Culka Roorinore Hasiꞌri
Culka afidhe egennootto? Culka afiꞌrinohu shiima mannaatilla. Ikkirono, lowo miliyoone ikkanno manni culka roorinore afiꞌrino. Iseno Qullaawu Maxaafinni afiꞌnanni egennooti woy hayyooti; tenne hayyo “filu culkinni dianfanni.”—Iyo. 28:12, 15.
MITO widoonni laꞌniro Qullaawa Maxaafa xiinxallitannori culka hasiꞌranno manni gedeeti. Insa Qullaawa Borro giddo noota muxxe hayyo afiꞌrate woꞌmanka wote sharrama hasiissannonsa. Ninkeno Qullaawu Maxaafi rosaano ikkinoommohura, culka afiꞌnannite sase doogganni maa ronseemmo?
CULKA AFIꞌROOTTO!
Hanni lagu lasora hadhanni noottohu gede assite hedi; caricho lawannori aana arrishshote xawaabbi uweenna cala yaanna laitto. Hatti culka ikkitinota afittoti lowo geeshsha hagiidhitto. Tini culka, geeshsha kifiriitichu umo diꞌꞌikkitanno; ikkollana fila almaaze roore muxxete. Hakko qooxeessira wole culka afiꞌrate hasiꞌrattoti egennantinote.
Hatteente gede, mittu Yihowa soqqamaanchi Qullaawu Maxaafi giddo noo hexxo kulahera minikkira dayi barri qulli yaannoheha ikkara dandaanno. Mite yite ayyaanaamittete culka afiꞌritto yanna qaagatto wote beꞌro gede ikkite leeltannoheha ikkara dandaanno. Hatti yanna Qullaawu Maxaafi giddonni Maganu suꞌmi Yihowa ikkinota afitto yanna ikkitara dandiitanno. (Ful. 6:3 lekkaalliidi qaagiishsha) Woy qole tini yanna Yihowa jaala ikka dandaattota rositto yanna ikkitara dandiitanno. (Yai. 2:23) Hakkiinni culka roorinore afiꞌroottota huwatootto! Qoleno, wole ayyaanaamittete culka afiꞌrate hasiꞌra hanafattoha ikkara dandaanno.
LEDDE AFIꞌROOTTO!
Mito wote shiimmaadda culka lagaho heedhara dandiitanno. Tenne culka shaafaamu culka yinanni. Jawaatte culka hasidhannori, boodu agani giddo lowo kg ikkitannotanna lowo kume doolaare hirtannota culkate duuno afidhara dandiitanno.
Yihowa Farciꞌraasine ledo Qullaawa Maxaafa xiinxalla hanafitto yannara, atino duunantino culka afiꞌre hagiidhanno manchi gede hagiidhoottoha ikkara dandaanno. Qullaawu Maxaafita mitte mittenta qummeeshshuwa hiincakki egennokki lexxitanno gede assitino; tini qolte ayyaanaamittetenni dureessa ikkatto gede assitinohe. Muxxe ikkinoha konne Qullaawu Maxaafi halaale hiincakki, Yihowawa shiqanna hegere heeshsho afiꞌratto gede kaaꞌlannohehu Isi baxillinni fulittokkinni heeꞌra dandaatto gara afate kaaꞌlitinohe.—Yai. 4:8; Yih. 20, 21.
Culka hasiꞌranno manchi culka afiꞌrate sharramannonte gede, atino Qullaawu Maxaafiha muxxe ikkino halaale afiꞌrate sharrantanni nootto?
Culka hasiꞌranno manchi shaafaamu bushshi giddo duunantinota muxxe culka afiꞌrate hasiꞌrannonte gede, atino muxxe ayyaanaamittete jiro afiꞌrate jawaatte hasidhanni keeshshoottoha ikkara dandaanno. Xintunniha Qullaawu Maxaafi halaale rositto gedensaanni, umokki Yihowara sayisse aatenna cuuamate mito coye biddi assiꞌra hanafootto.—Mat. 28:19, 20.
HASIꞌRA AGURTOOTI!
Culka hasidhannori baatto dhookkeenna fultanno kinna giddo shiimmaadda culka afidhara dandiitanno. Tenne kinna giddo mite giddose siwiilla amadino kinchi noote; hakko kincho darre giddosinni culka fushsha dandiinanni. Iimi adda laꞌniro hakkonni siwiila giddosi amadino kinchi giddo noo culka illete leella hooggara dandiitanno. Mayira? Korkaatuno mitte toone ikkannohu shiilo amadinohu filu kinchi giddo 10 giraame calla ikkitanno culka heedhara dandiitanno! Ikkirono, shiilo hasiꞌranno manchira tini loworeeti.
Mittu manchi “Kiristoosi daafira uyinoonniha umi roso” calla ikkikkinni wole rosono rosate sharrama hasiissannosi. (Ibi. 6:1, 2) Qullaawa Maxaafa xiinxallatto yannara alba afoottokkire afatenna heeshshokkira kaaꞌlannohe roso afiꞌrate seekkite xiinxalla hasiissannohe. Qullaawa Borro lowo diro xiinxallitanni keeshshoottoha ikkirono, Qullaawu Maxaafi xiinxallokki woyyeessiꞌrate ma assa dandaatto?
Rosate quqquxama agurtooti. Mitto mittonka coye badde afate woꞌnaali. Tenne assittoro Qullaawa Borronni culka yaano, Maganu hayyonna biddishsha afiꞌratto. (Rom. 11:33) Qullaawa Borro egennokki lossiꞌrate ati coyiꞌratto afiinni qixxeessinoonnita addi addita xiinxallote kaaꞌlitanno borruwa dancha gede assite horoonsiꞌri. Hexxo mudhittokkinni hasiisannohe biddishshanna Qullaawu Maxaafi xaꞌmokkira dawaro afiꞌrate sharrami. Wole manna hiitti qummeeshshuwa woy birxichuwa kaaꞌlitinonsaronna jawaachishshinonsaro xaꞌmi. Maganu Qaale xiinxallite afiꞌroottota kaajja hedo wolu mannira kuli.
Tenne assattohu egenno lexxate calla diꞌꞌikkino. Soqqamaasinchu Phaawuloosi ‘egenno naaxxisiissannota’ kule qorowisiisino. (1 Qor. 8:1) Konni daafira, shooshanqenna jawaata ammana heedhannohe gede sharrami. Ganyite maatete magansiꞌra assiꞌrakkinna Qullaawu Maxaafita hojju xiinxallo xiinxallakki Yihowa seeri ledo sumuu yite heeꞌrattonna wole manna kaaꞌlatto gede kakkayissannohe. Baalunkunni roore, culka roorinore afiꞌrootto daafira lowo geeshsha hagiidhatto.—Law. 3:13, 14.