Yihowa Shaqqille Leellishinonke

Daniyeeli busule ikkitinohura, “Polise kawira daggino daafira, insara bilbila dihasiissanno!” yite hashaashshe kultue. Ninke hakkira eꞌne keeshshinummokki mittu makeeni daye hoteelete albaanni uurre no. Shiimu daqiiqi gedensaanni lamenka polise amadde usurtunke. Ikkollana Daniyeeli balaxxe qorowisiissinoe daafira, boode sanade wolu rodiira oyeemmo faro afiꞌroommo.

Polisete xaawa haaꞌne haꞌnanni heeꞌneennanke, togoota worbanna Yihowa baxxanno minaama afiꞌraꞌyanni maassamoommo yaanni hedoommo. Aninna Daniyeeli mimmitoho irko ikkinoommo tunceenyi giddo mittu konneeti. Hanni loosonke agamboonni gobbuwa towaata hanafoommohu mayiraatiro kuleemmoꞌne.

YIHOWA HALAALE ROSEEMMO GEDE BAXILLUNNI KAAꞌLINOE

Ilamoommohu 1930nni aliyye Faransayera Kiriwa yinannihu shiimu katamiraati. Maateꞌya Kaatoolikete ammaꞌno harunsitannoreeti. Lamalate kiiro Qurbaane haꞌneemmo; anniꞌya beetekiristaanete assoote ganye assanno. Ikkollana 14 diro ikkieta beetekiristaane lawisiisaancho ikkitinota wodancheemmo gede assannori kalaqami.

Layinkihu alamete oli yannara Faransaye Jarmanete olanto anga ubbino. Beetekiristaanenke qeesichi Naazi kaaꞌlaancho ikkinohu Viishi gashshoote irkinseemmo gede ganye jawaachishinonke. Isi coyiꞌranno coyi lowo geeshsha waajjishinonke. Faransayete heeꞌrannohu batinyu manni gede ninkeno BBC yinannihu raadoonete xaawi widoonni buusantino gobbuwa olantanno oli daafira kultanno odoo maaxamme macciishshineemmo. Hakkiinni qeesichinke hedeweelcho hedosi soorre buusantino gobbuwa Naazi gashshoote qeeltino daafira, Wocawaaro 1944nni tenne qeelle irkisate galatu qixxaawo qixxeessinanni gede assi. Tini lowo geeshsha masissinoe. Hattono hakkuyi gedensaanni qeesete nooe ammana baꞌanni hadhino.

Olu uurrihunni shiima yanna gedensaanni anniꞌya fooliishshiꞌri. Hatte yannara bayira rodooꞌya minaannise ledo Beeljiyemete heedhanno; konnira amaꞌya towaateemmohu aneeti. Mittu hoccu faabirikira qaxarame loosa hanafummo. Loosiisannoe manchinna labballu oososi Kaatoolikete ammaꞌnonsara laalaattannoreeti. Faabiriku giddo lowo deerra iillate tunceenyi nooeha ikkirono, shiima yanna gedensaanni fonqolo ikkannoeri kalaqami.

Rodooꞌya Simooni 1953nni laꞌankera daggu; hatte yannara ise Yihowa Farciꞌraasinchooti. Ise Kaatoolike ‘Sioole giirammanni bayichooti, Maganu Sillaaseeti; lubbo direyitanno’ yite rosiissanno rosi kapho ikkinota Qullaawa Maxaafase horoonsidhe seekkite xawissue. Umi qara nabbabbinoehu Kaatolike qixxeessitino Qullaawu Maxaafinni ikkinokkita kule heewisamummo; shiima yanna gedensaanni kayinni coyidhinori halaale ikkinota ammanummo. Gedensoonni ise alba fultinota Agarooshshu Shae metseete abbiteennae hashsha hashsha kifileꞌyara ofolle seekke nabbaweemmo. Halaale afiꞌroommota shiima yanna giddo wodanchoommo; ikkollana Yihowa Farciꞌraasincho ikkoommota kulummoro loosoꞌya hoogeemmo yee waajjoommo.

Boodu agani geeshsha Qullaawa Maxaafanna Agarooshshu Shae hojjiꞌya xiinxalloommo. Gedensoonni kayinni Gambooshshu Addaraashe haꞌrate murciꞌrummo. Songonniwa laoommo baxilli wodanaꞌya kakkayisino. Mittu gikki yiino rodii ledo lee agana Qullaawa Maxaafa xiinxallummo gedensaanni Wocawaaro 1954nni cuuamummo. Shiima yanna gedensaanni amaꞌyanna maaꞌne rodooꞌya Yihowa Farciꞌraasine ikkansanni tashshi yiinoe.

WOꞌMA YANNA SOQQANSHO SOQQAMMANNI YIHOWA ADDAXXINOOMMO

Niyu Yorkete 1958nni assinoonniha daga dagiyyote gambooshshe haꞌrate qoosso afiꞌroommo; gambooshshe assinara boode lamala gatte heedheenna amaꞌya fooliishshidhu. Gambooshshuwiinni higummo gedensaanni maatete qeechi nooekki daafira looso agure suwisaancho ikkummo. Daniyeeli Deelii yinannita worba suwisaancho adhate coyiꞌramoommohu hatte yannaraati; hakkiinni Onkoleessa 1959nni Daniyeeli ledo adhammummo.

Daniyeeli woꞌma yanna soqqansho hanaffinohu maatese heedhannowiinni xeertowa noohu Biritaani yinannihu gaxarete qooxeessiraati. Kaatoolikete ammaꞌno harunsanno manni batiꞌrinohu hakko qooxeessira sabbakatenna biskilliiteteni gaxare haꞌrate worbimma hasiissinose. Anente gede iseno diinaggaabbe sabbakkanno; korkaatuno hatte yannara lamunku goofimarchu lowo geeshsha gambisino yine hendeemmo. (Mat. 25:13) Daniyeeli umise horo agurtannota ikkase, woꞌma yanna soqqansho giddo kaajjineemmo gede kaaꞌlitinonke.

Adhammummohunni boode lamala gedensaanni woradu looso loonseemmo gede koyinsinke. Konne looso loonseemmo yannara heeshshonke bikkunnita assiꞌra hasiissinonke. Umo towaantoommo songo 14 halashshaano noote; roduuwu ninke minensa wosinsate wolqa diassitannonsa. Konnira Gambooshshu Addaraashera madirakete firaashe kadhine gonxeemmo. Gonxeemmowi injiinoha diꞌꞌikkino; ikkirono hallinkera lowo geeshsha danchaho!

Woradu looso loonseemmo yannara loosu batiꞌrinonkeha ikkirono, Daniyeelira tenne ledo sumuu yee heeꞌra diqarrissinose. Mito woyite cimeeyyete ledo hedeweelcho gambooshshu heeꞌrannonke; tenne yannara Daniyeeli shiimu makeeninke giddo ofolte agartannoe. Ikkollana ise mitte higgeno koffi yite diegentino. Woradu looso lame diro calla loonsoommo; hakkonni lamunku diri giddo kayinni minaanninna minaama mimmitu ledo giddonsata fane hasaawanna buusame loosa hasiissanonsata wodanchinoommo.—Ros. 4:9.

HAARO SOQQANSHOTE QOOSSO

Niyu Yorkete noohu Giliyaadi Rosi Mine 37^ki kifile eꞌne tonne agana ronseemmo gede 1962nni koyinsinke. Hakko rosi minira koyisantinote 100 rosaano giddo 13 adhantinoreeti; aninna Daniyeeli insa ledo rosate qoosso afiꞌrankenni tashshi yiinonke. Kaajjado ammana noonsa roduuwi lawishshaho, Firederiki Firaanzi, Yuliisisi Gilaasinna Aleksaanderi Maakimilaani ledo sayinsoommo yanna xaano dihawoommo.

Qajeelshu yannara rosiisaanonke mittoricho xiinxalle laꞌꞌate dandoonke lossiꞌneemmo gede jawaachishshinonke. Saꞌne saꞌne Qidaame barra roso gundummo gedensaanni Niyu Yorkete katamira doyinanni mito bayicho daaꞌꞌanteemmo; tini qajeelshu kifileeti. Hakkiinni daaꞌꞌantanni laꞌnoommore Sanyote barra borreessine shiqinsheemmo. Duucha woyite Qidaamete hawarro minira hingeemmo woyite daafursannonke. Ikkollana Beeteelete soqqamannohu daaꞌꞌachishannonke rodii borrote fonqolira kaaꞌlitannota qara hedo qaangeemmo gede killasu xaꞌmo xaꞌmannonke. Mitte Qidaame barra katama lekkatenni haꞌne daaꞌꞌantanni honsummo. Hakko barra mitto xafarete xiinxallo xaawa daaꞌꞌantanni kaattanno beeddahenna (Miitiyoorsi) xafaretenni uullara ubbanno coyibba (Miitiyoorayitisi) daafira ronsoommo. Ameerikunnite Kalaqamu Xaggeha Donu Mine daaꞌꞌantanni babbaxxino naachi daafira ronsoommo. Beeteele hingummota daaꞌꞌachishannonke rodii, ‘Miitiyoorsinna Miitiyoorayitisi badooshshi maati?’ yee xaꞌminke. Daniyeeli lowo geeshsha daafurtino daafira, “Miitiyoorayitisi jajjabba hinko noonsareeti” yite qoltino.

Qajeelle kaꞌnummo gedensaanni Faransayennite sinu biirora soqqammeemmo gede sonkinketa dhagge assiꞌnoommo; hakkiicho 53 saꞌꞌanno diro soqqammoommo. Hakkiinni 1976nni Sinu Biiro qineessaancho ikke shoomamummo; qoleno Afirikahonna Mereerimi Iisiyira sabbakate loosonke hoolloonni woy agamboonni gobbuwa towaateemmo gede koyinsoonnie. Gaabooni haꞌnoommohunna hanafote kulummoꞌneri iillinonkehu hatte yannaraati. Noore coyiꞌrate, uyinoonnieta hedoommokki qoosso adhate ikkado ikkoommo yee hede diegennoommo. Daniyeeli kayinni uyinannie looso baala loosa dandeemmo gede kaaꞌlitinoe.

BUUTOTE FONQOLI IILLINKE

Beeteelete soqqama hananfummo yannanni kayise, hakko heeꞌnanni heeshsho lowo geeshsha banxoommo. Daniyeeli Giliyaadi haꞌnammora albaanni onte agana Ingilizete Afoo rossino daafira tirote loosinni fushshidhinota ikkitu. Beeteelete loosi harshammo afiꞌneemmo gede assinonke; songonkera soqqammeemmo soqqansho qolte hagiirrinke ero ikkanno gede assitino. Aninna Daniyeeli ayyaanaamittetenni lophitanni noota Qullaawu Maxaafi xiinxallo xiinxallinsummo gedensaanni, Paariisi katamira baattote giddoonni hige haꞌranno baabura giddine, minira hingeemmo; hatte yannara daafursannonkeha ikkirono hagiirru macciishshamannonke. Xaa geeshsha hattenne yanna dihaweemmo. Dadillisanno coyi kayinni, Daniyeeli hedeweelchu dhibbi amadinose daafira hasidhino geeshsha soqqama didandiitino.

Daniyeelira 1993nni unuunu kaansere nooseta anfummo. Ise biso dadhanna keemoterappiyi yinanni hikkiminna akkaꞌma hasiissinose daafira baasa qarrantino. Tonaa ontu diri gedensaanni wirro kaansere amadinose; tini kaansere albittenni roore dhibbinose. Ikkollana ise tirote looso baasa baxxanno daafira, woyya afidhanno woyite konne looso loossanno.

Daniyeeli dhiwanni waadinoseha ikkirono, mitto barrano Beeteeletenni fulate hende diegenninoommo. Ikkollana fayyimmate qarri heeꞌreenna Beeteelete soqqama shota diꞌꞌikkitino; hakko iso wolootu iillinonke qarra wodancha hoogguro tini roore qarrissanno. (Law. 14:13) Daniyeeli 70 diri balla ikke heeꞌreennase nafa xumanna hisataame ikkitino daafira, xiwantinota dilabbanno. Ise iillinose qarra heddanni yaada agurte, woloota kaaꞌlate aana illachishshanno. Mitiiꞌmino manni hasaaphanna seekke macciishsha lowo geeshsha kaaꞌlitannonsata affino. (Law. 17:17) Daniyeeli iseneeto amaalaanchote gede assite laꞌannokkiha ikkirono, kaansere amaddinonsari batinyu meya roduuwi waajjannokki gede umise woꞌnaalsha kulte jawaachishshannonsa.

Konni albaanni iille egenninonkekki fonqoli iillinonke. Daniyeeli fayyimmasenni kainohunni woꞌma yanna looso loosa agurtu yannara ane babbaxxitino doogonni kaaꞌlitinoe. Ise ane irkisate duuchare assitino; konnira 37 diro Sinu Biiro Komite qineessaancho ikke soqqama dandoommo. Lawishshaho ise barru baala barri sagale mine mitteenni inteemmonna yanna sayinseemmo gede mito coye qixxeessitanno.—Law. 18:22.

“MITTU MITTUNKU BARRIRA UMISI QARRI” NOOSI

Daniyeeli hexxo dimudhitanno, hattono heeshshotenni heeꞌra hasidhanno. Yannate gedensaanni Daniyeeli sayikkimeeshsho kaansere amadduse. Hatte yannara wolqa baꞌnoommo. Daniyeeli yannate kiiro akkaꞌmitannohu keemoterappiyinna radiyoterappiyi yinanni hikkiminni wolqase gudino daafira mito woyite qaafa nafa didandiitanno. Tirote loosira worba ikkitinoti muxxe minaamaꞌya coyidhe fushshiꞌra hoogginota laꞌꞌaꞌya, baasa xissiissinoe.

Dhuka hoongoommohu gede ikke macciishshaminkerono, Yihowa wolqankera aleenni ikkino qarri iillankera fajjannokkita anfoommo daafira jaante huucciꞌneemmo. (1 Qor. 10:13) Yihowa Qaalisi, Beeteelete noote hikkiminnu kifile, hattono ayyaanaamittete maate widoonni towaatannonke towaanyo woꞌmante yannara naandeemmota leellishate sharrammeemmo.

Hiittenne hikkiminnu ogimma horoonsiꞌra hasiissannonkero huwanteemmo gede kaaꞌlankera Yihowa huucciꞌneemmo. Mitto hikkiminna nafa afiꞌra hoongoommo woyiti no. Daniyeeli 23 diro woꞌma kaaꞌlanni keeshshino akimichi ise keemoterappiyinna radiyoterappiyi yinanni hikkiminna adhitu gedensaanni dammitannohu mayiraatiro gurchaawinosi. Isi konni bayicho wole hikkiminna kulankera didandiino. Hatte yannara kaaꞌlannonkehu noonkekkihunna daannore sammi yine agadha agurranna wole doogo noonkekkihu gede ikke macciishshaminonke. Hakkiinni wolu kaanserete akimichi Daniyeeli xagisate sumuu yii. Hatte yannara Yihowa yaaddonke qeela dandiineemmo gede doogo qixxeessinonkehu gedeeti.

Gaꞌara yaada hooganke iillinonke qarra dandee heeꞌrate kaaꞌlitinonke. Yesuusi yiinonte gede “mittu mittunku barrira umisi qarri” noosi. (Mat. 6:34) Gara ikkitino lao heedhannonke gede assiꞌranna iillinonke qarra kayinse haariimankeno kaaꞌlitinonke. Lawishshaho Daniyeeli keemoterappiyi yinanni hikkiminna adhitukki lame agana keeshshituti, “Albinni roore beya afiꞌrumma afitto!” yitanni haariintanno. (Law. 17:22) Daniyeeli dhiwanni waadannoseha ikkirono, haaro Maganu Mangiste faarso huurose naggi assite faarsitanni rosiisiꞌra baxxanno.

Daniyeeli hexxo mudha hoogase, anino laanfeꞌya qeeleemmo gede kaaꞌlitinoe. Halaale coyiꞌrate, isenna ani adhamme keeshshinummohu 57 diri giddo hasiisannoeha babbaxxino coye wonshitannoeti iseeti. Wole agurina ise quuphe raisammora nafa difajjitannoe! Konnira dhibbu minira qoliseta, uduunne hayishshanna sagale qisha rosa hasiissinoe. Hatte yannara boode birciqquwa hiiqqoommoha ikkirono, ise hagiirsiisannore loosa tashshi assitannoe.a

YIHOWA BAGAMANNOKKI BAXILLE LEELLISHINOE DAAFIRA GALAXXEEMMOSI

Albita qaageemmo woyite, dhibbunna geedhimma abbitinonke qarrinni lowore rosoommo. Umihunni, loosu batinyinni galtenkera baxille leellinsheemmo yanna hoongeemmokki gede qoropha hasiissannonke. Dhukunna fayyimma noonke yannara, banxeemmo manna towaaxxa hasiissannonke. (Ros. 9:9) Layinkihunni, garire ikkinokkirira quwa saꞌne yaada dihasiissannonke; hakkuyi kaꞌa barru baala afiꞌneemmo atooti goꞌlankera dandaanno.—Law. 15:15.

Woꞌma yanna soqqansho giddo sayinsoommo yanna hedeemmo woyite, Yihowa hendoommohunni aleenni maassiꞌrinonketa dihuluullameemmo. Faarsaasinchu gede anino “Kaaliiqi danchare assinoe” yee coyiꞌra dandeemmo.—Far. 116:7.