“Farciꞌraasineꞌya Ikkitinanni”

1, 2. (a) Baalanka roorinohu Yihowa farciꞌraasinchi ayeti? (b) Yesuusa yinanni suꞌmi mayi tiro afiꞌrino? Maganu Beetti suꞌmisi tiro ledo sumuu yaanno garinni heeꞌrinohu hiittoonniiti?

“ILAMOOMMOHUNNA tenne alame dawoommohu konniraati, yaano halaalu daafira farciꞌrammoraati.” (Yoh. 18:33-37) Yesuusi Kiristoosi, Roomu daga wido ikkinohura Yihudu gashshaanchira tenne coyiꞌrinohu firdete shiqe heeꞌreeti. Yesuusi hatto yaara albaanni nugusa ikkinota kulino. Dirra saꞌu gedensaanni, hawaariya Phaawuloosi Yesuusi waajja hoogasinni dancha lawishsha ikkinota qaage, “Phaanxiyosi Philaaxoosira faajjete kaajja gede farciꞌrinota” coyiꞌrino. (1 Xim. 6:13) Addaho, baxillu bainote tenne Sheexaanu alamera “ammanaminohanna halaalaancho farciꞌraasincho” ikkate worbimma lowonta hasiissanno woti no!—Aju. 3:14.

² Yesuusi Yihudootu daga wido ikkino daafira, Yihowa farciꞌraasincho ikke ilamino. (Isa. 43:10) Ikkirono, isi Maganu suꞌmisi daafira kayisino farciꞌraasine baalantenni roorino farciꞌraasincho ikkino. Yesuusi Maganu fushshinosi suꞌmi afiꞌrino tiro ledo sumuu yaanno garinni heeꞌrino. Mittu sokkaanchi Yesuusa lossanno manchira Yooseefira Maariyaami godobbinohu qullaawu ayyaaninni ikkinota kuli wote togo yiino: “Ise labbaa qaaqqo iltanno, ati qolte Yesuusa yite suꞌma fushshatto; korkaatuno isi mannasi cubbinsanni gatisanno.” (Mat. 1:20, 21) Xaphoomunni laꞌniro, Qullaawu Maxaafi fullahaano Yesuusa yinanni suꞌmi Yeshuwa yinannihu Ibirayisxete suꞌminni haaꞌnoonniha ikkinotanna Maganu suꞌma giddosiinni amadinota ammantanno; Yesuusa yaa “Yihowa Gatisanno” yaate. Yesuusi suꞌmisi tiro ledo sumuu yaanno garinni, “Isiraeelete mininni baino geꞌreewi” galagale Yihowa hagiirsiisate cubbinsara maaro eanno gede kaaꞌlino. (Mat. 10:6; 15:24; Luq. 19:10) Yesuusi tennera yee Maganu Mangiste daafira diinaggaawe farciꞌrino. Wongeelu borreessaanchi Marqoosi togo yiino: “Yesuusi Maganunniha dancha duduwo sabbakanni Galiila hige haꞌri; qoleno togo yii: ‘Wossannoonni yanna gooffino, Maganu Mangisteno gambisse daggino. Hakko daafira maaro eꞌe, hattono danchu duduwira ammana heedhoꞌne.’” (Marq. 1:14, 15) Qoleno, Yesuusi Yihudootu ammaꞌno marooti bunshe xawo fushshe coyiꞌrino; iso shitanno gede assinori giddo mittu konneeti.—Marq. 11:17, 18; 15:1-15.

“BAYIRA MAGANU LOOSO”

3. Yesuusi reyihunni sayikki barra mayi maikkino?

³ Yesuusa mararro nookkiha shinihunni sayikki barra, hoola yinanniri ikkino! Yihowa iso mannuwiinni baxxinoha, reyannokkiha ayyaanaamo kalaqo asse reyotenni kayisino. (1 Phe. 3:18) Mootichu Yesuusi reyotenni kainota buuxisate, maala uddiꞌre rosaanosira leellino. Reyotenni kai gedensaanni umi barranni, addi addi rosaanosira ajayi ajeenna onte hige leellino.—Mat. 28:8-10; Luq. 24:13-16, 30-36; Yoh. 20:11-18.

4. Yesuusi rosaanosira leelli yannara, ma assino? Isi rosaanosira mayi halaafinati noonsata kulinonsa?

⁴ Yesuusi ontimeeshsho leelli yannara, hawaariyaatesinna wolootu mitteenni gamba yite no. Hattee hawantannokki yannara, Yesuusi hawaariyaatesi “Qullaawa Borro yitannore huwattanno gede surrensa seekke faninonsa.” Hakko daafira insa Maganu diinna Yesuusa shitannotanna isi reyotenni kaꞌꞌannota Qullaawa Borro giddo balanxe masaalloonnita huwattu. Yesuusi hakko gambooshshira jeefote, insa halaafinati maatiro kulinonsa. “Suꞌmisinni cubboho gatona afiꞌrate [mannu] maaro eanno gede, Yerusaalametenni kayinse daga baalantera sabbankanni” yiinonsa. Ledeno togo yiino: “Konni baalunku coyira kiꞌne farciꞌraasine ikkitinanni.”—Luq. 24:44-48.

5, 6. (a) Yesuusi, “Farciꞌraasineꞌya ikkitinanni” yiinohu mayiraati? (b) Yesuusi rosaano dudubbannohu Yihowa alaami ledo xaado afiꞌrinohu haaru coyi maati?

⁵ Konni daafira 40 barri gedensaanni Yesuusi iimira haꞌrara kae heeꞌre leellinsa yannara, hawaariyaatesira aanche hajajinonsa hajajo mayyaatero leellinonsati egennantinote: “Yerusaalamete, Yihudu gobbara woꞌmate, Samaariyahonna uullate qacce geeshsha farciꞌraasineꞌya ikkitinanni.” (Looso 1:8) Yesuusi Yihowa farciꞌraasine ikkitinanni yaa agure “farciꞌraasineꞌya ikkitinanni” yiinohu mayiraati? Korkaatuno isi hakkawote hasaawisanni noori Isiraeelete daga widooti; insa qolte wonanni Yihowa farciꞌraasineeti.

⁶ Yesuusi rosaano hakkiinni jammarte Yihowa alaami ledo xaado afiꞌrinoha haaro coye dudubbanno yaate; hakkuno Yihowa Isiraeele Gibitsete borojjimmanni fushshi wotenna Baabiloonete qafadonni fushshi yannara assinorinni roorinore assannota dudubbanno. Yesuusi Kiristoosi reyonna kao, roore bushshino qafadonni yaano cubbunna reyote borojjimmanni keeraaꞌminanni faro fantino. Haarote buurantinori Yesuusi rosaano 33 M.D., “bayira Maganu looso” gamba yiino mannira dudubbino; hakkuri giddo maahoyye yee adhino manni lowoho. Lowo kume ikkanno manni maaro eino, hattono Yihowa mannu ooso gatisannohu Yesuusi widoonni ikkinota ammanino; hatte yannara Yesuusi Annisira qiniiteenni ofolle, suꞌmisi tiro roore woꞌmitanna laꞌꞌa jammarino.—Looso 2:5, 11, 37-41.

‘LOWO MANNIRA SHIQQINO WODO’

7. Sajjiina sase M.D. Phenxeqosxete barra ikkitino coyibba maa buuxissanno?

⁷ Sajjiina sase M.D., Phenxeqosxete barra ikkitino coyibba, Yihowa Yesuusi shiqishinoha uullayidi heeshshosi kakkalo waaga manna cubbunni gatisate kaaꞌlitanno wodo asse adhinota buuxissanno. (Ibi. 9:11, 12, 24) Yesuusi umisi yiinonte gede, isi dayinohu “soqqammasira ikkikkinni soqqamaranna heeshshosi lowo mannira wodo asse aaraati.” (Mat. 20:28) Yesuusi wodo kaaꞌlitannori “lowo manna” yiniri maaro eꞌanno Yihudoota calla diꞌꞌikkitino. Hatteentenni, Maganu fajjo “duuchunku gari manni gatanno gedeeti”; korkaatuno wodote kakkalo “alamete cubbo [huntanno]!”—1 Xim. 2:4-6; Yoh. 1:29.

8. Yesuusi rosaano mageeshshi geeshsha farcidhino? Konne assa dandiitinohu mayinniiti?

⁸ Hunditi Yesuusi rosaano waajjitukki isi daafira farciꞌra dandiitinokka? Ee dandiitino; dandiitinohu kayinni uminsa wolqanni diꞌꞌikkino. Yihowahu wolqaataamu qullaawu ayyaani insa agurtukki farcidhanno gede kakkayisinonsa hattono wolqa ikkinonsa. (Hawaariyaatete Looso 5:30-32 nabbawi.a) Sajjiina sasu M.D. saihunni mitu 27 diri gedensaanni, “danchu duduwi” “gordu woroonni noo kalaqami baalunkuwa,” Yihudootahonna insa wido ikkitinokkirira iillino.—Qol. 1:5, 23.

9. Balanxe masaalloonninte gede, hunditi Kiristaanu songo ma ikkitino?

⁹ Ikkollana, hunditi Kiristaanu songo galte hossanni daafama jammartu. (Looso 20:29, 30; 2 Phe. 2:2, 3; Yih. 3, 4) Yesuusi balaxe coyiꞌrinonte gede, Sheexaanu tareessannohu kaadaasinete rosi lophe, “tenne alamete goofimarchu barruwa” geeshsha addu Kiristinna booreessanno. (Mat. 13:37-43) Hakkiinnino Yihowa Yesuusa Mangistesira Nugusa asse shoomanno. Kuni ikkinohu Birra 1914⁠nniiti; hatte yannara Sheexaanu alameti “goofimarchu barruwa” jammartino.—2 Xim. 3:1.

10. (a) Yannankehu buuramino Kiristaani balaxe huwatinohu baxxino diri hiikkonneeti? (b) Birra 1914⁠nni mayi maikkino? Tenne buuxisannori maati?

¹⁰ Yannankehu buuramino Kiristaani, Birra 1914 baxxino diro ikkannota balaxe huwatino. Insa tenne huwattanno gede kaaꞌlitinonsati Daanieeli masaalooti; tini masaalo, mitte hulqa haqqicho karrihunni “lamalu diri” gedensaanni galagalte ciirtannota kultanno. (Dan. 4:16) Yesuusi Nugusa ikkanno yannarenna “alamete goofimarchu barruwa” daafira masaali wote konne “lamala diro,” “wossannoonnita dagate yanna” yee qummi assino. Alamete aana 1914⁠nni jammare ikkanni noori, Kiristoosi Nugusa ikkinota buuxisanno ‘malaateeti.’ (Mat. 24:3, 7, 14; Luq. 21:24) Hakko daafira, hakkuyinku jammare Yihowa Yesuusa Mangistesira Nugusa asse shoomasino ‘bayiru Maganu loosi’ widira gaamantannota ikkitino.

11, 12. (a) Haarote moohino Nugusi 1919⁠nni kayise maa assa jammarino? (b) Hakkiinnino 1930 mereedhi yannanni jammare xawe leellinori maati? (Umi misile lai.)

¹¹ Haarote moohino Nugusi Yesuusi, hakkawontenni buurantino harunsaanosi “Bayira Baabiloone” qafadonni fushsha jammari. (Aju. 18:2, 4) Umihu Alamete Oli uurri gedensaanni yaano 1919⁠nni, Maganu manna gatisate assino qixxaaworenna Maganu Mangisteha dancha duduwo alamete deerrinni farciꞌrate faro faꞌnantu. Buuramino Kiristaani tenne faro horoonsiꞌre farciꞌrino daafira, Kiristoosi ledo mookkannoti wole haammata kume ikkitanno buuramaasine lexxitino.

¹² Hakkiinnino 1930 mereedhi yannanni jammare, Kiristoosi “lowo daga” wido ikkinoha ‘wole geꞌreewosi’ gamba assa jammarinoti xabbe leeltino; gaꞌre baalantenni fulinohu kuni wolu geꞌreewi xaa yannara haammata miliyoone ikkanno. Buuramino Kiristaani aanno biddishshi garinni, tini lowo dagano waajjannokkihu Yesuusi faale harunsite, gato afidhinohu Maganunna Kiristoosiwiinni ikkinota faajjete dudubbanno. Insa konne looso loossanni kaajjite uurritannohanna wodote kakkalo ammantannota loosunni leellisha agurtannokkiha ikkiro, Sheexaanu alame hunannoha “bayira qarra” lulluqqite saꞌanno.—Yoh. 10:16; Aju. 7:9, 10, 14.

‘DANCHA DUDUWO KULATE JAWAANTE AFIꞌRA’

13. Yihowa Farciꞌraasine ikkinoommo daafira, ma assate murciꞌne kaꞌnoommo? Sabbakate loosinke qinaawannota huluullammeemmokkihu mayiraatiyya?

¹³ Maganu Yihowa loosinoha ‘bayira loosonna’ albillitte asseemmo yiino coyibba daafira mannaho farciꞌranke ninkera lowo ayirrinyeeti. Kuni loosi shota ikkannokki yanna nooti dikaandannite. Batinyu roduuwinke, sokkanke dulli asse giwannonna qacifatanno manni noowa, woy dartu noo qooxeessira soqqantanno. Ninkeno hawaariya Phaawuloosinna miillasi assitinore assa dandiineemmo. Isi togo yiino: “Mannu lowo geeshsha taqaawwaminkerono, Maganunniha dancha duduwo kiꞌnera kulate Maganinkenni jawaante afiꞌnoommo.” (1 Tes. 2:2) Konni daafira horonta hexxo mudhinoonke. Hatteentenni, Sheexaanu alame baꞌa geeshsha, ninkeneeto Yihowara sayinse uyinummo wote eꞌnoommo qaale agadhine heeꞌrate murciꞌne kaꞌno. (Isa. 6:11) Kayinni uminke wolqanni tenne assa didandiineemmo; hundi Kiristaani lawishsha harunsine, Yihowa qullaawu ayyaanisinni “bayira wolqa” aannonke gede huucciꞌra hasiissannonke.—2 Qorontoosi 4:1, 7 nabbawi;b Luq. 11:13.

14, 15. (a) Umi xibbi diro noo Kiristaana hakkawaro mannu ma garinni laꞌꞌanno? Hawaariya Pheexiroosi insa daafira mayino? (b) Yihowa Farciꞌraasine ikkinoommotera mannu taqaawwaminkero hiittoo hedo heedhannonke?

¹⁴ Xaa yannara lowo miliyoone ikkanno manni insaneeto ninke Kiristaanaho yaanno; ikkollana, “[Magano] loosinsanni kaaddannosi; korkaatuno, bushuullehonna hajajantannokkireeti, hattono danchu loosi baalunkura ikkadda ikkitannokkireeti.” (Tit. 1:16) Umi xibbi diro heeꞌrinoha addu Kiristaana yannansara noohu lowo manni giwannonsata dea dihasiissannonke. Hawaariya Pheexiroosi togo yee borreessinohu iseraati: “Kiristoosi suꞌmi daafira minshanniꞌneha ikkiro, kiꞌne hagiirraammaho; korkaatuno . . . Maganu ayyaani aanaꞌne no.”—1 Phe. 4:14.

¹⁵ Xaa yannara heeꞌnoommorira Yihowa Farciꞌraasinerano togoori iillannonke? Ee, korkaatuno ninkeno Yesuusi nugusa ikkinota farciꞌnanni heeꞌnoommo. Konni daafira, Yihowa suꞌminni woshshammoommo daafira mishamanna ‘Yesuusi Kiristoosi suꞌmi daafira mishama’ ise iseentilla. Korkaatuno, Yesuusi gibbannosirira togo yiino: “Ani Anniꞌya suꞌminni dawoommo; kiꞌne kayinni maahoyye yitine diadhitinoonnie.” (Yoh. 5:43) Hakko daafira farcidhinanni heedhineenna mannu taqaawwamiꞌnero, waajjitinoonte. Mannootu taqaawwamansa, Magano hagiirsiissinoonnitanna ayyaanisi ‘aanaꞌne noota’ leellishshannote.

16, 17. (a) Batinye gobbuwara loosinke ma guma laalanni no? (b) Maa assate murcidhe kaootto?

¹⁶ Wole widoonni kayinni, alamete aana batinye gobbuwara kiironke dancha gede lexxitanni no. Konni albaanni seekkine sabbankoonni qooxeessira nafa, gatote sokkanke kulleenna maahoyye yee macciishshanno manna afiꞌnanni heeꞌnoommo. Hasatto noonsare ceeꞌminummokki faana ganne hasaawinso; dandaamiha ikkiro Qullaawu Maxaafi xiinxallo jammarsiinse ayyaanaamittetenni lophite insaneeto Maganoho sayisse aatenna cuuamate deerra iillitanno gede kaaꞌlino. Kiꞌnerano, Wodiidi Afirikira heedhannote Saari yinanni rodoora macciishshaminori macciishshamannoꞌneti dihuluullissannote. Leya diro saꞌanno yanna diinaggaabbe sabbakkanni keeshshitinoti tini rodoo togo yitino: “Yesuusite wodote kakkalo widoonni, kalqete alamera Aliidi Mooticha ikkinohu Yihowa ledo dancha fiixooma kalaqiꞌra dandoomma daafira lowo geeshsha galateemmasi; qoleno ayirrado suꞌmasi mannaho egensiisa dandeemma daafira tashshi yaannoe.” Rodoo Saarinna minaannise Martiinesi, sase oosonsanna wole haammata manna Yihowa magansiꞌranno gede kaaꞌlitino. Ise ledde togo yitino: “Konni loosinni roore hagiirsiisannohu wolu loosi dino; qoleno heeshsho gatisannoha konne looso loonsanni heeꞌneemmo gede Yihowa hasiissanno wolqa qullaawu ayyaanisi widoonni baalunkura aannonke.”

¹⁷ Cuuammoommo Kiristaanano ikkino, hakkaange lophinanni heeꞌnoommori, Yihowa Farciꞌraasine songo ledo gamba yaate qoossonke lowo geeshsha naada hasiissannonke. Sheexaanu alame batte kissannoꞌnekki gede qorophitinanni, seekkitine farciꞌraꞌne agurtinoonte. Tenne assitiniro, suꞌmisinni woshshammeemmohu baxillaanchu iimi Anninke ayirranno gede assitinanni.