Akimicha Ikkatenni Roorinore Afiꞌroommo

Ilamoommohu 1941 Faransayete Paarisi yinanni katamira dureeyye ikkitinokki maate giddooti. Roso rosa lowo geeshsha baxeemmo; ikkirono 10 dirihu heeꞌreenna shombu dhibbi amadeennae rosu minira haꞌra agurummoti lowo geeshsha dadilloommo! Akimootu higae geeshsha mine goxe keeshsheemmo gede kultinoe. Hakko daafira haammata agana mine borqaalla (qaallate tiro amadino maxaafa) nabbawanninna Paarisi Yuniversitenni raadoonete widoonni shiqqannota rosu pirogiraame macciishshanni keeshshoommo. Hakkiinni akimichu huroommo daafira rosu minira haꞌra dandeemmota kulieta lowo geeshsha hagiidhoommo. ‘Akimootu loossanno loosi dhaggete!’ yee hedoommo. Hattee yannanni kayise manna xagise hursate halcha hanafummo. Anniꞌya konni kaꞌa maa ikka hasiꞌratto yee xaꞌmannoe woyite woꞌmanka woyite, “Doktora ikka hasiꞌreemmo” yee qoleemmosi. Heeshshoꞌya giddo baalunku coyinni roore akimicha ikka hasiꞌroommohu iseraati.

SAYINSETE DAAFIRA ROSOOMMORI MAGANUNNIWA SHIQEEMMO GEDE ASSINOE

Maatenke Kaatolike eꞌanno. Ikkollana Maganu daafira gariri afoommori dino; qoleno dawaro afiꞌroommokkiti batinye xaꞌmuwa nooe. Heeshsho dagginohu kalaqante ikkinota ammanoommohu yuniversite eꞌꞌe hikkiminnu daafira rosummohu gedensaanniiti.

Mite yee mayikiroskopetenni muꞌrote seele laoommo yanna qaageemmo. Seele iibbillunna qiidu yannara iseneeto gargadhitanno gari dhagge ikkinoe. Qoleno sayitopilaazimu (seelenniti giddooyidi kifile) maxine kissanno woyite cuꞌmamanno garanna xalalu wayi eanno woyite diriiranno gara laoommo. Tininna wole batinye ikkito lubbo noonsa kalaqami haaro qooxeessa rosanno gede assitannonsa. Mitte mittenti seele xurqa ikkitino gara laꞌꞌaꞌya heeshsho dagginohu hedeweelcho ikkinokkita huwateemmo gede assitinoe.

Hikkiminnu roso rosanni layinki diro, Maganu noota leellishshannota wole taje laoommo. Rosu mine mannu bisi daafira xiinxallinanna cigilenke, qubbuwanke cuꞌmanna diriirsa dandiineemmo gede assitanno gara rosoommo. Hirrenke, mikitankenna diimmichinke base basensa amade mitteenni loosanno gari dhaggete. Lawishshaho, cigilenkera noo hirrenna qubbichinkeha layinki miqicho xaadisanno diimmichi lamewa beehamanno; hakkiinni mereeroho doogo kalaqantanno; qubbenke birxicho iillino diimmichi hatte doogo widoonni saꞌꞌanno daafira gobbara hige difulanno. Qoleno diimmichonke qubbichinke ledo xaadise amadannorichi no. Bisinke konni garinni loosannokkiha ikkoommero, angankera noo diimmichi lowo geeshsha bedeedaminohu worbicho ollanni diiganni gede ikkanno. Mannu bisi kalaqamino gari, lowoti hedate dandoo noosi kalaqaanchi no yee hedeemmo gede assitinoe.

Qaaqquullu ilantanno gara xiinxallummoti heeshsho Kalaqinoha albinni roore naada hanafummo. Qaaqqu amate godowi giddo noo yannara oksijiine afiꞌrannohu amatewiinni ikkinota rosoommo. Hakko daafira qaaqqu shombi giddo noote ufuuffa labbanno ogorra giddo ayyare diheedhanno. Qaaqqu ilama rahanno yannara tenne ogorra giddo shamuri woꞌmanno. Hakkiinni qaaqqu ilame foola hanafanno woyite dhagge ikkannori ikka hanafanno. Qaaqqu wodani giddo noo xullo tuantanno; tini mundee shombu widira higge hadhanno gede assitanno. Shombu giddo noo ogorrara ayyare rakke ea hanafanno woyite ogorrate giddo noo shami ogorra mimmitoho qamidhannokki gede assanno. Konni garinni bayichonkonni qaaqqu umisinni foola dandaanno.

Konne dhagge ikkanno kalaqama kalaqinohu daafira afa hasiꞌroommo daafira, Qullaawa Maxaafa seekke nabbawa hanafummo. Maganu 3,000 saꞌꞌanno diri albaanni Israeelete ledo qaalu gondooro ei woyite uyinohu, fayyimma agadhate daafira kulanno seeri lowo geeshsha dhagge ikkinoe. Maganu, Israeele jawa shumara ofolturo bushsha dibbanno gede, ganyite hayishshidhanno gede, hattono mitto mancho taraawanno dhibbi amadinosita leellishanno malaate affuro mannuwiinni badde keeshshiishshanno gede hajajinonsa. (Lew. 13:50; 15:11; Mar. 23:13) Qullaawu Maxaafi dhibbu taraawannohu hiittoonniitiro kulanno; sayinse kayinni tenne buuxxinohu muli diri kawaatilla. Qoleno, Leewaawootu maxaafira noohu siimu xaadooshshi daafira kulanno seeri, Israeelete manni baalu fayyimmara lowore kaaꞌlinota huwatoommo. (Lew. 12:1-6; 15:16-24) Kalaqaanchu konne seera Israeelete uyinohu insa fayyimmara yee ikkinotanna isi hajajosi agadhitannore maassiꞌrannonsata wodanchoommo. Qullaawa Maxaafa borreesiisinohu Magano ikkinota ammanoommo; ikkollana hatte yannara konni Magani suꞌma diafoommo.

MINAAMAꞌYA LEDO EGENNAMOOMMO GARANNA YIHOWA AFOOMMO GARA

Yuniversitete hikkiminnu roso rosanni heeꞌre Liidi yinannite wedellitte beetto ledo egennamoommo; ise lowo geeshsha baxoommo. Hakko daafira 1965 adhammummo; hatte yannara roso mereerse noommo. Qoleno, 1971 lee oosonke giddo sase ilante no. Liidi hikkiminnu loosiꞌyarano maatenkerano dancha aggaare ikkitinoe.

Umiꞌyaha akimete mine faꞌnammora albaanni hospitaalete sase diro loosoommo. Hakkiinni mulenni, hanafote kulummo minaanninna minaama dhiwame xagisiꞌrara anewa dayi. Minaannisera hidhanno xagichi dana borreessanni heeꞌreenna minaamasi togo yitinoe: “Ballo mundee giddo afidhino xagga hajajjooti” yitue. Hakkiinni dhagge assiꞌre “Mayira? Addinta yitayi nootta?” yuummo. Hakkiinni ise, “Ninke Yihowa Farciꞌraasineeti” yite qoltue. Konni albaanni Yihowa Farciꞌraasine daafira macciishshe diegennoommo; mundee adhitannokkihu mayiraatirono diafoommo. Hakkiinni minaama, mundee adhannokkihu mayiraatiro kultannota Qullaawu Maxaafi qummeeshshuwa nabbabbue. (Soq. 15:28, 29) Qoleno isenna minaannise albillitte Maganu Mangiste qarra, dhibbanna reyo huntannota kulie. (Aju. 21:3, 4) Dhagge assiꞌre “Kultinanni heedhinoonnieri anjeꞌyanni kayise halcheemmoreeti! Akimicha ikkoommohu manna qarrunni gatisateeti” yuummo. Lowo geeshsha hagiidhoommo daafira hakko barra mitte saatenna darate ikkitanno yanna hasaamboommo. Hakkiinni insa haꞌrihu gedensaanni xaate Kaatolike dieꞌꞌeemmo yee hedummo; qoleno lowo geeshsha dhagge assiꞌreemmo Kalaqaanchira Yihowa yinanni suꞌmi noosita afummo!

Kuri Yihowa Farciꞌraasine ikkino minaanninna minaama ledo akimete mineꞌya sase hinge xaandoommo; sasente yannara mitte saate saꞌanno yanna hasaamboommo. Qullaawu Maxaafire lende hasaambammora hasiꞌroommo daafira insa miniꞌyara koyisoommo. Liidi ninke ledo Qullaawa Maxaafa xiinxallate sumuu yitinoha ikkirono konni albaanni ronsoommohu mitu Kaatolikete ammaꞌno rosiissanno rosi kapho ikkinota ammante adha gibbino. Hakko daafira mitto Kaatolikete qeesicha mininkera koyisummo. Hakkiinni Qullaawa Maxaafa calla horoonsiꞌne beetekiristaane rosiisanno rosi daafira hashshu taalooti geeshsha heewisammoommo. Kuni hasaawi Liidi Yihowa Farciꞌraasine rosiissanno rosi halaale ikkinota ammantanno gede assinose. Hakkunni gedensoonni, Maganu Yihowara noonke baxilli lexxanni haꞌrino daafira 1974 cuuammummo.

HEESHSHOꞌYA GIDDO YIHOWA BALAXISIISOOMMO

Maganu mannu oosora hedinore rosaꞌya heeshshoꞌya giddo balaxisiiseemmo coye soorreemmo gede assitinoe. Liidinna ani Yihowara soqqamate illachinshoommo. Qoleno oosonke Qullaawu Maxaafi biddishshi garinni lossiꞌrate murciꞌnoommo. Yihowanna manna banxeemmo gede uyinoonni seera harunsanke maatenke giddo mittimma heedhanno gede assitino.—Mat. 22:37-39.

Aninna Liidi mitto coye assate hendeemmo woyite mitto afoo ikkineemmo gari oosonke kaaꞌlino gara hendummo kiiro osoꞌlineemmo. Oosonke Yesuusi, “Coyidhinanniri addahoro “Ee”, kaphohoro “Deeꞌni” yiiyye” yee hajajino hajajo maatenke wodho ikkitinota affino. (Mat. 5:37) Lawishshaho 17 diri beettonke jaallase ledo hadhe yanna sayissara xaꞌmidhuta Liidi difajjitinose. Jaallase giddonni mitte “Amakki fajja gibbuhero annakki xaꞌmiꞌri” yituseta beettonke, “Iso xaꞌmaꞌya kaaꞌlitannori dino. Lamunku hedo mittete” yite qoltino. Ee, leenti oosonke Qullaawu Maxaafiha xintu seera harunsate daafira mittu gari hedo noonketa affino. Xaa yannara halaꞌlado maatenke Yihowara soqqantanni no; tennera Yihowa galaxxineemmosi.

Halaale rosaꞌya heeshshoꞌya giddo balaxisiiseemmo coye soorreemmo gede assitinoeha ikkirono, xagisate dandooꞌya horoonsiꞌre Maganu manna kaaꞌla hasiꞌroommo. Hakko daafira, umo Paarisi noo Beeteelera gedensaanni Looviye noo Beeteelera akimicha ikke soqqamoommo. Konni garinni miniꞌyanni haꞌranni Beeteelete 50 diro meddi yitanno yanna soqqamoommo. Hatte yanna giddo mite Beeteelete maate miilla ledo dancha jaalooma kalaqiꞌroommo; xa insa giddo mitu 90 diri balla ikkannonsareeti. Mitto barra mittu haarote Beeteele eino wedellichi ledo xaadoommo. Hakkiinni mitu 20 diri albaanni amasi iso iltu woyite ilshiishoommohu ane ikkoommota afummoti lowo geeshsha dhagge assiꞌroommo!

YIHOWA MANNISIRA MAGEESHSHI GEESHSHA HEDANNORO HUWATOOMMO

Lowo diro Yihowa mannasi dirijjitesi widoonni massagannanna agaranna laoommo; tini isira nooe baxilli lexxanno gede assitino. Aliidi Bisi 1980 hanafora Yihowa Farciꞌraasine mundee adhitannokkihu mayiraatiro akimootu albinni roore affanno gede assate Yunayitidi Isteetisete mitte pirogiraame qixxeessino.

Aliidi Bisi 1988 Beeteelete mitto haaro gola qixxeessino; konne gola Hospitaalete Mashalaqqe Aanno Gola yinanni. Umi qara kuni goli, Hospitaalete Ledo Xaadissanno Komite looso massaganno; tini Yunayitidi Isteetisete qixxeessinoonni komite Yihowa Farciꞌraasine dancha hikkiminna afidhanno gede kaaꞌlitanno. Tini qixxaawo alamete doyichora halaꞌlituta, Hospitaalete Ledo Xaadissanno Komite Faransayeteno qixxeessinoonni. Yihowa dirijjite dhiwantino roduuwira kaaꞌlo hasiissannonsa yannara baxillunni kaaꞌlitanno gari dhagge ikkinoe!

HALCHANNI HEEꞌROOMMORE AFIꞌRUMMO

Bashshora heeshshoꞌya giddo balaxisiiseemmo coyi manna xagise hursate. Ikkollana balaxisiiseemmo coye layiꞌreemmo woyite, mannaho roore hasiissannoti ayyaanaamittete hurre ikkitinota yaano mannu heeshshote Buicho ikkinohu Maganu Yihowa ledo jaalooma kalaqiꞌranno gede kaaꞌla ikkitinota huwatoommo. Xurata fulummohu gedensaanni, aninna Liidi woꞌma yanna suwisaano ikkine Maganu Mangisteha dancha duduwo dudumbanni aganu kiiro lowo saate soqqammeemmo. Xaa geeshsha konne heeshsho gatisanno looso dandiinummo deerrinni loonsanni heeꞌnoommo.

Xaano mannu dhibbinsanni beya afiꞌranno gede kaaꞌla diaguroommo. Ikkollana worbaho yinoonni akimichi nafa baalanka dhibba hursa dandaannokkita woy reyo hoola dandaannokkita huwatoommo. Hakko daafira shetto, dhibbunna reyo baꞌanno yanna quqquxame agadheemmo. Muli yannara daggannote haaro alamera dhagge ikkanno garinni kalaqaminohu mannu bisi daafiranna wolu Maganu kalaqino kalaqami daafira hegerera rosate faro afiꞌreemmo. Hige anjeꞌyanni kayise halchoommori gudisame diwoꞌmino. Kayinni haaro alamera afiꞌreemmori xa afiꞌroommorinni roorannota horo dihuluullameemmo!