Kiristoosi Maganu Wolqaati
“Kiristoosi Maganu wolqaati.”—1 QOR. 1:24.
1. Phaawuloosi, “Kiristoosi Maganu wolqaati” yiinohu mayiraati?
YIHOWA Yesuusi Kiristoosi widoonni wolqasi maalale ikkitanno doogganni leellishino. Shoolunku Wongeeli Kiristoosi loosinota ammananke jawaachishshannota mite mite maalale kulannonke. Isi wole batinye maalale loosinotino egennantinote. (Mat. 9:35; Luq. 9:11) Ee, Maganu wolqasi Yesuusi widoonni leellishino. Hawaariya Phaawuloosi “Kiristoosi Maganu wolqaati” yaasi garankolla. (1 Qor. 1:24) Ikkina, Yesuusi loosino maalale ninkera kaaꞌlitannonkehu hiittoonniiti?
2. Yesuusi loosino maalalenni maa ronseemmo?
2 Hawaariya Pheexiroosi Yesuusi maalale woy “dhagge” loosinota coyiꞌrino. (Looso 2:22) Yesuusi uullate aana noo waro loosino maalale albillitte gashshootisi yannara abbannoha baete atoote leellishshannote. Tini maalale Yesuusi Maganunnite haaro alamera uulla woꞌmate aana loosanno maalalera caaleho! Isi loosino maalale, isitanna Annisi akatta seekkine huwanteemmo gedeno kaaꞌlitannonke. Hanni Yesuusi loosinota mite maalale laꞌne tini maalale xaano ikko albillitte maaho kaaꞌlitannonkero xiinxallino.
SHAQQILLE ROSIISSANNO MAALALE
3. (a) Yesuusi umi maalale loosanno gede assinosire xawisi. (b) Yesuusi Qaanaho assinori shaqqillesi leellishannohu hiittoonniiti?
3 Yesuusi umi maalale loosinohu Qaana Galiilaho sargete jiliwaati. Konni jilira hendoonnihunni aleenni ikkino wosini dayinoha ikkara dandaanno. Korkaatu maatiro afano hoongummoro, jilaho qixxeessinoonni woyine takki yite gooffino. Dayino wosini giddo mitte Yesuusi ama Maariyaamiiti. Ise lowo diro, beettise daafira kultanno masaalo hiincitanni keeshshitinoti dihuluullissannote; hattono beettise “Ayirradu Magani Beetto” yaamamannota affino. (Luq. 1:30-32; 2:52) Maariyaami beettise hatte yannara mannaho leellishinokki wolqa noosita ammantinokka? Maariyaaminna Yesuusi kore haarote adhamino manna kaaꞌlite fojonsa diwa hasidhinota huwata dandiineemmo. Yesuusi wosina adha lowore ikkitinota afino. Hakko daafira 380 litire meddi yaanno waa “dancha woyinera” qole soorrino. (Yohaannisi 2:3, 6-8, 10 nabbawi;a Yoh. 2:9, 11) Yesuusi tenne maalale loosanno gede giddeessannosihu nooni? Dino. Isi tenne maalale loosinohu mannaho assaawanno daafiraati; qoleno isi tenne maalale loose shaqqadu iimi Annisi lawishsha harunsino.
4, 5. (a) Yesuusi umo loosino maalalenni maa ronseemmo? (b) Yesuusi Qaanaho loosino maalale albillittete yanna daafira maa rosiissannonke?
4 Yesuusi maalaletenni lowo woyine heedhanno gedenna baalunku mannira tuqqanno gede assino. Tenne maalalenni ninke maa ronseemmo? Tini maalale Yesuusinna Annisi mannu qarrinna yaaddo leeltannonsare ikkitinota buuxissanno. Annuno Beettuno gaggaadaamma diꞌꞌikkitino. Hanni Yihowa haaro alamera uulla woꞌmate “daga baalate” falakkino sagale itise duushshate wolqasi shaqqillunni horoonsiꞌranno gara hedi.—Isayyaasi 25:6 nabbawi.b
5 Hanni konne coye hedi! Mittu mittunku manchiti gara ikkitino hasattonna halcho woꞌmitanno yanna, lawishshaho taaltino sagalenna dancha mine afiꞌranno yanna dagganni no. Yihowa shaqqillunni Gannate ikkitanno uullara hasiisannonkere baalankare wonshannonketa hendeemmo wote lowo geeshsha tashshi yaannonke.
Wolootaho yannanke shaqqillunni uyineemmoha ikkiro, Yesuusi shaqqille harunsinanni heeꞌnoommo yaate (Gufo 6 lai)
6. Yesuusi maalale loosate wolqasi horoonsiꞌrinohu ayeoo kaaꞌlateeti? Ninke isi faale haꞌra dandiineemmohu hiittoonniiti?
6 Daawuloosi, Yesuusa kincho daabbo assi yee fonqolino; isi kayinni maalale loosanno wolqa umisi horora horoonsiꞌra dihasiꞌrino. (Mat. 4:2-4) Hatteentenni isi tenne wolqasi wolootu hasatto wonshate horoonsiꞌrino. Meessi horo agurre woloota kaaꞌlate Yesuusi lawishsha harunsa dandiineemmohu hiittoonniiti? Isi Maganu soqqamaano “wolootaho aate” rosichi heeꞌrannonsa gede jawaachishino. (Luq. 6:38) Konne dancha shaqqillu akata leellishate, woloota mininkera koyinse maalaamittetenna ayyaanaamittete sagale mitteenni beeqqa dandiineemmo. Gambooshshu gedensaanni wolootaho yannanke shaqqillunni aa, lawishshaho mitore assine kaaꞌla woy mittu rodii kifilesi shiqishanno gara rosiisiꞌranna macciishsha dandiineemmo. Hattono woloota soqqanshote qajeelsine kaaꞌla dandiineemmo. Mannaho maalaamittete ikko ayyaanaamittete hasiisannonsare shaqqillunni assine Yesuusiwiinni ronsoommota leellisha dandiineemmo.
“BAALUNKU ITTE DUUBBU”
7. Tini busha alame noo geeshsha baꞌꞌannokkiri maati?
7 Buxima hundinni hanaffe noote. Yihowa hundi Isiraeelera duuchanka wote gobbansara buxane hooggannokkita coyiꞌrino. (Marro 15:11) Lowo xibbi diri sai gedensaanni Yesuusino togo yiino: “Buxane ayewoteno ledoꞌne heedhanno.” (Mat. 26:11) Isi hatto yaasi ayewoteno uullate aana buxane heedhanno yaateni? Deeꞌni, isi hatto yiinohu tini busha alame noo geeshsha buxane heedhanno yaateeti. Konni daafira, Yesuusi loosino maalale albillitte gashshootisi yannara mannu baalunku ite duuwannotanna hagiidhannota leellishshannota huwatanke jawaachishshannote!
8, 9. (a)Yesuusi lowo kume ikkanno manna maalaletenni itisanno gede assinosiri maati? (b) Yesuusi lowo kume ikkanno manna itisinota hedatto wote maalaꞌlatto gede assannoheri maati?
8 Faarsaanchu Yihowa togo yiino: “Ati angakki fanatto; heeshshote kalaqami baalunku hasattono wonshatto.” (Far. 145:16) ‘Maganu wolqa’ ikkinohu Kiristoosi Annisi lawishsha harunse, duucha hige angasi diriirse harunsaanosi hasatto wonshino. Isi tenne assinohu mulla wolqasi leellishate yee diꞌꞌikkino. Konne assinohu manna mararannohuraati. Hanni Maatewoosi 14:14-21 noo xagge laꞌno. (Kiiro 14, 15, 19, 20 nabbawi.c) Yesuusi rosaano sagalete haja kultasira isiwa daggu. Insa yaaddinohu uminsa hudidhino daafira calla ikkikkinni Yesuusa harunsara addi addi katammanni lekkansanni seeda doogo haꞌre dayino manni hudiꞌre quubbi yiino daafiraati. (Mat. 14:13) Hakkiinni isi maa assiyya?
9 Yesuusi onte daabbonninna lame qulxuꞌmichonni 5,000 labballo, hattono meentonna qaaqquulle itisino! Yesuusi hakkoye gamba yiino mannanna shiimaadda qaaqquulle marare, maalale loosate wolqasi horoonsiꞌre shaqqillunni towaatinonsata afanke lowo geeshsha hagiirsiissannota diꞌꞌikkitino? Duuchunku manni “ite duuwino.” Tini qolte hakkawote falakkino sagale noota leellishshanno. Yesuusi shiqishino sagale mulla qamasate geeshshira calla ikkikkinni gamba yiino manni seeda doogo haꞌre qaensa higate jawaante afiꞌranno gede assitanno geeshshite. (Luq. 9:10-17) Qoleno, mannu ite duuweenna gattino sagale 12 gimboola ikkitino!
10. Muli yanna giddo buxima hiikkitanno?
10 Yannankera taashshote xeꞌne noo gashshootinni kainohunni lowo miliyoone ikkanno manni heeshshote hasiissannonsata qara coyibba nafa diafiꞌrino. Mitu roduuwinke nafa afooho wodhitannore hoogginokkiha ikkirono, gari sagale dinonsa. Ikkollana hajajamanno manni bunshenna buxima nookki alamera hagiidhanni heeꞌranno yanna gambisse daggino. Ati wolqa heedhoommehero, mannu baalunku hasatto wonsha dihasiꞌratto? Duuchanka dandaanno Magani muli yanna giddo mannu baalunku hasatto wonshanno wolqanna hasatto noosi. Ee, fooliishsho afiꞌneemmo yanna muleeti!—Faarso 72:16 nabbawi.d
11. Kiristoosi muli yanna giddo wolqasi uulla woꞌmate aana horoonsiꞌranno yineemmohu mayiraati? Tenne afakki maa assatto gede kakkayissannohe?
11 Yesuusi uullate aana noo waro, maalale loosinohu boodu qooxeessira sase dironna darate callaati. (Mat. 15:24) Isi ayirrado Nugusa ikkino daafira gashshootisi uullate aana qaccetenni qaccete geeshsha ikkanno. (Far. 72:8) Yesuusi loosinoti addi addi maalale, isi gashshootisi yannara ninkera danchare assanno dandoonna hasatto noosita addaxxineemmo gede assitannonke. Ninke maalale loosa dandiineemmokkiha ikkirono, mannu Maganu Qaale afate quqquxamanno gede assa dandiineemmo. Qullaawu Maxaafi masaalo albillitte woyyitino yanna daggannota buuxisannonke. Albillittete yanna daafira dancha egenno afiꞌnoommore Yihowa Farciꞌraasine ikkinoommo daafira, wolu mannira edu noonketa anfoommo. (Rom. 1:14, 15) Konne qeechanke hiincanke Maganu Mangisteha dancha duduwo wolootaho kulleemmo gede kakkayissannonke.—Far. 45:1; 49:3.
UULLANNITA KALAQAMU WOLQA HAJAJA DANDAANNO
12. Yesuusi uullate kalaqami daafira seekke afino yineemmohu mayiraati?
12 Maganu uullanna uullate aana noore baalankare kalaqi yannara, Yesuusi ledosi “qara loosaasincho” ikke loosino. (Law. 8:22, 30, 31; Qol. 1:15-17) Hakko daafira, Yesuusi uullate kalaqami daafira seekke afino. Isi uullate jiro garunni amada, horoonsiꞌranna taashshine beeha dandiinanni gara egennino.
Yesuusi maalale loosate wolqasi horoonsiꞌrino gara hedatto wote dhagge ikkannoheri maati? (Gufo 13, 14 lai)
13, 14. Kiristoosi kalaqamu wolqa hajaja dandaannota leellishanno lawishsha kuli.
13 Yesuusi uullate aana noo waro kalaqamu wolqa hajaje isi “Maganu wolqa” ikkinota leellishino. Hanni Yesuusi hambabalatte kaꞌeenna rosaanosi masse huxidhu wote assinore laꞌno. (Marqoosi 4:37-39 nabbawi.e) Mittu Qullaawu Maxaafi fullahaanchi togo yiino: “[Marqoosi 4:37 aana “hambabalatte” yine tirroonnihu] Girikete qaali bayira dambala woy lowo wisho kulannoho. Kuni qaali horonta shota bubbe xawisannoha diꞌꞌikkino . . . Hatteentenni, kolishshu gomichi gordo diwe amadanno wote, hattono banqo xadhitannonna barada xeena gananno wote kalaqantannota, baalankare haadhe uullate gantanno wisho kulannoho.” Maatewoosi Wongeeli tenne “lowo dambala” yee xawisanno.—Mat. 8:24.
14 Hanni hakkawote noo ikkito hedi: Kiristoosi soqqamanni hose baasa daafurino. Dambalu yowolo gane kawanna kaꞌa qolanni raateessanni no; qoleno wayi kaate giddora eanni no. Dambalu huuro lowota ikkiturono, hattono yowolo kawanna kaꞌa shafantanni nooha ikkirono Yesuusi kayinni natare goxe no. Mannimmasi lowo geeshsha daafurtino. Masse huxidhino rosaanosi iso goxinowiinni kayisse ‘Goonfummowe!’ yitu. (Mat. 8:25) Hakkiinni Yesuusi gotti yee baaranna hambabalatte, “Sammi yii! Eemarami!” yee hajaji. Hambabalatteno sammi yitu. (Marq. 4:39) Yesuusi bubbenna baaru sammi yaanno gede hajajino. Hakkiinni mayi maikkiyya? Qullaawu Maxaafi togo yaanno: “Qooxeessu lowonta qaxaqaꞌa yii.” Ee, Yesuusi bayira wolqa noosiho!
15. Duuchanka Dandaanno Magani kalaqamu wolqa illaallisa dandaannota leellishinohu hiittoonniiti?
15 Kiristoosira wolqa uyinohu Yihowa umosiiti; konni daafira Duuchanka Dandaanno Magani kalaqamu wolqa woꞌmunni woꞌma illaallisa dandaannota ammana dandiineemmo. Hanni mito lawishsha laꞌno. Baote Wayi daara albaanni Yihowa togo yiino: “Lamalu barri gedensaanni, 40 barranna 40 hashsha woꞌma uullate aana xeena dirriseemmo.” (Kal. 7:4) Hattonni Wolapho 14:21 togo yitanno: “Yihowa wolqaataame soojjaati bubbe abbe baara badhera qole xooqisino.” Yoonaasi 1:4 qolte togo yitanno: “Yihowa baaru aana bayira bubbe abbi; wolqaataamu dambali kaeenna yowolo hiiqqantara kaꞌu.” Yihowa kalaqamu wolquwa hajaja dandaannota afanke jawaachishshannote. Addaho, Uullanke albillitte hiikkitakka yine yaada dihasiissannonke.
16. Kalaqaanchinkenna Beettisi kalaqamu wolqa hajaja dandiitannota afanke jawaachishshannonkehu mayiraati?
16 Kalaqaanchinkenna “qara loosaasincho” ikkino Beettisi wolqa mageeshshitero hiincanke harshammi yine heeꞌneemmo gede assitannonke. Insa 1,000 diro uulla woꞌmunni woꞌma towaattanno yannara, mannu baalunku yaaddo nookkiha teese heeꞌranno. Waajjishshannoti kalaqamu dano diheedhanno. Haaro alamera hambabalattete, sunaame, woy baattote huxano gawajjitannohu diheeꞌranno. Kalaqamu dano mitto manchono shitannokki woy biso gawajjitannokkita hattee yanna heda lowo geeshsha hagiirsiissannote; korkaatuno “Maganu dunkaani mannu ledo [ikkanno]!” (Ajuuja 21:3, 4) Kumu Diri Gashshooti yannara Maganu wolqasi Kiristoosi widoonni horoonsiꞌre kalaqamu wolquwa illaallisannota addaxxa dandiineemmo.
XAANNI MAGANONNA KIRISTOOSI LABBE
17. Yihowanna Yesuusa lambeemmoti mitte doogo hiittenneeti?
17 Ninke Yihowanna Yesuusi gede kalaqamu wolqa hajaja didandiineemmo; ikkirono mito geeshshi wolqa noonke. Tenne wolqa horoonsiꞌra hasiissannonkehu hiittoonniiti? Mitte doogo Lawishsha 3:27 yitannore assate. (Qummeeshsha nabbawi.f) Roduuwinkera buutote qarri iillannonsa wote, maalaamittete woy ayyaanaamittete hasiisannonsare assine kaaꞌlanna sheshifachisha dandiineemmo. (Law. 17:17) Lawishshaho, kalaqamu dano gawajjitino roduuwanke kaaꞌla dandiineemmo. Mitte minaanna shiidhino rodoo hambabalatte minese diiggu yannara afidhino kaaꞌlora lowo geeshsha galatte togo yitino: “Yihowa dirijjite giddo heeꞌraꞌyanni afiꞌroommate maalaamittetenna ayyaanaamittete kaaꞌlora lowo geeshsha galaxxeemma.” Qoleno mitte lafitte rodoo minese hambabalattete diiggeenna lowo geeshsha hexxo mudhitino hattono assitannori leella giwise. Hatte yannara roduuwu kaaꞌlitinose daafira togo yitino: “Hiitto yeemmaro diafoomma! Macciishshaminoere asse kuleemma gari bainoe . . . Yihowa, galaxxeemmahe!” Wolootu daafira lowo geeshsha hedannohu roduuwu maamari wido ikkanke lowo geeshsha hagiirsiissannonke. Roorenka hagiidhineemmohu kayinni, Yihowanna Yesuusi Maganu mannira lowo geeshsha assaabbannore ikkitino daafiraati.
18. Yesuusi maalale loosino korkaati dhagge ikkannohehu mayiraati?
18 Yesuusi soqqanshosi yannara “Maganu wolqa” ikkinota leellishino. Ikkina Yesuusa tenne assanno gede assinosiri maati? Isi wolqasi mannaho leellamate yee woy umisi horora horoonsiꞌre diegennino. Hatteentenni, isi loosinoti addi addi maalale mannu oosora noosi baxille leellishshannote. Aananno birxichira tenne hajore ronseemmo.
a Yohaannisi 2:3, 6-8, 10: “Woyine gooffanni hadhuta, Yesuusi ama iso ‘Woyine gooffunsawe’ yitu. Yihudootunnite keeraanchimmate woga garinni, mitte mittenti lame woy sase duꞌnamaanote bikkaancho amaddannoti kinchunni loonsoonniti lee wayi googide hakko no. Yesuusi, ‘Googiddate waa wonshe’ yiinsa. Hakko daafira googiddate waa kicci assite wonshitu. Hakkiinni isi, ‘Hanni shiima xorshitine haadhine jilu sooreessira masse’ yiinsa. Insano haadhe massitu. Isi qole togo yii: ‘Mannu baalunku umo dancha woyine shiqishe, mannu dimbihu gedensaanni kayinni anfi gedeetalla shiqishanno. Ati kayinni dancha woyine xaa geeshsha worootto.’”
b Isayyaasi 25:6: “Olantote Mootichi Yihowa konni ilaali aana daga baalate doorantino sagale nooha lowo jila qixxeessanno; kaajja woyine, qoe woꞌmitinoti doorantino sagale, hattono ximbiimboonniti kaajja woyine noo jila jilanno.”
c Maatewoosi 14:14, 15, 19, 20: “Isi baaru gama dayiti, lowo manna lae marari; mereeronsa nooha xiwamino mannano hursi. Hashshita kayinni rosaanosi isiwa shiqqi yite togo yitusi: ‘Heeꞌnoommohu baddowaati, yannano hashshitino; hakko daafira qacha haꞌre sagale hidhanno gede manna haꞌrisi.’ Hakkiinni isi mannu hayissote aana ofollanno gede hajaji. Hakkiinnino onte daabbonna lamenta qulxuꞌmicho haare iima hige lae maassiꞌri; daabbo tattayise, rosaanosira uyi, rosaanosino mannaho uyitu. Baalunku itte duubbu; hakkiinni gattino sagale 12 gimboola ikkitannota gamba assitu.”
d Faarso 72:16: “Uullate aana gidu woꞌmanno; ilaallate sammorano batiꞌranno. Nugusu gumi Libaanoosi haqqicho gede shembe yaanno; katammateno mannu uullate aana noo haqqe gede daraaranno.”
e Marqoosi 4:37-39: “Hakkawote lowo hambabalatte kaꞌu; dambaluno yowolote daye gaꞌnanni giddora ea hanafi; hakko daafira yowolote wayi woꞌmara kai. Yesuusi kayinni yowolote badhiidi widoonni barko barkiꞌre goxe no. Hakko daafira insa goxinowiinni kayisse, ‘Rosiisaancho, goonfanna sammi yite laꞌꞌatto?’ yitusi. Hakkiinni isi gotti yee bubbe ufi, baarano ‘Sammi yii! Eemarami!’ yii. Bubbeno uurritu; qooxeessu lowonta qaxaqaꞌa yii.”
f Lawishsha 3:27: “Manna kaaꞌlate wolqa heedheennahe, hasiisannonsarira danchare assa agurtooti.”