Yihowa Hasiisannonkere Aannonkehonna Agaraanchonkeeti

1, 2. Maatete heeshshonke garinna halaale macciishshinoommo gari babbaxxannohu hiittoonniiti?

MAATETE qixxaawo safinohu Yihowaati. (Efe. 3:14, 15) Mitte maate miilla ikkinummorono, akatinke addi addiho; qoleno heeshshonke gari babbaxxinoho. Mitu manni anninsanna amansa anga lophinoha ikkara dandaanno. Wolu kayinni annansanna amansa xiwanunni, danotenni woy wolu buutote coyinni shiirinoha ikkara dandaanno. Annansanna amansa horo egenninokki mannino no.

² Ninke baalunku Yihowa magansiꞌranno manna amaddino maate miillaati; halaale macciishshinoommohu kayinni addi addi garinniiti. Ati miteekkite halaalu mine lophoottoha, hattono annikkinna amakki maganittete seeri garinni lossinoheha ikkara dandaanno. (Marro 6:6, 7) Woy lowo kume ikkannohu wolu manninte gede atino, halaale afoottohu wole Yihowa soqqamaano farcidheennahe ikkara dandaanno.—Rom. 10:13-15; 1 Xim. 2:3, 4.

3. Ninke baalanka mitto assannonkeri maati?

³ Aleenni kulli coyibba heedhurono, baalanka mitto assitannonke coyibba no. Addaami finqillenni kainohunni guuntete xeꞌne, cubbonna reyo ragiꞌnoommo. (Rom. 5:12) Ikkirono, Yihowa halaalunni magansiꞌneemmo daafira, iso “Annanke” yaa dandiineemmo. Hundihu dooraminohu Maganu manni Isayyaasi 64:8 kultannonte gede, “Yihowa, ati Annankeeti” yaa dandaanno. Qoleno Yesuusi huuccatto rosiisanni togo yiino: “Iima heeꞌratto Annanke, suꞌmikki qullaawo.”—Mat. 6:9.

4, 5. Anninkera Yihowara noonke diniqo lexxitanno gede assiꞌrate, maa xiinxallineemmo?

⁴ Iimi Anninke ammanatenni suꞌmasi woshshanno mannasi towaatanno, hattono agaranno. Faarsaanchu, Yihowa togo yiinota borreessino: “[Soqqamaanchiꞌya] baxannoe daafira gatiseemmosi. Suꞌmaꞌya afino daafira agareemmosi.” (Far. 91:14) Ee, Maganu Yihowa baxillunni mannasi diinnansa anganni gatisanno, hattono raaphite gooffannokki gede agarannonsa.

⁵ Iimi Anninkera noonke diniqo lexxitanno gede, hanni sase qara coyibba laꞌno: (1) Anninke hasiisannonkere Aannonkeho. (2) Yihowa Agaraanchonkeeti. (3) Maganu muli Jaalankeeti. Tenne sase naxibba xiinxallineemmo wote, Maganu ledo noonke fiixoomanna Anninke gede assiꞌne isira ayirrinye aa dandiineemmo gara hiincino. Qoleno Yihowa isiwa shiqqannorira dirrisara noo atoote hendo.—Yaq. 4:8.

YIHOWA HASIISANNONKERE AANNONKEHO

6. Yihowa ‘dancha elto baalanta’ aanno Magano ikkinota leellishannohu mittu coyi maati?

⁶ Rosaanchu Yaaqoobi togo yee borreessino: “Dancha eltonna guutu atooti baalunku alinni, iimi xawaabbi Anniwiinni dirranno.” (Yaq. 1:17) Heeshsho umise Yihowa uyinonkete muxxe eltooti. (Far. 36:9) Heeshshonkenni Maganu fajjo assineemmoha ikkiro, xaa yannara falahino atoote, haaro alamera qolle hegere heeshsho afiꞌneemmo. (Law. 10:22; 2 Phe. 3:13) Ikkina, Addaami lowo coye daafino daafira tenne assa dandiineemmohu hiittoonniiti?

7. Maganu isi ledo danchu fiixoomi heeꞌrannonke gede doogo faninonkehu ma garinniiti?

⁷ Yihowa hasiisannonkere aannonkeha ikkinota leellishino doogga kiirre ditunqannite. Lawishshaho, shaqqadonna dancha Magano ikkino daafira ninke gatisate hasiisannore assino. Ninke baalunku cubbaataammaho, qoleno hundi anninkewiinni guuntete xeꞌne ragiꞌnoommo. (Rom. 3:23) Yihowa kayinni baxillisinni isi ledo dancha fiixooma kalaqiꞌneemmo doogo faninonke. Hawaariya Yohaannisi togo yiino: “Maganu baxilli ninkera xawinohu konni garinniiti; hakkuno isi widoonni heeshsho afiꞌneemmo gede Maganu mitto Beettosi alame soyino. Baxillu leellinohu togoonniiti; ninke Magano banxoommo daafira ikkikkinni, isi baxinonke daafiraatinna cubbinke diwamanno gede Beettosi soyino daafiraati.”—1 Yoh. 4:9, 10.

8, 9. Yihowa Abirahaaminna Yisaaqi waro hasiisannore aate taalle nookkiha ikkinota leellishinohu hiittoonniiti? (Umi misile lai.)

⁸ Yesuusi ilamara albaanni 19⁠^ki sanira ikkitinoti mitte ikkito, Yihowa hajajamanno mannira baalaho hegeri heeshsho baxillunni aanno gara leellishshanno. Ibiraawuyaani 11:17-19 togo yite xawissanno: “Abirahaami fonqolami yannara, ammanatenni Yisaaqi kakkalo asse shiqishate geeshsha iillino; hexxote qaale hagiirrunni adhinohu kuni manchi mitto beettosi kakkalo asse shiqishate kaino; tenne assinohu, ‘Sirchikki woshshamannohu Yisaaqi widoonniiti’ yine kulle heeꞌneennasiiti. Isi kayinni beettosi Maganu reyotenni nafa kayisara dandaannota wodanchino; qoleno lawishsha ikkanno garinni beettosi reyote afiinni qole adhino.” Abirahaami mitto beettosi Yisaaqi kakkalo asse shiqishate xiixaminokkinte gede, Yihowano manna gatisate Beettosi Yesuusi Kiristoosi sayise uyino.—Yohaannisi 3:16, 36 nabbawi.

⁹ Yisaaqi hakkawote kakkalo ikke reyikki gatino daafira lowo geeshsha hagiidhinoti dihuluullissannote! Isi bayicho kakkalo ikkara Yihowa geꞌrechu goco qixxeessino daafira lowo geeshsha galatisikki digatino. (Kal. 22:10-13) Hakko bayichi “Yihowa-yirie” yaamamasi garankolla; Ibirayisxete afiinni hatto yaa “Yihowa Qixxeessanno” yaate.—Kal. 22:14.

ARAARAHO KAAꞌLITANNO QIXXAAWO

10, 11. ‘Araarsate soqqanshora’ albisa ikkitinori ayeooti? Insa tenne assitinohu ma garinniiti?

¹⁰ Yihowa uyinonkere heeshshi gotti assine hendeemmo wote, Yesuusi kakkalo nookkiha Maganu jaala ikka dandiineemmokkita huwanteemmo. Phaawuloosi togo yee borreessino: “Mittu manchi baalunkura reyinota huwantoommo; korkaatuno baalunku balaxe reyino. Lubbote noori xaate uminsara heeꞌra agurte insara yee reyinohuranna reyotenni kainohura heedhanno gede, isi baalunkura reyino.”—2 Qor. 5:14, 15.

¹¹ Hundi Kiristaani Magano baxanno daafiranna isira soqqamate qoosso lowo ayirrinyi gede asse laꞌꞌanno daafira, “araarsate soqqansho” hagiirrunni soqqamino. Kuni Kiristaani loosinohu sabbakatenna manna rosaano assate loosi, suwashsho wodana afiꞌrino manni Maganu ledo araaramanno gede, isi jaala ikkanno gedenna ayyaanaame oososi ikkanno gede faro fanino. Yannankerano buurantinori Yihowa soqqamaano hattoo soqqansho soqqantanno. Insa Maganohonna Kiristoosira ambaasaadderoota ikkite soqqamansa, joogu manni Yihowawa shiqanno gedenna soqqamaanosi ikkanno gede assitanno.—2 Qorontoosi 5:18-20 nabbawi; Yoh. 6:44; Looso 13:48.

12, 13. Yihowa uyinonkehu lowo coyira galatu noonketa leellishate ma assa dandiineemmo?

¹² Uulla ragiꞌrate hexxo noonsa Kiristaani baalunku, hasiisannonkere aannonkehura Yihowara diniqo noonsa daafira, buurantinori ledo sabbakate looso loossanno. Konni loosira Maganu uyinonketa wole muxxe elto, yaano Qullaawa Maxaafa horoonsiꞌneemmo. (2 Xim. 3:16, 17) Maganu Qaale soqqanshonkera dancha gede assine horoonsiꞌneemmoha ikkiro, mannaho hegere heeshsho afiꞌranno faro heedhannonsa. Yihowa qullaawa ayyaanasino aannonke; ninke baalunku soqqanshonkera kuni ayyaani kaaꞌlannonketa addaxxineemmo. (Zek. 4:6; Luq. 11:13) Afiꞌnoommo gumino lowonta hagiirsiisannoho; diru dirunku fulannohu Yihowa Farciꞌraasinehu Diru Maxaafi tenne buuxisanno. Annankenna hasiisannonkere aannonke Magano guwisiꞌrate konne looso loosa lowo ayirrinyeeti!

¹³ Maganu lowo coye uyinonke daafira, ninkeneeto togo yine xaꞌma hasiissannonke: ‘Yihowa assinoe coyira nooe diniqo leellishate wolqaꞌya assitu geeshsha soqqamanni noommo? Dancha duduwo roore guma abbanno garinni sabbakate maa maa woyyeessiꞌra dandeemmo?’ Maganu uyinonkehu dhaggete coyira galatu noonketa leellishate, heeshshonke giddo Mangistesi balaxisiisa hasiissannonke. Hatto assineemmoha ikkiro, Yihowa hasiisannonkere aannonke. (Mat. 6:25-33) Maganu baxillunni towaatannonke daafira, iso hagiirsiisatenna wodanasi tashshi assate wolqanke dandiitannore baala assineemmo.—Law. 27:11.

14. Yihowa mannisira Gatisaancho ikkinota leellishinohu hiittoonniiti?

¹⁴ Faarsaanchu Daawiti togo yee faarsino: “Ani kaaꞌlannoehu nookkihonna buxichoho; Yihowa kayinni dideannoe. Ati kaaꞌlaanchoꞌyaatinna gatisaanchoꞌyaati.” (Far. 40:17) Yihowa mannisira gaamote deerrinni duucha hige Gatisaancho ikkanni keeshshino; roorenkanni ammanansanni kainohunni buutote qarri iillinsa yannara diinnansa anganni gatisinonsa. Maganu togoo yannara kaaꞌlannonke daafiranna lowoha ayyaanaamo atoote ganye aannonke daafira lowo geeshsha galanteemmosi!

YIHOWA MANNASI AGARANNO

15. Shaqqadu anni oososi gawajjotenni agaranno gara lawishshunni kuli.

¹⁵ Shaqqadu anni oososira hasiisannore oye calla diaguranno; insa gawajjotennino agarannonsa. Oososi adaga abbanno coyi giddo noota afiro, insa gatisate rahe iillanno. Mittu rodiira anje annisi gatisinosi gari dibainosi. Mitto barra isinna annisi soqqanshotewiinni shiimu lagi widoonni higge qaera higganni no. Hakko barra soodo biite xeena ganino daafira lagu daye no. Hakkoye laga tayise saꞌꞌate kubbinanni jajjabba kinna kaxxa agurranna wole doogo dino. Hakkawote annisira albaanni haꞌranni noohu kuni beetti, kinchu shalaqisheennasi iima haꞌranni noo wayi giddo uwi; hakkiinnino wayi lame hige lixise fushshisi. Annisi rahe qote amade kayise gatisisi; beettuno tennera lowo geeshsha hagiidhino! Hatteente gede, iimi Anninke lolahu gede ikkinohu tenne busha alame adaginninna gashshaanchise Sheexaanu anganni gatisannonke. Addaho, Yihowa gede gatisannohu horonta dino.—Mat. 6:13; 1 Yoh. 5:19.

16, 17. Isiraeele Amaaleeqi gosa ledo olantu yannara Yihowa kaaꞌlinonsahunna agarinonsahu hiittoonniiti?

¹⁶ Yihowa 1513 K.A. Isiraeele Gibitsete borojjimmanni fushshe maalaletenni Duumo Baara tayisse saꞌanno gede assi gedensaanni ikkino coyi, mannasi baxillunni agarannota seekke xawisanno. Isiraeele halalli gobba tayisse Siina Ilaala hadhu yannara, Rafidiimi iillitino.

¹⁷ Kalaqo 3:15 aana masaalloonni masaalo garinni, Sheexaanu wolqiweeloota labbannota Isiraeelete daga gawajjate hatte yannara faro hasiꞌrinoti dihuluullissannote. Isi Maganu manni diinna ikkitinore Amaaleeqi daga horoonsiꞌre tenne assate woꞌnaalino. (Zeh. 24:20) Hanni Yihowa shoole ammanamino manna yaano Iyyaasu, Muse, Aarooninna Hoori horoonsiꞌre assinore laꞌno. Iyyaasu Amaaleeqi gosa ledo olamanno wote, Muse, Aarooninna Hoori hakko qooxeessaho noo tullora agarte no. Muse angasi kayisanno wote Isiraeele qeeltanno. Isira anga daafurtuta kayinni, Aarooninna Hoori angasi gotti assite irkisse amaddu. Konni daafira Yihowa kaaꞌlonninna agarooshshinni, “Iyyaasu Amaaleeqinna gosasi qeelino.” (Wol. 17:8-13) Muse hakko kakkalote bayicho seekke “Yihowa-nisi” yee suꞌma fushshi; hatto yaa “Yihowa Goloꞌyaati” yaate.—Wolapho 17:14, 15 nabbawi; lekkaalliidi qaagiishsha.

SHEEXAANU GAWAJJONNI AGARANTINO

18, 19. Yihowa yannankera soqqamaanosi agarinohu ma garinniiti?

¹⁸ Yihowa baxxannosirenna hajajantannosire agaranno. Isiraeele Rafidiimi noo waro assitunte gede, ninkeno diinnanke gawajjitankera kaꞌanno wote agarooshshe afiꞌrate alba Maganunniwa hingeemmo. Yihowa gaamote deerrinni duucha hige agarinonke; qoleno Daawuloosi gawajjonni agarannonke. Maganu roduuwinke poletiku coyira anga wodha gibbino daafira iillitannonsa gawajjonni agarinonsa gara heda dandiinanni. Lawishshaho 1930⁠nni kayise 1940 gedensaanni noote boode yanna giddo, Naazi paarte gashshoote amadde noo yannara, Jarmanetenna wole gobbuwara Yihowa roduuwanke agarino. Roduuwinketa heeshshote xaggenna Diru Maxaafira fultanno temokkiruwa nabbambe hiincineemmoha ikkiro, Yihowa albinni roore Golonke assiꞌne addaxxineemmo.—Far. 91:2.

¹⁹ Qoleno Yihowa ninke agarate dirijjitesinna borronke widoonni baxillunni amaalenna qaagiishsha aannonke. Hanni muli yannara uyinoonninkeha addi addi qaagiishsha hendo. Amanyootu maaeelle, hattono teeda baꞌino misillanna borro tenne alame bashshonni roore batteessitanni no; ninkera kayinni Yihowa isi ledo noonke fiixooma daafannore assineemmokki gede lowonta hasiissannonke amaale xawise uyinonke. Lawishshaho, dagoomittete aante kalaqiꞌnanni webisayite doogimale horoonsiꞌne busha jaalooma kalaqiꞌneemmokki gede dancha amaale uyinoonninke.a—1 Qor. 15:33.

20. Kiristaanu songo widoonni hiittoo agarooshshenna biddishsha afiꞌneemmo?

²⁰ Ikkina tenne baxillu amaale macciishshineemmorenna ‘Yihowa rosiisinonkere’ ikkinoommota leellishate ma assa hasiissannonke? Hajajosi seekkine agadha hasiissannonke. (Isa. 54:13) Songuwanke agarooshshenna biddishsha afiꞌne teense heeꞌneemmo baseeti. Korkaatuno cimeeyye songote giddo Qullaawu Maxaafinni kaaꞌlonna amaale uyitannonke. (Gal. 6:1) Yihowa ninke baxillunni towaatate kuri ‘elto ikkitino labballo’ horoonsiꞌranno. (Efe. 4:7, 8) Ikkina cimeeyye amaale uyitannonke wote ma assa hasiissannonke? Maahoyye yine hajajama hasiissannonke. Hatto assineemmoha ikkiro, Yihowa maassiꞌrannonke.—Ibi. 13:17.

21. (a) Maa assate murciꞌre kaꞌꞌa hasiissannonke? (b) Aane noo birxichira maa ronseemmo?

²¹ Qullaawu ayyaani iimi Anninke biddishshira maahoyye yine hajajamate kaaꞌlannonke gede, konne ayyaana addaxxino. Qoleno Yesuusi Kiristoosi heeꞌrino gara hiincanna lawishshasi harunsate sharrama hasiissannonke. Yesuusi reyote geeshsha hajajamino daafira, Yihowa lowonta kiisinosi. (Fil. 2:5-11) Ninkeno woꞌmu wodaninkenni Yihowa addaxxineemmoha ikkiro, maassammeemmo. (Law. 3:5, 6) Ayewoteno, hasiisannonkere aannonkehanna wolu baalunkunni roore agarannonkeha Yihowa irkiꞌno. Isira soqqama iso hiittoo ayirrinyeeti! Qolteno lowonta hagiirsiissannote! Ikkina Yihowa muli Jaalanke ikkinohu hiittoonniiti? Aane noo birxichira tenne xaꞌmora dawaro afiꞌneemmo wote, isira noonke baxilli roore lexxanno.