Danchumma Leellisha Abbitino Guma

HINDETE Gujaraati yinannihu shiimu katamira heeꞌrannohu Jooni yinanni beetti anni 1950 balla cuuame Yihowa Farciꞌraasincho ikkino. Jooninna ontu roduuwisi, hattono amansa Roomu Kaatoolike eannoreeti; konni daafira insa annansa ammaꞌnosinni kainohunni giwannosi.

Mitto barra Jooni anni songosira noohu mittu rodiira poosta massie yee soqqino. Hatte soodo Jooni mitte jawa siwiilu barimeelle fananni angicho mudhino. Ikkirono, isi annisira hajajama hasiꞌrino daafira, mundaanni noo angicho hoccunni usudhe rodooho poosta haaꞌre haꞌrino.

Jooni rodooho poosta massanno wote, poosta haadhinoti Yihowa Farciꞌraasincho ikkitino minaamasiiti. Ise Jooni angichi madiꞌrinota laꞌuti, mada hayishshite angicho hoccunni usurtusi. Hakkiinni ise Joonira shae gaffinosi, hattono isi ledo Qullaawu Maxaafi hasaawa hasaabbino.

Hatte yannanni kayise, Jooni Yihowa Farciꞌraasinera noosi lao biddi assiꞌra hanafino; isi annisi ammaꞌnonna isi ammaꞌno mereero noo badooshshire yaano, Yesuusi Maganohoronna teꞌee hattono Kiristaanu Maariyaami huucciꞌra hasiissanonsaronna teꞌee xaꞌminose. Ise Jooni coyiꞌrannoha Gujaraati Afoo rossino daafira Qullaawu Maxaafinni xaꞌmino xaꞌmora dawaro qoltusi; hakkiinni “Kuni Maganu Gashshootihu Danchu Duduwi” (Ingilizete Afoo) yitanno buukileete uyitusi.

Gedensaanni Jooni tenne buukileete nabbawi wote, Qullaawu Maxaafi halaale mite yee macciishshanni nooha lawinosi. Isi qeesichinsawa mare rodoo xaꞌmi xaꞌmo lede xaꞌmino. Hakkiinni qeesichu hanqe beleqe togo yiino: “Sheexaane! Hanni Qullaawu Maxaafi Yesuusi Magano diꞌꞌikkino yaannohu mamaatiro kulie. Maariyaami huucciꞌra dihasiissanno yaannohu mamaatiro leellishie. Leellishiewe yoommohe koo!” Jooni qeesichu ikkitonni lowo geeshsha mase, “Layinkita Kaatoolikete beetekiristaane lekkatenni nafa dikaxxeemmo” yiino. Isi yiinonte gede hakkira haꞌre diegennino!

Jooni Yihowa Farciꞌraasine ledo Qullaawa Maxaafa xiinxalla hanafe, Maganoho soqqama hanafino. Gedensaanni, maatensa miilla giddo batinyu Yihowa Farciꞌraasine ikkitino. Joonira mitu 60 diri albaanni mudhinohu angichu bassi xaa geeshsha dibaino. Isi halaalu magansiꞌrawa daanno gede assitinosita, mitte rodoo leellishshinosi danchumma dihawanno.—2 Qor. 6:4, 6.