Asan’ny Apostoly
24 Limy andro tafara atoy, nijotso ta Kaisaria any Ananiasy mpisorobe noho ty anti-panahy sisany noho mpisolovava* raiky mana anara Tertylo zay, ka nivola ty raha nasaran-drozy an’i Paoly tamy governera eo. 2 Lafa nikaihy Tertylo, le nanomboky nanasara raha an’i Paoly hoe:
“Manaja anao Feliksa Governera, milamy soa ty aminay eto vokatsin’ny raha ataonao. Mahay manenty lavitsy koa iha ka manday fivoara amy firenena toy eto. 3 Ndre aia ndre aia le mieky an’ny raha zay zahay iaby liany bakany zay, ka tena manao mahavelo bevata anao. 4 Fe mba tsy hitanjahanay anao ela, le mangataky anao aho mba ho soa fanahy aminay ka hijanjy anay tsielatsiela. 5 Tsy zay fa hitanay hoe mpanakoronta* lahilahy io, ka ampirisihiny hizizo amy fanjakà ty Jiosy iaby amy tany toy.* Mbo ie koa ro mitariky an’ny sektan’ny Nazareanina iny. 6 Nila fomba hanivativà ty tempoly koa ie ka nisamborinay. 7 —— 8 Ho hitanao fa marina raha iaby resahinay mikasiky azy zao lafa manao ankety azy iha.”
9 Nandentiky azy koa Jiosy rey ka nanamafy fa marina iaby raha rezay. 10 Lafa nanao fihetsiky tamy lohany governera iny mba hanomeza fivolana an’i Paoly, le namaly Paoly hoe:
“Haiko soa hoe fa an-taony maro iha ro mpitsara an’ny firenena toy, ka falifaly aho hivola aminao ty fiarovako ty vatako. 11 Azonao hamarìny koa fa tsy mandilatsin’ny 12 andro zay ty niakarako hivavaky a Jerosalema any. 12 Le tsy nahita ahy nialy hevitsy tamin’olo tamy tempoly ao rozy na nahita ahy nitariky olo hikoronta, ndre tamy synagoga ao zay ndre tan-tanà eo. 13 Tsy afaky manome porofo an’ny raha asaran-drozy ahy henanizao reo koa rozy. 14 Fe mieky aminao eto aho, fa mifanaraky amy azy kaihin-drozy hoe ‘sekta’* iny ro anompoako ty Ndranaharin’ny razambeko, satria mino ty raha iaby volanin’ny Lalàna noho voasoratsy amy Mpaminany ao aho. 15 Le mitamà manahaky an-drozy koa aho fa hovelomi-Ndranahary ty marina noho ty tsy marina. 16 Zay mahavy ahy hiezaky avao mba halio eritseritsy* amy Ndranahary noho amin’olo eo. 17 Tao maro tafara atoy, le niavy tamy firenenako eto aho, mba handay fanomeza ho fiferinesa ty mahantra noho hanao fanatitsy. 18 Nihitan-drozy tamy tempoly ao aho lafa nanao an’ny raha zay. Fe fa nalio mifanaraky amy ty raha takin’ny Lalàna aho tamy zay, le tsy niaraky tamin’olo maro na nahavy ty olo hikoronta. Nisy Jiosy baka amy faritanin’i Azia rezay ty tao, 19 le rozy ro tokony ho avy eto mba hanasara raha ahy aminao eto laha tena misy vatany raha volanin-drozy mikasiky ahy rezao! 20 Na engao hivola ty raha raty hitan-drozy nataoko olo manatriky eto reto tamy zaho nitsanga tamy Fitsarà Anabo Jiosy teo. 21 Laha tsy hoe eritseretin-drozy ho raha raty nataoko vasa ty raha nivolaniko tamy zaho nitsanga tamin-drozy teo iny hoe: ‘Tsarà aho satria mino ty fameloma ty maty!’”
22 Fe nahay soa mikasiky an’ny Lala* zay Feliksa, le nampandehaniny tse rozy, ka nivola ie hoe: “Lafa mijotso atoy Lysia sefon’ny maramila vo hanapa-kevitsy mikasiky an’ny raha toy aho.” 23 Le nameany baiko hitanjaky an’i Paoly manamboninahitsy iny, fe nameany alala hanao raha sisany koa ie, sady nengany hikarakara azy namany rey.
24 Le niavy Feliksa andro vitsivitsy tafarani-zay, niaraky tamy Drosila valiny. Jiosy Drosila io. Le nampangalaky an’i Paoly ie ka nijanjy azy niresaky mikasiky ty finoa an’i Kristy Jesosy. 25 Fe lafa niresaky mikasiky ty atao hoe mety noho tsy mety noho ty fifehezam-bata noho ty fitsarà ho avy Paoly, le natahotsy Feliksa ka nivola hoe: “Mandehana amy zay tse iha, fa mbo hampangalaky anao avao aho lafa misy fotoa.” 26 Fe nitamà koa ie hoe hanome drala azy Paoly, ka zay nahavy azy hampangalaky an’i Paoly matetitetiky noho hiresaky taminy io. 27 Fe roe tao tafara atoy, le Porsio Festosy ro nandimby an’i Feliksa. Le nengan’i Feliksa tamy prizon ao Paoly, satria ta hahazo hatò amy Jiosy rey ie.