Addu Hagiirre Afiꞌra Dandaatto

1. Ayyaanaamittete hasattonke maati? Tini hagiirru ledo xaadooshshe afidhinohu hiittoonniiti?

ADDU hagiirri yannate geeshsha calla afiꞌnanni hagiirre diꞌꞌikkino. Heeshshonke diro woꞌma togoo hagiirre afiꞌra dandiineemmo. Hiittoonni? Yesuusi Ilaalu Sibikatesi yannara, “Ayyaanunni buxxinori baꞌraadhinoreeti; gordu gashshooti insahona” yiino. (Mat. 5:3) Yesuusi mannaho kalaqamunni Kalaqaanchonsa Magano Yihowa afatenna magansiꞌrate hasatto noonsata afino. Ayyaanaamittete hasattonke yaa tenneeti. Qoleno Yihowa ‘hagiirraamo Magano’ ikkino daafira, iso magansidhannorino hagiirraamma ikka dandiitanno.—1 Xim. 1:11, NW.

2-3. (a) Yesuusi yiino garinni hagiirraamma ikka dandiitannori wolootu ayeooti? (b) Konni birxichira maa xiinxallineemmo? Hatto assa hasiissannohu mayiraati?

² Hagiirraamma ikka dandiineemmohu baalunkuri injiinkero callaati? Deeꞌni. Yesuusi Ilaalu Sibikatesi yannara dhagge ikkannore coyiꞌrino. Isi loossino soꞌronni kainohunni woy iillinonsa qarrinni “yaaddannori” hagiirraamma ikka dandiitannota coyiꞌrino. Qoleno “Keeraanchimmate daafira xiiwantannori” woy Kiristoosi harunsaano ikkitino daafira ‘xonnanninsari’ hagiirraamma ikka dandiitannota coyiꞌrino. (Mat. 5:4, 10, 11) Ikkina togoo qarri iillanni heeꞌreennanni addu hagiirre afiꞌra dandiinannihu hiittoonniiti?

³ Yesuusi addu hagiirre afiꞌneemmohu baalunkuri qiniinkero ikkikkinni ayyaanaamittete hasattonke wonshiꞌnummoronna Maganunniwa shiqqi yinummoro ikkinota rosiisanni no. (Yai. 4:8) Tenne assa dandiineemmohu hiittoonniiti? Konni birxichira addu hagiirre afiꞌneemmo gede kaaꞌlannonkeha sase qara coye laꞌneemmo.

AYYAANAAMITTETE SAGALE SAGAꞌLE

4. Addu hagiirre afiꞌrate assa hasiissannonkehu umi coyi maati? (Faarso 1:1-3)

⁴ Umihunni, addu hagiirre afiꞌrate ayyaanaamitte sagale sagaꞌla hasiissannonke. Mannahono saadateno sagale hasiissanno. Kayinni ayyaanaamittete sagale hasiissannohu mannaho callaati. Yesuusi “Mannu Maganu afiinni fulanno qaali baalunni ikkinnina, sagale callatenni diheeꞌranno” yiinohu iseraati. (Mat. 4:4) Hakko daafira ayyaanaamittete sagale sagaꞌlinummokkinni yaano Maganu Qaale nabbambummokkinni mitto barrano saꞌꞌa dihasiissannonke. Faarsaasinchu togo yee borreessino: ‘Kaaliiqi Seerinni hagiidhannohu Seerasino hashshanna barra buuxanni qaagannohu hagiirraamoho.’—Faarso 1:1-3 nabbawi.

5-6. (a) Qullaawu Maxaafinni maa ronseemmo? (b) Qullaawa Maxaafa nabbawa kaaꞌlitannonkehu hiitte doogganniiti?

⁵ Yihowa baxannonke daafira hagiirru noo heeshsho heeꞌrate maa assa hasiissannonkero Qullaawu Maxaafi giddo kulinonke. Isi ninkera hedinori maatiro ronseemmo. Isiwa shiqa dandiineemmo garanna cubbinkera maaro afiꞌra dandiineemmo gara ronseemmo. Qoleno dhagge ikkitannote albillitte afiꞌneemmo hexxo daafira ronseemmo. (Erm. 29:11) Qullaawa Maxaafa xiinxalline ronseemmohu kuni halaali wodaninke hagiidhanno gede assanno!

⁶ Qoleno anfummonte gede, Qullaawu Maxaafi giddo barru barrunku heeshshonkera kaaꞌlitannoti lowo amaale no. Tenne amaale harunsinummoro hagiirraamma ikkineemmo. Iillinohe qarrinni kainohunni hexxo mudhittoro, albinni roore Yihowa Qaale nabbawi hattono hiinci. Yesuusi “Maassantinori [“hagiirraammu,” NW] Maganu qaale macciishshite hajajantannoreeti” yiino.—Luq. 11:28.

7. Maganu Qaale nabbabbine roore hoꞌro afiꞌrate kaaꞌlannoꞌneri maati?

⁷ Maganu Qaale nabbabbinanni woyite nabbabbinoonnire hiincate yanna gaaꞌme. Hanni mittu manchi baxxinanni sagale qishinoꞌne yine hendo. Ikkollana muddantinoonni woy wodaniꞌne wolewa noo daafira sagale coommitinorono coommitinokkirono affinikki rakkine ittine guddini. Guddinihu gedensaanni muddantine heedhine ittinoonnita wodanchitini; hakkiinni mayi coommillese badanni sununnilla ito yitini. Hatteente gede Qullaawa Maxaafa muddantine heedhine nabbabbinanni sokkasi hiincitinikki gattine egentinoonni? Maganu Qaale nabbabbine hiincate yanna gaaꞌme; dhaggete giddo kulloonnire laꞌꞌate, huuro macciishshatenna nabbabbinanni heedhinoonnire hedate woꞌnaalle. Konni garinni nabbawaꞌne hagiirriꞌne lexxanno gede assitannoꞌne.

8. “Ammanaminohunna wodanaamu borojjichi” uyinoonnisi looso loosanni noohu hiittoonniiti? (Lekkaalliidi qaagiishshano lai.)

⁸ Yesuusi ayyaanaamittete sagale hasiissanno yannara shiqishanno gede ‘ammanaminohanna wodanaamo borojjicho’ shoomino; qoleno ayyaanaamittete sagale dancha gede sagaꞌlinanni heeꞌnoommo.b (Mat. 24:45, NW) Ammanamino borojjichi qixxeessanno coyi baalu xintaminohu Maganu ayyaaninni borreessaminohu Qullaawu Maxaafi aanaati. (1 Tes. 2:13) Tini ayyaanaamittete sagale Qullaawu Maxaafi giddo kulloonnita Yihowa hedo anfeemmo gede kaaꞌlitaanke. Agarooshshu Shaenna Baqqi Yiiyye yitanno metseetuwa hattono jw.org aana fultanno birxichuwa nabbambeemmohu iseraati. Kiristaanu Heeshshonna Soqqansho Gambooshshiranna Sambatu barri gambooshshira qixxaambeemmo. Qoleno aganu kiiro fultannota JW Biroodikaaste laꞌneemmo. Ayyaanaamittete sagale dancha gede sagaꞌlanke, addu hagiirre afiꞌneemmo gede kaaꞌlannonkeha layinki coye assate kaꞌneemmo gede assitannonke.

YIHOWA BIDDISHSHI GARINNI HEEDHE

9. Addu hagiirre afiꞌneemmo gede assannonkehu layinki coyi maati?

⁹ Layinkihunni, addu hagiirre afiꞌrate Yihowa biddishshi garinni heeꞌra hasiissannonke. Faarsaanchu togo yee borreessino: “Kaaliiqa ayirrissannorinna hajajosi agadhitannori, baꞌraadhinoreeti.” (Far. 128:1) Yihowa waajjate yaa iso lowo geeshsha ayirrinseemmo daafira iso dadillisannoha aye coyeno assineemmokki gede qorophate yaate. (Law. 16:6) Hakko daafira Yihowa Qullaawu Maxaafi giddo garanna gara ikkinokkiri daafira kulino biddishsha harunsate woꞌmanka woyite sharrammeemmo. (2 Qor. 7:1) Yihowa baxannore banxeemmohanna isi giwannore gimbeemmoha ikkiro hagiirraamma ikkineemmo.—Far. 37:27; 97:10; Rom. 12:9.

10. Roomu Sokka 12:2 kultanno garinni assa hasiissannonkeri maati?

¹⁰ Roomu Sokka 12:2 nabbawi. Mittu manchi garanna gara ikkinokkiri daafira biddishsha fushshate silxaane noosihu Yihowa ikkinota afinoha ikkara dandaanno; ikkirono Maganu biddishshi garinni heeꞌrateno maahoyye yaa hasiissannosi. Lawishshaho mittu manchi makeenna ooffannori quwa saꞌe ooffannokki gede biddishsha fushshannohu gashshoote ikkinota afinoha ikkara dandaanno. Ikkollana isi konne biddishsha harunsate maahoyye yaa hoogara dandaanno. Hakko daafira isi quwa sae oofanno. Yihowa biddishsha harunsa baalunkurinni woyyitinota ikkitinota ammanneemmota leellinsheemmohu amanyootinkenniiti. (Law. 12:28) Daawiti Yihowa daafira aane noore yiinohu iseraati: “Heeshshote doogo leellishoottoena, ledokki heeꞌraꞌya hagiirrunni wonshitannoe; qiniitekkiinni heeꞌra hegere hagiirre uyitannoe.”—Far. 16:11.

11-12. (a) Yaandeemmo woy hexxo mudhineemmo woyite maa qoropha hasiissannonke? (b) Filiphisiyusi Sokka 4:8 boohaarsha doodhineemmo woyite kaaꞌlitannonkehu hiittoonniiti?

¹¹ Yaachishannori woy hexxo mudhineemmo gede assannori iillannonke woyite konne coye hooꞌlate mitore assa hasiissannonke yine hendeemmoha ikkara dandaanno. Hatto yee heda nooreentilla; ikkirono Yihowa giwannore assineemmokki gede qoropha hasiissannonke.—Efe. 5:10-12, 15-17.

¹² Soqqamaasinchu Phaawuloosi Filiphisiyusi heeꞌranno Kiristaanira borreessino sokkara ‘taalo ikkinore . . . minshanniri nookkirenna baxille’ harunsa agurtannokki gede jawaachishinonsa. (Filiphisiyusi Sokka 4:8 nabbawi.) Phaawuloosi koye coyiꞌranni noohu boohaarshu daafira ikka hoogirono isi kulinonkeri doodhineemmo boohaarshi daafirano kulannonkeri no. Hanni togo assate woꞌnaali: Qummeeshshu aana isi kulinori bayicho, “muuziiqa,” “filme,” “maxaaffa,” woy “viidiyote godoꞌle” worate woꞌnaali. Hatto assakki Magano hagiirsiisannohunna hagiirsiisannokki boohaarshi hiikkoyetiro badde afatto gede kaaꞌlitannohe. Yihowahu taalle nookki biddishshi garinni heeꞌra hasiꞌneemmo. (Far. 119:1-3) Togo assiꞌneemmoha ikkiro, addu hagiirre afiꞌneemmo gede assannoha aananno coye xalalu tiiꞌꞌinni assa dandiineemmo.—Soq. 23:1.

YIHOWA MAGANSIꞌRA BALAXISIISSE

13. Addu hagiirre afiꞌneemmo gede assannonkehu sayikki coyi maati? (Yohaannisi 4:23, 24)

¹³ Sayikkihunni, heeshshoꞌne giddo Yihowa magansiꞌra balaxisiissinanni heedhinoonnironna teꞌee buuxidhe. Kalaqaanchonke ikkino daafira Yihowa magansiꞌra hasiissannonke. (Aju. 4:11; 14:6, 7) Hakko daafira isi hasiꞌranno garinni yaano “ayyaanunninna halaalunni” magansiꞌra hasiissannonke. (Yohaannisi 4:23, 24 nabbawi.) Qaalisi giddo noo halaali garinni Yihowa magansiꞌrate qullaawu ayyaanisi massagannonke gede assiꞌra hasiissannonke. Loosonke hoolloonni woy agamboonni gobbara heeꞌneemmoha ikkiro nafa, Yihowa magansiꞌra balaxisiisa hasiissannonke. Xaa yannara Yihowa Farciꞌraasine ikkitino daafira calla 100 saꞌanno roduuwanke usurroonninsa.c Ikkirono insa hagiirrunni huucciꞌrate, xiinxallatenna Maganu Mangiste daafira wolootaho kulate dandiiture baala assitanni no. Mannu xoninkerono xiiwinkerono Yihowa ledonke noota anfoommo daafira hagiirraamma ikka dandiineemmo.—Yai. 1:12; 1 Phe. 4:14.

ADDU XAGGE

14. Taajikistaanete heeꞌrannohu wedellichu rodiira mayi iillinosi? Mayira?

¹⁴ Mitu roduuwinkera lowo qarri iillinonsa; ikkirono insa aleenni laꞌnummoha sasenka coye assitino daafira addu hagiirre afiꞌra dandiitino. Hanni Taajikistaanete heeꞌrannohu Jovidooni Bobojonoov yinannihu 19 diri wedellichi woꞌnaalsha laꞌno; isi olaho haꞌra giwino. Iso Birra 4, 2019nni minisinni giddeessine haaꞌne haꞌne boode agana usurroonnisi; hattono jaddo loosinohu gede beebba assiꞌnoonnisi. Hakkiinni iso beebba assiꞌnoonnita batinye gobbuwara odootenni kulloonni. Olanto iso olamate qaale eanno gedenna olantote uduunne uddiꞌranno gede giddeessitanni gantinosita odootenni kulloonni. Hakkunni gedensaanni jaddo loosino yine usuramanno gede assinoonni; jeefote hatte gobba pirezidaantichi iso maare tidhamanno gede assinosi. Kuni baalu qarri iillisirono Jovidooni minshe noosikkiha ikkino; hattono hagiirrisi baikkinni heeꞌrino. Isi tenne assanno gede kaaꞌlinosiri maati? Woꞌmanka woyite ayyaanaamittete coye assasiiti.

15. Jovidooni usuru mine noo yannara ayyaanaamittete sagale sagaꞌlinohu hiittoonniiti?

¹⁵ Jovidooni usurame noo yannara Qullaawu Maxaafi woy borruwanke noosikkiha ikkirono, ayyaanaamittete sagale sagaꞌla diagurino. Hiittoonni? Qooxeessaho noo roduuwi sagale massitannosi woyite sagale worroonni uduunnichira barru qummeeshsha borreessite massitanno. Isi konni garinni barru baala Qullaawa Maxaafa nabbawanno hattono hiincanno. Isi usurunni tidhamihu gedensaanni xaa geeshsha lowo qarri iillinonsakki roduuwa togo yee amaalino: “Nooꞌne yanna Maganu Qaalenna dirijjitesi qixxeessitino borro nabbabbine Yihowa daafira nooꞌne egenno lexxitanno gede assiꞌrate horoonsidhe.”

16. Jovidooni maa illachishino?

¹⁶ Rodiinke Yihowa biddishshi garinni heeꞌrino. Isi gara ikkinokkire dihedino woy bushare diassino; hatteentenni Yihowanna Yihowa baxannore illachishino. Jovidooni Maganu kalaqo dhagge assiꞌrino. Isi soodo goxinowiinni kaꞌꞌanno woyite, woꞌmanka woyite ceate huuro macciishshanno. Qoleno hashsha hashsha agananna beeddahe laꞌꞌanno. Isi, “Tini Yihowa elto hagiidheemmonna jawaateemmo gede assitinoe” yiino. Yihowa ayyaanaamittetennino maalaamittetennino assinonkerira galanteemmosiha ikkiro, wodaninke hagiidhanno; tini qolte qarra dandiineemmo saꞌneemmo gede wolqa ikkitannonke.

17. Umi Pheexiroosi 1:6, 7 Jovidoonira iillino gedee qarri iillinonsare kaaꞌlitannonsahu hiittoonniiti?

¹⁷ Qoleno Jovidooni Yihowa magansiꞌra balaxisiisino. Isi halaalaanchu Maganira ammanaminoha ikke heeꞌra hasiissannota ikkitinota afino. Yesuusi “Mootichu Maganikkira calla kumbuuli! Iso calla magansiꞌri” yiino. (Luq. 4:8) Olantote hajajaanonna olanto Jovidooni ammanasi kaadara hasidhino. Isi kayinni hexxo mudhannokki gedenna ammaname heeꞌranno gede kaaꞌlasira Yihowa barrano hashshano huucciꞌrino. Beebba assiꞌnisirono Jovidooni ammaname heeꞌrino. Xa isi lowo geeshsha hagiirraamoho; korkaatuno xa noosi ammana gannasiranna usurrasira albaanni noositenni roorete.—1 Pheexiroosi 1:6, 7 nabbawi.

18. Hagiirrinke baꞌꞌannokki gede assiꞌra dandiineemmohu hiittoonniiti?

¹⁸ Yihowa addu hagiirre afiꞌrate mayi hasiisannonkero afino. Addu hagiirre afiꞌneemmo gede assannoha sasenka coye harunsitiniro, qarru iilliꞌnero nafa hagiirriꞌne baikkinni heeꞌra dandiitinanni. Hakkiinni kiꞌneno “Kaaliiqi Maganonsa ikkino manni baꞌraaꞌrinoho [“hagiirraammaho,” NW]” yaa dandiitinanni.—Far. 144:15.