Ati Tenne Afootto?

Hundi Israeele miine miintannohu mayiraati?

Hundi waro seenne adhanno beetti maatenna adhanno beetto maate sumuu yituro beettote maatera miine miinanno. Miinete jajja, saada woy woxe aa dandiinanni. Qoleno mito woyite miinete waagi bayicho looso loosa dandiinanni; lawishshaho Yaiqoobi Raaheeli adhate annisera lamala diro soqqamate maahoyye yiino. (Kal. 29:17, 18, 20) Miine minnannihu mayiraati?

Qullaawu Maxaafi fullahaancho Karooli Mayiresi togo yitino: “Baatto loosidhe galtanno maate giddo meyati loossanno loosi lowo geeshsha hasiisannoho; hakko daafira beettote maatera miine minnannihu beettonsa uyitinohura afanshu gede asse aateeti.” Qoleno miine tenne lamente maate mereero noo fiixoomi kaajjanno gede kaaꞌlitanno. Togoo fiixoomi qarru yannara mimmitoho kaaꞌlantanno gede assanno. Qoleno miine mitte beetto huuccante nootanna towaatannosenna agarannose anniwiinni agurte minaannisewa hadhara kaꞌe noota leellishshanno.

Miine miina mitte meyata jajju gede assine kiirre hidhinannita woy hirrannita leellishshannota diꞌꞌikkitino. Enshenti Iziraeeli Itis Layifi Endi Institiyushiins yinanni maxaafi togo yiino: “Seenne adhannohu miine miina iimi adda laꞌniro Israeele meya beettonsa jajju gede assite laꞌannoha lawissara dandiitanno. Ikkollana miine beettote maatera uyinanni afanshi gede assine laꞌnannireeti ikkinnina beetto hidhate baantanni waaga diꞌꞌikkitino.”

Xaa yannarano mite gobbuwara miine miinnanni budi no. Kiristaana ikkitino maate miine miinnansara hasidhuro, quwa saꞌe miinete lowo waaga xaꞌmiꞌra dihasiissannonsa. (Fil. 4:5; 1 Qor. 10:32, 33) Insa konni garinni woxe ‘baxxannore’ woy hafuuraamma ikkitinokkita leellisha dandiitanno. (2 Xim. 3:2) Qoleno Kiristaana ikkitino maate quwa saꞌe miinete lowo waaga xaꞌmidhannokkiha ikkiro, beettonsa adhate hedino beetti miinannoha lowo woxe afiꞌra geeshsha adhikkinni dikeeshshanno. Woy mittu woꞌma yanna suwisaanchi miinete ikkannoha lowo woxe afiꞌrate yee woꞌma yanna looso loosate soqqanshosi agura hasiissannosihu gede asse dihedanno.

Mite gobbuwara mageeshshi woxe miina hasiissannoro kulannohu gashshootu fushshino seeri no. Togoo gobbuwara heeꞌranno Kiristaani konne seera ayirrisanno. Mayira? Korkaatuno Maganu Qaali, “Aleenni noo gashshaanora hajajama [hasiissannota]” kulanno. Kiristaanu Maganu seera diigannoha ikka hoogi geeshsha gashshaano fushshitanno seerira hajajama hasiissannonsa.—Rom. 13:1; Soq. 5:29.