Hegerera Heeꞌra Dandiineemmo

1. Yihowa uyinonketa hegere heeshsho hexxo hiincanke kaaꞌlitannonkehu hiittoonniiti?

YIHOWA isira hajajantannori ‘hegere heeshsho’ afidhannota kule qaale eino. (Rom. 6:23) Yihowa uyinonke hexxo hiincanke isira noonke baxilli albinni roore lexxanno gede assitanno. Hanni tenne hedi: Iimi Anninke lowo geeshsha baxannonke daafira, isiwiinni horo xeertiꞌneemmokki gede tenne hexxo uyinonke.

2. Hegere heeshsho hexxo kaaꞌlitannonkehu hiittoonniiti?

² Maganu uyinonketi hegere heeshsho hexxo, xaa yannara iillannonke qarra dandiine saꞌneemmo gede kaaꞌlitannonke. Diinnanke shitannonketa kulte waajjishiishshunkero nafa Yihowara soqqama diagurreemmo. Mayira? Mittu korkaati, Yihowa isira ammanamme reyinummoro reyotenni kayisannonketanna reyinummokkinni hegerera heeꞌrate hexxo noonketa anfoommo daafiraati. (Yoh. 5:28, 29; 1 Qor. 15:55-58; Ibi. 2:15) Hegerera heeꞌra dandiineemmota huluullammeemmokkihu mayiraati? Hanni aane noo korkaata laꞌno.

YIHOWA HEGERERA HEEꞌRANNOHO

3. Yihowa hegerera heeꞌneemmo gede assa dandaannota huluullammeemmokkihu mayiraati? (Faarso 102:12, 24, 27)

³ Yihowa heeshshote Buichonna hegerera heeꞌrannoha ikkino daafira, hegerera heeꞌneemmo gede assa dandaannota anfoommo. (Far. 36:9) Hanni Yihowa noohanna woꞌmanka woyite heeꞌrannoha ikkinota kulannoha mito Qullaawu Maxaafi gafa laꞌno. Faarso 90:2 Yihowa ‘hegere hegerera Magano’ ikkinota kultanno. Faarso 102no togoo hedo kultanno. (Faarso 102:12, 24, 27 nabbawi.) Qoleno masaalaanchu Imbaaqoomi iimi Anninke daafira togo yee borreessino: “Kaaliiqa Maganoꞌya, ati biꞌre hundinni kayisse nootto qullaawaatinna hegerera heeꞌrattoho. Ninkeno direyineemmo [“ati direyatto” NW].”—Imb. 1:12.

4. Yihowa woꞌmanka woyite heeꞌrannoho yitanno hedo huwata qarra ikkitunkero yaada hasiissannonke? Xawisi.

⁴ Yihowa ‘hegereho’ yitanno hedo huwata qarra ikkitinohe? (Isa. 40:28) Batinyu mannirano tenne huwata qarra ikkitinonsa. Eelihu Maganu daafira coyiꞌranni, “Dirisi mageeshshihoro afinohu dino” yiino. (Iyo. 36:26) Kayinni mitto coye huwata hoongoommo daafira calla hakku coyi kaphoho yaa diꞌꞌikkino. Lawishshaho korreente loossanno gara woꞌmunni woꞌma afa hoongammora dandiineemmo; hatto yaa kayinni korreente dino yaa ikkitinoni? Diꞌꞌikkitino! Hatteente gede, Yihowa woꞌmanka woyite noohonna heeꞌrannoho yitanno hedo woꞌmunni woꞌma huwata hoongammora dandiineemmo. Togo yaa kayinni Maganu hegerera diheeꞌrannoho yaa diꞌꞌikkitino. Kalaqaanchu daafira halaale ikkinori, ninke wodanchinoommo woy wodancha hoongoommo daafira disoorramanno. (Rom. 11:33-36) Isi kalqete alamera noore lawishshaho arrishshono beeddaheno kalaqara albaanni nooho. Yihowa ‘wolqasinni baatto kalaqinota’ buunxeemmo gede assinonke. Addanko isi ‘gordo diriirsara’ albaanni nooho. (Erm. 51:15; Soq. 17:24) Hegerera heeꞌra dandiineemmota huluullammeemmokki gede assannonkehu wolu korkaati maati?

KALAQAMMOOMMOHU HEGERERA HEEꞌNAMMORAATI

5. Umi minaanniranna minaamara uyinoonninsa hexxo maati?

⁵ Mannu ooso agurranna Yihowa uullate aana kalaqinohu heeshsho afiꞌrino kalaqami baalu gedensoonni reyannoho. Isi mannu oosora reyitukki heedhanno gede baxxitino hexxo uyinonsa. Ikkirono Yihowa Addaami togo yee qorowisiisinosi: “Bushanna dancha bade afate egenno uyitanno haqqicho laalo kayinni ittooti; tenne haqqicho laalo itootto barra, halaalinta reyatto.” (Kal. 2:17) Addaaminna Heewani Yihowara hajajantoommero direyitanno. Yihowa gedensoonni tenne “heeshshote haqqicho” laalo ittanno gede fajjannonsa yee heda garaho. Insa tenne haqqicho itansa, ‘hegerera heedhannota’ buuxisinonsata leellishshanno.b—Kal. 3:22.

6-7. (a) Mannu ooso kalaqantinohu reyitara ikkinokkita leellishannori woluri maati? (b) Haaro alamera maa assitanni heeꞌra hasiꞌratto? (Misilla lai.)

⁶ Mite xiinxallaano surrenke xa heeꞌneemmo dirinni amada dandiineemmota roortanno mashalaqqe amada dandiitannota buuxxino; tini dhaggete. Mitte 2010nni fultino metseetera surrenketi mashalaqqe amadate dandoo 300 miliyoone saate qaddaꞌnoonni viidiyo ledo taalo ikkitanno yine hendannita kulloonni; tenne viidiyo laꞌne gudate 300 diri hasiisanno. Surrenke kawii lowo geeshsha roortanno mashalaqqe nafa amaddara dandiitanno. Tini, Yihowa surrenke 70 woy 80 diro calla heeꞌne afiꞌneemmo mashalaqqenni roore amada dandiitanno gede asse kalaqinota leellishshanno.—Far. 90:10.

⁷ Qoleno Yihowa kalaqinonkehu hegerera heeꞌra lowo geeshsha halchineemmo gede asseeti. Qullaawu Maxaafi, Maganu “Mannu wodanira hegerimmate hedo worino” yaanno. (Ros. 3:11) Reyo diininke gede assine laꞌneemmo gede assannonkehu mittu korkaati konneeti. (1 Qor. 15:26) Lowo geeshsha xiwammummoro reyo agadhine sammi yine ofollineemmo? Diofollineemmo. Duucha woyite, akimete minira haꞌneemmo hattono dhibba gargadhate xagicho adhineemmo. Isinni quwa saꞌnummokki, reyineemmokki gede dandiineemmore baala assineemmo. Shiiꞌneemmo woyite, shiiꞌnoommo manchi ajano akkalano ikkiro lowo geeshsha xissiisiꞌneemmo. (Yoh. 11:32, 33) Hegerera heeꞌrate hasatto heedhinonkehu baxillaanchu Kalaqaanchinke hakko garinni heeꞌnammora kalaqinonke daafiraati; addaho isi hegerera heeꞌneemmo gede assa dandaanno. Kayinni hegerera heeꞌra dandiineemmota ammanneemmo gede assannonkehu wolu korkaatino no. Hanni Yihowa albano ikko xaa yannara assinohu mitu coyi isi hunda hedinori soorraminokkita leellishanno gara laꞌno.

YIHOWA HEDINORI DISOORRAMINO

8. Isayaasi 55:11 Yihowa ninkera hedinori daafira maa buuxissannonke?

⁸ Addaaminna Heewani cubbo loossinohanna sirchinsara reyo abbitinoha ikkirono, Yihowa mannu oosora hedinore disoorrino. (Isayaasi 55:11 nabbawi.) Isi ammanantinoti mannu ooso hegerera heedhanno gede assate hedinori xaano disoorramino. Yihowa hedinore wonshate coyiꞌrinorinna assinori hatto yine hendeemmo gede assannonke.

9. Maganu eino qaali maati? (Daanieeli 12:2, 13)

⁹ Yihowa reyitinore kayisannonsatanna hegere heeshsho aannonsata qaale eino. (Soq. 24:15; Tit. 1:1, 2) Ammanamino manchi Iyyoobi Yihowa reyitinore kayisannota ammanino. (Iyo. 14:14, 15) Masaalaanchu Daanieeli reyino manni reyotenni kae hegerera heeꞌranno faro afiꞌrannota afino. (Far. 37:29; Daanieeli 12:2, 13 nabbawi.) Yesuusi waro heeꞌrinohu Yihudu mannino Yihowa ammanamino mannira “hegere heeshsho” aannonsata afino. (Luq. 10:25; 18:18) Yesuusi mannaho tenne hexxo duucha hige kulino; qoleno Annisi iso reyotenni kayisinosi.—Mat. 19:29; 22:31, 32; Luq. 18:30; Yoh. 11:25.

10. Alba mannu reyotenni kainota kultanno xagge maa leellishshanno? (Misile lai.)

¹⁰ Yihowa heeshsho aannohonna reyino manna reyotenni kayisate wolqa noosiho. Isi masaalaanchu Eeliyaasi Seraphitaho heedhannote gunnitte mancho qaaqqo reyotenni kayisanno gede wolqa uyinosi. (1 Mot. 17:21-23) Gedensoonni masaalaanchu Elsai Maganu uyinosi wolqanni Suneemi katami mancho qaaqqo reyotenni kayisino. (2 Mot. 4:18-20, 34-37) Tininna mannu reyotenni kainota kultannoti wole xagge, Yihowara reyino manna kayisate wolqa noosita leellishshanno. Yesuusi uullate noo yannara Annisi reyino manna kayisate wolqa uyinosita leellishino. (Yoh. 11:23-25, 43, 44) Xa Yesuusi iima no; hattono isira “Roorre baala gordohonna baattote [uyinoonnisi].” Hakko daafira isira “waammate giddo noori” kaꞌe hegerera heedhannota kultanno hexxo woꞌmitanno gede assate silxaane noosi.—Mat. 28:18; Yoh. 5:25-29.

11. Wodote kakkalo hegerera heeꞌra dandiineemmo gede assitannonkehu hiittoonniiti?

¹¹ Yihowa baxanno Beettisi qarrame reyanno gede fajjinohu mayiraati? Yesuusi mayiraatiro kulanni togo yiino: “Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.” (Yoh. 3:16) Maganu cubbinkera maaro afiꞌneemmo gede Beettosi wodo asse oye, hegere heeshsho afiꞌneemmo faro faninonke. (Mat. 20:28) Soqqamaasinchu Phaawuloosi Maganu assara hedinoha qara coye xawisanni togo yee borreessino: “Reyo dagginohu mittu manchi Addaami widoonni ikkitinonte gede, reyotenni kaꞌꞌano dagginohu mittu manchi Kiristoosi widoonniiti. Addaaminni kainohunni mannu baalu reyannonte gede, Kiristoosi widoonni mannu baalu heeshsho afiꞌranno.”—1 Qor. 15:21, 22.

12. Yihowa Gashshooti isi ninkera hedinori woꞌmanno gede assannohu hiittoonniiti?

¹² Yesuusi, rosaanosi Maganu Mangiste dagganno gedenna Maganu hedinori woꞌmanno gede huuccidhara rosiisinonsa. (Mat. 6:9, 10) Maganu hedinori giddo gamu mannu uullate aana hegerera heeꞌranno gede assate. Tenne assate Maganu Beettosi Gashshootisira Moote asse shoomino. Maganu, hedinore wonshate Yesuusi ledo gashshannoha 144,000 wido ikkino manna uullate aaninni dooranni keeshshino.—Aju. 5:9, 10.

13. Yihowa xaa yannara ma assanni no? Ati maa assa hasiissannohe?

¹³ Yihowa xaa yannara “lowo manna” gamba assanni no; hattono Gashshootisi hunda heedhanno gede qajeelsanni noonsa. (Aju. 7:9, 10; Yai. 2:8) Xaa yannara noohu rooru manni mimmito giwannohanna mimmitu ledo olamannoha ikkirono, lowo manni wido ikkitinori kayinni mereeronsa aye gibbo heedhannokki gede assate sharrantanni no. Lawishshu yaattonni insa bisensa heellakkote soorridhino. (Mik. 4:3) Insa lowo manni goofanno gede assannohu tenne alame olira anga wodhantenni, Maganunna Maganu hedinori daafira mannaho rosiisse, mannu “halaalaancho heeshsho” afiꞌranno gede kaaꞌlitanno. (1 Xim. 6:19) Insa Maganu Mangistera halantino daafira maatensa gibbansara woy angate anje qarrissansara dandiitanno; ikkirono Yihowa hasiisannonsare aannonsata buuxisinonsa. (Mat. 6:25, 30-33; Luq. 18:29, 30) Tini Maganu Gashshooti addinta nooha ikkinotanna Yihowa hedinori woꞌmanno gede assannota buuxissanno.

ALBILLITTE DAGGANNOTA HAGIIRSIISSANNO YANNA

14-15. Yihowa reyo hegerera hunara eino qaali jeefote woꞌmannohu hiittoonniiti?

¹⁴ Yesuusi xa iima Maganu Gashshooti Moote ikke no; hattono isi Yihowa uyino hexxo baala woꞌmitanno gede assanno. (2 Qor. 1:20) Yesuusi 1914nni kayise baarigaarrasi aana roorre afiꞌrino. (Far. 110:1, 2) Yesuusinna ledosi gashshitannori muli yanna giddo qeelle adhitanno; hattono bushuulle huntanno.—Aju. 6:2.

¹⁵ Yesuusihu Kumi Diri Gashshooti yannara reyitinori kaꞌanno; hattono hajajantannori mannu ooso guuta ikkitanno. Jeefote fonqoli gedensaanni Yihowa keeraanote yee yoo yaannonsari ‘baatto ragidhe hegerera heedhanno.’ (Far. 37:10, 11, 29) ‘Goofimarchu diini reyo baꞌanno’; tini hagiirsiissannote!—1 Qor. 15:26.

16. Yihowara soqqammeemmo gede assannonkehu qaru coyi maati?

¹⁶ Xaa geeshsha ronsummonte gede hegerera heeꞌrate hexxonke xintantinohu Maganu Qaali aanaati. Tini hexxo, heeꞌnoommote tenne qarrissanno yannara ammanamme heeꞌneemmo gede kaaꞌlitannonke. Kayinni Yihowa hagiirsiisate hegerera heeꞌra halchatenni sainore assa hasiissannonke. Yihowaranna Yesuusira ammanamme heeꞌneemmo gede assannonkehu qaru coyi insara noonkeho lowo baxilleeti. (2 Qor. 5:14, 15) Kuni baxilli insa lawishsha harunsineemmo gedenna hexxonke wolootaho kulleemmo gede kakkayisannonke. (Rom. 10:13-15) Umonke calla banxeemmokkirenna shaqqadda ikkineemmo gara ronsanni haꞌnummo kiiro, Yihowa hegerera jaallasi assiꞌra hasiꞌranno manni gedeere ikkineemmo.—Ibi. 13:16.

17. Mittu mittunku maa assa hasiissannonke? (Maatewoosi 7:13, 14)

¹⁷ Hegere heeshsho afidhannori wido ikkinammo ikka? Yihowa hegere heeshsho afiꞌneemmo faro faninonke. Ninke assa hasiissannonkeri, heeshshonniwa massitanno doogonni fullummokki heeꞌrate. (Maatewoosi 7:13, 14 nabbawi.) Hegerera heeꞌneemmo woyite heeshsho hiittoota ikkitanno? Aananno birxichira tenne xaꞌmora dawaro afiꞌneemmo.