Yesuusi Gede Worbuullenna Wodanchitinannire Ikke

1, 2. (a) Gato afiꞌra dandiineemmohu hiittoonniiti? (b) Gatote widira massitanno doogonni fullummokki heeꞌrate kaaꞌlannonkehu maati?

KIRISTOOSI harunsaano ikkinummohunni hananfe doogo haꞌnanni heeꞌnoommohu gedeeti. Tini doogo iima woy uulla hegere heeshsho afiꞌneemmo gede assitannonke. Yesuusi togo yiino: “Goofimarchu [xaa heeshshosi goofimarchi woy tenne busha alame goofimarchi] geeshsha kaajje uurrannohu kayinni hakku gatanno.” (Mat. 24:13) Ee, ammanamate doogo amande haꞌneemmoha ikkiro, gato afiꞌneemmo. Doogote aana kayinni hedonke billaallitannokki gede woy wolewa hinge baꞌneemmokki gede qoropha hasiissannonke. (1 Yoh. 2:15-17) Ikkina, doogotenni fullummokki heeꞌra dandiineemmohu hiittoonniiti?

² Lawishshanke ikkinohu Yesuusi tenne doogo leellishinonke. Isi haꞌrino doogo woy heeshshosi gari Qullaawu Maxaafi giddo borreessamino. Tenne isire kultanno xagge xiinxalline Yesuusi akati hiittoohoro afa dandiineemmo. Hakko garinni iso banxeemmore ikkineemmo; hattono isira ammana noonketa loosunni leellinsheemmo. (1 Pheexiroosi 1:8, 9 nabbawi.a) Hawaariya Pheexiroosi Yesuusi faalesi seekkine harunsinammora lawishsha ikkinonketa coyiꞌrinota qaagi. (1 Phe. 2:21) Isi lawishsha seekkine harunsineemmoha ikkiro, ammananke “mixo” woꞌmitanno, yaano jeefote gato afiꞌneemmo.b Sai birxichira, Yesuusi lawishsha harunsine shooshaqootanna shaqqadda ikka dandiineemmo gara ronsoommo. Hanni xa isi faale harunsine worbimmanna wodancha noonketa leellisha dandiineemmo gara laꞌno.

YESUUSI WORBAHO

3. Worbimma maati? Worboota ikka dandiineemmohu hiittoonniiti?

³ Worbimma dhuku heeꞌrannonke gedenna kaajjine uurrineemmo gede kaaꞌlitanno simmeeteeti. Worbimma “qarru yannara kaajje uurra,” “gara ikkino coyira haꞌla,” hattono “shetto ammanatenni woy ayirrinyunni duqqa” ikkitinota xawinsoonni. Worbimma waajjate, hexxotenna baxillu ledo xaado afidhino. Hiitto? Magano waajja, manna waajjineemmokki gede kaaꞌlitannonke worbimma heedhannonke gede assitanno. (1 Sam. 11:7; Law. 29:25) Halaalaancho hexxo iillannonke qarra agurre albillittete heeshshonke aana illachinsheemmo gede kaaꞌlitannonke. (Far. 27:14) Umisi horo hasiꞌrannokki baxilli, dartu iillinkerono worbimma leellinsheemmo gede assannonke. (Yoh. 15:13) Magano addaxxineemmohanna Beettisi faale haꞌneemmoha ikkiro, worbimma heedhannonke.—Far. 28:7.

4. Yesuusi beetemeqidesete giddo “rosiisaanote mereero” worbimma leellishinohu hiittoonniiti? (Umi misile lai.)

⁴ Yesuusi 12 dirihu heeꞌre nafa worbimmatenni gara ikkino coyira haꞌlino. Hanni isi shiimu heeꞌre “beetemeqidesete giddo rosiisaanote mereero ofolle” noo wote ikkinore hedi. (Luq. 2:41-47) Hatti rosiisaano Muse Higge seekkite affinore calla ikkitukkinni tenne Higge harunsa qarra ikkitanno gede assitannota Yihudootu wogano affinoreeti. Yesuusi kayinni insa waajje sammi diyiino; isi “insa addi addi xaꞌmo xaꞌmino.” Isi qaaqquullu afate quqquxante xaꞌmitannote gedee xaꞌmuwa xaꞌminokkiti egennantinote. Yesuusi tenne rosiisaano hixamanyite macciishshitanno gede assitannota hawa gede qollannikki xaꞌmuwa xaꞌminota heda dandiineemmo. Qoleno, tini rosiisaano Yesuusa gurcheessitanno xaꞌmuwa xaꞌmite coyinni amaddasira woꞌnaaltinoha ikkiro, beebba daafurtino. Rosiisaano calla ikkikkinni macciishshanni noo manni baalunku “wodanchasinna qolanno dawaro dhagge assiꞌrino”; qolino dawaro qolte Maganu Qaali halaale irkissannota ikkitinoti dihuluullissannote!

5. Yesuusi soqqanshosi yannara worbimma leellishinohu hiittee doogganniiti?

⁵ Yesuusi soqqanshosi yannarano duucha doogonni worbimma leellishino. Isi ammaꞌnote marooti kapho rosiisse manna soꞌrisiissanni noota waajjikkinni faajjete coyiꞌrino. (Mat. 23:13-36) Qoleno, alame hedosi daaffara diwodhino. (Yoh. 16:33) Gibbannori heedhurono, sabbakasi diagurino. (Yoh. 5:15-18; 7:14) Isi waajjikkinni beetemeqidesete giddo Maganu magansiꞌra batteessitannore lame hige shorre Maganu mine keereensino.—Mat. 21:12, 13; Yoh. 2:14-17.

6. Yesuusi uullate aani heeshshosira jeefote barra worbimma leellishinohu hiittoonniiti?

⁶ Yesuusi qarru yannara worbimmatenni assinore hiinca ammana jawaachishshannote. Hanni uullate aana heeꞌrino heeshshora jeefote barra worbimma leellishino gara hedi. Yesuusi sae aamamanno wote mayi iillannosiro afino. Ikkirono, isi Faasiku ayyaaniwa Yihuda togo yiino: “Assitanni noottore rakke assi.” (Yoh. 13:21-27) Yesuusi Geetesemaani yinanniwa amadasira dayino wottaaddarira waajjikkinni ayimmasi kulino. Isi umisi heeshsho qarru giddo nooha ikkirono, wottaaddaru rosaanosi amadannokki gede waajjikki coyiꞌrino. (Yoh. 18:1-8) Yesuusi Sanihediriini shongo albira yoote shiqi yannara, kakkalaanote biili iso shiishiishate faro hasiꞌranni noota afinoha ikkirono, isi Kiristoosinna Maganu Beetto ikkinota waajjikki buuxisino. (Marq. 14:60-65) Qoleno, haqqu aana sutame reyate geeshsha ammanaminoha ikkino. Qeelle adhino daafira reyara hiliri gate heeꞌreenna, “Xaate woꞌmino!” yiino.—Yoh. 19:28-30.

YESUUSI GEDE WORBUULLE IKKE

7. Wedella, Yihowa suꞌminni woshshantinannihura mayi macciishshamannoꞌne? Worboota ikkaꞌne leellisha dandiitinannihu hiittoonniiti?

⁷ Yesuusi lawishsha harunsine worbimma leellisha dandiineemmohu hiittoonniiti? Rosu mine. Wedella, ledoꞌne rossannori woy wolootu qacifattuꞌnero nafa, Yihowa Farciꞌraasine ikkitinoonnita egensiisaꞌne worboota ikkaꞌne buuxissanno. Konne assaꞌne Yihowa suꞌminni woshshama kiꞌnera ayirrinye ikkitinota leellishshanno. (Faarso 86:12 nabbawi.c) Wolootu suutu soorro halaaleho yitine ammantinara xixxiibbaꞌnera dandiitanno. Ikkollana, Qullaawu Maxaafi heeshsho dagginohu kalaqanteeti yaannori halaale ikkinota ammantinanni gede assannoꞌnehu gari korkaati nooꞌne. “Nooꞌne hexxo daafira” afa hasidhannorira duushshitanno dawaro qolate, Heeshshote Kaima—Dawaronsa Afa Hasiissannota Onte Xaꞌmuwa (Amaaru Afoo) yitanno biroshere horoonsiꞌra dandiitinanni. (1 Phe. 3:15) Hatto assitiniro, Maganu Qaali halaalira haꞌlitinoonnita afaꞌne hagiirsiissannoꞌne.

8. Worbimmatenni sabbankeemmo gede assannonkeri maati?

⁸ Soqqanshonke yannara. Addu Kiristaana ikkinoommo daafira, ayewoteno “waajjinummokki Yihowa silxaanenni” coyiꞌra hasiissannonke. (Looso 14:3) Worbimmatenni woy waajjinummokki sabbankeemmo gede assannonkeri maati? Sabbankeemmo sokka Qullaawu Maxaafi aana xintantinota ikkitino daafira halaale ikkitinota anfoommo. (Yoh. 17:17) “Maganu ledo loonseemmore” ikkinoommotanna qullaawu ayyaani irkisannonketa huwantoommo. (1 Qor. 3:9; Looso 4:31) Diinaggaambe farciꞌranke Yihowanna olliichonke banxeemmota leellishshannota anfoommo. (Mat. 22:37-39) Worbimma waajjine sammi yineemmokki gede assitannonke. Hatteentenni, mannu halaale afannokki gede ballisinoha ammaꞌnote kapho xawo fushshineemmo. (2 Qor. 4:4) Qoleno, mannu sokkanke mulluri gede asse laꞌꞌannoha, qacifatannonkeha, woy taqaawwamannonkeha ikkirono sabbakanke diagurreemmo.—1 Tes. 2:1, 2.

9. Qarru yannara worbimma leellisha dandiineemmohu hiittoonniiti?

⁹ Qarru iillannonke wote. Magano addaxxa qarra dandaate hasiissanno ammananna worbimma heedhannonke gede kaaꞌlitannonke. Shiiꞌneemmo wote xissiisiꞌneemmoha ikkirono hexxo dimudhineemmo. “Shesho baalante Magani” Yihowa jawaante aannonketa dihuluullammeemmo. (2 Qor. 1:3, 4; 1 Tes. 4:13) Buutote dhibbi amadinkero woy mannimmanke gawajjanturo, baasa xissannonketi egennantinote; kayinni hakkawoteno ikkiro Maganu seera didiingeemmo. Qullaawu Maxaafihu xintu seeri ledo sumuu yaannokki hikkiminna diadhineemmo. (Looso 15:28, 29) Dadillineemmo wote ‘wodaninke bushiishankera’ dandaannoha ikkirono, “xissiisidhinorira mule” ikkino Magano addaxxineemmo daafira hexxo dimudhineemmo.d—1 Yoh. 3:19, 20; Far. 34:18.

YESUUSI WODANCHANNOHO

10. Wodancha maati? Wodancha noosi Kiristaanchi coyiꞌrannohunna mitto coye assanohu hiittoonniiti?

¹⁰ Wodanchate yaa coye keenate dandooti; yaano gara ikkinore gara ikkinokki coyiwiinni bande dancha ikkinoha doodhate dandooti. (Ibi. 5:14) Wodancha “ayyaanaamitte hajo lainohunni gara ikkinore wossaꞌnate dandoo” ikkitinota xawinsoonni. Wodancha noosi Kiristaanchi Magano hagiirsiisannore coyiꞌrannonna assanno. Togoo manchi woloota gawajjannore ikkikkinni kaaꞌlannonsare coyiꞌranno. (Law. 11:12, 13) Qoleno, “hanqoho dimuddamanno.” (Law. 14:29) Gatote widira massitanno doogonni fulikki ‘suwe albillitte haꞌranno.’ (Law. 15:21) Wodanchineemmore ikka dandiineemmohu hiittoonniiti? Maganu Qaale xiinxallanna ronseemmore harunsa hasiissannonke. (Law. 2:1-5, 10, 11) Hakko iso uullate aana heeꞌrino manni baalunkunni roore wodanchannoha ikkinohunniha Yesuusi lawishsha xiinxalla roore kaaꞌlitannonke.

11. Yesuusi coyiꞌrino coyinni wodancha noosita leellishinohu hiittoonniiti?

¹¹ Yesuusi coyiꞌrinonna assino coyi baalunkunni wodancha noosita leellishino. Coyiꞌrino coye. Soqqanshosi yannara coye dancha gede keene, macciishshannosi mannira dhagge ikkannoha “eltote qaale” doore coyiꞌrino. (Luq. 4:22; Mat. 7:28) Isi duucha hige Maganu Qaale horoonsiꞌrino; qoleno hiittee xiqise hiikkawote horoonsiꞌra woyyitannoro seekke afino. (Mat. 4:4, 7, 10; 12:1-5; Luq. 4:16-21) Hakkiinni saeno, Qullaawa Borro macciishshannosi manni wodana kakkayisanno garinni xawisino. Isi reyotenni kaihu gedensaanni, Eemahusi hadhanni noorira lame rosaanora “Qullaawa Borro giddo isi daafira borreessaminore baalankare tittire kulinsa.” Rosaano gedenaanni higge togo yitino: “Qullaawa Borro tittire kulannanke wodaninke giirate gede ikke dibuwino?”—Luq. 24:27, 32.

12, 13. Yesuusi hanqoho muddamannokkihanna quwa saꞌꞌannokkiha ikkinota leellishanno lawishsha kuli.

¹² Simmeetesinna laosi. Wodancha Yesuusi isonooto eemadhe “hanqoho muddamannokki” gede kaaꞌlitinosi. (Law. 16:32) Isi “joogaho.” (Mat. 11:29) Yesuusi rosaanosi sodhannore ikkiturono ayewoteno insa ledo cincatenni heeꞌrino. (Marq. 14:34-38; Luq. 22:24-27) Gara ikkinokkire assinisi wote nafa isonooto qeeꞌlino.—1 Phe. 2:23.

¹³ Qoleno, wodancha Yesuusi quwa saꞌꞌannokkiha ikkanno gede assitinosi. Isi Muse Higge uyinoonni korkaata wodanchino; qoleno hatte wodanchasi garinni heeꞌrino. Hanni Marqoosi 5:25-34 noo xagge lawishsha assine laꞌno. (Kiiro 27-29, 33, 34 nabbawi.e) Mundee duꞌnantannoseti mitte mancho lowo manni mereeroonni higge Yesuusi uddano kisse hurtino. Muse Higge garinni tini mancho battaame ikkitino daafira mitto manchono kisa dihasiissannose. (Zel. 15:25-27) Ikkirono, Yesuusi ise kissinosi daafira diboroorinose; isi “Higgete giddo roore hasiisannore” lawishshaho “maaronna ammanama” wodanchino. (Mat. 23:23) Isi shaqqillunni togo yiinose: “Beettoꞌya, ammanakki hursitinohe. Salaametenni haꞌri, waadannohe dhibbikkinni fooliishshiri.” Yesuusi wodanchatenni togo shaqqille leellishasi lowo geeshsha dhaggete!

14. Yesuusi maa assa doodhino? Isi soqqanshosi aana illachishinohu hiittoonniiti?

¹⁴ Heeꞌrino heeshsho. Yesuusi gara ikkitinota heeshshote doogo doodhenna hattee doogo seekke cuꞌmiꞌre wodancha noosita leellishino. Isi sabbakate looso heeshshosira qara looso assiꞌrino. (Luq. 4:43) Yesuusi konne looso illachishanno gedenna gumulanno gede kaaꞌlannosire wossaꞌne hanafino doogonni fulikki heeꞌrino. Yannasinna wolqasi soqqanshote horoonsiꞌra dandaanno gede shota heeshsho heeꞌra doodhino; tini hayyote. (Luq. 9:58) Qoleno, reyi gedensaanni isi hanafino looso loossannore qajeelsa hasiissannosita wodanchino. (Luq. 10:1-12; Yoh. 14:12) Hattono “alamete goofimarchu barruwa geeshsha” konni loosira rosaanosi ledo ikkannota coyiꞌrino.—Mat. 28:19, 20.

YESUUSI GEDE WODANCHA HEEDHOꞌNE

15. Coyiꞌneemmo coyinni wodancha noonketa leellisha dandiineemmohu hiittoonniiti?

¹⁵ Yesuusi gede wodanchineemmore ikka dandiineemmohu ma garinniiti? Coyiꞌneemmo coye. Ammanate roduuwinke ledo hasaambeemmo wote, mikita ganannonsaha ikkikkinni kiannonsa qaale coyiꞌneemmo. (Efe. 4:29) Mannaho Maganu Mangistere kulleemmo wote, “maxinetenni” cuukkamino qaale coyiꞌneemmo. (Qol. 4:6) Qaete anni hasatto wodanchine, coyiꞌneemmore isi hasatto garinni biddi assiꞌneemmo. Shaqqado qaale coyiꞌra hasaawaho faro fantaranna mannu wodanansa fananno gede assitara dandiitannota anfoommo. Hakkiinni saeno, ammananke daafira mannaho farciꞌneemmo wote, Qullaawa Maxaafa horoonsiꞌrate woꞌnaalleemmo. Konnira, dandaaminkero ayewoteno Maganu Qaale ikkinoha Qullaawa Maxaafa mannaho nabbambeemmo; korkaatuno aliidi silxaane noosihu Maganoho. Ninke uminkenni coyiꞌneemmo qaali baalunkunni roore lowo wolqa afidhinoti Qullaawu Maxaafi sokka ikkitinota huwantoommo.—Ibi. 4:12.

16, 17. (a) Hanqoho muddammeemmokkirenna quwa saꞌneemmokkire ikkinoommota leellisha dandiineemmohu ma garinniiti? (b) Ayewoteno soqqanshonke aana illachisha dandiineemmohu hiittoonniiti?

¹⁶ Simmeetenkenna laonke. Wodancha ninkeneeto eemadhine ‘hanqoho muddammeemmokki’ gede kaaꞌlitannonke. (Yaq. 1:19) Mittu manchi koffi assannonke wote, hatto coyiꞌranno woy assanno gede assinosire wodanchate woꞌnaalleemmo. Togoo wodancha hanqo agurre baddalo gatona yine saꞌneemmo gede kaaꞌlitannonke. (Law. 19:11) Qoleno, wodancha quwa saꞌneemmokkire ikkineemmo gede kaaꞌlitannonke. Ammanate roduuwinkera ninke gudinse anfoommokki qarri iillanni noonsaha ikkara dandaannota huwanteemmo daafira, insawiinni quwa sainore diagarreemmo. Hedonsa maahoyye yine macciishshineemmo; hattono hasiisanno wote ninketa agurre insa lao ledo sumuu yineemmo.—Fil. 4:5.

¹⁷ Heeꞌneemmo heeshsho. Yesuusi harunsaano ikkinoommo daafira, dancha duduwo sabbakate looso loosa roortannoti wole qoosso nookkita wodanchinoommo. Konni daafira, soqqanshonke aana illachinsheemmo gede kaaꞌlannonkere wossaꞌnineemmo. Lowo geeshsha hasiisannoha sabbakate looso goofimarchu daara albaanni woꞌma lubbonkenni loosa dandiineemmo gede ayyaanaamittete coyibba balaxisiinseemmo, hattono shota heeshsho heeꞌra doodhineemmo.—Mat. 6:33; 24:14.

18. Gatote widira massitanno doogonni fullummokki heeꞌra dandiineemmohu hiittoonniiti? Maa assate murcidhe kaootto?

¹⁸ Kaajja Yesuusi akatta giddo mitete daafira rosanke addinta hagiirsiissinonke. Wole akattasino hattonni xiinxallanna isi faale haꞌra dandiineemmo gara huwata baasa kiissannota heda dandiineemmo. Konnira Yesuusi lawishsha seekkine harunsate murciꞌne kaꞌno. Tenne assine gatote widira massitanno doogonni fullummokki heeꞌranna Yihowawa albinni roore shiqa dandiineemmo.