Aa Hagiirre Afiꞌreemmo Gede Assitinoe

AA DANDEEMMORI muxxe ikkinori nooeta huwatoommohu 12 dirihu heeꞌreeti. Mitte hige jawu gambooshshiwa mittu rodii sabbaka hasiꞌreemmotanna teꞌee xaꞌmie. Hakkuyira albaanni sabbake egennoommokkiha ikkirono, “Ee hasiꞌreemmo” yee dawarummo. Ledosi soqqanshote qoqqowo haꞌrummo gedensaanni, isi Maganu Mangistere kultanno buukileetuwa uyie. Hakkiinnino, “Ani doogo kawaanni heeꞌranno manna hasaawiseemmona, ati doogo kaꞌaanni heeꞌranno manna hasaawisi” yiie. Hakka wote waajjoommoha ikkirono minunni mine haꞌre sabbaka hanafummo; uyinoe buukileetuwa baala hakkawontenni ele gudummo; tini dhagge ikkitinoe. Hatte yannara mannaho aanni noommori insa lowo geeshsha hasiꞌrannore ikkinota huwatoommo.

Ilamoommohu 1923nni Ingilaandete gobbara Kenti qoqqowira Chatemi yinanni baseraati; lophoommohu hexxo mudhino manni mereerooti. Mannu Umihu Alamete Oli gedensaanni alame woyyaabbanno yee hedinori haaqete hagiirre ikke gatino. Qoleno, Baaptisti yinanni ammaꞌno qeesooti uminsa horo calla hasidhannore ikkansa annaꞌyanna amaꞌya hanqissinonsa. Honse diro ikkie balla, amaꞌya Alamete Doyichohu Qullaawu Maxaafi Rosaano Maamari miilla (Yihowa Farciꞌraasine) “rossannowa” woy gambooshshe assidhannowa haꞌra hanaffu. Hakko, roduuwu giddonni mitte rodoo boode ooso gamba assite, Qullaawa Maxaafanna Maganu Gingilaate yinanni maxaafa horoonsidhe rosiissannonke. Hatte yannara roseemmori baasa baxisinoe.

DIRO ANE ROORTANNO RODUUWIWIINNI ROSO AFIꞌROOMMO

Anjenni kayise, mannaho Maganu Qaali giddo noo hexxo kula lowo geeshsha baxisannoe. Duucha wote minunni mine calliꞌya haꞌre soqqameemmoha ikkirono, diro ane roorannoe roduuwi ledono soqqameemmo; tini insawiinni lowore rosate kaaꞌlitinoe. Lawishshaho, mitto barra diro ane rooranno rodii ledo biskilliitetenni soqqanshote qoqqowo haꞌnanni heeꞌneenna mitto qeesicha laummoti hakkunni rodiira, “Kune meicho lai” yuummo. Hakkiinni roduu bisikilliitetenni dirre mitte karroonni haqqicho udulumi aana gaffi assino yiie. Hakkiinni togo yiie: “Meichoho yite yoo yaate atera silxaane uyinohehu ayeti? Yoo Yihowa yoona, ninke mannaho dancha duduwo kulle hagiidhino.” Hatte yannara aa lowo hagiirre afiꞌnanni gede assitannota huwatoommo.—Mat. 25:31-33; Soq. 20:35.

Diro ane roorannohu wolu rodiino aatenni hagiirre afiꞌrate, mito wote cinca hasiissannota rosiisinoe. Minaamasi Yihowa Farciꞌraasine dibaxxannote. Mitto barra isi gaffi assinoommo widoonni mitore caꞌmi yinammora minisira haare haꞌrie. Minaamasi kayinni isi soqqansho fulinota affuti lowo geeshsha hanqitino daafira shaqixalu paakko aananke qolte olloltu. Isi kayinni isera hanqa agure muushshi yee, hatte paakko basesera qole wori. Yannate gedensaanni minaamasi cuuante Yihowa Farciꞌraasincho ikkitinohura cincasi kiissinosi.

Albillittete yannare kultanno hexxo mannaho kulate nooe hasatto lexxitanni hadhuta, amaꞌyanna ani 1940nni Badheessu aganira Doveri yinanniwa cuuammummo. Wocawaaro 1939nni Biritaaniyu Jarmanete aana ola kayisi yannara anera 16 diro ikke nooe. Ella 1940nni mininke xullichira heeꞌre, lowo kume ikkitannota masse qece yitino olanto makeenunni haaꞌne sayinsanna laummo. Insa Denkerki yinannite olu basenni gattinoreeti. Insa hexxo mudhitinota laummoti, Maganu Mangistere kulammonsara lowonta halchummo. Gedensaanni hakko dironni, Jarmane Biritaaniyu gobbara bomba tuga hanaffu. Hashshu kiiro Jarmanenniti olu jettuwa ninke qooxeessi widoonni higge saꞌanna laeemmo. Bombu tunganni wote suunannonna uwe dhoohe luulanno gari shibbire naqannoho. Soodo gobbara fulleemmo wote, qooxeessinkera noo minna diigantino. Tini, Maganu Mangiste calla hexxo assiꞌra hasiissannoeta albinni roore huwateemmo gede assitinoe.

AATE BIDDI YEE HIGOOMMO GARA

Hagiirsiissannota woꞌma yanna soqqansho hanafoommohu 1941nniiti. Hakkuyira albaanni howolote loosi ogimma afiꞌrate yee Chatemi yinanniwa, Royaali Dokiyaardi yinanni dirijjitera looseemmo; kuni loosi mannu afiꞌrate lowonta hasiꞌrannohonna lowo horo aannoho. Yihowa soqqamaasine, Kiristaanu mitte gobbara haꞌle wole gobba ledo olama hasiissannonsakkita lowo diri albaanni huwattino. Qoleno, 1941nni olu uduunne qixxeessitanno dirijjitera loosa hasiissannonkekkita buunxummo. (Yoh. 18:36) Hakka waro dokiyaardi yinanni dirijjite wayi giddo lixa dandiitannota olu howolo seekkitanni noo daafira, loosanni noommo looso aguratenna woꞌma yanna soqqansho eate murciꞌrummo. Woꞌma yanna soqqansho eꞌꞌe umo haꞌroommohu Kaatisiwooldisi giddo nooho Serensesteri yinanniho biifado katamaati.

Tonaasette diro ikkieta wottaaddara ikka giwoommohura honse agana usuramoommo. Usuru minira eessine callichoꞌya cunfieta lowo geeshsha masoommo. Gedensoonni kayinni agaraasinenna usuramino manni usurroonniehu mayiraatiro xaꞌmieta hagiirrunni ammanaꞌya daafira kuloommonsa.

Usuru mininni fulummota Kenti haꞌre Lionaardi Isimizia ledo addi addi katammara soqqamammora sonkie; ninke ilammoommohu hakko qoqqowiraati. Gedensaanni 1944nni kayise mitto kume saꞌannoti oofannohu nookkiti fanje hogomboonniti olu jette Kenti ubbino. Ninke heeꞌneemmohu Naatisi amadinote Awuroppu gobbuwanna Lendenete jette buubbanno dhaawaraati. Tenne olu jettuwa Dudulibaagi yinanni. Jettete motore uurritu yaa, xuꞌeessu giddo hatti olu jette dagge ubbe dhookkannota anfe agarranni; tini qolte mannaho shibbire naqqanno. Hakka waro ninke ontu manni noote mitte maatera Qullaawa Maxaafa xiinxallinsanni heeꞌnoommo. Mito wote, insa minensa bombu dirre ganeenna minu aanaho uwe gawajjannonsakki gede seekkiꞌrinote siwiilu kurse woroonni ofolline xiinxallinseemmonsa. Yannate gedensaanni hatti maate gudisante cuuantino.

DANCHA DUDUWO BAARA WIDI GOBBUWARA SABBAKA

Olu gedensaanni, suwisaancho ikke wodiidi Ayerilaandera lame diro soqqamoommo. Ninke Ayerilaande Ingilaandetenni lowo geeshsha baxxitannota dibuunxoommo. Hakko daafira misiyoone ikkinoommota kullanni galleemmo mine xaꞌmiꞌneemmo; hattono doogote metseettanke elleemmo. Kayinni Kaatoolikete ammaꞌno annattino gobbara tenne assanke “gowwimmate!” Mitte hige mittu manchi waajjishiisheennanke polisichaho kulummota, isi “Wona mayyaanno yite hedootto?” yiie. Qeesootu kageeshshi silxaane afidhinota dianfoommo. Insa borronke adhanno manna loosunni fushshine hunanni gede assitanno; hattono galleemmo mininni haꞌrinsanninke gede assitanno.

Hakkuyi gedensaanni haaru qooxeessira sabbankeemmo wote, biskilliitetenni galleemmo qachinni xeertowa haꞌne qeesse affannonkekki qooxeessira sabbaka woyyitannota huwantummo. Jeefote qachinkera heeꞌranno mannira sabbankeemmo. Kilkini yinanniwa mannu waadannonkeha ikkirono, mitto wedellicha lamalate giddo sase hinge xiinxallinseemmo. Qullaawu Maxaafi halaale mannaho rosiisa baxisinoe daafira, Giiliyaadi Qullaawu Maxaafi Rosi Mine eꞌꞌe misiyoone ikke qajeelate forme wonshummo.

Niwu Yorkete onte agana qajeellummo gedensaanni, Giliyaadi Rosi Mine maassammoommori giddo shoole roduuwa Karibiiyaani Baarite shiimmaadda giddichuwara soqqammammora sonkinke. Bocaasa 1948nni, seendille 18 meetire ikkitannote Sibiya yinanni howolonni Niwu Yorki Sitinni haꞌnummo. Hakkuyira albaanni howolotenni laaqanni haꞌre egennoommokki daafira hagiidhoommo. Jaalinke Gesti Maaki howolo laaqate worbaho. Isi howolo laaqannohu assannore lawishshaho, shaꞌra suntanninna dirrinsanni gara, kompaase horoonsiꞌne raga anfanni garanna bubbe yowolo gantanno wote wole ragaanni hinge laanqanni gara rosiisinonke. Gesti konni garinni 30 barra qarrisanno dambali giddoonni laaqanni Bahaamasi iillishinke.

MAGANU QAALE GIDDICHUWATE SABBAKA

Bahaamasite shiimmaadda giddichuwara boode aganna sabbankummo gedensaanni Liiwaardinna Windiwardi yinanni giddichuwa haꞌnummo; tini giddichuwa Puwerto Rikora multannote Virjiniyu giddichuwanni kayise Tirinidaadi mereero seendille 800 kiilo meetire ikkitanno basera noote. Ontu diri giddo roore sabbankoommohu Yihowa Farciꞌraasine nookki giddichuwaraati. Mito wote haammata lamala imeelete sokka sonkummokki woy sonkoonninketa layiꞌnummokki keeshshineemmo. Ikkirono Yihowa Qaale giddichuwate sabbakanke lowo geeshsha hagiirsiissinonke.—Erm. 31:10.

Baaru qacce dange howolonke uurrinseemmo wote, qachu manni xaphi yee ninke ewelumma afate hakkira daanno. Insa giddo mitu togoo howolo woy faranje afe diegennino. Hatte giddichuwara heeꞌranno manni ammaꞌnote coye baxannoho, danchuullehonna Qullaawa Maxaafa seekke egenninoho. Insa duucha hige xaalla woshshaande fushshinoonni qulxuꞌme, awukaatonna ocholoone uyinonke. Howolonke gonxannihu, qishiꞌnannihu, woy uduunne hayishshiꞌnannihu gari bayichi nookkita ikkiturono dandiine heeꞌnoommo.

Baaru laso amande haꞌnanni manna hasaawinsanni honseemmo. Qoleno, Qullaawu Maxaafi lallawo heedhannota kulleemmonsa. Hakkiinni hawarranno wote howolote dowwola ganneemmo. Mannu daanna laꞌnanni wote lowo geeshsha hagiirsiisanno. Insa bagatenni dirranno yannara, kurraazensa beeddahe bilicci bilicci yitanni dirritannoha labbanno. Mito wote xibbe ikkanno manni daanno; qoleno xaꞌmo xaꞌmanni hashshiishiꞌre haꞌranno. Insa faarso faarsa baxanno; hakko daafira mite Maganu Mangiste faarso tayippetenni borreessine uyineemmonsa. Ninke shoolunku faarsa hananfummo gedensaanni insa ledonke faarsanno wote huuronsa lowo geeshsha baxissanno. Hatti lowo geeshsha hagiirsiissanno yannaati!

Mite Qullaawu Maxaafi rosaano insa xiinxallinse kaꞌne wole maatewa haꞌneemmo wote, hatti maate xiinxallitanna macciishshate ledonke hadhanno. Mitte basera keeshshineemmohu boode lamala calla ikkirono, ninke galagalle hingammo geeshsha lowo hasatto noonsari wole manna xiinxallissanno gede assineemmo. Insa giddo mitu uyinoommonsa looso danchu garinni loossinota laꞌꞌanke hagiirsiissinonke.

Xaa yannara kuri giddichuwa giddo batinye mannu daaꞌꞌatate yaaꞌꞌannota ikkitino; hakka waro kayinni tini giddichuwa gordu kuuli gedee wayi, shaafu batiꞌrinoti baaru qaccenna saattu callu woꞌminote; hattono qaxaqaꞌa yitinote. Duucha wote mitte giddichonni wole giddicho haꞌneemmohu hashshaati. Haꞌneemmo wote dolfiini yinannihu wayi giddo kalaqami godoꞌlanni howolonkera qoteho daahanno; hatte yannara howolonke laanqanna macciishshantanno huuro agurranna wole qoonqo dino. Qaxaqaꞌa yiino baari aana fulinohu aganu xawaabbi, wayi qasirowa massitannota birra yinanni shiilo aanaho karroonni doogo lawanno.

Addi addi giddichuwara sabbankanni onte diro keeshshinummohu gedensaanni, howolonke motoretenni loossanno howolora soorriꞌrate Puwerto Riko haꞌnummo. Hatte gobba marroommowa misiyoone ikkite soqqantannote Makseni Booyidi yinannite mitte xuma beetto ledo egenname ise lowo geeshsha baxummo. Ise anjesenni kayisse dancha duduwo diinaggaabbe dudubbanni keeshshitino. Yannate gedensaanni, ise Kaatolikete gashshooti 1950nni fushshe haꞌrisise yanna geeshsha, Doominiku Ripaabilikera misiyoone ikkite soqqantino. Howolo laaqqannorira Puwerto Riko mitto agana calla keeshshitanno gede fajjinanninsa daafira, mittu agani gedensaanni hakkiinni haꞌra hasiissannoe. Muli yanna giddo hatte gobbanni wole giddichuwa haꞌre boode dirra keeshsha hasiissannoe. Konni daafira aneneetira togo yuummo: ‘Roonaaldi, tenne beetto baxoottoro olloha hasiissannohe.’ Sase lamala gedensaanni ise adhate huucciꞌrummo; hakkiinni lee lamala gedensaanni adhammummo. Makseninna Ani Puwerto Riko misiyoone ikkine soqqammeemmo gede assinoonninke daafira hatte gobbara gatummo.

Gedensaanni 1956nni ani woradu aliidi laꞌꞌaancho ikkeenna songuwa towaata hananfummo. Towaanteemmo roduuwi giddo rooru anga shiima ikkirono, insa towaata lowo geeshsha hagiirsiissannonke. Lawishshaho Potela Pestelo yinanni qachira, lowo ooso afidhinoti lame Yihowa Farciꞌraasine ikkitino maate no; ani insara suusulle ufuufeemmonsa. Insa giddonni Hilda yinanni qaaqqo ninke ledo soqqama hasidhannoronnna teꞌee xaꞌmummo. Tennera ise, “Hasiꞌrate wote hasiꞌreemmana, kayinni caammu nooekki daafira soqqama didandeemma” yitu. Konnira isera caamma hirreennase ledonke soqqansho fultu. Lowo diri gedensaanni 1972nni Makseninna Ani Birukiliini noo Beeteele daaꞌꞌantanni heeꞌneenna, Giliyaadi Rosi Mine muli yanna giddo maassante kaꞌinoti mitte rodoo ninkewa dagge coyishiishshunke. Ise Ikuwadoore sonkeennase hakkira hadhe soqqantaraati; hakkiinni ise, “Ane qaagginanni? Ani Pestelonni dawoommate biꞌre caammu nooekki qaaqqooti.” Ise Hildaati! Hatte yannara lowo geeshsha hagiidhinoommo daafira wiꞌlinummo!

Gedensaanni 1960nni Puwerto Riko gobbara Sani Juani yinanniwa Santersi giddo noote shiima lame fooqe afidhinote sinu biirora soqqama hananfummo. Umi balla rooriidi looso loonseemmori Leenarti Joonseninna Aneeti. Doominiku Ripaabilikera umo Yihowa Farciꞌraasine ikkite soqqantinori isootinna minaamasiiti; insa Puwerto Riko dayinohu 1957nniiti. Yannate gedensaanni, Makseni lamalate giddo mitte kume saꞌanno metseetta, metseete hajaccanno mannira sokkanno. Ise kuni manni baalu ayyaanaamittete sagale afiꞌranni noota heddanno daafira konne looso hagiidhite loossanno.

Beeteelete soqqansho aate faro fantanno daafira baasa baxeemmo. Ikkirono, togoo heeshsho heeꞌra shotate yaa diꞌꞌikkino. Lawishshaho, 1967nni Puwerto Riko gobbara umiha daga dagiyyote gambooshshe assini yannara, loosu batiꞌrinoehura lowo geeshsha yaadoommo. Hatte yannara Yihowa Farciꞌraasinera albisa ikke loosanni noohu Naataani Noori Puwerto Riko dayino. Ani wole gobbanni dagganno misiyoonera hodhishsha qixxeessommoha ikkirono Isira kayinni hatto assoommokkiha lawinosi. Gedensaanni Isi coye qineessa hasiissannoeta kule kaajjishe amaalie hattono isi anera koffi yiinota kulie. Ani hakka wote isira tumo qoloommokkiha ikkirono, isi assoommore diassootto yiino daafira boode yanna geeshsha wodaniꞌyanni hanqoommo. Ikkollana wole yannara Makseninna Ani Roduu Noorinni xaandeenna isi ninke minisira woshshe sagale itisinonke.

Maateꞌya laꞌꞌate Puwerto Rikonni Ingilaande haammate hinge haꞌnoommo. Amaꞌyanna Ani halaale macciishshine adhinummo yannara anniꞌya diadhino. Ikkirono, roduuwu Beeteeletenni lallawo shiqishate dagganno wote, amaꞌya insa mininkera koyissanno. Anniꞌya kuri Beeteelete albisa ikkite soqqantannori umonsa heeshshi assitannore ikkitinota lae, effire giwanno gede assitinosi qeesootiwiinni horo baxxitinore ikkitinota huwatino. Yannate gedensaanni isi 1962nni cuuame Yihowa Farciꞌraasincho ikkino.

Muxxe galteꞌya Makseni 2011nni fooliishshidhino. Ani ise reyotenni kaꞌeenna galagale xaadeemmo yanna quqquxame agadhe noommo. Tini lowo geeshsha hagiidheemmo gede assitannoe! Makseninna Ani mitteenni soqqammummohu 58 diri giddo, Puwerto Riko gobbara 650 ikkitannoti Yihowa Farciꞌraasine lexxite 26,000 ikkitanna laꞌnoommo! Muli diro 2013nni Puwerto Rikota sinu biiro Yunayitidi Isteetisennite sinu biiro ledo mitte assinita, Ane Niwu Yorkete Wolkiili yinanniwa soqqamammora woshshinie. Puwerto Riko giddichora soqqamanni sayisoommoha 60 diro hedeemmo wote hatte gobbara ilame lophoommoha lawannoe. Kayinni hatte gobbanni agure fuloommo.

“MAGANU HAGIIDHE AANNOHA BAXANNO”

Beeteelete Maganoho soqqama xaano baxisannoe. Xa anera 90 diro sainoe; loosiꞌya Beeteelete maate towaatate. Wolkiili dawummonku 600 saꞌꞌanno manna towaatoommota kulloonnie. Anewa daanno manni giddo mitu uminsa hajora woy maatensara kaaꞌlitanno amaale xaꞌmiꞌranno. Wolu manni kayinni Beeteelete soqqanshonni hagiirre afiꞌra dandaanno gara kayise amaaꞌlannoe. Muli barra adhantinori kayinni adhamansa hagiirraame assiꞌrate kaaꞌlitanno amaale xaꞌmidhanno. Mito qanchoho hadhe soqqantanno gede assinoonni. Amaale xaꞌmiꞌrannoe manni yaannoere seekke macciishsheemmo, hattono hasiisannoha ikkiro togo yeemmonsa: “‘Maganu hagiidhe aannoha baxanno.’ Loosattohu Yihowara ikkino daafira uyinoonnihe looso baala hagiirrunni loosi.”—2 Qor. 9:7.

Beeteelete soqqanshonnino ikko wole soqqanshonni hagiirre afiꞌrate, loonsanni heeꞌnoommori hasiisannoha ikkinohu mayiraatiro heda hasiissannonke. Beeteelete loonseemmo loosi baalu qullaawa soqqanshooti. Kuni loosi “ammanaminohunna egennaamu [“wodanaamu,” NW] soqqamaanchi” alamete qooxeessira noohu roduuwu maamarira ayyaanaamittete sagale shiqishshanno gede irko ikkanno. (Mat. 24:45) Yihowara soqqammeemmowi ikkiwano ikkiro, iso guwisiꞌneemmo faro afiꞌneemmo. Konnira, “Maganu hagiidhe aannoha baxanno daafira” isi aannonke looso baala hagiirrunni loonso.