AANIIDI QOOLIHA COYI UMO | SAYINSE QULLAAWA MAXAAFA SOꞌROTE YINANNI GEDE ASSITINONI?

Sayinse Dandiitannokkiri No

Muli yanna kawa haaru Maganiweelu manni hedo kultannoti batinye maxaaffa gobba tuqqino. Tini maxaaffa lowo manni afate quqquxamanno gede hattono lowo hasaawinna heewo kaꞌanno gede assitino. Tenne lainohunni nervete daafira xiinxallannohu sayinsete fullahaanchi Deevidi Iiglimani togo yee borreessino: “Mite nabbawaano . . . sayinsete fullahaano baalanka coye affe guddinohu gede assite heddanno.” Isi lede togo yiino: “Dancha sayinse kayinni ayewoteno wolootu hedo macciishshitanno; qoleno sayinsete lopho kultanno xagge haaru coyi woꞌminote.”

Gordu bissa xiinxallaanchi teleskoppe horoonsiˈranni no

Lowo diro, sayinsete fullahaano kalaqamu daafira kaꞌannote hibbo ikkitanno xaꞌmuwara dawaro afate xiinxallitino xiinxallo lowore dhaggeeffantannire assitino. Ikkirono, insa giddo mitootu xiinxallitanni lowo soꞌro loossino wotino no. Hundinni kayisse egennantinori sayinsete fullahaano giddo mittu Ayizaaki Niwuteniiti. Isi goshoonshete wolqa pilaaneetta, beeddahenna gaalaksuwa mitteenni amadisiisante mitte kalqete alame ikkitanno gede assitanno gara xawisino. Qoleno kompiyuterete loosira, gordo haꞌre xiinxallatenna niyukileerete fiiziksera horoonsiꞌnanni shallago kalaqino. Ikkollana, Niwuteni irsaase yinanni siwiilanna wole siwiilla culkaho soorrate, alkemii yinannita ayyaantotenna digintete wolqanni loossannota kaphu sayinseno harunsino.

Niwuteni heeꞌrihunni mitu 1,500 diri albaanni heeꞌrinohu Girikennihu gordu bissa xiinxallo fullahaanchi Tolemii, illetenni calla laꞌꞌanni gordoho noore xiinxallino. Isi hashsha iima pilaaneetta hadhanno doogga afino; hattono kaarta loosate fullahinoho. Ikkollana uulla baalunkurira mudukkoho woy mereeroho yee ammananno. Gordu bissa orte xiinxallanno fullahaanchi Kaarli Saagani, Tolemii daafira togo yee borreessino: “Isi Uulla kalqete alamera mudukkoho yiinota mannu 1,500 diro ammane heeꞌrino; tini qolte fullahaano nafa lowo geeshsha sodhara dandiitannota leellishshannote.”

Sayinsete fullahaancho Qullaawa Maxaafa nabbabbanni no

Yannankete sayinsete fullahaanorano gurcheessanno coyi tuncu yaannonsa. Insa kalqete alame daafira affe guda dandiitakka? Sayinse lophitino dirimanna ninkera kaaꞌlannore assitinota ammana gara ikkiturono, sayinse dandiitannokkiri nootano heda hasiissanno. Fiiziksete fullahaanchi Pooli Deeviisi togo yiino: “Mittu mittunku coyira ikkadonna isi isiniiwa sumuu yaanno xawishsha afiꞌra didandiinanni.” Tini yaatto mitto morommannikki halaale xawissanno: Mannu ooso kalaqamu daafira affe guda didandiitanno. Konni daafira, sayinse baalanka coye xawisse kula dandiitanno yine coyiꞌnannita ammanne adhate albaanni heeshshi gotti asse heda busullete.

Ee, Qullaawu Maxaafi sayinsetewiinni afiꞌnannikkiha hasiisanno biddishsha aannonke

Qullaawu Maxaafi kalaqamu giddo noote dhaggete coyibba daafira togo yaanno: “Kuneeti! [Maganu] doogga giddo tini qacce qaccetella; isi daafira macciishshinoommo coyi hashaanshe kulloonniri geeshshaatilla!” (Iyyoobi 26:14) Mannaho afatenna wodanchate wolqansara aleenni ikkinohu lowo coyi no. Ee, hawaariya Phaawuloosi mitu 2,000 diri albaanni borreessinori xaano ikkiro halaaleho: “Maganu durummanna hayyosi hattono egennosi hiitto xeertidhino! Yoosino xiinxalline dianfannite! Dooggasino diꞌꞌiillinannite!”—Roomu Sokka 11:33.

Sayinsetewiinni Afiꞌnannikki Biddishsha

Sayinse kalaqamu daafira anfanni gede kaaꞌlitanno; Qullaawu Maxaafi kayinni mannu mimmitu ledo salaametenni hagiidhanni heeꞌranno gede kaaꞌlanno biddishshanna xintu seera amadino. Hanni aante noo lawishshuwa lai.

Jaddo Hoola

Heeshshote diniqo heedhohe

“Shitooti.” —Wolapho 20:13.

“Rodoosi giwannohu baalunku lubbo shiinoho.”—1 Yohaannisi 3:15.

Salaame kalaqi hattono baꞌannokki gede assi

“Bushu coyiwiinni xeertiꞌri, qoleno danchare assi; salaame hasiꞌri hattono harunsi.” —Faarso 34:14.

“Salaame kalaqqannorira keeraanchimmate gumi salaametenni wixamannonsa.”—Yaaqoobi 3:18.

Finqilletewiinni xeertiꞌri

“Yihowa keeraanchono busha manchono seekke laꞌꞌanno; isi finqille baxxannore giwanno.”—Faarso 11:5.

“Finqila mancho laꞌe hinaassooti; dooggasi baalantano harunsitooti; korkaatuno Yihowa hantaalaamo mancho effire giwanno.”—Lawishsha 3:31, 32.
Maatete Hagiirre

Annikkiranna amakkira hajajami

“Ooso, Mootichu fajjo ledo sumuu yaanno garinni anniꞌneranna amaꞌnera hajajamme; korkaatuno kuni Maganu albaanni gara ikkinoreeti. ‘Annakkinna amakki ayirrisi’; tini hexxote qaali ledo uyinoonnite umi hajajooti: ‘Tini seyannohe gedenna uullate aana dirikki seedanno gede assitanno.’”—Efesooni 6:1-3.

Oosoꞌne garunni rosiisse

“Annuwa, oosoꞌne caacceessitinoonte; hatteentenni Yihowa seejjonninna biddishshinni lossensa.”—Efesooni 6:4.

“Annuwa, ballo hexxo mudhitannokki gede oosoꞌne hifachishshinoonte.”—Qolasiyaasi 3:21.

Galteꞌne baxxe hattono ayirrisse

“Konnira kiꞌne giddo mittu mittunku isonooto baxannonte gede minaamasino hattonni baxo; minaama kayinni minaannase lowo geeshsha ayirrisso.”—Efesooni 5:33.
Kalaqamu qooxeessa gawajjotenni agara

Qullaawu Maxaafi hunda Isiraeelete yannara qooxeessa babbaxxitino doogonni daafino mannire kulanni togo yaanno: “Baatto aanase heeꞌranno manni daafino; . . . Tennera aanase heeꞌranno manni xaꞌmamanno.” (Isayyaasi 24:5, 6) Maganu qooxeessa afanni heeꞌrenni daafanno manna xaꞌmanno. Isi “uulla huntanni noore hunanno.” (Ajuuja 11:18) Kuni manni assanno coyira xaꞌmamansa digattanno.