Nisoratin’i Matio
19 Lafa baka nivola ani-rezay Jesosy, le niala ta Galilia ao bakeo nitsaky ty Vavaranon’i Jordana, le niavy tamy sisin-tanin’i Jodia teo. 2 Nisy olo maro koa nanaraky azy tany, ka nafahiny iaby ty aretin-drozy.
3 Le nisy Fariseo namonjy azy satria ta hamandriky azy, ka nanontany hoe: “Azon’ny lahilahy atao va ty misaraky amy valiny ndre ino ino antony?” 4 Le hoy ty navaliny: “Mbo tsy nivakinareo va fa azy namoro ty olo tam-boalohany any iny, le namoro an-drozy ho lahilahy noho ampela, 5 le nivola hoe: ‘Hiala amy babany noho reniny zany ty lahilahy, ka hitambatsy amy valiny, le ho nofotsy raiky avao rozy roe’? 6 Ka tsy roe sasy rozy fa nofotsy raiky avao. Ao tsy hosarahin’olo zany ze naharo-Ndranahary bao.”* 7 Le hoy ty asan-drozy: “Ka manino Mosesy ro nivola hoe mila manome taratasy fisaraha ty lahilahy lafa misaraky amy valiny?” 8 Le hoy ty asany tamin-drozy: “Satria olo tsy hay atao nareo, le zay ro nahavy an’i Mosesy nanenga anareo hisara-baly. Fe tsy nanahaky ani-zay ty tam-boalohany tany. 9 Ambarako anareo fa ze lahilahy misaraky amy valiny ka manambaly olo hafa, le mpandranto, laha tsy hoe fijangajangà* avao ro antony isarahan-drozy.”
10 Le hoy mpianatsy rey taminy: “Aleo tsy manambaly laha zay ty raha mahazo ty lahilahy manambaly.” 11 Fe hoy ty asany: “Tsy ty olo iaby ro afaky manao an’ny raha volaniko zao, fa ze nahazo an’ny fanomeza zay avao. 12 Fa misy olo tsy manambaly satria misy handra baka an-tron-dreniny* any, le misy tsy manambaly* satria nivosirin’olo. Misy koa mifily tsy hanambaly mba hahafahan-drozy hahavita raha maro ho an’ny Fanjakàn’ny lanitsy. Soa laha tsy manambaly ze mahavita tsy manambaly.”
13 Bakeo nisy ajà nandesy taminy teo mba hametrahany tana noho hanaovany vavaky, fe nihelofan’ny mpianatsy rey rozy. 14 Fe hoy Jesosy: “Engao ajà reo hamonjy ahy fa ka sakana, satria ho ani-ze olo manahaky an-drozy ty Fanjakàn’ny lanitsy.” 15 Le nametra-tana tamin-drozy ie, bakeo nandeha.
16 Le ingy nisy pamaraky raiky namonjy azy sady nivola hoe: “Mpampianatsy e, ino ty raha soa tsy maintsy ataoko mba hahazoako fiaina mandrakizay?” 17 Le hoy Jesosy: “Manino iha ro manontany ahy mikasiky ty soa? Raiky avao ty soa. Ka laha ta hahazo fiaina iha, le oriho avao didy rey.” 18 Le hoy pamaraky iny: “Ino amy didy rey zay?” Le hoy Jesosy: “Azy hoe: Ka mamono olo, ka mandranto, ka mangalatsy, ka mitsanga ho vavolombelo mavandy, 19 hajao ty babanao noho ty reninao, le tiavo ty namanao manahaky itiavanao ty vatanao.” 20 Le hoy pamaraky iny: “Fa norihiko iaby reo, ka ino ty mbo mila ataoko?” 21 Le hoy Jesosy taminy: “Laha ta ho lavorary* iha, le ndany avilio ty hanananao le ameo ho an’ny mahantra, amy zay hana hanana an-danitsy any iha. Le ndao hanara-dia ahy.” 22 Lafa naharè ani-zay pamaraky iny, le nandeha sady nalahelo satria nimaro ty hananany. 23 Le hoy Jesosy tamy mpianatsiny rey: “Ambarako anareo mazava fa ho sarotsy amy ty olo panarivo ty hilitsy amy Fanjakàn’ny lanitsy. 24 Ampoliko ndraiky hoe mbo moramora ty hiliran’ny rameva amy loaky amy fitrebiky rey, tany ty hiliran’ny panarivo amy Fanjakà-Ndranahary ao.”
25 Nitseri-draha mpianatsy rey lafa naharè ani-zay ka hoy ty asan-drozy: “Ka hisy ho avotsy avao laha zay?” 26 Nanenty an-drozy soa Jesosy le nivola hoe: “Tsy hain’olombelo zay, fe tsy misy raha tsy hai-Ndranahary.”
27 Bakeo namaly Petera hoe: “Fa nafoinay ty kila raha iaby le nanaraky anao zahay. Le ino zany ty raha ho azonay?” 28 Le hoy Jesosy tamin-drozy: “Ambarako anareo mazava fa hatao-Ndranahary vaovao ty raha iaby lafa hipetraky amy sezim-panjakàny be voninahitsy ty Anak’olo. Amy fotoa zay, le hipetraky amy sezim-panjakà 12 koa nareo ze fa nanaraky ahy, ka hitsara ty foko 12 amy Israely eo. 29 Ankoatsini-zay, ze olo iaby fa nahafoy trano na rahalahy na anabavy na baba na reny na anaky na tany satria manday ty anarako, le hahazo injaton’ny raha nafoiny zay, sady handova fiaina mandrakizay.
30 “Fe maro amy ty voalohany ro ho farany, le ty farany ho voalohany.