Ati Tenne Afootto?

Biꞌree waro giira bayichunni bayicho haaꞌne haꞌnannihu hiittoonniiti?

KALAQAMA 22:6 (NW) aana Abirihaami kakkalo shiqishate xeerto gobba haꞌri yannara, haꞌrate qixxaawino gara togo yine kulloonni: “Konnira Abirihaami shilqote kakkalo shiqishate horoonsiꞌnanni haqqe haare Yisihaaqira duhisiisi. Hakkiinnino isi anga giiranna billawa haaꞌreenna lamunku hadhu.”

Hundi yannara mannu giira ma garinni kayisiꞌrannoro Qullaawa Borro kultannori dino. Mittu fullahaanchi Abirihaaminna Yisihaaqi bubbanni noo giira xoꞌukkinni “seeda doogo haadhe haꞌra didandiitanno” yiino. Konni daafira, konni qummeeshshira kulloonniri giira kayisiꞌrate horoonsiꞌnanni uduunnicho ikkara dandaanno.

Wolootu kayinni hundi yannara giira kayisiꞌra shota ikkitinokkita coyidhanno. Hatte yannara mannu giira kayisiꞌrate woꞌnaalantenni dandaamannonsaha ikkiro olliichinsawiinni kashilo adhe giidha doodhanno. Konni daafira, lowo fullahaano Abirihaami giira adhe haꞌrino yinoonnihu bero gede hashsha giirroonni giira aaninni kashilo mitirira, lawishshaho xiltaame shaate gedeerichira wore kasaho sutaasincho gane rarraase adhe haꞌrinota kulate ikkara dandaanno yite heddanno. (Isa. 30:14) Konni garinni haaꞌne haꞌnanni kashilo horoonsiꞌne, seeda doogo haꞌnanni wote hasiꞌni yannara kashee woy qaxaware worre giira kayisa dandiinanni.