Ty taratasy voalohany ho ahi-ty Korintianina
6 Laha misy aminareo tsy mifanaraky, le ho sakin’ny raiky iny va ty hitory an’ny raiky iny anatrehan’olo tsy marina amy tribinaly any, fa tsy anatrehan’olo masy eo? 2 Sa tsy hainareo fa hitsara ani-zao tontolo zao ty olo masy? Ka laha zao tontolo zao aza hotsaranareo, le tsy ho hainareo va ty hitsara ty raha tena maliniky? 3 Tsy hainareo va fa hitsara anjely tsika? Ka manino tsika ro tsy hitsara raha mikasiky an’ny fiaina toy? 4 Ka laha misy raha mikasiky an’ny fiaina toy tokony hotsarà, le lahilahy tsy misy dikany amy fiangona va ro hofilinareo ho mpitsara? 5 Ty hahamenatsy anareo ro ivolanako an’ny raha zay. Tsy misy lahilahy hendry afaky mitsara ty alin’ny rahalahiny va aminareo eo ndre raiky? 6 Fe mifampitory amy tribinaly any rahalahy reo, sady amin’io anatrehan’olo tsy mpino eo!
7 Laha ty marina, le fa resy sahady nareo lafa mifampitory. Tsy aleo va miaritsy ty tsy rariny? Tsy aleo va maneky hoveriverè? 8 Fe mifanohitsy amy zay, fa nareo koa ro manao ty tsy rariny noho mamerivery, sady amin’io ty rahalahinareo avao ro anaovanareo ani-zay!
9 Sa tsy hainareo fa tsy handova ty Fanjakà-Ndranahary ty olo tsy marina? Ka maneky ho voafitaky* nareo. Ty mpijangajanga,* ty mpanompo sampy, ty mpandranto, ty lahilahy maneky hanaovan’ny lahilahy firaisa, ty lahilahy mandry amy lahilahy,* 10 ty mpangalatsy, ty olo tsy mety afa-po, ty mamo lava, ty mpandratiraty,* noho ty mpandrava rahan’olo, le tsy handova ty Fanjakà-Ndranahary. 11 Fa nanahaky ani-zay avao ty sisany taminareo taloha, fe fa voasasa malio soa nareo, fa nihamasìny, sady fa nambara ho olo marina tamy anaran’i Jesosy Kristy Tompo noho tamy fanahin’ny Ndranaharintsika iny.
12 Azoko atao ty raha iaby, fe tsy ty raha iaby ro mahasoa. Azoko atao ty raha iaby, fe tsy hengako hisy raha hamehifehy ahy* mihintsy. 13 Ty hany le natao ho an’ny kibo, le ty kibo* natao ho an’ny hany, fe samby horavà-Ndranahary raha reo. Ty vatan’olombelo koa le tsy natao ho an’ny fijangajangà* fa ho an’ny Tompo, le ty Tompo ho an’ny vatan’olombelo. 14 Fe Ndranahary fa namelo an’ny Tompo, le hamelo antsika koa ie amy alalan’ny heriny.
15 Tsy hainareo va fa rantsambatan’i Kristy ty vatanareo? Ka ty rantsambatan’i Kristy va le halàko bakeo hampiarahiko amy makorely? Tsy zay mihintsy! 16 Tsy hainareo va fa ze miaraky amy makorely le vata raiky aminy? Tsy zay fa nivola Ndranahary hoe: “Ho nofotsy raiky avao rozy roe.” 17 Fa ze miaraky amy Tompo, le mitovy eritseritsy aminy. 18 Ilaiso ty fijangajangà!* Ze fahotà hafa ataon’olo le ivelan’ny vatany eny, fa ty mpijangajanga manota amy ty vatany avao. 19 Tsy hainareo va fa ty vatanareo ro tempolin’ny fanahy masy anainareo ao noho azonareo baka amy Ndranahary? Sady tsy ahinareo sasy koa ty vatanareo, 20 satria fa nivilỳ nareo. Dikani-zay, ampiasao hanomeza voninahitsy a-Ndranahary ty vatanareo.