XIINXALLOTE BIRXICHO 19
FAARSO 6 Gordu Maganu Ayirrinye Duduwanno
Ammanantino Sokkaasine Lawishsha Haꞌrunse
“Sokkaasine Kaaliiqa galattesi.”—FAR. 103:20.
GUULCHO HEDO
Ammanantino sokaasine lawishshinni maa ronseemmoro xiinxallineemmo.
1-2. (a) Sokkaasinetewiinni baxxinoommohu ma garinniiti? (b) Insa ledo mitto assannonke coyi maati?
YIHOWA isiwa abbihe woyite, baxillu noote iso magansidhanno maatewa koyisinohe; tenne maate giddo alamete doyichora noori ammanate roduuwinkenna lowo miliyoone ikkitanno sokkaasine no. (Dan. 7:9, 10) Sokkaasinete daafira hendeemmo woyite insa ninkewiinni baxxitino gara hendeemmoha ikkara dandaanno. Lawishshaho, sokkaasine kalaqantinohu ninke kalaqammammora lowo diri albaanniiti. (Iyo. 38:4, 7) Insa ninkenni roore wolqaataammaho. Qoleno ninke guuntete xeꞌne noonkereeti; insa kayinni keeraanotenna qullaawootaho.—Luq. 9:26.
2 Togoo badooshshi heeꞌrirono sokkaasinete ledo mitto assannonkehu lowo coyi no. Lawishshaho, sokkaasinete gede ninkeno Yihowa akatta leellisha dandiineemmo. Sokkaasinete gede ninkerano doodhate qoosso noonke. Hattono uminke suꞌmi, addi addi akattanna addi addihu loosu qeechi noonke. Qoleno insante gede ninkeno Kalaqaanchonke magansiꞌra hasiissannonke.—1 Phe. 1:12.
3. Ammanantino sokkaasine lawishshinni maa ronseemmo?
3 Sokkaasinete ledo mitto assannonkehu batinyu coyi noo daafira, insahu danchu lawishshi jawaachishannonke. Qoleno insawiinni lowoha hasiisanno roso ronseemmo. Konni birxichira, umo heeshshi assate, manna baxate, kaajjine uurratenna songo xuru nookkita ikkite heedhanno gede assate ammanantino sokkaasine lawishsha haꞌrunsa dandiineemmo gara ronseemmo.
SOKKAASINE UMONSA HEESHSHI ASSITANNOREETI
4. (a) Sokkaasine umonsa heeshshi assitannore ikkansa leellishshinohu hiittoonniiti? (b) Insa umonsa heeshshi assitannohu mayiraati? (Faarso 89:7)
4 Ammanantino sokkaasine umonsa heeshshi assitannoreeti. Insa woꞌnaalshu noonsare, wolqaataammanna hayyoota ikkiturono Yihowa biddishshira hajajantanno. (Far. 103:20) Insa loosonsa loossanno woyite assitinore kulte dibooꞌnitanno; woy mannunnita roortino wolqa noonsata leellishate diwoꞌnaaltanno. Insa mannu suꞌmansa afinokkiha ikkirono Maganu asse yiinonsare hagiirrunni assitanno.a (Kal. 32:24, 29; 2 Mot. 19:35) Sokkaasine Yihowara hasiisanno ayirrinye adha dihasidhanno. Insa lowo geeshsha umonsa heeshshi assitannore ikkitinohu mayiraati? Yihowa baxxannohuraatinna iso lowo geeshsha ayirrissanno daafiraati.—Faarso 89:7 nabbawi.
5. Sokkaasinchu soqqamaasincho Yohaannisi seejji woyite umosi heeshshi assannoha ikkasi leellishinohu hiittoonniiti? (Misileno lai.)
5 Hanni sokkaasine umonsa heeshshi assitannore ikkansa leellishannoha mitto lawishsha laꞌno. Mittu suꞌmasi kulloonnikki sokkaasinchi 96 M.D. balla soqqamaasinchu Yohaannisira dhagge ikkitanno ajuuja leellishinosi. (Aju. 1:1) Yohaannisi ma assiyya? Isi sokkaasincho magansiꞌrate woꞌnaalino. Ikkirono kuni ammanaminohu ayyaanaamu kalaqami bayichonkonni iso togo yee hoolinosi: “Qorophi togo ikkitooti! Anino atenna . . . roduuwikki ledo soqqamaanchootina Magano magansiꞌri!” (Aju. 19:10) Kuni sokkaasinchi lowo geeshsha umosi heeshshi assannoho! Isi ayirrinye uyinasira woy guwinsasira dihasiꞌrino. Kuni sokkaasinchi bayichonkonni Yohaannisi Magano Yihowa illachishanno gede assino. Ikkirono sokkaasinchu Yohaannisi woffi diassino. Kuni sokkaasinchi Yohaannisinni roore Yihowara seeda diro soqqaminohanna wolqaataamo ikkirono, umosi heeshshi asse Yohaannisira ledosi soqqamaancho ikkinota kulinosi. Isi Yohaannisi seejjinoha ikkirono konni geedhino soqqamaanchira kaajjishe dicoyiꞌrino. Hatteentenni shaqqillunni hasaawisinosi. Yohaannisi laino coye dhagge assiꞌrinota sokkaasinchu wodanchikki digatino.
Sokkaasinchu, Yohaannisi amaali woyite umosi heeshshi assannoha ikkinota leellishino (Gufo 5 lai)
6. Sokkaasinete lawishsha haꞌrunsine umonke heeshshi assa dandiineemmohu hiittoonniiti?
6 Sokkaasinete lawishsha haꞌrunsine umonke heeshshi assa dandiineemmohu hiittoonniiti? Ninkeno sokkaasinete gede uyinoonninke looso booꞌninummokki woy baxxitino dandoo noonkeha lawisate woꞌnaallummokki loosa dandiineemmo. (1 Qor. 4:7) Qoleno Yihowara wolootunni roore seeda yanna soqqammoommoha ikkiro woy mite qoosso noonkeha ikkiro, woloota roorroommohu gede assine hedate diwoꞌnaalleemmo. Isinni, lowo qoosso heedhunke kiiro, ninkeneeto wolootaho woriidire assine laꞌꞌa hasiissannonke. (Luq. 9:48) Sokkaasinete gede ninkeno wolootaho soqqama hasiꞌneemmo. Ninkeneeto dibokkeessineemmo.
7. Mitto mancho seejjineemmo woy amaalleemmo woyite umonke heeshshi assineemmota leellisha dandiineemmohu hiittoonniiti?
7 Qoleno ammanate rodoonke woy qaaqqonke seejjineemmo woyite woy amaalleemmo woyite umonke heeshshi assineemmota leellisha dandiineemmo. Mito woyite kaajjinshe seejja hasiissannonkeha ikkara dandaanno. Ikkollana Yohaannisi shaqqillunni seejji sokkaasinchi gede, ninkeno mitto mancho kaajjinshe kayinni hexxo mudhanno gede assinummokkinni amaala dandiineemmo. Woloota roorroommohu gede assine hendeemmokkiha ikkiro, mitto mancho Qullaawa Maxaafa horoonsiꞌne ayirrinyunninna shaqqillunni amaala dandiineemmo.—Qol. 4:6.
SOKKAASINE MANNA BAXXANNO
8. (a) Luqaasi 15:10 kultanno garinni, sokkaasine manna baxxannota leellishshinohu hiittoonniiti? (b) Sokkaasine sabbakate looso loonseemmo woyite kaaꞌlitannonkehu hiittoonniiti? (Misileno lai.)
8 Sokkaasine manna lashshi woy woffi diassitanno. Insa manna baxxanno. Insa cubbaataammu maaro eꞌanno woyite yaano baꞌino geꞌrecho Yihowawa higganno woyite woy mittu manchi heeshshosi biddi assiꞌre halaalu minira daanno woyite hagiidhitanno. (Luqaasi 15:10 nabbawi.) Sokkaasine Maganu Gashshootiha sabbakate looso loonseemmo woyiteno kaaꞌlitannonke. (Aju. 14:6) Insa mannaho xaaddote sabbakkannokkiha ikkirono, mittu halashshaanchi Yihowa daafira rosa hasiꞌranno manchiwa maranno gede massaggasira dandiitanno. Hige sokkaasine mitto halashshaancho woꞌmanka woyite konni garinni massagganno yine afoo wonshine coyiꞌra didandiineemmo. Yihowa isi daafira rosa hasiꞌranno manna kaaꞌlate woy mittu halashshaanchi isi daafira rosa hasiꞌranno manchiwa maranno gede massagate qullaawa ayyaanasino horoonsiꞌrara dandaanno. (Soq. 16:6, 7) Ikkirono isi sabbankeemmo woyite ninke kaaꞌlate sokkaasine horoonsiꞌranno. Hakko daafira dancha duduwo dudumbeemmo woyite sokkaasine kaaꞌlitannonketa addaxxa dandiineemmo.—“Huuccattonsara Dawaro Afidhino” yitanno saaxine lai.b
Mittu minaanninna minaama xaalla gudumaalu soqqansho soqqame kae no. Insa minira haꞌranni heeꞌreenna minaama mitte dadillitino mancho laꞌu. Tini rodoo, sokkaasine ayyaanaamittete kaaꞌlo hasidhannoriwa massaggankera dandiitannota wodanchitino. Ise mancho sheshifachisha hasidhino (Gufo 8 lai)
9. Sokkaasinete lawishsha haꞌrunsine manna baxa dandiineemmohu hiittoonniiti?
9 Sokkaasinete lawishsha haꞌrunsine manna baxa dandiineemmohu hiittoonniiti? Mittu manchi galagale Yihowa Farciꞌraasincho ikkinota kullanni woyite sokkaasinete gede hagiidha dandiineemmo. Galagale halaalu minira higino rodoonke anga fanne haaꞌranna banxeemmosita leellisha dandiineemmo. (Luq. 15:4-7; 2 Qor. 2:6-8) Qoleno sabbakate looso loosate dandiinummore baala assine sokkaasinete lawishsha haꞌrunsa dandiineemmo. (Ros. 11:6) Sokkaasine dancha duduwo dudumbeemmo woyite ninke kaaꞌlitannonte gede, ninkeno ammanate roduuwinke sabbakkanno woyite insa kaaꞌlineemmo faro hasiꞌneemmo. Lawishshaho, gari woꞌnaalshi noosikki halashshaanchi ledo soqqamate pirogiraame fushshiꞌra dandiineemmo. Qoleno geedhitinori woy dhuku anje noonsa roduuwi soqqansho fultanno gede kaaꞌla dandiineemmo.
10. Saara woꞌnaalshinni maa ronseemmo?
10 Yihowara albi gede soqqama dandiinoommokkihalla ikki? Togoo woyiteno sabbakate looso sokkaasinete ledo loosa dandiineemmo doogga noonke. Hanni Hindete heedhannote Saarac yinanni rodoo woꞌnaalsha laꞌno. Ise woꞌma yanna suwisaancho ikkite mito 20 diro soqqantuhu gedensaanni buuto dhiwantino daafira daallasunni kaꞌꞌa hooggino. Ise lowo geeshsha dadillitino. Kayinni ammanate roduuwise baxillunni kaaꞌlitinose daafiranna ganyite Qullaawa Maxaafa nabbabbanno daafira gedensoonni galagalte hagiirraame ikka dandiitino. Hige ise wolu gari soqqansho rosa hasiissinose. Ise borrote sokka borreessate ofolla nafa dandiitannokki daafira farcidhannohu silketenni callaati. Hakko daafira ise alba hasaawissino manniwa dowwoltuta kuni manni Qullaawu Maxaafi daafira afa hasiꞌrannohu wolu mannino noota kulise. Tini mayi guma abbituyya? Boodu agani giddo Saara Qullaawa Maxaafa xiinxallannoha 70 manna afidhino; ise konne manna baala callase xiinxallisse didandiitanno! Hakko daafira mito manna songote giddo noo halashshaanora uyitino. Xaa yannara konni manni giddo batinyu gambooshshe daanni no. Sokkaasine Saara gede sabbakate dandaaminsare baala assitanno halashshaano ledo loosansanni lowo geeshsha hagiidhitanno!
SOKKAASINE CINCITANNORE IKKANSA LEELLISHSHINO
11. Ammanantino sokkaasine cincitannore ikkansa leellishshinohu hiittoonniiti?
11 Ammanantino sokkaasine cincate kaajja lawishsha ikkitinonke. Insa lowo kume diro taashshote xeꞌnenna bunshe laꞌanni cincite keeshshitino. Alba ledonsa Yihowara soqqantannori Sheexaanunna wole batinye ayyaanu kalaqo Yihowara finqiltanna laꞌino. (Kal. 3:1; 6:1, 2; Yih. 6) Qullaawu Maxaafi mitto ammanamino sokkaasincho bushu wolqaataamu sokkaasinchi siꞌꞌinosita kulanno. (Dan. 10:13) Qoleno sokkaasine lowo diro Yihowa halaalunni shiimu manni calla magansiꞌranna laꞌino. Kuni baalu coyi heeꞌrirono ammanantino sokkaasine Yihowara hagiirrunninna diinaggaabbe soqqama diagurtino. Insa Maganu yannasira taashshote xeꞌne baala hunannota affino.
12. Cincineemmo gede kaaꞌlannonkeri maati?
12 Sokkaasinete lawishsha haꞌrunsine cinca dandiineemmohu hiittoonniiti? Sokkaasinete gede ninkeno taashshote xeꞌne laꞌnammora dandiineemmo woy mannu giwankera dandaanno. Kayinni insa gede ninkeno Maganu yannasira bunshe baala hunannota addaxxa dandiineemmo. Hakko daafira ninkeno ammanantino sokkaasine gede, “hexxo mudhine dancha looso loosa [diagurreemmo].” (Gal. 6:9) Maganuno cincineemmo gede kaaꞌlannonketa kule qaale eino. (1 Qor. 10:13) Yihowa qullaawa ayyaanasi aannonke gede huucciꞌra dandiineemmo; kuni ayyaani cincineemmorenna hagiirraamma ikkineemmo gede kaaꞌlannonke. (Gal. 5:22; Qol. 1:11) Mannu giwinohehalla ikki? Woꞌmunni woꞌma Yihowa addaxxi hattono waajjitooti. Yihowa woꞌmanka woyite kaaꞌlannohe hattono jawaachishannohe.—Ibi. 13:6.
SOKKAASINE SONGO XURU NOOKKITA IKKITE HEEDHANNO GEDE KAAꞌLITANNO
13. Goofimarchu yannara sokkaasine loossannohu baxxino loosi hiikkonneeti? (Maatewoosi 13:47-49)
13 Goofimarchu yannara Yihowa sokkaasinete baxxino looso uyinonsa. (Maatewoosi 13:47-49 nabbawi.) Danchu duduwi lowo miliyoone ikkannohu duuchunku gari manni daanno gede assanno. Konni manni giddo mitu heeshshonsa biddi assiꞌre addu Kiristaana ikkanno; mitu kayinni ikkikki gatanno. Sokkaasinete ‘bushuulle keeraanotewiinni badate’ looso uyinoonninsa. Togo yaa insa songo xuru nookkita ikkitanno gede kaaꞌlitanno yaate. Hatto yaa kayinni Yihowa magansiꞌra agurtinori, agurtino korkaati ikkihano ikkiro galagalte dihigganno yaa diꞌꞌikkino; qoleno songote giddo horonta qarra ikkannori diheeꞌranno yaa diꞌꞌikkino. Ikkirono, sokkaasine songo xuru nookkita ikkite heedhanno gede assate diinaggaabbe loossannota addaxxa dandiineemmo.
14-15. Sokkaasinete lawishsha haꞌrunsine songo ayyaanaamittetenninna amanyootunni xuru nookkita ikkitanno gede assa dandiineemmohu hiittoonniiti? (Misillano lai.)
14 Sokkaasinete lawishsha haꞌrunsine songo xuru nookkita ikkitanno gede assa dandiineemmohu hiittoonniiti? Songonke amanyootunninna ayyaanaamittetenni xuru nookkita ikkitanno gede ninke widiidire assatenniiti. Hatto assate dancha jaalla doodhinenna batteessannonkeha aye coye baala gimbe wodananke agadhate sharrammeemmo. (Far. 101:3) Qoleno ammanate roduuwinke Yihowara ammanante heedhanno gede kaaꞌla dandiineemmo. Lawishshaho, mittu ammanate rodiinke jawa cubbo loosinota anfummoro ma assa hasiissannonke? Ammanate rodoonke banxeemmosi daafira isi tenne songote cimeeyyera kulanno gede jawaachinsheemmosi. Isi kulannokkiha ikkiro kayinni ninke songote cimeeyyera kulleemmo. Yihowa ledo noosi jaalooma huꞌnanni noohu ammanate rodiinke mulenni kaaꞌlo afiꞌrara hasiꞌneemmo!—Yai. 5:14, 15.
15 Jawa cubbo loossinore mitoota songotenni fushshinanni; tini dadillissannote. Togoo woyite insawa ‘aana agurreemmo.’d (1 Qor. 5:9-13) Tini qixxaawo songo xuru nookkita ikkitanno gede assitanno. Qoleno songotenni fushshinoonniriwa aana qorophine insara baxille leellinsheemmo. Insawa aana giwanke insa assootensa biddi assidhanno gede kaaꞌlitansara dandiitanno. Insa galagalte higguro Yihowanna sokkaasinesi ledo mitteenni hagiidhineemmo.—Luq. 15:7.
Mittu ammanate rodiinke jawa cubbo loosinota anfummoro maa assa hasiissannonke? (Gufo 14 lai)e
16. Sokkaasinete lawishsha haꞌrunsate sharramattohu hiitte doogganniiti?
16 Ammanate illenkenni ayyaanaame alame laꞌꞌanna sokkaasinete ledo mitteenni loosa ninkera lowo ayirrinyeeti! Insa lawishsha haꞌrunsine umonke heeshshi assino, manna banxo, cincineemmore ikkino hattono songo amanyootunninna ayyaanaamittetenni xuru nookkita ikkite heedhanno gede kaaꞌlino. Ammanantino sokkaasine lawishsha haꞌrunsineemmoha ikkiro, ninkeno hegerera Yihowa magansidhanno maate wido ikka dandiineemmo.
FAARSO 123 Tiokiraasete Wodho Ayirrise Heeꞌra
a Lowo xibbe miliyoone ikkitanno sokkaasine nooha ikkirono, Qullaawu Maxaafi giddo lamu sokkaasinchi suꞌma calla kulloonni; insano Mikaeeliitinna Gebirieeliiti.—Dan. 12:1; Luq. 1:19.
b Ledde afate, Yihowa Farciꞌraasinete Xiinxallote Kaaꞌlitanno Borrora nooha “Sokkaasine” yaanno birxicho lai.
c Suꞌma soorrinoonni.
d Songotenni fushshinoonni manchi songote gambooshshe dayiro, 2024 Aliidi Bisi Rippoortera Kiiro 2 kulloonninte gede halashshaano Qullaawu Maxaafinni qajeelino tiiꞌꞌinsa kulannonsa garinni iso keere haadhannoronna teꞌee uminsa doodha dandiitanno.
e MISILLATE XAWISHSHA: Mitte rodoo jaalase loossino cubbo songote cimeeyyera kultanno gede jawaachishshanni no. Mite yanna geeshsha agarteennase kula gibbino daafira rodoo umise marte cimeeyyete kultanni no.