞌmankare qaaga hasiissannosi. Yihowa addinta tenne dandaanno? Kalqete alame giddo lowo biliyoone ikkitanno beeddahe no. Qullaawu Maxaafi, Yihowa mitte mittente beeddakko suꞌma afinota kulanno. (Isayaasi 40:26 nabbawi.) Isi mitte mittente beeddakko suꞌma qaagannoha ikkiro, reyotenni kayisanno manni baalunku daafira woꞌmankare qaaga diqarrissannosi. Roore kayinni, woꞌmankare kalaqinohu Yihowaati; konni daafira reyino manna kayisate wolqa noosi.

14, 15. Iyyoobi coyiꞌrino qaali kaote daafira maa rosiisannonke?

¹⁴ Ammanamino manchi Iyyoobi kao noota ammanannoho. Isi togo yee xaꞌmino: “Mittu manchi reyiro, galagale lubbote heeꞌranno?” Iyyoobi aanche Yihowara togo yiino: “Ati woshshattoe, ani qoleemmohe. Angakki loosono sinsinnaawatto.” Ee, Iyyoobi Yihowa reyino manna kayisanno yanna quqquxame agadhannota huwatino.—Iyyoobi 14:13-15, NW.

¹⁵ Kaote hexxo daafira hedatto wote mayi macciishshamannohe? Miteekkite, ‘Maahoyyena, ane fiixinna jaallaꞌyano reyotenni kaꞌanno ikka?’ yite hedattoha ikkara dandaanno. Yihowa reyino manni galagale heeshsho afiꞌranno gede assa hasiꞌrannota afanke sheshifachishshannonke. Hanni Qullaawu Maxaafi reyino manni kae hiikko heeꞌranno yaannoronna reyotenni kaꞌannori ayeooti yaannoro laꞌno.

‘HUUROSI MACCIISHSHITE FULTANNO’

16. Uullate aana reyotenni kaꞌꞌanno manni hiittoo heeshsho heeꞌranno?

¹⁶ Alba reyotenni kaino manni uullate aana galagale fiixinsanna jaallansa ledo xaadino. Albillitteno kuni ikkanno; kayinni hakkiinni roorinori ikkanno. Hiitto? Korkaatuno albillitte uullate aana reyotenni kaꞌꞌanno manni layinkimeeshsho reyikki hegerera heeꞌranno faro afiꞌranno. Kuni manni xa heeꞌnoommo alamenni lowo geeshsha baxxitino alamera heeꞌranno. Hatte yannara olu, jaddonna dhibbu diheeꞌranno.

17. Reyotenni kaꞌannori ayeooti?

¹⁷ Reyotenni kaꞌannori ayeooti? Yesuusi, “qaagooshshu waamma giddo noori baalunku huurosi macciishshite fultanno” yiino. (Yohaannisi 5:28, 29, NW) Qoleno Yohaannisi Ajuuja 20:13 togo yitanno: “Baaruno giddosi nooha reyino manna fushshe uyi; reyonna jennaatuno [waammano] giddonsa nooha reyino manna uyi.” Ee, lowo biliyoone ikkanno manni reyotenni kaꞌꞌanno. Soqqamaasinchu Phaawuloosino “Maganu cubbaataammanna keeraano reyotenni kayisanno” yiino. (Soqqamaasinete Looso 24:15 nabbawi.) Hatto yaa mayyaate?

18. Reyotenni kaꞌannori “keeraano” yiniri ayeooti?

¹⁸ Yesuusi uullara daara albaanni heedhinoti Yihowa soqqamaasine “keeraano” yiniri widooti. Nohi, Abirahaami, Saara, Muse, Ruutinna Asteeriuu gedee manni uullate aana heeꞌrara reyotenni kaꞌꞌanno. Togoohu ammanamino labballinna meentire Ibiraawoota fooliishsho 11 aana nabbawa dandaatto. Yannankera reyitannori ammanantinori Yihowa soqqamaasinena? Insano ‘keeraanote’ widooti; hakko daafira reyotenni kaꞌanno.

19. “Cubbaataamma” yiniri ayeooti? Yihowa togoo mannira mayi faro fanannonsa?

¹⁹ Yihowa afate faro afiꞌrikki reyinohu lowo biliyoone ikkanno manni, “cubbaataamma” yiniri wido kiiramanno. Togoo manni reyinoha ikkirono, Yihowa dihawinonsa. Yihowa reyotenni kayiseennansa, isi daafira rosatenna isira soqqamate faro afidhanno.

20. Reyotenni kaꞌannokkiri ayeooti?

²⁰ Ikkina hatto yaa reyinohu baalunku kaꞌꞌanno yaateni? Deeꞌni. Yesuusi mitu manni galagale heeshsho afiꞌrannokkita coyiꞌrino. (Luqaasi 12:5) Mitto mancho kaꞌꞌanno woy dikaꞌꞌanno yaa dandaannohu ayeti? Jeefote yoo yaanno Daanyi Yihowaati; kayinni isi “nooriranna reyitinorira yoo yaanno gede” Yesuusirano roorre uyinosi. (Soqqamaasinete Looso 10:42) Bushaho yine yoo yinoonnihunna heeshshonsa biddi assiꞌra hasiꞌrannokki manni baalunku reyotenni dikaꞌꞌanno.—Jeefote Hedo 19 lai.

IIMI HEESHSHO AFIꞌRATE KAꞌꞌA

21, 22. (a) Iimi heeshshora kaꞌannori hiittoo biso uddidhe kaꞌanno? (b) Iima heeꞌrate mite yee reyotenni kainohu ayeti?

²¹ Qullaawu Maxaafi mitu manni iimira haꞌrannota kulanno. Mittu manchi iima heeꞌrate reyotenni kaꞌꞌanno wote, kaꞌꞌannohu maala uddiꞌre diꞌꞌikkino. Togoo manni ayyaanu biso uddiꞌre iima heeꞌrara kaꞌꞌanno.

²² Togoo kao kainohu umihu Yesuusaati. (Yohaannisi 3:13) Yesuusa shinihunni sasu barri gedensaanni, Yihowa iso reyotenni kayisinosi. (Faarso 16:10; Soqqamaasinete Looso 13:34, 35) Yesuusi reyotenni kainohu maala uddiꞌre diꞌꞌikkino. Soqqamaasinchu Pheexiroosi Yesuusi “manninatunni ree, ayyaanunni kayinni heeshshonniha ikkino” yiino. (1 Pheexiroosi 3:18) Yesuusi wolqaataamo ayyaanu kalaqo ikke reyotenni kaino! (1 Qorontoosi 15:3-6) Ikkirono Qullaawu Maxaafi konni garinni kao afiꞌrinohu iso calla ikkinokkita kulanno.

23, 24. Yesuusi “shiima hoshsha” yiiri ayeooti? Kiironsa meꞌꞌete?

²³ Yesuusi reyara albaanni ammanantino rosaanosira togo yiino: “Heedhinanni darga qixxeessate haꞌreemmo.” (Yohaannisi 14:2) Hatto yaasi, harunsaanosi giddo gamu reyotenni kaꞌe isi ledo iima heedhanno yaate. Insa kiiro meꞌꞌete? Yesuusi konni manni kiiro shiima ikkitinohura “shiima hoshsha” yiinonsa. (Luqaasi 12:32) Soqqamaasinchu Yohaannisi konni manni kiiro bade kulino. Isi, Yesuusi iima “Tsiyooni Ilaali aana uurre nooha” laino; hakkawote “144,000 manni isi ledo no” yiino.—Yohaannisi Ajuuja 14:1.

²⁴ Kuni 144,000 Kiristaani reyotenni kaꞌꞌannohu mamarooti? Qullaawu Maxaafi kuni ikkannohu Kiristoosi iima moohihu gedensaanni ikkinota kulanno. (1 Qorontoosi 15:23) Tini heeꞌnoommo yanna Kiristoosi moohe noote; konnira 144,000 manni giddo rooriidi reyotenni kaꞌe iimira hadhe kaꞌino. Xa uullate aana gatte noori reyitanno wote hakkawoyintenni kaꞌe iimira hadhanno. Kayinni rooriidi manni albillitte uullate aana Gannatete heeꞌrara reyotenni kaꞌꞌanno.

25. Aante noo fooliishshora mayi daafira ronseemmo?

²⁵ Muli yanna giddo, Yihowa baalanka manna reyote usurinni fushshanno; reyono hegerera baꞌanno! (Isayaasi 25:8 nabbawi.) Ikkina iimira hadhannori hakko maa assitanno? Qullaawu Maxaafi insa Yesuusi ledo iimi gashshootira mookkannota kulanno. Aantanno fooliishshora konni gashshootire ronseemmo.