Gannu Daafira Afa Hasiissannonkeri Maati?

Alamete aana lowo miliyoone ikkanno manni addi addi korkaatira Ganna ayirrisanno. Mitu manni ayirrisannohu jaallansanna fiixinsa ledo mitteenni hagiidhate yeeti. Wolu kayinni Gannu yannara Maganu daafira hedanno woy buxanenna qarrantinore kaaꞌlanno. Togoo assooti minshannire diafiꞌrino. Ikkollana, togoohu danchu assooti Gannu yannara assinannihu bushu coyi ledo xaado afiꞌrino.

Umihunni, konne ayyaana ayirrisannohu batinyu manni Gannu Yesuusi ilamino barraati yee ammananno. Ikkollana, batinye xaggete fullahaano Yesuusi ilamino barra bande anfoonnikkita sumuu yitanno. “Hundi Kiristaani Magano affinokki daga rosichi baalunkuwiinni xeertiꞌra” hasiꞌrino daafira, “Yesuusi ilamino barraati yee mitto barra bade [ayirrisa] dihasiꞌrino” yee mittu maxaafi kulanno. (Ze Kiristiyani Buuki Ovi Wayi) Qoleno Qullaawu Maxaafi Yesuusi, isi ilamino barrano ikko wolu manniha ilamate barra ayirrisino diyaanno. Hatteentenni Yesuusi, harunsaanosi reyosi qaagganno gede hajajino.—Luqaasi 22:19.

Layinkihunni, batinye xiinxallaano Gannu yannara assinannihu rooru assooti dayinohu Kiristaana ikkitinokkinna Magano affinokki dagawiinni ikkinota sumuu yitanno. Konni assooti giddo Santa Kilawusi (Gannu Anna), Gannu haqqicho qasiꞌra, kuꞌu kuꞌuyira mitore aa, shaama qasa, seesiinsoonni awawa wodha, hattono minunni mine haꞌne faarso faarsa lawinore qummi assa dandiinanni. Ze Ekisternaalis Ovi ze Kaatoliki Cherchi yinanni maxaafi togoo assooti daafira togo yaanno: “Gannu uduunne uyineemmonna adhineemmo wote, hattono haanja seesiinsoonni awawa mininkeranna beetekiristaannankera wodhineemmo wote, Magano affinokki daga bude harunsinanni heeꞌnoommota afinohu ninke giddo meꞌꞌeho?”

Ikkirono, togoore assa mayi qarra afidhino? yite hedattoha ikkara dandaanno. Tennera dawaro ikkitannota sayikki assaawe lai. Maganu isiweelo daga harunsitanno bude halaalu magansiꞌra ledo karsiinsara dihasiꞌranno. Yihowa masaalaanchisi Amootsi widoonni ammanaminokki mannisi daafira togo yiino: “Ayyaannaꞌne giwissinoe, hattono effire giwoommo . . . Faarsoꞌne huuro anewiinni xeertidho.”—Amootsi 5:21, 23.

Maganu togo kaajjishe coyiꞌrinohu mayiraati? Hanni biꞌre Isiraeelennite aliyye mangiste hunda noo manni assinore laꞌno. Hatte mangistehu umi nugusi Iyyoorbaami Daaninna Beeteelete katamira lame worqete siitta seekke, mannu Yerusaalame haꞌre Magano garunni magansiꞌra agure hattee siitta magansiꞌranno gede assino. Qoleno, ayirrinsanni ayyaana kalaqino hattono hatte ayyaanna yannara soqqantanno kakkalaano shoomino.—1 Negesti 12:26-33.

Iimi adda laꞌniro, tini Isiraeele danchare hedde assitinoha lawanno. Hige insa konne baala assitinohu Magano magansiꞌratenna iso hagiirsiisate yite diꞌꞌikkino? Maganu Amootsinna wole masaalaano widoonni kaajjishe coyiꞌrino qaali, hakkawaro togoo assoote ma garinni lainoro xawise leellishanno. Isi masaalaanchu Milkiyaasi widoonni togo yiino: “Ani Yihowaati; disoorrameemmoho.” (Milkiyaasi 3:6) Tini Maganu Gannu yannara assinanniha batinye coye ma garinni laꞌꞌannoro huwanteemmo gede diassitannonke?

Haammata miliyoone ikkanno manni aleenni laꞌnummo coyibba heeshshi gotti asse hedi gedensaanni Ganna ayirrisa agurino. Kuni manni diru giddo baxi yannara jaallansanna maatensa ledo dancha yanna sayise hattono buxanenna qarrantinore kaaꞌle hagiidhanno.