Asan’ny Apostoly
19 Tamy Apolosy mbo ta Korinto any, le nitety an’ny faritsy tsy amoron-driaky rey Paoly sady nijotso ta Efesosy any. Nahita mpianatsy vitsivitsy tao ie, 2 le hoy ty asany: “Nahazo fanahy masy va nareo lafa nanjary mpino?” Le namaly rozy hoe: “Zahay aza mbo tsy naharè mikasiky an’ny fanahy masy zao mihintsy ka.” 3 Le hoy ty asany: “Fa ino ty batisa nanaova batisa anareo?” Le namaly rozy hoe: “Ty batisan’i Jaona.” 4 Le hoy Paoly: “Nanao batisa Jaona mba hampisehoan’olo hoe fa nibebaky rozy. Nivola tamin’olo ie mba hino ani-azy ho avy afarany ao iny, tsy ia zay fa Jesosy.” 5 Lafa naharè ani-zay rozy, le natao batisa tamy anaran’i Jesosy Tompo. 6 Le nilatsaky tamin-drozy ty fanahy masy lafa nametra-tana tamin-drozy Paoly. Le nanomboky nivola tamy fivolana samby hafa rozy sady naminany. 7 Lahilahy 12 eo ho eo ty isakin-drozy laha atambatsy.
8 Le nilitsy tamy synagoga ao Paoly sady nahasaky nitory tao tanatin’ny telo vola. Nandaha-teny noho nandresy lahatsy olo mikasiky ty Fanjakà-Ndranahary ie. 9 Fe tsy nety nino azy mihintsy ty sisany,* fa nanaraty Ty Lala* tanatrehan’ny vahoaky eo. Farany niala tamin-drozy eo ie, ka nandesiny mpianatsy rey, le nandaha-teny sanandro tamy trano malalakin’i Tyrano ao ie. 10 Naharitsy roe tao raha zay, ka naharè ty safàn’ny Tompo iaby ze olo nipetraky tamy faritanin’i Azia any, ndre Jiosy zay ndre Grika.
11 Le mbo nanao fahagagà miavaky tamy alalan’i Paoly avao Ndranahary. 12 Ka ndre ty lambany noho ty akanjony nikasiky tamy vatany avao aza ro nandesy tamy marary rey any, le fa nahafaky arety sady nampiboaky an’ny fanahy raty rey. 13 Fe nisy Jiosy rezay nandehandeha mba hampiboaky demonia. Niezaky nikaiky ty anaran’i Jesosy Tompo koa rozy lafa nahita olo nisy fanahy raty. Le hoy ty asan-drozy: “Mandidy mafy anareo amy anaran’i Jesosy, azy torin’i Paoly iny aho mba hiboaky!” 14 Nisy lahilahy fito anan’ny sefon’ny mpisoro kaihy hoe Skeva, nanao manahaky ani-zay. 15 Fe namaly an-drozy fanahy raty rey hoe: “Haiko Jesosy, sady haiko koa Paoly, fa nareo ia?” 16 Le niambotraky tamin-drozy eny lahilahy nisy fanahy raty iny ka nialy tamin-drozy, le naharesy an-drozy kiraidraiky. Le nilay tsy amin-tsiky niboaky an’ny trano iny rozy, sady naradratsy. 17 Lasa nahay an’ny raha zay ty olo iaby nipetraky ta Efesosy ao, ndre Jiosy zay ndre Grika. Le natahotsy ty olo iaby ka vomaiky nahazo voninahitsy ty anaran’i Jesosy Tompo. 18 Le maro tamin’olo nanjary mpino rey ro niavy ka nieky tamin’olo iaby teo ty raha nataon-drozy sady nitantara an’ny raha zay mazava soa. 19 Maro tamin’olo zatsy nampiasa mazỳ rey koa ro nanday ty bokin-drozy, ka nañoro an’ny raha zay tanatrehan’olo iaby eo. Le nikontikontin-drozy ty mety ho vilin’ny raha zay, ka nihitan-drozy hoe nahasesy volafoty 50 000* ty viliny. 20 Vokatsin’ny herin’i Jehovah, le mbo niparitaky avao ty safàny sady vomaiky nisy heriny tamin’olo.
21 Tafaran’ny nisehoan’ny raha iaby rezay, le tapa-kevitsy ho a Jerosalema any Paoly, lafa baka nandalo mba Makedonia noho Akaia. Hoy ty asany: “Tsy maintsy mandeha a Roma any koa aho lafa baka a Jerosalema any.” 22 Le nirahiny ho a Makedonia any ty roe tamin’olo nikarakara azy rey, tsy ia zay fa Timoty noho Erasto, fa ie mbo nijano kelikely tamy faritanin’i Azia any.
23 Nisy koronta mikasiky Ty Lala,* tamy fotoa zay. 24 Tsy zay fa namboatsy tempoly kelikely volafoty ho an’i Artemisy ty lahilahy raiky kaihy hoe Demetrio. Mpanefy volafoty Demetrio io, le nahavy ty mpanao asa tana hahazo drala be raha nataony zay. 25 Le navorin’i Demetrio rozy noho ty olo hafa mpanao asa tana, ka hoy ty asany: “Hainareo soa fa asa toy ro mahapanarivo antsika. 26 Fe hitanareo noho renareo henanizao fa tsy ta Efesosy eto avao, fa presky ho amy faritanin’i Azia iabiaby mihintsy ro nandresy lahatsy olo maro Paoly sady nampiova hevitsy an-drozy. Nao zao hoe tsy ndranahary zao ty ndranahary namboary tana. 27 Midika raha zay fa tsy asantsika toy avao ro atahora ho raty laza, fa hoeritseretin’olo ho tsy misy dikany koa ty tempolin’i Artemisy, azy ndranaharivavy mahery iny. Le tsy hohajan’olo ndranaharivavy iny, azy ivavahan’olo iaby amy faritanin’i Azia noho amy tany iaby misy olo iny.” 28 Neloky marè ty olo lafa naharè ani-zay ka nikorakoraky hoe: “Mahery Artemisy ndranaharin’ny Efesianina!”
29 Le nisabadida ty tan-tanà ao, ka niaraky nirodorodo nilitsy tamy pilasy fihisà tantara ao rozy iaby. Le nitaritaritin-drozy ho any koa Gaio noho Aristarko, azy Makedonianina roe lahy niharo lia tamy Paoly rey. 30 Ta hilitsy amy Pilasy iny ao Paoly mba hiresaky amy vahoaky iny, fe tsy nengan’ny mpianatsy rey. 31 Ndre ty sisany tamin’olo mpikarakara fety noho mpikarakara fihisà rey aza, azy nisoa fanahy tamy Paoly rey, le nandefa hafatsy aminy ka nisoloho taminy mba tsy hilitsy amy pilasy io ao tsy no ho azon-draha. 32 Tsy zay fa nikorakoraky ty olo tao, ka ty sisany nivola raha hafa, le ty ilany nivola raha hafa. Nisabadida ty vahoaky iaby nivory tao, le tsy hain’ny ankamaroan-drozy iaby hoe ino ty antony niavian-drozy eo. 33 Le natositosikin’ny Jiosy rey ho aloha any Aleksandra, ka nandesin’olo niala tamy vahoaky rey teo. Le nanao fihetsiky tamy tanany Aleksandra mba hampitsìna an’ny olo rey, satria ta hivola ty fiarovany ty vatany ie. 34 Fe laha vo nihain’olo rey fa Jiosy ie, le niaraky nikorakoraky marè tanatin’ny lera roe teo ho eo rozy iaby hoe: “Mahery Artemisy ndranaharin’ny Efesianina!”
35 Nivitan’ny ben’ny tanà iny avao ty nampitsỳ an’ny vahoaky rey tamy farany, ka hoy ty asany: “Nareo Efesianina, ia aminareo vatany moa ro tsy mahay hoe tanàn’ny Efesianina toy ro mpiamby ty tempolin’i Artemisy ndranahary mahery noho azy sary latsaky baka an-danitsy any iny? 36 Satria tsy azo ialia hevitsy raha zay, le tokony ho kalma nareo ka tsy halisalisa hanao raha. 37 Fa lahilahy nandesinareo eto reo, le tsy mpandrava tempoly sady tsy mpanivativa ty ndranaharintsika. 38 Ka laha ta hitory olo Demetrio noho ty mpanao asa tana namany, le eo ty andro fitsarà sady eo koa ty governeram-paritsy.* Any rozy ro tokony hifampitory. 39 Fa laha mila raha hafa ankoatsini-zay nareo, le amy fivoria mahazatsy ro tsy maintsy handrambesa fanapaha-kevitsy mikasiky ani-zay. 40 Fa laha raha niseho nandroany zay, le mety hasara ho mampirisiky olo hanohitsy fanjakà tsika, satria tsy misy fanazavà azontsika amea mba hanazavà hoe ino ty antony nahavy an’ny rotaky toy.” 41 Lafa baka nivola ani-zay ie, le naravany vahoaky rey.