Baxillu Gimbanninketa Dandiine Saꞌneemmo Gede Kaaꞌlannonke

1. Maatewoosi 24:9 kultanno garinni, mannu giwinkero tini dhagge ikkitannonkekkihu mayiraati?

YIHOWA, manna banxeemmonna wolootuno baxxankera hasiꞌneemmo gede asse kalaqinonke. Hakko daafira mittu manchi giwannonke woyite xissiisiꞌnammora, wole agurina waajjinammora nafa dandiineemmo. Lawishshaho, Awuroppaho heedhannoti Joorjiina yinanni rodoo togo yitino: “Tonaashoolu diriti heeꞌreenna amaꞌya Yihowa Farciꞌraasincho ikkoomma daafira gibbinoe. Callatoommahanna busha beetto ikkoommaha lawinoe.”b Daaneelo yinanni rodii togo yee borreessino: “Polise Yihowa Farciꞌraasincho ikkoommohura gantueta, xontuetanna waajjishiishshueta lowo geeshsha masoommo hattono saaloommo.” Mannu giwannonke woyite xissiissiꞌneemmoha ikkirono tini dhagge diꞌꞌikkitannonke. Yesuusi mannu giwannonketa balaxe kulino.—Maatewoosi 24:9 nabbawi.

2-3. Yesuusi harunsaano gimbanninsahu mayiraati?

² Alame Yesuusi harunsaano gibbanno. Mayira? Korkaatuno Yesuusi gede ninkeno tenne alame wido diꞌꞌikkinoommo. (Yoh. 15:17-19) Mannu gashshoote ayirrinseemmoha ikkirono poletikaho anga diwodhineemmo, baandiira keere dihaaꞌneemmo hattono gobbate faarso difaarsineemmo. Yihowa calla magansiꞌneemmo. Mannu ooso gashshate qoosso noosihu Magano ikkinota ammanneemmo; Sheexaanunna ‘sirchisi’ kayinni tenne feexidhe gibbanno. (Kal. 3:1-5, 15) Mannu ooso qarra tirtannoti Maganu Mangiste calla ikkitinota sabbankeemmo; hattono tini Mangiste muli yanna giddo Magano gibbannore baala huntannota kulleemmo. (Dan. 2:44; Aju. 19:19-21) Tini sokka jooguulleho dancha duduwooti; bushuulleho kayinni busha duduwooti.—Far. 37:10, 11.

³ Maganunniha keeraancho seera harunsineemmo daafirano mannu giwannonke. Kuni seeri alamennite mancaꞌꞌa ikkito ledo horo dixaadannoho. Lawishshaho, xaa yannara batinyu manni lowo geeshsha mancaꞌꞌa coye gara ikkinori gede asse laꞌꞌanno; Maganu Soddoomunna Gomooru manna huninohu hattoore assino daafiraati. (Yih. 7) Ninke tenne lainohunni Qullaawu Maxaafi biddishsha harunsineemmo daafira batinyu manni qacifatannonke hattono quwa saꞌnoommohu gede asse laꞌꞌannonke.—1 Phe. 4:3, 4.

4. Mannu giwannonke woyite jawaanteemmo gede kaaꞌlitannonketi hiikkuri akattaati?

⁴ Mannu giwannonketanna xonannonketa dandiine saꞌneemmo gede kaaꞌlannonkeri maati? Yihowa kaaꞌlannonketa seekkine ammana hasiissannonke. Wonqote gede ammananke, “giirate gede wala yaannoha bushu koottalo baala hunate” kaaꞌlitannonke. (Efe. 6:16) Ikkirono ammanatenni roore hasiisannonkeri no. Baxillu hasiisannonke. Mayira? Korkaatuno “baxillu dicaaccaawanno.” Hattono xissiisannore baala cince saꞌꞌanno. (1 Qor. 13:4-7, 13) Hanni xa Yihowa, ammanate roduuwankenna giwannonke manna nafa baxa gimbanninketa dandiine saꞌneemmo gede kaaꞌlitannonke gara laꞌno.

YIHOWA BAXA MANNU GIWANNONKETA DANDIINE SAꞌNEEMMO GEDE KAAꞌLITANNONKE

5. Yesuusi Annasi baxasi jawaante ikkitinosihu hiittoonniiti?

⁵ Yesuusi gaꞌa gede shinasira heeꞌneenna, hashsha ammanantino harunsaanosira togo yiino: “Annaꞌya baxeemmo [daafira] . . . Anniꞌya hajajinoere baala wonsheemmo.” (Yoh. 14:31) Yesuusi Yihowa baxasi iillasira noo fonqolo dandee saꞌꞌanno gede jawaante ikkitinosi. Ninkeno Yihowa baxanke hatto assineemmo gede kaaꞌlitannonke.

6. Roomu Sokka 5:3-5 kultanno garinni, alame gibbannonsa woyite Yihowa soqqamaanora mayi macciishshamannonsa?

⁶ Yihowa soqqamaano iso baxansa dartu iillannonsa woyite dandiite saꞌanno gede kaaꞌlitannonsa. Lawishshaho, Ayihudennihu wolqaataamu aliidi yoo mini soqqamaasine sabbaka agurtanno gede hajajinsata, insa Magano baxxanno daafira “Mannaho hajajamantenni Maganoho hajajama hasiissannonke” yitino. (Soq. 5:29; 1 Yoh. 5:3) Xaa yannarano batinye Maganu soqqamaano iso lubbora baxansa kaajjadunna wolqaataamu gashshooti miicannonsata dandiite heedhanno gede kaaꞌlitannonsa. Alame gibbannonke woyite hexxo mudhantenni hagiidhineemmo.—Soq. 5:41; Roomu Sokka 5:3-5 nabbawi.

7. Mininke manni giwannonke woyite ma assa hasiissannonke?

⁷ Mininke manni giwannonke woyite tini roore qarra ikkitankera dandiitanno. Yihowa daafira rosa hananfeemmo woyite mininke manni giddonni mitoho soꞌnoommoha lawansara dandaanno. Wolootaho kayinni wodana fayyinoommokkiha lawansara dandaanno. (Maarqoosi 3:21 ledo heewisiisi.) Insa beebba assidhankera dandiitanno. Tini haaro coye diꞌꞌikkitannonke. Yesuusi “Mannaho umisi mini manni diina ikkanno” yiino. (Mat. 10:36) Fiixinke baxire assirono ninke insa diinnanke gede assine dilaꞌneemmo. Yihowa lowo geeshsha banxummo kiiro mannano albinni roore banxeemmo. (Mat. 22:37-39) Ikkollana manna hagiirsiisate yine Qullaawu Maxaafi seeranna biddishsha horo didiingeemmo.

8-9. Mitte rodoo lowo geeshsha gimbiserono tenne dandiite saꞌanno gede kaaꞌlinoseri maati?

⁸ Aleenni kulliti Joorjiina amase lowo geeshsha gibbuserono ammanante heedhino. Ise togo yitino: “Amaꞌyanna ani Yihowa Farciꞌraasine ledo Qullaawa Maxaafa xiinxalla hananfoommo. Lewu agani gedensaanni kayinni, gambooshshe haꞌra hasiꞌreemma yuummata amaꞌya wole ikkitue. Ise kaadaasinete borro nabbabbannotanna insa yitannore kayisse ane ledo heewisantannota wodanchoomma. Ise xontannoe, umo amadde goshooshshannoe, qalxite amaddannoe hattono borroꞌya fushshite olloltanno. Tonaaonte diro ikkieta cuuamumma. Amaꞌya Yihowara soqqameemmata hoolate finqilino seenne worranniwa massitue; hakko heeꞌranno seenni giddo mitu jingilli assitanno xagga adhannoreetinna jaddo loosannoreeti. Woleteemmero ninke baxanna towaata hasiissannosi manchi giwannonke woyite tini roore xissiissannonke.”

⁹ Ikkina Joorjiina tenne dandiite saꞌinohu hiittoonniiti? Ise togo yitino: “Amaꞌya waada hanaffinoehu Qullaawa Maxaafa nabbawe gudumma barraati. Rosoommari halaale ikkinota buuxoomma; qoleno Yihowawa shiqoomma. Iso ganye huucciꞌreemma; isino huuccattoꞌya macciishshinoe. Finqilino seenni heeꞌranno mine noomma yannara mitte rodoo minese koyisseennae Qullaawa Maxaafa mitteenni xiinxallineemmo. Hatte yannara roduuwu lowo geeshsha jawaachishshinoe. Insa mininsa manni gede assidhinoe. Giwannonkehu ayeno ikkiro, Yihowa insanni roore wolqaataamo ikkinota huwatoomma.”

10. Yihowa woꞌmanka woyite ma assannonketa addaxxa dandiineemmo?

¹⁰ Soqqamaasinchu Phaawuloosi, “Mootichinke Kiristoosi Yesuusi widoonni afiꞌnoommohu Maganu baxilliwiinni badankera dandaannori nookkita” borreessino. (Rom. 8:38, 39) Yannate geeshsha qarrammummoro nafa, Yihowa woꞌmanka woyite ledonke ikke sheshifachishannonkenna jawaachishannonke. Joorjiina woꞌnaalshi Yihowa ayyaanaamittete maatenke widoonnino kaaꞌlannonketa leellishanno.

AMMANATE RODUUWANKE BAXA GIMBANNINKETA DANDIINE SAꞌNEEMMO GEDE KAAꞌLITANNONKE

11. Yesuusi Yohaannisi 15:12, 13 kulino baxilli rosaanosi kaaꞌlinonsahu hiittoonniiti? Lawishsha kuli.

¹¹ Yesuusi gaꞌa gede reyara hashsha rosaanosi mimmitu ledo baxantanno gede qaagiissinonsa. (Yohaannisi 15:12, 13 nabbawi.) Isi rosaanosi mimmito uminsa gede assite baxansa mittimma heedhannonsa gedenna mannu giwannonsata dandiite saꞌanno gede kaaꞌlitannonsata afino. Hanni Teselonqe heedhanno songo lawishsha laꞌno. Hatti songo xintantu yannanni kayise hatte songo Kiristaani dartu iillannansa heeꞌrino. Ikkirono kuni Kiristaani ammaname heeꞌrenna baxille leellishe dancha lawishsha ikkino. (1 Tes. 1:3, 6, 7) Phaawuloosi insa mimmito ‘hakkiinni roorsite baxxanno gede’ jawaachishinonsa. (1 Tes. 4:9, 10 ) Baxillu yaaddinore sheshifachishshanno gedenna dhuku ajinonsare irkissanno gede assinonsa. (1 Tes. 5:14) Insa Phaawuloosi amaalinonsa amaale harunsitino; isi mittu diri gedensaanni borreessinote layinki sokkara, “Mimmitiꞌnera nooꞌne baxillino lexxanni no” yiinonsa. (2 Tes. 1:3-5) Baxillu qarranna mannu giwannonsata dandiite saꞌanno gede assinonsa.

12. Mitte gobbara olu kaita roduuwu mimmitoho baxille leellishshinohu hiittoonniiti?

¹² Hanni aleenni kullihu Daaneelonna minaamasi lawishsha laꞌno. Heedhanno katamira olu kaita insa gambooshshe haꞌranna dandiitu deerrinni sabbaka diagurtino; hattono afidhino sagale ammanate roduuwinsa ledo beeqqitino. Mitto barra Daaneelo massaara qodhitino olanto dagge amaddinosi. Isi togo yiino: “Insa ammanaꞌya kaadeemmo gede giddeessitinoe. Giwummota kayinni gantinoe hattono massaara albiꞌyara leenqissanninna ale qolte gantanni waajjishiishshinoe. Insa wole woyite dagguro galteꞌya seyattannota kulte waajjishiishshe hadhino. Ikkollana roduuwu rakke baaburunni wole katama haadhe hadhinonke. Kuri muxxe roduuwi leellishshinoe baxille horo dihaweemmo. Marroommo katamira roduuwu sagale uyitinonke hattono loosonna galleemmowa afiꞌneemmo gede kaaꞌlitinonke. Ninkeno ola xooqqe daggino ruduuwira hasiisannonsare assine kaaꞌla dandiinoommo.” Kuni woꞌnaalshi baxillu mannu giwannonketa dandiine saꞌneemmo gede kaaꞌlannonketa leellishanno.

DIINNANKE BAXANKE GIMBANNINKETA DANDIINE SAꞌNEEMMO GEDE KAAꞌLITANNONKE

13. Mannu giwinkero nafa qullaawu ayyaani Yihowara ammanamme soqqammeemmo gede kaaꞌlannonkehu hiittoonniiti?

¹³ Yesuusi harunsaanosi baarigaaransa baxxanno gede kulinonsa. (Mat. 5:44, 45) Hatto assa shota coye ikkitinoni? Diꞌꞌikkitino! Maganunnihu qullaawu ayyaani kaaꞌlonni kayi baarigaaranke baxa dandiineemmo. Baxillu, cinca, danchumma, joongillunna meessanaa qeeꞌla Maganunnihu qullaawu ayyaani laalo widooti. (Gal. 5:22, 23) Kuri akatta gimbanninketa dandiine saꞌneemmo gede kaaꞌlitannonke. Batinyu giwannonke manni Yihowa Farciꞌraasincho ikkino minaanni, minaama, ooso woy wolu roduuwi kuri akatta leellishshinohura ninke giwa agurtino. Lowohu giwannonke manni isinni roduuwanke ikkino. Yihowa Farciꞌraasincho ikkootto daafira giwannohe manna baxa qarra ikkitinoheha ikkiro, qullaawa ayyaana afiꞌrate huuccatto assiꞌri. (Luq. 11:13) Yihowara hajajamittoro woꞌmanka woyite seyannoheta addaxxi.—Law. 3:5-7.

14-15. Minaannise beebba assiꞌriserono Roomu Sokka 12:17-21 Yaasimiini baxille leellishshanno gede kaaꞌlitinosehu hiittoonniiti?

¹⁴ Hanni Yaasimiini yinanni rodoo lawishsha laꞌno. Ise Yihowa Farciꞌraasincho ikkituta minaannisera dogantinoha lawinosi daafira Maganoho soqqantannota hoolate woꞌnaalino. Isi xoninose hattono fiixu, ammaꞌnote murrootinna kiilaano ise waajjishiishshanno gedenna maate diigganni no yite ise busha assitanno gede kakkayisino. Minaannise songote gambooshshiwa mare roduuwaho nafa boolaqiꞌrino. Yaasimiini beebba assiꞌnoonnise daafira woꞌma woye wiꞌlitanno.

¹⁵ Yaasimiini ammanate roduuwise sheshifachishshinose hattono jawaachishshinose. Songote cimeeyye Roomu Sokka 12:17-21 noo amaale loosunni leellishshanno gede jawaachishshinose. (Qummeeshsha nabbawi.) Yaasimiini togo yitino: “Tini shota diꞌꞌikkitinoe. Kayinni Yihowa kaaꞌlannoe gede huucciꞌre Qullaawu Maxaafi amaale harunsate danduummare baala assoomma. Minaanniꞌya ane caacceessate yee sagale qishiꞌreemmawa ishinshanno woyite ani kayinni feyemma. Xonannoe woyite shaqillunni qoleemma. Dhiwamitano towaatoommasi.”

16-17. Yaasimiini woꞌnaalshinni maa rosootto?

¹⁶ Yaasimiini minaannisera baxille leellishase kiissinose. Ise togo yitino: “Minaanniꞌya woꞌmanka woyite halaale coyiꞌreemmata afino daafira albinni roore ammaninoe. Isi ammaꞌnote daafira kayinse hasaambeemmo woyite seekke macciishshannoe hattono minenke keeru nooha assiꞌneemmo gede sumuu yiino. Isi xa gambooshshe haꞌreemma gede jawaachishannoe. Maatenke heeshsho lowo geeshsha woyyaabbino hattono minenke keeru woꞌmino. Minaanniꞌya halaale macciishsharanna ane ledo Yihowara soqqamara halcheemma.”

¹⁷ Yaasimiini woꞌnaalshi ‘baxillu baalankare cincannota, baalanka hexxannotanna dargasi agurannokkita’ leellishanno. (1 Qor. 13:4, 7) Mannu giwannonke woyite lowo geeshsha xissiisiꞌnammora dandiineemmo; baxillu kayinni tenne baala qeelanno. Baxillu mannu wodana shaqqishanno. Qoleno baxille leellinsheemmo woyite Yihowa hagiidhanno. Ikkollana mannu ninke giwa agura hooginkero nafa hagiirraamma ikka dandiineemmo. Hiittoonni?

GIMBINKERONO HAGIIRRAAMMA IKKA DANDIINEEMMO

18. Gimbanninke woyite hagiirraamma ikka dandiineemmohu mayiraati?

¹⁸ Yesuusi “Mannu giwiꞌnero,  . . . baꞌraadhinoonnireeti” yiino. (Luq. 6:22) Mannu giwankera dihasiꞌneemmo. Ammanankera yine reyano dihalchineemmo. Ikkina gimbanninke woyite hagiirraamma ikkineemmohu mayiraati? Umihunni, cincine saꞌneemmo woyite Yihowa hagiirsiinseemmo. (1 Phe. 4:13, 14) Layinkihunni, ammananke fonqolante kaajjado ikkitanno. (1 Phe. 1:7) Sayikkihunni, taalle nookki baꞌraaꞌra yaano hegere heeshsho afiꞌneemmo.—Rom. 2:6, 7.

19. Soqqamaasine ganninsahu gedensaanni hagiirraamma ikkitinohu mayiraati?

¹⁹ Yesuusi reyotenni kaihunni shiima yanna gedensaanni soqqamaasine isi afidhinanni yiino hagiirre afidhino. Gashshaasine insa gante kaꞌe sabbaka agurtanno gede hajajjunsata hagiidhitanni fultino. Mayira? “Yesuusi suꞌmira yite shollinye adha hasiissannonsata egentino” daafiraati. (Soq. 5:40-42) Insa gibbannonsa diinna waajjantenni roore Mootichansa baxxino. ‘Dancha duduwo agurtukkinni kulte’ tenne leellishshino. Xaa yannara lowo roduuwinke qarra ikkannori heeꞌrirono agurtukkinni ammanante soqqantanni no. Insa Yihowa loosonsanna suꞌmisira leellishshino baxille hawannokkita affino.—Ibi. 6:10.

20. Aananno birxichira maa ronseemmo?

²⁰ Tini busha alame noo geeshsha mannu giwannonke. (Yoh. 15:19) Ikkirono waajja dihasiissannonke. Aananno birxichira ronseemmonte gede Yihowa ammanantino soqqamaanosi “jawaachishanno” hattono “agaranno.” (2 Tes. 3:3) Konnira Yihowa, ammanate roduuwanke, wole agurina diinnanke nafa baxa agurroonke. Tenne amaale harunsineemmoha ikkiro, mittimmanke dibaꞌanno, ayyaanaamittetenni kaajjine heeꞌneemmo, Yihowa ayirranno gede assineemmo hattono mannu giwinkerono baxillu kayinni tenne qeelannota leellinsheemmo.