YANNA SAꞌINOHONSO XAA YANNARANO KAAꞌLANNOHO?
SAYINSE
QULLAAWU MAXAAFI SAYINSETE MAXAAFA IKKA HOOGIRONO, SAYINSETE LEDO XAADOOSHSHE AFIꞌRINORE KULANNO WOTE SAYINSE XIINXALLITE AFFARA ALBAANNI BALAXE GARA IKKINORE KULANNO. HANNI MITO LAWISHSHA LAꞌNO.
Kalqete alamera kaimu no?
Alba sayinsete fullahaano ‘Kalqete alamera kaimu dino’ yite ammantanno. Xa kayinni roore sayinsete fullahaano kalqete alamera kaimu noota huwattino. Qullaawu Maxaafi kalqete alamera kaimu noota kulinohu hundaati.—Kalaqama 1:1.
Wayi doyicho
Hunda mannu wayi doyicho afikki keeshshino. Ikkollana Qullaawu Maxaafi lowo diri albaanni wayi doyichore kulino. Togo yaanno: “Wayi baalu lolahe baara eanno; baaruno horonta diwoꞌmanno. Wayi galagale fulino dargira higanno.”—Rosiisaancho 1:7.
Yanna saꞌanno wote xafarete bissa baꞌanno?
Shoolki sani K.A. heeꞌrinohu Giriikennihu sayinsete fullahaanchi Aristootili, yanna saꞌanno wote sholannori woy baꞌꞌannori baattote aana noore calla ikkinotanna beeddahe woꞌmitino gordi kayinni horo soorrammannokkita woy baꞌꞌannokkita rosiisino. Mannu konne roso lowo diro ammane keeshshino. Ikkollana 19ki sanira sayinsete fullahaano entirophii yinanni roso kalaqqino. Kuni rosi, xafarete bissano ikko baattote anna noori soorramannota woy baꞌꞌannota xawisannoho. Tenne hedo ammantannori sayinsete fullahaano giddo mittu Loordi Keelvinni yinannihu, Qullaawu Maxaafi iiminna uulla “uddanote gede akkaltanno” yaannota coyiꞌrino. (Faarso 102:25, 26) Keelvinni Maganu kuri coyibba baꞌꞌansanni kalaqamisino baꞌꞌannokki gede assa dandaannota kulino; Qullaawu Maxaafino tenne rosiisanno.—Rosiisaancho 1:4.
Baattonna wole pilaaneetta tuuqe amadinori maati?
Aristootili ‘Xafarete bissa hincilaallote gedee doyicho giddo no; mitte mittenti tiꞌi teꞌee doyissite heedhanno, baatto qolte giddoyidi kifilera no’ yee rosiisino. Ikkollana sayinsete fullahaano 18ki sani, K.A. beeddahenna pilaaneetta mitturino tuuqinori nookkiha rarraꞌe heedhannota buuxxino. Kalaqaanchu ‘baatto mulla darga rarraasinota’ 15ki sani K.A. Iyyoobi maxaafira borreessinoonni.—Iyyoobi 26:7.
HIKKIMINNA
QULLAAWU MAXAAFI HIKKIMINNU MAXAAFA IKKA HOOGIRONO, FAYYIMMANKE AGADHINEEMMO GARA KULANNO.
Xiwamino manni addinni heeꞌranno gede assa.
Muse Seeri dhiigu amadino manchi mannuwiinni baxxe heeꞌranno gede kulanno. Akimootu tenne huwattinohu 700 diri albaanni taraawanno dhibbi manna gawajji yannaraati; kuni biddishshi xaa yannarano kaaꞌlannoho.—Leewaawoota fooliishsho 13 nna 14.
Reeshsha kinsiro anga hayishshiꞌra.
Akimootu 19ki sani geeshsha reeshsha amaddino anga hayishshidhukkinni wole manna xagissanni keeshshitino. Tini lowo manni reyanno gede assitino. Muse seeri kayinni reeshsha kisino manchi battaawannota kulanno. Isinni hakko manchi keeraawate uduunnesinna bisosi hayishshiꞌra hasiissannosi. Kuni ammaꞌnote seeri fayyimma agadhate lowo geeshsha kaaꞌlino.—Kiiro 19:11, 19.
Ishine huna.
Diru kiiro onte xibbe kume saꞌꞌanno qaaqquulli deeu dhibbinni reyanno; kuri qaaqquulli giddo rooru reyannohu mullawa ofollinoonnite lowo shuma ledo xaadooshshe afiꞌrinorinniiti. Muse Seeri shumate mannu heeꞌrannowiinni xeertiꞌne ofollinanni gedenna shumate ofollini gedensaanni umme bushsha aanaho gannanni gede kulanno.—Marro 23:13.
Qaaqquulle barcinshiinshanni yanna.
Maganu Seeri labbaa qaaqqo ilamihunni settita barcinshiisha hasissannota kulanno. (Leewaawoota 12:3) Mittu muru qaaqqira bisosi murranni wote mundee rakke uurritannohu ilamihunni mitte lamala gedensaanni ikkinota buunxoonni. Xa noo gedee hikkiminni nookki yannara, labbaa qaaqqo mitte lamala ikkisi gedensaanni barcinshiinshanni gede kulannohu Qullaawu Maxaafi biddishshi qaaqquulleho lowo agarooshshe ikkino.
Surretenna ordu fayyimma mereero noo xaadooshshe.
Akimootunna sayinsete fullahaano hagiiru, hexxo, galatanna wolootaho gatona yaa ordu fayyimmara kaaꞌlitannota coyidhanno. Qullaawu Maxaafino togo yaanno: “Hagiirraamu wodani mannimmate fayyimma aanno; dadillaamu wodani kayinni mannimma maniissanno.”—Lawishsha 17:22.