ROSO 41
Qullaawu Maxaafi Siimu Xaadooshshi Daafira Mayyaanno?
Batinyu manni siimu xaadooshshi daafira hasaawa saalanno. Ikkollana, Qullaawu Maxaafi tenne hajo daafira xawise, kayinni kawajjeesse kulanno. Qoleno kulannori kaaꞌlannonkereeti. Hatto yaa garankolla. Mayira yiniro, Yihowa Kalaqaanchonkeeti. Hakko daafira, ninkera woyyannore afinohu isooti. Yihowa iso hagiirsiisate maa assa hasiissannonkeronna hegerera hagiidhinanni heeꞌneemmo gede kaaꞌlannonkeri maatiro kulannonke.
1. Yihowa siimu xaadooshshi daafira mayino?
Siimu xaadooshshi Yihowa eltooti. Isi siimu xaadooshshe adhamino minaanninna minaama hagiidhara uyino. Tini elto minaanninna minaama ooso ilanno gede calla ikkikkinni mimmitoho baxillensa hagiirsiisanno garinni leellishanno gedeno kaaꞌlitannonsa. Qullaawu Maxaafi “Qeedhichimmakki galte ledo hagiidhi” yaannohu iseraati. (Lawishsha 5:18, 19) Yihowa, adhamino Kiristaani mimmitoho ammaname heeꞌrara hasiꞌranno; hakko daafira insa soorrotewiinni xeertiꞌra hasiissannonsa.—Ibiraawoota 13:4 nabbawi.
2. Foorre maati?
Qullaawu Maxaafi “foortannori . . . Maganu Gashshoote diragidhanno” yaanno. (1 Qorontoosi 6:9, 10) Qullaawu Maxaafi borreessaano, foorre xawisate poorniya yaannoha Giriikete qaale horoonsidhino. Kuni qaali (1) adhaminokki manni assannoha siimu xaadooshshe,a (2) labbaahu labbaahu ledo woy meyati meyate ledo foora, hattono (3) saadate ledo siimu xaadooshshe assa kulannoho. ‘Foorretewiinni xeertiꞌranke’ Yihowa hagiidhanno gede assitanno; ninkerano kaaꞌlitannonke.—1 Teselonqe 4:3.
LEDDE XIINXALLI
Foorretewiinni xeertiꞌra dandaatto garanna amanyootunni xuru nookkiha ikkite heeꞌra kaaꞌlitannohe gara rosi.
3. Foorretewiinni xooqi
Ammanaminohu Yihowa soqqamaasinchi Yooseefi amanyootunni xuru nookkiha ikke heeꞌrate sharramino. Kalaqama 39:1-12 nabbabbe; hakkiinni tenne xaꞌmuwa hasaabbe:
Yooseefi xooqanno gede kakkayisinosiri maati?—Kiiro 9 lai.
Yooseefi doodhinori gara lawannohe? Mayira?
Xaa yannara wedellootu Yooseefi lawishsha harunsite foorretewiinni xooqa dandiitannohu hiittoonniiti? VIIDIYO laꞌe.
Yihowa ninke baalunku foorre gimbammora hasiꞌranno. Umi Qorontoosi 6:18 nabbabbe; hakkiinni aante noo xaꞌmuwa hasaabbe:
Mitto mancho foorrete widira qole massara dandaannori maati?
Foorretewiinni xooqa dandaattohu hiittoonniiti?
4. Fonqolo qeelte saꞌꞌa dandaatto
Foorrete widira qole massanno fonqolo qeela qarra ikkitanno gede assara dandaannori maati? VIIDIYO laꞌe; hakkiinni, aante noo xaꞌmo hasaabbe.
Viidiyote giddo laꞌnummo rodii, hedanni noorinna assootisi galtesira ammanamannokki gede assasira dandaannota wodanchiti, maa assino?
Ammanamino Kiristaani nafa hedonsa xuru nookkita ikkitanno gede assiꞌrate sharrama hasiissannonsa woyiti no. Maaeela coye heda agura dandaattohu hiittoonniiti? Filiphisiyusi Sokka 4:8 nabbabbe; hakkiinni aante noo xaꞌmuwa hasaabbe:
Hiittoo coye heda hasiissannonke?
Qullaawa Maxaafa nabbawankenna Yihowa loosi woꞌminonkere ikkanke, cubbu widira massanno fonqolo qeelate kaaꞌlitannonkehu hiittoonniiti?
5. Yihowa aannonke biddishshi kaaꞌlannonke
Yihowa ninkera woyyannori maatiro afino. Isi xuru nookkire ikkine heeꞌra dandiineemmo garanna hatto assanke kaaꞌlitannonke gara kulannonke. Lawishsha 7:7-27 nabbabbe, woy VIIDIYO laꞌe; hakkiinni aante noo xaꞌmuwa hasaabbe.
Wedellichu beetti fonqolanno coyi giddora einohu hiittoonniiti?—Lawishsha 7:8, 9 lai.
Lawishsha 7:23, 26 kultanno garinni, foorre buutote qarra abbitanno. Amanyootunni xuru noonkekkire ikkinummoro, hiittoo qarrinni ganteemmo?
Amanyootunni xuru nookkire ikkanke hegerera hagiidhinanni heeꞌneemmo gede kaaꞌlitannonkehu hiittoonniiti?
Mitootu, Qullaawu Maxaafi labbaahu labbaahu ledo woy meyati meyate ledo foorate daafira kulannori mararro nookkireeti yite heddanno. Ikkollana, Yihowa baxillaancho Maganooti; qoleno isi mannu baalunku hegerera hagiidhanni heeꞌrara hasiꞌranno. Hegere heeshsho afiꞌrate, seerisi garinni heeꞌra hasiissannonke. Umi Qorontoosi 6:9-11 nabbabbe; hakkiinni tenne xaꞌmo hasaabbe:
Maganu hedo garinni, giwa hasiissannonketi labbaahu labbaahu ledo woy meyati meyate ledo foorate yorto callate?
Magano hagiirsiisate, ninke baalunku heeshshonke biddi assiꞌra hasiissannonke. Heeshshonke biddi assiꞌrate hakkeyi geya sharrama hasiissannonke? Faarso 19:8, 11 nabbabbe; hakkiinni aante noo xaꞌmuwa hasaabbe:
Yihowa seera agadha dandiinannikkire labbannohe? Mayira?
Yihowa batinye manna seerisi ledo sumuu yee heeꞌranno gede kaaꞌlino. Ateno kaaꞌlahera dandaanno
MITU MANNI TOGO YAANNO: “Lamu manni mimmito baxannoha ikki geeshsha, siimu xaadooshshe assiro qarru dino.”
Ati tennera mayyaatto?
XAPHISHSHA
Siimu xaadooshshi Yihowa minaanni minaamasi ledo hagiidhara uyino eltooti.
Kageeshsha Rosoottore
Foorrete yinannihu hiittoo hiittoo cubbooti?
Foorretewiinni xeertiꞌneemmo gede kaaꞌlannonkeri maati?
Yihowaha amanyootu seera agadhanke kaaꞌlitannonkehu hiittoonniiti?
EGENNO LEXXI
Maganu, mitteenni heeꞌra hasiꞌranno manchinna mancho adhamara hasiꞌrannohu mayiraati?
“Qullaawu Maxaafi Adhammikki Mitteenni Heeꞌrate Daafira Mayyaanno?” (Webisayitenkera fultino borro)
Qullaawu Maxaafi labbaahu labbaahu ledo woy meyati meyate ledo foora cubboho yaasi togoo manna giwa hasiissannonke yaa ikkitinokkihu mayiraati?
“Labbaahu Labbaahu Ledo Woy Meyati Meyate Ledo Foora Soꞌrote?” (Webisayitenkera fultino borro)
Maganu siimu xaadooshshi daafira fushshino seeri kaaꞌlannonkehu hiittoonniitiro rosi.
“Afuunni Assinanni Xaadooshshi Addinta Siimu Xaadooshsheeti?” (Webisayitenkera fultino borro)
“Insa Ayirrissinoe” yaanno woꞌnaalshi giddo, labballu ledo foorannohu mittu manchi Magano hagiirsiisate heeshshosi biddi assiꞌranno gede kakkayisinosiri maatiro nabbawi.
“Qullaawu Maxaafi Heeshsho Biddi Assanno” (Agarooshshu Shae, Dotteessa 1, 2011)
a Kuni qaali (poorniya) siimu xaadooshshe assa calla kulannoha ikkikkinni, duuchu gari assoote lawishshaho, afuunninna ofollaanchunni siimu xaadooshshe assa, woy wolu manchiha sirote biso amammadanna woleno kuri lawanno assoote xawisannoho.