Asan’ny Apostoly
8 Le neken’i Saoly ty namonoa an’i Stefana.
Tamy fotoa zay, le nanjeky ty fanenjeha ty fiangona ta Jerosalema any, ka niparitaky mbamy faritsin’i Jodia noho Samaria any rozy iaby, laha tsy apostoly rey avao. 2 Fe nisy lahilahy natahotsy a-Ndranahary rezay nanday an’i Stefana le nandevy azy. Le nitany marè rozy satria nalahelo azy. 3 Fa Saoly nanao raha mba handravà ty fiangona. Le niteteziny kiraidraiky ty tranon’olo tamy fiangona ao rey, ka nilirany forosè, le nitaritaritiny ho amy prizon any rozy, ndre lahilahy zay ndre ampela.
4 Fa azy niparitaky rey nandeha mbamy faritsy iny, ka nitory ty vaovao soan’ny safà-Ndranahary. 5 Le nandeha nijotso amy tanàn’i* Samaria any Filipo, ka nitory mikasiky an’i Kristy any. 6 Nijanjy soa ty raha iaby nivolanin’i Filipo ty vahoaky, nijanjy azy rozy sady nanenty ty famantara nataony. 7 Tsy zay fa nimaro tamin’olo rey ro nisy fanahy maloto, le nikorakoraky fanahy rey lafa niboaky baka amin-drozy ao. Maro koa ty kombo noho ty kilemaina lasa nisalama. 8 Le nifalifaly biby ty olo tamy tanà io ao.
9 Nisy lahilahy mana anara Simona zay amy zay tamy tanà iny ao. Mpihisa aoly lahilahy io, ka nampieky olo ta Samaria ao, sady nandrengy vata koa ie hoe tsy misy mandilatsy azy. 10 Nijanjy soa azy ty olo iaby, ndre ty anakajà zay ndre ty olobe. Le nivola rozy hoe: “Lahilahy io ro Heri-Ndranahary, kaihy koa ie hoe Hery Bevata.” 11 Farany nijanjy soa azy ty olo, satria fa ela ro nampieky an-drozy ty fahaizany mihisa aoly. 12 Fe nino ty raha nivolanin’i Filipo olo rey, lafa nitory ty vaovao soa mikasiky Fanjakà-Ndranahary noho mikasiky ty anaran’i Jesosy Kristy ie. Le natao batisa rozy, ndre lahilahy zay ndre ampela. 13 Ndre Simona koa aza nino ka natao batisa, le niaraky tamy Filipo avao ie tafarani-zay. Le nitseriky ie nahita ty famantara noho ty fahagagà miavaky nataon’i Filipo.
14 Lafa niren’ny apostoly ta Jerosalema any rey fa naneky ty safà-Ndranahary ty olo ta Samaria any, le nirahin-drozy ho any Petera noho Jaona. 15 Le nandeha nijotso any Petera noho Jaona ka nivavaky ho an-drozy mba hahazoan-drozy ty fanahy masy. 16 Tsy zay fa mbo tsy nisy nilatsahan’ny fanahy masy olo tany rey, fa natao batisa tamy anaran’i Jesosy Tompo avao. 17 Le nametra-tana tamin-drozy Petera noho Jaona, ka nahazo fanahy masy amy zay rozy.
18 Lafa nihitan’i Simona fa nahazo fanahy masy ze olo nametrahan’ny apostoly rey tana, le nameany drala Petera noho Jaona, 19 sady hoy ty asany: “Mba ameo amy fahefà zay koa aho. Amy zay hahazo fanahy masy ze olo ametrahako tana.” 20 Fe hoy ty asan’i Petera taminy: “Enganè ho ripaky miaraky aminao ty volafotinao! Mieritseritsy va iha fa azo vilỳ drala ty fanomeza maimaim-poana baka amy Ndranahary? 21 Tsy mana anjara amy raha zay mihintsy iha, satria tsy mahity fo amaso-Ndranahary eo. 22 Ka mba mibebaha, le mialà amy ty haratia sainao, le misolohoa amy Jehovah vasa mba hanenga ty hadisoanao avao ie, amy ty eritseritsy raty am-ponao ao. 23 Tsy zay fa hitako hoe sahala poizy mafaitsy* iha sady andevon’ny tsy fahamarina.” 24 Le hoy ty asan’i Simona tamin-drozy: “Mangataky anareo aho mba hisoloho amy Jehovah ho ahy, amy zay tsy hisy hahazo ahy raha nivolaninareo rezay.”
25 Lafa baka namita soa ty fitoriany Petera noho Jaona, sady nivola ty safàn’i Jehovah, le nimpoly ta Jerosalema any. Nitory ty vaovao soa rozy lafa nandalo mbamy tanà malinidiniky maro misy an’ny Samaritanina rey.
26 Fe nisy anjelin’i Jehovah nivola tamy Filipo hoe: “Mitsangàna, le mandehana mana antimo any, amy lala mijotso baka Jerosalema mandeha a Gaza any iny.” —Lala amy dezera* any raha zay.— 27 Le nitsanga Filipo ka nandeha, le nahita tandapa* etiopianina. Manam-pahefà tambany fahefàn’i Kandasy mpanjakavavin’ny Etiopianina tandapa io, sady niandraikitsy ty hananany iaby. Nandeha a Jerosalema any ie mba hivavaky, 28 le tan-dala holy ie tamy fotoa zay. Nipetraky tanaty saretiny* ao ie sady namaky marè ty bokin’i Isaia mpaminany. 29 Farany nivola tamy Filipo ty fanahy hoe: “Mandehana mamonjy an’ny sarety* roy!” 30 Le nilailay tanilan’ny sarety iny eny Filipo ka naharè azy namaky marè ty bokin’i Isaia mpaminany. Le hoy ty asan’i Filipo: “Azonao* soa va raha vakinao io?” 31 Le hoy ty asany: “Akory moa ty hahazoako azy laha tsy misy olo manazava azy amiko?” Le nangataky an’i Filipo ie mba hiakatsy le hipetraky anilany eo. 32 Le ho zao andininy amy Soratsy Masy nivakiny iny: “Sahala aondry nandesy hovonoa ie, le sahala anak’aondry mitsỳ alohan’ny mpihety azy eo, ka tsy mivola mihintsy. 33 Tsy mba namea rariny ie tanatin’ny fotoa nangalà baraka azy. Le ia ty hivola ty tsipiriany mikasiky ty taranaky niaviany? Fa ndre ty ainy aza nalà tsy ho amy tany.”
34 Le hoy ty asan’ny tandapa iny tamy Filipo: “Nao tse, ia ty tean’ny mpaminany iny horesahy amy raha zay? Ty vatany avao va sa olo hafa?” 35 Le nivola ndraiky Filipo, ka nitory taminy ty vaovao soa mikasiky an’i Jesosy, le andininy iny avao ro nanombohany an’ny raha zay. 36 Tamy rozy mbo tan-dala eny iny, le niavy tamy pilasy nisy rano zay, ka hoy tandapa iny: “Io misy rano, ka ino ty misaka ahy tsy hatao batisa?” 37 —— 38 Nampijanoniny amy zay sarety* iny. Le nijotso tanaty rano ao Filipo noho tandapa iny, ka nataon’i Filipo batisa ie. 39 Lafa niakatsy baka anaty rano ao rozy, le nandesin’ny fanahin’i Jehovah niala teo malaky Filipo, ka tsy nihitan’ny tandapa iny sasy. Le nanohy ty liany tandapa iny sady falifaly. 40 Fa Filipo niavy ta Asdoda any, le nandeha mbamy faritsy iny any. Tsy nieny nitory ty vaovao soa tamy ze tanà iaby nandehanany ie, zisiky niaviany ta Kaisaria any.