Anjeꞌyanni Doodhoommore

Kamboodiyu gobbanni 1985⁠nni Yunayitidi Isteetise dayino qaaqquulli Ohayo, Kolembesira ani roseemmo rosi mine daye ei; hakkawote anera tonne dirolla ikkannoe. Hakko qaaqquulli giddo mittu, Ingilizete afiita boode qaalla calla afino. Kuni qaaqqi gobbansara manna gannoonninna shinoonni gara, hattono mitu manni gate fulino gara misile kayise kula jammarie. Konne qaaqquulle hedeemmo wote hashsha wiꞌleemmo. Uulla Gannate ikkitannotanna kao noota kulammonsara hasiꞌroommo; kayinni insa coyiꞌreemmo afoo didandiitanno. Ajummorono, ledoꞌya rossanno oosora Yihoware kula dandeemmo gede Kamboodiyu afoo rosate kaummo. Kuni doorshiꞌya albillittete heeshshoꞌya hiitto assannoro hatte yannara dihuwatoommo.

Kamboodiyu afii rosate qarrisie. Lame hige hexxo mudhe facci asse agurate wossaꞌnoommo; ikkirono Yihowa anniꞌyanna amaꞌya widoonni jawaachishinoe. Yannate gedensaanni, rosiisaanoꞌyanna ledoꞌya rossanno ooso lowo woxe abbanno looso amadate sharrameemmo gede amaala jammartue. Ani kayinni suwisaancho ikka hasiꞌroommo; tenne mixoꞌya wonshiꞌra dandeemmo gede, boode saate calla loonsanni looso afiꞌrate kaaꞌlitanno korse adha doodhummo. Rosu mininni dawummo gedensaanni, suwisaanote ledo qaxaro amaxxe soqqameemmo. Qoleno Ingilizete afoo rossanno ooso rosiisa jammarummo; togo assaꞌya gedenaanni lowo geeshsha kaaꞌlitinoe.

Tonaa lewu dirihu heeꞌre, Yunayitidi Isteetete Kalifoorniyaho Longi Bichi yinanni katamira, Kamboodiyu afiinni gambooshshe assidhanno gaamo noota macciishshummo. Hakkira haꞌre Kamboodiyu afoo nabbawa rosummo. Rosu mininni maassame fulanni heeꞌrenni, suwisaancho ikke soqqamanna qachinkera noohura Kamboodiyu mannira farciꞌra jammarummo. Tonaa sette diro ikkieta, Kamboodiyu gobba haꞌrate heda jammarummo. Hakkawaro Kamboodiyaho heeꞌra adaga abbitara dandiitannoha ikkirono, hakko heeꞌrannohu tonne miliyoone ikkanno manni giddo Maganu Mangisteha dancha duduwo macciishshino manni gariha ikkinokkita afoommo. Hatte yannara, hakko 13 halashshaano amaddinoti mitte songo calla no. Tonaa honse diro ikkieta mite yee Kamboodiya haꞌre higummo. Lamu diri gedensaanni, hakko haꞌre heeꞌrate wossaꞌnummo. Soqqameemmo wote hasiisannoere afiꞌrate kaaꞌlannoeha boode yanna looso afiꞌrummo; hakkuno, tirote loosootinna Ingilizete afoo rosiisate. Yannate gedensaanni, anete gedee mixo noose rodoo adhummo. Lamunku mitteenni, lowohu Kamboodiyu manni heeshshonsa Maganoho sayise aanno gede kaaꞌline hagiidhinoommo.

Yihowa ‘wodaniꞌya halcho’ wonshinoe. (Far. 37:4) Loosu baalunkunni roore harshammi assanno loosi, manna rosaano assate. Kamboodiyaho heeꞌrummohu 16 diri giddo, 13 Yihowa soqqamaano amaddinoti hatti shiinqa songo lophiteenna xa 12 songonna 4 gaamo kalaqantino!—Jeeseni Bilakiweli coyiꞌrinore.