Nisoratin’i Matio
7 “Ka mitsara sasy mba tsy hotsarà. 2 Fa arakaraky ze fitsarà ataonareo ro hitsarà anareo, le arakaraky ze meza ampiasanareo ro hanamezà ho anareo. 3 Ka manino iha ro manenty ty potin-kazo amy mason’ny rahalahinao eny, kanefa ty bodan-kazo amy masonao eny aza tsy hitanao? 4 Sady akory moa ty ivolananao amy rahalahinao hoe: ‘Ao halàko potin-kazo amy masonao tỳ’, kanefa amy masonao eo aza misy bodan-kazo? 5 Mpiatsaravelatsihy! Afaho tse ty bodan-kazo amy masonao eny, le ho hitanao soa hoe akory ty hanafaha ty potin-kazo amy mason’ny rahalahinao eny.
6 “Ka amea amboa ty raha masy, le ka atoraky amy kosò any ty perlanareo tsy no hokitsakitsahin-drozy sady nareo koa ro hivalihan-drozy ka horotarotan-drozy.*
7 “Mangataha avao le hamea nareo. Milà avao le hahita nareo. Dondòno* avao le hovohà nareo. 8 Fa ze mangataky ro mahazo, ze mila ro mahita, le ze mandondò* ro hovohà. 9 Ia aminareo vatany moa laha angatahan’ny anany mofo ka hanome azy vato? 10 Na laha angatahany fia ka hanome azy bibilava? 11 Ka laha nareo, ndre raty fanahy io aza, mahay manome raha soa ho ahi-ty ananareo, tsy vo handraky va azy Babanareo an-danitsy any iny! Tena hanome raha soa ho ani-ze mangataky aminy ie.
12 “Ka ze raha iaby teanareo hataon’olo aminareo, le mba anovo aminy koa. Zay laha ty marina ro volanin’ny Lalàna noho ty Mpaminany.
13 “Milira amy vavahady tery, satria malalaky ty lala mandeha amy fandripaha any sady bevata ty vavahady, le maro ty militsy any. 14 Fe maifitsy ty lala mandeha amy fiaina any sady tery ty vavahady, ka kelikely avao ty mahita azy.
15 “Mitandrema amy mpaminany sandoky avy aminareo eo, satria manao kisary anak’aondry rozy kanefa ty anatiny ao amboanala manehitsy. 16 Ty voany ro ahaizanareo soa an-drozy. Misy olo mila voaloboky na aviavy amy fatiky eny va? Raha tsy hisy mihintsy zay! 17 Manahaky ani-zay koa fa ze hazo soa le manome voany soa, fa ze hazo raty le manome voany raty. 18 Tsy afaky manome voany raty ty hazo soa, le tsy afaky manome voany soa ty hazo raty. 19 Hotampahy ze hazo tsy manome voany soa, le hatoraky anaty afo any. 20 Ty raha ataon’ny* mpaminany sandoky rey zany ro hahaizanareo an-drozy.
21 “Tsy ze mikaiky ahy hoe: ‘Tompo, Tompo’, ro hilitsy amy Fanjakàn’ny lanitsy, fa ze manao ty sitrapon’ny Babako an-danitsy any iny avao. 22 Maro ty hivola amiko amy fotoa zay hoe: ‘Tompo, Tompo, zahay va tsy fa naminany tamy anaranao, le fa nandroaky demonia tamy anaranao, sady fa nanao fahagagà maro tamy anaranao?’ 23 Fe hovolaniko mazava soa amin-drozy amy fotoa zay hoe: ‘Tsy misy fahaizako anareo mihintsy! Mialà ahy nareo mpandika lalàna!’
24 “Ka ze maharè an’ny safàko rezay noho manoriky azy, le mitovy amy lahilahy mahihitsy namboatsy ty tranony tanabo vatolampy. 25 Nizinja ty ora ka nanday rano be, sady nanjeky ty tsioky ka nahazo an’ny trano iny. Fe tsy nikopaky trano iny satria namboary tanabo vatolampy. 26 Fa ze maharè an’ny safàko rezay, kanefa tsy manoriky azy, le mitovy amy lahilahy gegy namboatsy ty tranony tanabo fasy. 27 Nizinja ty ora ka nanday rano be, sady nanjeky ty tsioky ka nahazo an’ny trano iny. Le nikopaky trano iny ka nirava tanteraky.”
28 Lafa baka nivola an’ny raha iaby rezay Jesosy, le nitseriky tamy fomba fampianarany vahoaky rey, 29 satria lafa nampianatsy ie le hita hoe mana fahefà baka amy Ndranahary, fa tsy manahaky ty mpanora-dalàna.