‘Baatto Ragiꞌrate’ Qixxaawootto?
BAALUNKU Yesuusi kulino hexxo quqquxamme agadhineemmo; isi “Jooguullu baꞌraadhinoreeti; baattono ragidhannona” yiino. (Mat. 5:5) Buurantinori iima Yesuusi ledo mootoolla ikkite gashshite uulla ragidhanno. (Aju. 5:10; 20:6) Xaa yannara noohu rooru addu Kiristaani baatto ragiꞌranno; hattono guuta ikke, keere afiꞌrenna hagiidhanni hegerera heeꞌranno. Konnira insa loosa hasiissannonsahu batinyu loosi no. Hanni konni loosi giddo sase laꞌno: Uulla biifisa, reyotenni kaꞌinore towaatanna insa rosiisa. Qoleno konne looso loosa halchattota leellishate xaa yannara nafa maa assa dandaattoro laꞌneemmo.
UULLA BIIFISATE QIXXAAWOOTTO?
Yihowa manna ‘ille ilamme baatto woꞌme; baattono kiꞌne gashshitinannita ikkito’ yii woyite, isi gedensoonni uulla woꞌma gannate ikkitannota coyiꞌranni no. (Kal. 1:28) Uulla ragidhannori tenne umi hajajo wonshitanno. Edeni Gannate baꞌino daafira insa ragiꞌra hanaffannohu Gannate ikkitino uulla diꞌꞌikkino. Armagedooni oli gedensaanni uulla haaroonsate loonsannihu lowo loosi no. Kuni dishaaꞌꞌa loosooti!
Tini, Israeele Baabiloonete qafadonni higgu yannara loossino looso qaangeemmo gede assitannonke. Insa higginohu 70 diro woꞌma mannu heeꞌrinokki baattowaati. Ikkirono Isayaasi insa Yihowa kaaꞌlonni baatto galagalte biifisa dandiitannota masaalino. Isi togo yee masaalino: “Halallimmase Edenete gedeeta, moolleseno Gannatete gedeeta asseemmo.” (Isa. 51:3) Yihowa kaaꞌlonni Israeele baatto biifisa dandiitino. Hatteente gede uulla ragidhannori Yihowa kaaꞌlonni uulla biifisa dandiitanno. Ati konni loosira kaaꞌlama halchattota xa nafa leellisha dandaatto.
Tenne assa dandaattoti mitte doogo quwa saittokkinni minekkinna qooxeessakki biifisseeti. Qachikki manni hatto assannokkiha ikkiro nafa ati biifisiꞌra dandaatto. Qoleno Gambooshshunna Jajjabbu Gambooshshi Addaraashuwa gatamara kaaꞌla dandaatto. Dandaattoha ikkiro dano kalaqantanno woyite kaaꞌlamate loosirano forme wonsha dandaatto. Konni garinni kaaꞌlo hasiissannonsare kaaꞌlate qixxaawoottota leellisha dandaatto. Ateneeto togo yite xaꞌmi: ‘Yihowa haaro alame eꞌꞌeemmo gede fajjiero hakko horoonsiꞌreemmoti rosa dandeemmoti wole dandoo no?’
REYOTENNI KAꞌANNORE TOWAATATE QIXXAAWOOTTO?
Yesuusi Iyyairoosi qaaqqo reyotenni kayisanni heeꞌrenni ittannore uyinannise gede hajajino. (Maq. 5:42, 43) Tonaa lamu diri qaaqqora sagale aa lowo looso diꞌꞌikkitino. Kayinni hanni Yesuusi ‘waammate giddo noori huurosi macciishshite’ fultannota kulino hexxo woꞌmitanno woyite mageeshshi loosi heeꞌrannoro hedi. (Yoh. 5:28, 29) Qullaawu Maxaafi mitto mittonka coye tittire kulannokkiha ikkirono, reyotenni kaꞌannori sagale, uddanonna mine afidhanno gede kaaꞌla hasiissannonketa heda dandiineemmo. Insa kaaꞌlate qixxaawoottota xa nafa leellisha dandaatto. Hanni xa assa dandaattoha mito coye laꞌno.
Uulla ragiꞌrate qixxaawoottota leellishate xaa yannara maa assa dandaatto?
Woradu aliidi laꞌꞌaanchi songoꞌne towaatara daannota kullanni woyite iso wosinchimma adha hasiꞌrattota kulatto? Beeteelete soqqantannori qanchoho soqqantanno gede assinanni woyite woy woradu aliidi laꞌꞌaanchi, woradu looso loosa aguranno woyite insa heedhanno mine afidhanno gede kaaꞌla dandaatto? Qooxeessikkira qoqqowu woy baxxino gambooshshi heeꞌranno woyite gambooshshu hanafara albaanninna gambooshshu gedensaanni umikki fajjonni soqqama woy gambooshsheho daanno wosina anga fante haaꞌra dandaatto?
REYOTENNI KAꞌANNORE ROSIISATE QIXXAAWI
Soqqamaasinete Looso 24:15 kultanno garinni lowo biliyoone ikkanno manni reyotenni kaꞌꞌannota heda dandiineemmo. Konni manni giddo rooru reyara albaanni Yihowa daafira rosate faro diafiꞌrino. Insa reyotenni kaꞌuhu gedensaanni Yihowa daafira rosate faro afidhanno.a Ammanantinorinna woꞌnaalshu noonsari Maganu soqqamaano insa rosiisate looso loossanno. (Isa. 11:9) Awuroppaho, Wodiidi Ameerikiranna Afirikaho heeꞌranno mannira sabbakkinoti Sharlooti yinanni rodoo tenne quqquxante agadhitannota coyidhino. Ise hagiirrunni togo yitino: “Reyotenni kaꞌꞌanno manna rosiisate quqquxameemma. Alba heeꞌrino manchi daafira nabbaweemma woyite duucha woyite togo yee hedeemma: ‘Kuni manchi Yihowa daafira rosinoha ikkoommero heeshshosi togoota diꞌꞌikkitanno.’ Reyotenni kaꞌꞌanno mannira insa affinokkiha lowo coye kulammansara quqquxameemma.”
Wole agurina Yesuusi uullara daara albaanni Yihowara ammanante heedhino soqqamaanosi nafa lowori rossannori no. Hanni Daanieelira, tirose afikkinni borreessino masaalo woꞌmitino gara xawise kula mageeshshi qoossootiro hedi! (Dan. 12:8) Woy Ruutiranna Naaoomira, Buuraminohu dayinohu insa maate sirchi widoonni ikkinota kula mageeshsha hagiirsiissannoro hedi. Xa nooti busha alame waaddunkekkinna hedonke bebbeehantanno gede assitukkinni alame woꞌmate loonsanniha rosiisate looso loosa lowo geeshsha hagiirsiissanno!
Reyotenni kaꞌꞌanno manna rosiisate qixxaawoottota leellishate xaa yannara maa assa dandaatto? Tenne assa dandaattoti mitte kaajja doogo rosiisate dandookki woyyeessiꞌrate; hattono xaa yannara loonsanni heeꞌnoonniha alamete doyichoha sabbakate looso ganyite loosate. (Mat. 24:14) Xaa yannara geedhimma woy wolu coyi hasiꞌrootto geeshsha soqqamattokki gede assihero nafa, soqqamate sharramakki reyotenni kaꞌannore rosiisate qixxaawoottota leellishshanno.
Addanko aante noo xaꞌmuwa heda lowo geeshsha hasiissannote. Addinta uulla ragiꞌrate quqquxamatto? Uulla biifisate, reyotenni kaꞌannore towaatatenna insa rosiisate quqquxamatto? Xa loonsanni heeꞌnoonniha hatte yannara loonsanni gedee looso loosate afiꞌritto faro baala horoonsidhe hatte yannara qixxaawoottota leellisha dandaatto!
a Wocawaaro 2022te Agarooshshu Shaera fulinoha “Lowo Manna Rosiise Halaalu Widira Qola” yaanno birxicho lai.