Geꞌrechu Sarge Iillitinona Hagiidhe!
“Geꞌrechu sarge iillitino daafira . . . hagiidhino, hattono tashshi yoonke.”—AJU. 19:7.
1, 2. (a) Iima hagiirru woꞌmanno gede assitannoti aye sargeeti? (b) Hiittee xaꞌmuwara dawaro afiꞌneemmo?
SARGETE qixxaawate ayewoteno yanna hasiissannoti egennantinote. Xa kayinni mitte lowonta baxxitino sargere laꞌneemmo. Hattino Nugusu sargeeti. Tenne sargera qixxaawo jammarrinku, mito 2,000 diro ikkitanno yanna saꞌino. Tini lowonta dhagge ikkitannote! Idayichunna idayicho mitto ikkitanno yanna xa lowo geeshsha gambisse daggino. Muli yanna giddo Nugusu beetemangistera hagiirsiisanno muuziiqi suunanna iimi saraawite togo yitanni faarsitanno: “Yahira galata uuyye; korkaatuno Duuchanka Dandaanno Maganinke Yihowa nugusa ikke gashsha jammarino! Geꞌrechu sarge iillitino daafiranna idayicho iseneeto qixxeessitino daafira hagiidhino, hattono tashshi yoonke.”—Aju. 19:6, 7.
2 Iima hagiirru woꞌmanno gede assitanno sargera idayicho ikkino “Geꞌrechi” Yesuusi Kiristoosiiti. (Yoh. 1:29) Isi sargete hiittoo uddano uddiꞌrino? Idayicho ayetiyya? Ise sargete qixxaabbinohu hiittoonniiti? Tini sarge mamaro ikkitanno? Tini sarge iima noore lowo geeshsha hagiirsiissannoti dihuluullissannote; uullate aana hegerera heeꞌrate hexxo noonsari tenne sargera hagiidhitannoyya? Tenne xaꞌmuwa dawaro afate quqquxxannote; konni daafira hanni Faarso 45 lende xiinxallino.
‘UDUUNNISI SUꞌNEE GAWWU YAANNO’
3, 4. (a) Faarsaanchu Idayichunnihu sargete uduunni hiittooho yiino? Nugusa roore hagiidhanno gede assannosihu maati? (b) Idayichu ledo hagiidhannohu ‘nugussate seenninna’ “mootitte” ayeoo riqibbanno?
3 Faarso 45:8, 9 nabbawi. Idayichu Yesuusi Kiristoosi, ayirradu gaacheeni heeꞌrannosi gede assannosiha nugusu uddiꞌrannoha sargete uduunne uddiꞌrino. Uddiꞌrino uduunni suꞌniilli, “doorantino qimamma” gede, lawishshaho karbete fooli gede lowo geeshsha baxisannoho; togoo qimamma Isiraeelete waro buurrannita qullaawa zayite qixxeessate horoonsiꞌnanni.—Wol. 30:23-25.
4 Iima Idayichu beetemangistera macciishshamanno muuziiqi, Idayichu roore hagiidhanno gede assannosi. “Mootitte” yaano Maganu dirijjiteti iimiidi kifile Idayichu ledo hagiidhitanno; “nugussate seenni” yaano keeraano sokkaano tenne dirijjite wido kiirantanno. Iima togo yitanno huuro macciishsha lowo geeshsha hagiirsiissannote: “Geꞌrechu sarge iillitino daafira . . . hagiidhino, hattono tashshi yoonke”!
IDAYICHO SARGETE QIXXAABBINO
5. “Geꞌrechu galte” yiniti ayeti?
5 Faarso 45:10, 11 nabbawi. Idayichu ayetiro anfummona, idayicho ayetiyya? Tini lawishshu idayicho, 144,000 buuramino Kiristaani gaamo gudisse riqibbannote. Yesuusi Kiristoosi tenne buurantino songora umoho. (Efesooni 5:23, 24 nabbawi.) Kuni Kiristaani Kiristoosi ledo Mangistesira moohanno. (Luq. 12:32) Qoleno insa “Geꞌrechu haꞌriwa baalankawa hoodesi hadhanno.” (Aju. 14:1-4) Insa “Geꞌrechu galte” ikkite isi ledo iimi qaesira heedhanno.—Aju. 21:9; Yoh. 14:2, 3.
6. Buuramino Kiristaani “nugusu beetto” yaamaminohu mayiraati? Insa ‘mannansa habbanno’ gede kulloonninsahu mayiraati?
6 Idayicho “Beettoꞌya” yaamantino; qoleno ise “nugusu beetto” yinoonni. (Far. 45:13) Koye yini ‘nugusi’ ayeti? Yihowa buuramino Kiristaana “oososi” assiꞌrino. (Rom. 8:15-17) Buuramaasine iimi idayicho ikkitanno daafira, “Mannaꞌnenna [uullate] annuwaꞌne qae habbe” yinoonninsa. Insa surrensa ‘uullayidi coyi aana ikkikkinni iimi coyi aana illachishshanno’ gede assiꞌra hasiissannonsa.—Qol. 3:1-4.
7. (a) Kiristoosi albillittete idayichosi qixxeessanni keeshshinohu hiittoonniiti? (b) Idayicho albillittete minaannisera hiikkitanno?
7 Kiristoosi albillittete idayichosi lowo xibbe diro iimi sargera qixxeessanni keeshshino. Hawaariya Phaawuloosi togo yiino: “Kiristoosi songo baxino, hattono isonooto isera sayise uyino; konne assinohu, ise qaalu widoonni wayinni hayishshe keereense qulleessateeti; qoleno songo xuru woy albu shoccoorraawa woy woluri togoori noota ikkitukki, qullaawanna muso nookkita asse xummese baꞌukki umisiwa shiqishiꞌrateeti.” (Efe. 5:25-27) Phaawuloosi hunda Qorontoosi noo Kiristaanira togo yiino: “Ani kiꞌnera maganittete hinaaso hinaaseemmo; korkaatuno kiꞌne keeraancho seemo gede Kiristoosira shiqishate mittu minaannira huuccoommoꞌne.” (2 Qor. 11:2) Idayicho Yihowa xalalletenni magansidhanno daafiranna isino tennenni hagiidhanno daafira, Nugusu Yesuusi Kiristoosi ise “xuma” ikkitino gede asse laꞌꞌanno. Idayicho minaannisera kumbuultanno, hattono ‘mootichase’ assite adhitanno.
IDAYICHO ‘NUGUSUNNIWA ABBINANNI’
8. Idayicho “alinni eeli geeshsha gaamaartino” yaamamase gara ikkitinohu mayiraati?
8 Faarso 45:13, 14a nabbawi. Idayicho “minaannisera seesse,” hattono “alinni eeli geeshsha gaamaarte” sargete qixxaabbino. Ajuuja 21:2 aana tenne idayicho katamu ledo, yaano Haaro Yerusaalame ledo heewisiinsoonni. Kuni iimi katami “Maganu ayirrinyi” nooho, qoleno “lowo geeshsha muxxe ikkino kinchi gede, hattono iyyasphiidi yinanni kinchi gede ikke xawanno; qoleno kiristaale yinanni kinchi gede ikke waraꞌa yaanno.” (Aju. 21:10, 11) Haaro Yerusaalame xabbanno gara Ajuujate maxaafira kaajja gede assine kulloonni. (Aju. 21:18-21) Faarsaanchu, idayicho “alinni eeli geeshsha gaamaartino” yaasi garankolla! Tini nugusu sarge iima ikkitanno daafira, hatto yaamamase garaho.
9. Idayicho haaꞌne abbini “nugusi” ayeti? Ise hiittoo uduunne uddidhino?
9 Idayicho abbinoonnihu Idayichunniwa yaano Buuramino Nugusiwaati. Isi ise ‘qaalu widoonni wayinni hayishshe keereensanni’ keeshshino. Ise “qullaawanna muso nookkita” ikkitino. (Efe. 5:26, 27) Idayichono sargete hasiisanno garinni uddidhanno yine heda garaho. Uddidhinohuno hakko garinniiti! Ee, “uddanose culkunni seesiinsoonni”; qoleno, “xilfetenni biifinsoonni uduunne uddidheenna nugusunniwa abbinannise.” Ise Geꞌrechu sargera, “xawado, collittenna dancha shalaalate hocci uddano uddidhara uyinoonnise”; “dancha shalaalate hocci uddano qullaawootunniha keeraanchimmate looso riqibbanno.”—Aju. 19:8.
‘SARGETE BARRI IILLINO’
10. Geꞌrechu sarge ikkitannohu mamarooti?
10 Ajuuja 19:7 nabbawi. Geꞌrechu sarge mamaro ikkitanno? Ajuuja 19:7 aana ‘idayicho iseneeto [sargete] qixxeessitinota’ kulloonniha ikkirono, aantete noo assaawe sargennire xawissannota diꞌꞌikkitino. Aanchine xawinsoonnihu, bayiru qarri jeefora ikkanno coyeeti. (Aju. 19:11-21) Hatto yaa kayinni sarge ikkitannohu Nugusu qeelle gudise adhara albaanniiti yaate? Deeꞌni. Ajuujate maxaafira masaalloonniti addi addi ikkito borreessantinohu, woꞌmitanno yanna aantenni diꞌꞌikkino. Faarso 45 kultanno garinni nugusu sarge ikkitannohu, Nugusu Yesuusi Kiristoosi ‘bisesi qodhe’ diinnasi ‘qeeli’ gedensaanniiti.—Far. 45:3, 4.
11. Kiristoosi qeelle gudise adhanno aante xawisi.
11 Konni daafira, tini ikkituwa aanchine kulloonni aantenni woꞌmitanno yine heda dandiineemmo: Umo, “bayira fotaancho” yaamantinota Bayira Baabiloone yaano baalanti kaphu ammaꞌno baꞌanno. (Aju. 17:1, 5, 16, 17; 19:1, 2) Hakkiinnino, Kiristoosi uullate aana gattinota busha Sheexaanu alame Armagedooni olinni hunanno; kuni oli “Duuchanka Dandaanno Maganihu bayira barra kaꞌꞌanno ola” yaamamino. (Aju. 16:14-16; 19:19-21) Jeefote, Nugusu Sheexaanenna agaanintesi ayeno gawajjitannokkiwa qilete tuge qeelle gudise adhanno. Insa hakko reyitinohu gede ikkitanno.—Aju. 20:1-3.
12, 13. (a) Geꞌrechu sarge mamaro ikkitanno? (b) Iima Geꞌrechu sargera hagiidhitannori ayeooti?
12 Goofimarchu barruwara, reyote geeshsha ammanantino buuramaasine reyotenni kaꞌe iimira hadhanno. Bayira Baabiloone baꞌuhunni shiima yanna gedensaanni, Yesuusi idayichote gaamo ikkitinore uullate aana gattinore gudise isiwa haaranno. (1 Tes. 4:16, 17) Konni daafira, Armagedooni oli jammarara albaanni, “idayichote” gaamo wido ikkitinori gudisidhe iimira hadhanno. Konni oli gedensaanni, Geꞌrechu sarge jammartanno. Tini sarge iso hiitto hagiirsiissannota ikkitanno! Ajuuja 19:9, “Geꞌrechu sargehu hashshi hurbaatira woshshinoonniri hagiirraammaho” yitanno. Addaho, idayichote gaamo ikkitannori lowo geeshsha hagiidhitanno. Idayichuno ledosi mookkannori baalunku kiironsa xeꞌukki isiwa gamba yite lawishshu yaattonni ‘Mangistesira sagalesi ittannonna agganno’ wote lowo geeshsha hagiidhanno. (Luq. 22:18, 28-30) Ikkollana, Geꞌrechu sargera hagiidhitannori Nugusanna idayichosi calla diꞌꞌikkitino.
13 Umo laꞌnummonte gede, iimi saraawite togo yite shooshshite faarsitanno: “Geꞌrechu sarge iillitino daafiranna idayicho iseneeto qixxeessitino daafira hagiidhino, hattono tashshi yoonke, qoleno isira [Yihowara] ayirrinye uyino.” (Aju. 19:6, 7) Uullate aana Yihowara soqqantannorina? Insano konni garinni Yihowa guwisidhanno?
“HAGIIRRUNNI ABBINANNINSA”
14. Faarso 45 aana kulloonniri idayichote ‘jaalla ikkino seenni’ ayeooti?
14 Faarso 45:12, 14b, 15 nabbawi. Masaalaanchu Zekkaariyaasi goofimarchu yannara, addi addi daga manni ayyaanaame Isiraeele giddo uullate aana gattinori ledo miilooꞌmannota masaalino. Isi togo yiino: “Hatte yannara, addi addi dagahu duuchunku afii giddonni tonnu manni mittu Yihudichira uddano seekke cuꞌmiꞌre, ‘Maganu kiꞌne ledo noota macciishshinoommo daafira, ate ledo haꞌra hasiꞌneemmo’ yaanno.” (Zek. 8:23) Faarso 45:12 aana kulloonniti ‘Xiroosi beettonna’ “dureeyye manni,” konne “tonne manna” riqiwanno. Kuni manni uullate aana gattino buuramaasine kaaꞌlatenna ayyaanaamittete kaaꞌlo afiꞌrate insawa shiqanno. Buuramaasinete giddo uullate aana gattinori 1935nni jammarte, lowo miliyoone ikkanno manna ‘keeraanchimmate widira qoltino.’ (Dan. 12:3) Buuramino Kiristaana ammaname kaaꞌlannohu kuni manni heeshshonsa colloonsiꞌre, ayyaanaamittetenni seemo ikkino. Idayichote ‘jaalla ikkinohu kuni seenni,’ insaneeto Yihowara sayise uyino, hattono Nugusu Yesuusi Kiristoosira ammanantino soqqamaano ikkinota leellishino.
15. Idayichote ‘jaalla ikkino seenni,’ idayichote gaamo giddo uullate aana gattinori ledo buusame loosinohu ma garinniiti?
15 Idayichote ‘jaalla ikkino seenne’ yinihu kuni manni ‘Mangistenniha dancha duduwo uulla woꞌmate aana sabbakate’ looso diinaggaawe kaaꞌlanni keeshshino; idayichote gaamo giddo uullate aana gattinori tenne kaaꞌlo kaffi assite laꞌanno. (Mat. 24:14) ‘Ayyaananna idayichono’ agurranna macciishshitannorino, “Amo!” yitanno. (Aju. 22:17) Ee, “wolu geꞌreewi” buuramaasine “Amo!” yitanna macciishshe, insa ledo uulla woꞌmate noo manna “Amo!” yaanni no.—Yoh. 10:16.
16. Yihowa wolu geꞌreewira mayi qoosso uyinonsa?
16 Uullate aana gatte noo buuramaasine, wolu geꞌreewi gaamo baxxanno. Qoleno buuramaasine, Idayichu Anni Yihowa wolu geꞌreewino Geꞌrechu sargera hagiidhanno gede qoosso uyinonsata afansa tashshi assitannonsa. Konne idayichote ‘jaalla ikkino seenne,’ “hagiirrunni abbinanninsa” yine balanxe masaalloonni. Ee, uullate aana hegerera heeꞌrate hexxo afiꞌrinohu wolu geꞌreewi, Geꞌrechu sarge iima ikkitanno wote kalqete alame maate ledo hagiidhanno. Ajuujate maxaafi “batinyu manni” gaamo ikkitinori “zuufaanetenna Geꞌrechu albaanni uurritinota” kulanno. Insa bayira ayyaanaame beetemeqidesete uullayidi hoowera Yihowara soqqantanno.—Aju. 7:9, 15.
Idayichote ‘jaalla ikkino seenni’ Geꞌrechu sarge yannara hagiidhanno (Gufo 16 lai)
“LABBALLI OOSOKKI ALBI ANNUWAKKI BAYICHO AMADDANNO”
17, 18. Geꞌrechu sarge haaro alamera mayi atoote abbitanno? Kiristoosi Kumu Diri Gashshootisi yannara ayeoora anna ikkanno?
17 Faarso 45:16 nabbawi. Kiristoosite iimi idayicho “jaalla,” tini sarge haaro alamera lowo atoote abbitanna laꞌanno wote roore hagiidhitanno. Nugusu Yesuusi Kiristoosi ‘albita uulla annuwasi’ reyotenni kayisanno. Kiristoosi reyotenni kayisannonsa daafira, insa ‘labballi oososi’ ikkitanno. (Yoh. 5:25-29; Ibi. 11:35) Isi kuri giddo gama “uulla woꞌmate aana sooreeyye” asse shoomanno. Qoleno, yannankera noote ammanantino cimeeyye giddo gama haaro alamera albisa ikkitanno gede shoomannoti dihuluullissannote.—Isa. 32:1.
18 Kiristoosi Kumu Diri Gashshootisi yannara wolootahono anna ikkanno. Hiittoonni? Uullate aana hegerera heedhannori baalunku tenne heeshsho afidhannohu Yesuusita wodote kakkalo ammantannohuraati. (Yoh. 3:16) Konni garinni Kiristoosi ‘Hegeri Annansa’ ikkanno.—Isa. 9:6, 7.
NUGUSU ‘SUꞌMA EGENSIISATE’ KAKKAꞌꞌA
19, 20. Faarso 45 aana kulloonniti dhaggete coyibba, yannankera noohu addu Kiristaani baalunku ma assanno gede kakkayissanno?
19 Faarso 45:1, 17 nabbawi. Baalunku Kiristaani, Faarso 45 aana kulloonni coyibba seekke illachisha hasiissannonsa. Uullate aana gatte noo buuramaasine, muli yanna giddo iima roduuwinsanna Idayichu ledo xaaddanno yanna lowonta quqquxante agadhite no. Wolu geꞌreewi gaamo ikkitinori ayirradu Nugusinsara maahoyye yite galate kakkaꞌanno; hattono idayichote gaamo giddo uullate aana gattinorira miilla ikkansa lowo geeshsha naaddanno. Kiristoosinna ledosi mookkannori sargensa gedensaanni, uullate aana heedhannorira kulle gundannikki atoote dirrissanno.—Aju. 7:17; 21:1-4.
20 Buuramino Nugusire kulannohu “danchu coyi” woꞌmanno yanna quqquxamme agadhineemmo wote, ‘nugusu suꞌma egensiisate’ kakkaꞌꞌa dihasiissannonke? Ee, ‘Nugusaho hegerinni hegerira guweenya uyino.’