Nisoratin’i Matio
6 “Miambena soa tsy no hoe mba ho hitan’olo avao ty antony anaovanareo ty marina aminy eo. Fa laha tsy zay, le tsy hahazo fitahia baka amy Babanareo an-danitsy any iny nareo. 2 Ka lafa manome raha ho an’ny mahantra* iha, le ka mitsoky antsiva* alohanao eo, satria ho zay ty ataon’ny mpiatsaravelatsihy rey amy synagoga ao noho an-dala eny, mba hideran’olo an-drozy. Ambarako anareo mazava fa fa azon-drozy iaby ty anjaran-drozy. 3 Fa lafa manome raha ho an’ny mahantra iha, le ka atao hain’ny tananao ankavia ze ataon’ny tananao ankavana, 4 mba tsy hisy hahay* hoe niferinay ty mahantra iha. Le hitahy anao azy Babanao mahita anao iny, ndre tsy hitanao aza ie.*
5 “Lafa mivavaky koa nareo, le ka manao manahaky an’ny mpiatsaravelatsihy rey. Tea mivavaky mitsanga amy synagoga ao noho amy lala be* eny rozy satria ta ho hitan’olo. Ambarako anareo mazava fa fa azon-drozy iaby ty anjaran-drozy. 6 Fa lafa mivavaky iha, le milira an-tranonao ao. Bakeo hilio ty varavara, le mivavaha amy azy Babanao tsy hita maso* iny. Le hitahy anao Babanao mahita ty raha iaby* iny. 7 Lafa mivavaky nareo, le ka mampimpolimpoly raha mitovy avao manahaky ty ataon’olo amy zao tontolo zao.* Satria rozy mieritseritsy hoe lafa lava biby ty vavaky ataon-drozy, le hojanjìny rozy. 8 Ka manao manahaky an-drozy zany, satria fa hain’ny Babanareo ze raha ilànareo, ndre mbo tsy mangataky aminy aza nareo.
9 “Mivolana manahaky ani-zao zany lafa mivavaky:
“‘Babanay an-danitsy any, enganè hohamasìny* ty anaranao! 10 Enganè ho avy ty Fanjakànao! Enganè hatao an-tany etoy ty sitraponao, manahaky ty an-danitsy any! 11 Ameo anay androany ze hany* ampy anay androany, 12 le engao ty hadisoanay,* manahaky ty nanenganay ze nanao diso* taminay. 13 Le ka engà ho resin’ny fakam-panahy zahay,* fa afaho* amy azy raty iny.’
14 “Laha manenga hadisoan’olo nareo, le hanenga ty hadisoanareo koa Babanareo an-danitsy any iny. 15 Fa laha tsy manenga hadisoan’olo nareo, le tsy hanenga ty hadisoanareo koa Babanareo.
16 “Lafa mifaly hany nareo, le ka manao kisary malahelo manahaky an’ny mpiatsaravelatsihy rey. Tsy karakaran-drozy* ty tarehin-drozy, soa ho hitan’olo hoe mifaly hany rozy. Ambarako anareo mazava fa fa azon-drozy iaby ty anjaran-drozy. 17 Fa lafa iha mifaly hany, le hosoro menaky ty lohanao le sasao ty tarehinao, 18 amy zay Babanao tsy hita maso* iny avao, fa tsy olo, ro hahita hoe mifaly hany iha. Le hitahy anao azy Babanao mahita ty raha iaby* iny.
19 “Ka mamory hanana an-tany etoy sasy, satria ty etoy misy bibikely* noho heriky manimba an’ny raha rey, sady misy mpangalatsy mamaky trano noho mangalatsy. 20 Fa aleo mamory hanana an-danitsy any, satria ty any tsy misy bibikely na heriky manimba, sady tsy misy mpangalatsy mamaky trano na mangalatsy. 21 Fa amy ze pilasy misy ty hanananao, le ho any koa ty fonao.
22 “Ty masonao ro jiron’ny vatanao. Ka laha mifantoky soa* zany ty masonao, le hazava soa* ty vatanao iaby. 23 Fa laha maniry rahan’olo* ty masonao, le haìky ty vatanao iaby. Laha maìky ty hazavà anatinao ao, le tena hangokòky raha zay!
24 “Tsy misy mahavita manompo tompo roe, fa ty raiky ho halany, le ty raiky ho teany, na ty raiky hipitihany le ty raiky tsy hodareany.* Tsy mahavita manompo a-Ndranahary noho ty Hanana nareo.
25 “Zay ro mahavy ahy hivola aminareo hoe: Ka atao mampiasa loha anareo sasy ty ainareo, anatini-zay ty hoe ino ty hohaninareo na hinominareo. Ka atao mampiasa loha anareo koa ty vatanareo, anatini-zay ty hoe ino ty hisikinanareo. Tsy sarotsy mandilatsy ty hany va ty ainareo, le tsy sarotsy mandilatsy ty siky va ty vatanareo? 26 Henteo soa voro anabo eny rey: Tsy mamafy na mamory vokatsy na manajary hany anaty trano fanajaria vokatsy raha rey, fe manome hany an-drozy Babanareo an-danitsy any iny. Tsy mbo sarotsy mandilatsy ani-rey va nareo? 27 Ia aminareo ty mahay manalava ty androm-piainany, ndre kelikely* avao, lafa miasa loha? 28 Manino koa nareo ro miasa loha amy resaky siky? Diniho tse* moa folera* an-tonda eny rey. Tsy miasa mafy na mitrebiky* raha rey, 29 kanefa ambarako anareo fa ndre Solomona nana raha soa maro iny aza, mbo tsy nisalotsy manahaky ty raiky amy rey. 30 Ka laha ty raha mitiry an-tonda any aza ampisikini-Ndranahary soasoa manahaky ani-zay, kanefa androany avao rey ro ho eo, fa hamaray hatoraky anaty afo,* vo handraky va nareo, nareo le kely finoa io? 31 Ka miasa loha mihintsy zany nareo hoe: ‘Ino ty hohaninay?’, na ‘Ino ty hinominay?’, na ‘Ino ty hisikinanay?’ 32 Satria raha iaby rezay ro tena irini-zao tontolo zao. Fa hain’ny Babanareo an-danitsy any iny fa ilànareo raha iaby rezay.
33 “Ilao avao tse* zany Fanjakà iny noho ty fahamarina-Ndranahary,* le hamea anareo koa raha iaby rezay. 34 Ka miasa loha amy ty hamaray mihintsy zany, fa aleo hamaray ro miasa loha amy ty hamaray. Fa ampy ty problemo miseho amy andro kiraidraiky.