Nisoratin’i Jaona

14 Nivola koa Jesosy hoe: “Ka engà hatahotsy ty fonareo. Minoa a-Ndranahary, le minoa ahy koa. 2 Maro pilasy azo ipetraha an-tranon’ny Babako ao. Tsy ho nivola ani-zay taminareo aho laha tsy nisy raha zay, satria handeha hanoma pilasy ho anareo aho. 3 Lafa handeha aho le hanoma pilasy ho anareo, bakeo ho avy ndraiky le handramby anareo amiko any. Amy zay ze misy ahy le hisy anareo koa. 4 Le ho hainareo ty lala mandeha amy ze andehanako any.”

5 Le nivola taminy Tomasy hoe: “Tompo, tsy hainay hoe ho aia iha, ka akory ty ahaizanay ty lala mandeha any?”

6 Le hoy Jesosy: “Zaho ro lala noho fahamarina noho fiaina. Tsy misy olo mandeha amy Baba any laha tsy amy alalako. 7 Laha fa nahay ahy nareo, le ho nahay an’ny Babako koa. Hainareo ie manomboky henanizao, sady fa hitanareo.”

8 Le hoy Filipo taminy: “Tompo, atorò anay Baba zao le fa ampy anay zay.”

9 Le hoy Jesosy: “Haelan’ny niarahako taminareo zay, le mbo tsy mahay ahy avao iha Filipo? Ze nahita ahy le nahita an’ny Baba koa. Ka manino iha mivola hoe: ‘Atorò anay Baba zao’? 10 Sa tsy mino va iha hoe miaraky amy Baba aho, le Baba miaraky amiko? Tsy ty hevitsiko avao ro volaniko aminareo, fa azy Baba miaraky amiko avao iny ro manao ty asany. 11 Minoa an’ny raha volaniko iny hoe zaho miaraky amy Baba, le Baba miaraky amiko. Laha tsy zay, le minoa ndre amy asa ataoko rey avao aza. 12 Ambarako anareo mazava soa fa ze mampiseho finoa ahy, le hanao ty asa ataoko koa. Hanao asa bevata mandilatsy ani-zay aza ie, satria zaho handeha ho amy Baba any. 13 Le ze raha iaby angatahinareo amy anarako, le hataoko, soa hahazo voninahitsy amy alalan’ny Anaky ty Baba. 14 Laha mangataky raha amy anarako nareo, ndre ino zay ndre ino, le hataoko iaby.

15 “Laha tea ahy nareo, le hanoriky ty didiko. 16 Le hangataky amy Baba aho, ka hameany mpanampy* hafa nareo mba ho aminareo eo mandrakizay, 17 tsy ino zay fa ty fanahin’ny fahamarina. Tsy afaky mahazo an’ny fanahy io zao tontolo zao, satria tsy hitany sady tsy hainy raha io. Nareo ro mahay an’ny raha io, satria aminareo eo avao raha io sady anatinareo ao. 18 Tsy hengako ho raiky* nareo, fa himpoly aminareo atoy aho. 19 Sisa kely le tsy hahita ahy sasy zao tontolo zao, fa nareo ro hahita ahy, satria velo aho le ho velo nareo. 20 Ho hainareo amy andro zay hoe miaraky amy Babako aho, le nareo miaraky amiko, le zaho miaraky aminareo. 21 Ze maneky ty didiko noho manoriky azy, le tea ahy. Le ze tea ahy, le ho tean’ny Babako. Ho tea azy aho, ka hataoko ze hahaizany ahy soa.”

22 Hoy Jodasy (tsy Jodasy Iskariota): “Tompo, manino zany zahay ro hataonao mahay soa anao, fa tsy zao tontolo zao?”

23 Le hoy ty navalin’i Jesosy: “Laha misy olo tea ahy, le hanoriky ty safàko ie, ka ho tea azy Babako. Le ho aminy any zahay sady hiaraky mipetraky aminy. 24 Ze tsy tea ahy, le tsy manoriky ty safàko. Tsy ahy ty safà renareo, fa ahin’ny Baba naniraky ahy iny.

25 “Ambarako anareo raha rezay, tany mbo aminareo eto aho. 26 Fe mpanampy iny, zany hoe ty fanahy masy, azy hirahin’ny Baba amy anarako iny ro hampianatsy anareo ty raha iaby, sady hampitiaro anareo ze raha iaby nivolaniko taminareo. 27 Fiadana ro engàko ho anareo. Ameako anareo ty fiadanako. Fe hafa mihintsy ty fomba anomezako azy, fa tsy manahaky ty anomezani-zao tontolo zao azy. Ka engà havaka na hatahotsy zany ty fonareo. 28 Fa nirenareo raha nivolaniko taminareo iny hoe: ‘Handeha aho, le himpoly aminareo atoy ndraiky.’ Laha tea ahy nareo, le ho falifaly lafa handeha amy Baba any aho, satria Baba anabo mandilatsy ahy. 29 Mbo tsy miseho raha zay le fa nivolaniko taminareo, amy zay nareo mino lafa tena miseho raha zay. 30 Tsy hivola raha maro aminareo sasy aho, satria fa ho avy azy mpanday ani-zao tontolo zao iny. Fe tsy mana fahefà amiko ie. 31 Kanefa mba hahaizani-zao tontolo zao hoe tea an’ny Baba aho, le ze raha nampanovin’ny Baba ahy mihintsy ro ataoko. Mitsangàna le ndao tsika hiala eto.