Asan’ny Apostoly

27 Nitampaky ty hevitsy fa halefa sambo ho a Italia any zahay. Le namea an’i Jolio, azy manamboninahitsy baka amy toropy maramilan’i Aogosto iny, Paoly noho ty gadra sisany. 2 Sambo baka a Adramytena any ty niondrananay, le fa handeha mbamy pôro amy sisin’ny riakin’ny faritanin’i Azia eny sambo io. Le nandeha zahay sady niaraky taminay koa Aristarko, azy Makedonianina baka a Tesalonika any zay. 3 Niavy ta Sidona ao zahay hamarain’iny. Soa fanahy* tamy Paoly, Jolio ka nengany ho amy namany rey any ie sady nengany hokarakaran-drozy.

4 Niala tao ndraiky zahay, le nanaraky ty sisin’ny riakin’i Sipra mba tsy ho tratsin’ny tsioky, satria nanohitsy anay tsioky iny. 5 Bakeo nandeha tanivon-driaky eny zahay lafa nandalo tandrifin’i Kilikia noho Pamfilia, ka niavy tamy pôron’i Myra, a Lykia any. 6 Nahita sambo tao manamboninahitsy iny. Baka a Aleksandria any sambo io, le ho a Italia any, ka nampiondraniny ao zahay. 7 Le nandeha moramora tanatin’ny andro maromaro sambo iny, ka nisahira zahay vo niavy ta Kinido ao. Le nandalo tandrifin’i Salmona zahay, bakeo nanaraky ty sisin’ny riakin’i Kreta mba tsy ho tratsin’ny tsioky, satria tsy nengan’ny tsioky iny handeha mana aloha zahay. 8 Ndre fa nanaraky sisiny aza zahay, le mbo nisahira avao sambo iny tratsin’ny tsioky iny. Fe ndre teo zay, le niavy tamy pilasy kaihy hoe Serana Kanto zay avao zahay. Tanilan’ny tanàn’i Lasea eo ty nisy an’ny pilasy io.

9 Fa nandeha avao ty fotoa, ka fa natahora ty nandeha sambo, satria ndre ty fifalia hany amy andro Fandimbofam-pahotà aza fa nitampitsy. Farany nanoro hevitsy an-drozy Paoly 10 hoe: “Laha ty fahitako azy, le ho azon-draha tsika laha mbo mandeha avao, satria tsy sambo toy noho enta reo avao ro ho simba, fa mety hafointsika koa ty aintsika.” 11 Fe ty resakin’ny mpanday sambo noho tompon’ny sambo iny ro norihin’ny manamboninahitsy iny, fa tsy resakin’i Paoly iny. 12 Tsy soa ijanona amy andro asotry ty amy pôro iny eo, farany nanoro hevitsy ty ankamaroan’olo hoe aleo miala ao, vasa mba ho avy zisiky a Foiniksa any avao, le hijano any amy fotoan’ny asotry. Pôron’i Kreta, Foiniksa io le mitoliky mana avaratsy antinana noho mana antimo antinana.

13 Lafa nisoasoa ty tsioky baka antimo any, le nieritseritsy rozy hoe ho avy amy pilasy tean-drozy handehana iny any. Le nampiakary ty talimbato* ka lasa rozy nanaraky ty sisin’i Kreta. 14 Fe fotoa kelikely tafarani-zay le nisy tsioky be kaihy hoe Eorakylona* nahazo an’ny Nosy iny. 15 Finaokin’ny tsioky iny amy zay sambo iny, le tsy niafaky nanohitsy, ka nenganay handesiny amy ze anandesany azy any. 16 Bakeo nanaraky ty sisin’ny nosy kelikely kaihy hoe Kaoda zay zahay mba tsy ho tratsin’ny tsioky iny, fe mbo nisahira avao zahay vo nahazo an’ny laka* tamy faran’ny sambo iny eo. 17 Lafa nitafiakatsy tanaty sambo ao laka iny, le nifehezin-drozy ty vatan’ny sambo iny amy zay hatanjaky soa. Le natahotsy hidofotsy tamy dongom-pasin’i Sirtisy* rozy, ka najotson-drozy lay iny, le nandeha amy zao avao sambo iny. 18 Fe mbo natoratorakin’ny tsioky be iny zahay, ka natao ze hampaivaiva an’ny sambo iny hamarain’iny. 19 Le ty tanan-drozy mihintsy ro nanary ty fitaova tamy sambo iny ao, tamy andro fahatelo.

20 Fa maromaro andro zay ro tsy nihita sasy ty masoandro na ty basia, sady nanjeky* tsioky be nahazo anay iny, ka fa tsy nitamà loatsy zahay hoe mbo ho avotsy. 21 Le fa ela ty olo ro tsy nihina, ka nitsanga tanivon-drozy eo Paoly sady nivola hoe: “Tokony ho narahinareo mihintsy resako iny, ka tsy niala ta Kreta any tsika, le tsy ho niazon-draha manahaky ani-zao sady tsy ho nisimba sambo toy. 22 Fe mbo mampirisiky anareo aho henanizao mba tsy ho kivy,* satria tsy hisy ho maty nareo, fa ty sambo avao ro ho rava. 23 Tsy zay fa nisy anjelin’ny Ndranahary tompoko sady anaovako fanompoa masy iny nitsanga tanilako eo nankaly, 24 le nivola hoe: ‘Ka matahotsy Paoly, fa tsy maintsy hitsanga amy Kaisara eo iha. Le hiaro ty ainao Ndranahary sady hiaro ty aini-ze olo iaby miaraky aminao anaty sambo ao.’ 25 Ka le mahereza!* Mino aho fa hotanterahi-Ndranahary vatany ze raha nivolaniny tamiko. 26 Fe tsy maintsy hidofotsy amy nosy raiky tsika.”

27 Mbo natoratorakin’ny tsioky iny tamy riakin’i Adria eny avao zahay tamy haly faha-14. Lafa niavy ty vakimirahaly, le nijilon’ny mpiasan’ny sambo rey hoe fa narìny tany maiky rozy. 28 Nirefesin-drozy rano iny ka nihitan-drozy fa 36 metra eo ho eo* ty halalikiny. Le nandeha kelikely rozy bakeo nandrefy ndraiky, le nihitan-drozy fa 27 metra eo ho eo* ty halalikiny. 29 Le natahotsy rozy tsy no hidofotsy amy vato zahay. Le nalatsakin-drozy talimbato* efatsy baka amy faran’ny sambo iny ao rey, ka fa tsy nilinin-drozy ty hahamaray an’ny andro iny. 30 Fe nita hilay baka anaty sambo ao mpiasan’ny sambo rey. Najotson-drozy an-driaky eny amy zay laka iny, ka nanao kisary handatsaky talimbato* baka amy lohan’ny sambo iny ao rozy. 31 Le nivola tamy manamboninahitsy iny noho tamy maramila rey Paoly hoe: “Laha tsy mijano anaty sambo ato olo reo, le tsy ho avotsy nareo.” 32 Bakeo nitampahin’ny maramila rey ty taly tamy laka iny, le nengan-drozy ho latsaky laka iny.

33 Lafa narìny ho vaky ty andro, le nampirisiky ty olo iaby hihina Paoly. Hoy ty asany: “Andro faha-14 nandinisanareo tanatin’ny tahotsy noho tsy nihinananareo raha mihintsy androany. 34 Ka le mampirisiky anareo aho mba hihina satria hahasoa anareo raha zay. Tsy zay fa tsy hisy hihintsa* ndre ty raiky amy volon-dohanareo aza.” 35 Lafa baka nivola ani-zay ie, le nangalaky mofo, ka nisaotsy a-Ndranahary tamin’olo iaby eo. Bakeo nitampahiny mofo iny le nanomboky nihina ie. 36 Le tsy nikivy sasy* rozy iaby ka nanomboky nihina. 37 Nisy 276 ty isakinay iaby tamy sambo iny ao. 38 Lafa nivintsy rozy, le narian-drozy tan-driaky any varimbazaha rey mba hampaiva an’ny sambo iny.

39 Lafa nazava ty andro le nihitan-drozy tany maiky iny, kanefa tsy nihain-drozy hoe aia io. Fe nahajilo faritsy marivo misy fasy rozy, ka tapa-kevitsy hampidofotsy an’ny sambo iny eo laha vitan-drozy. 40 Nitampahin-drozy amy zay talimbato* rey le nengan-drozy ho latsaky an-driaky any. Nivahan-drozy koa ty taly namehy an’ny fivè fandaisa an’ny sambo iny rey. Ka lafa baka nampiakarin-drozy ty lay aloha eo mba ho azon-tsioky, le nandeha nana amy fasy iny eny rozy. 41 Fe nidofotsy tamy dongom-pasy anaty riaky ao sambo iny. Le nitafijano sambo iny ka nipaky ao ty lohany le tsy nihetsiky sasy, fa ty tafaran’ny sambo iny ao nipilapilaky tratsin’ny lozoky rey. 42 Farany nanapa-kevitsy maramila rey fa hamono an’ny gadra rey amy zay rozy tsy hisy hilano bakeo hilay. 43 Fe nitapa-kevitsy hiaro ty ain’i Paoly manamboninahitsy iny, ka tsy nengany hanatanteraky an’ny raha nieritseretin-drozy hatao iny maramila rey. Le nivolaniny hitsamboko an-driaky any ze nahay nilano mba ho avy voalohany an-tety eny. 44 Le ty sisany nanaraky afara, ka niondra hazo pisapisaky na niondra raha hafa baka amy sambo iny. Le niavy soa tan-tety eny rozy iaby.