Nisoratin’i Matio

23 Le hoy ty asan’i Jesosy tamy ty vahoaky noho ty mpianatsiny: 2 “Nangalaky ty pilasin’i Mosesy ty mpanora-dalàna noho ty Fariseo. 3 Anovo zany ze raha iaby volanin-drozy sady oriho. Fe ka atao ze raha ataon-drozy, satria mivola rozy fe tsy ataon-drozy iaby raha volanin-drozy rey. 4 Mamehy enta mavesatsy rozy, le apetrakin-drozy an-tsorokin’olo eny, kanefa rozy tsy ta hampihetsiky an’ny raha rey ndre amy ty rantsantanan-drozy aza. 5 Ze raha iaby ataon-drozy, le ataon-drozy mba hahitan’olo an-drozy avao. Ataon-drozy bevata, ohatsy, boaty misy andininy baka amy Soratsy Masy rey, azy isikinan-drozy sahala aoly fiarova rey,* le ataon-drozy lava biby koa ramborambony amy sikin-drozy rey. 6 Tean-drozy ty pilasy farani-ze soa amy fihinana hariva rey, ty pilasy aloha* amy synagoga ao, 7 ty hoarahaban’olo am-bazary eny, noho hokaihin’olo hoe Raby.* 8 Fa nareo, ka mety kaihin’olo hoe Raby, satria raiky avao ty Mpampianatsy anareo sady mpirahalahy iaby nareo. 9 Ankoatsini-zay, ndre ia ia an-tany etoy le ka kaihy hoe babanareo satria raiky avao ty Babanareo, tsy ia zay fa Azy an-danitsy any iny. 10 Ka mety kaihin’olo hoe mpitariky koa, satria raiky avao ty Mpitariky anareo, tsy ia zay fa Kristy. 11 Fa ze farany anabo aminareo, le tsy maintsy ho mpanomponareo. 12 Ze manondrotsy ty vatany ro ho lasa ambany, le ze miambany ro hasondrotsy.

13 “Ho azon-draha nareo mpanora-dalàna noho Fariseo mpiatsaravelatsihy io, satria ahilinareo ty Fanjakàn’ny lanitsy soa tsy hiliran’olo! Nareo tsy militsy, kanefa ze ta hilitsy tsy engànareo hilitsy. 14 ——

15 “Ho azon-draha nareo mpanora-dalàna noho Fariseo mpiatsaravelatsihy io! Mitety riaky noho tany nareo mba hitaoma olo raiky hiova finoa,* bakeo lafa miova finoa ie, le ataonareo ze hahavy azy ho amy Gehena* any, ka hahazo sazy mandilatsy ty hahazo anareo.

16 “Ho azon-draha nareo mpitariky jiky io! Mivola nareo hoe: ‘Laha misy olo mifanta amy tempoly, le tsy mampanino zay. Fa laha misy olo mifanta amy volamenan’ny tempoly, le tsy maintsy mitanjaky ty safà nataony.’ 17 Gegy nareo sady jiky! Ino ty tena vatan-draha: Volamena iny sa ty tempoly mahavy an’ny volamena iny ho masy? 18 Mivola koa nareo hoe: ‘Laha misy olo mifanta amy alitara, le tsy mampanino zay. Fa laha misy olo mifanta amy fanomeza anabony eo, le tsy maintsy mitanjaky ty safàny ie.’ 19 Jiky nareo! Ino ty tena vatan-draha: Fanomeza iny sa ty alitara mahavy an’ny fanomeza iny ho masy? 20 Dikani-zay ze mifanta amy alitara, le mifanta amy alitara noho amy ze raha iaby anabony eo. 21 Ze mifanta amy tempoly koa, le mifanta amy tempoly noho amy Azy mipetraky ao iny. 22 Le ze mifanta amy ty lanitsy le mifanta amy sezim-panjakà-Ndranahary noho amy Azy mipetraky anabony eo iny.

23 “Ho azon-draha nareo mpanora-dalàna noho Fariseo mpiatsaravelatsihy io, satria manao fanomeza* solila, aneta, noho komina* nareo, kanefa tsy dareanareo ty raha tena bevata amy Lalàna ao, zany hoe manao ty rariny, miferinay olo, noho azo atokisa! Fanomeza tsy maintsy atao rey, fe tsy maintsy atao koa raha hafa reo. 24 Mpitariky jiky nareo! Tantavaninareo ty moky amy raha inominareo, kanefa ty rameva atelinareo.

25 “Ho azon-draha nareo mpanora-dalàna noho Fariseo mpiatsaravelatsihy io, satria mitovy amy kopy noho finga malio ivelany rey nareo,* kanefa anatinareo ao nareo tsy mety afa-po* sady tsy mahatanjaky ty ainareo! 26 Fariseo jiky! Diovo tse ty anatin’ny kopy noho finga ao, mba halio koa ty ivelany etoy.

27 “Ho azon-draha nareo mpanora-dalàna noho Fariseo mpiatsaravelatsihy io, satria nareo mitovy amy lolo nilokoa foty, soasoa laha hentea ivelany etoy, fe ty anatiny ao feno taolam-paty noho loto sankarazany! 28 Ho zay koa nareo: Ivelany etoy nareo atao ho olo marina io, fe anainareo ao feno fiatsarambelatsihy noho fandikàn-dalàna.

29 “Ho azon-draha nareo mpanora-dalàna noho Fariseo mpiatsaravelatsihy io, satria mamboatsy ty lolon’ny mpaminany nareo, le asianareo pozipoziny ty lolon’olo marina, 30 sady mivola nareo hoe: ‘Laha nivelo tamy fahakin’ny razambenay zahay, le tsy ho niaraky tamin-drozy nandatsaky ty lion’ny mpaminany!’ 31 Ka nareo avao zany ro manambara vata hoe anani-azy namono mpaminany rey. 32 Le fa vitao zany ty asa natombokin’ny razambenareo.*

33 “Taranakin’ny bibilava misy poizy nareo! Mieritseritsy va nareo hoe afaky hilay ka tsy ho voasazy amy Gehena* any? 34 Satria nareo tsy mibebaky, le haniraky mpaminany noho olo hendry noho mpampianatsy* ho aminareo any aho. Ty ilany hovonoanareo noho hofantsihinareo amy hazo fijalea, le ty sisany hofilapilarinareo amy synagoganareo ao sady hitety tanà nareo hanenjiky an-drozy. 35 Amy zay hivaly aminareo iaby ty lion’olo marina nalatsaky tan-tany etoy, nanomboky tamy lion’i Abela zisiky tamy lion’i Zakaria, anan’i Barakia, azy nivonoanareo tanelanelan’ny pilasy masy noho alitara teo iny. 36 Ambarako anareo mazava fa hivaly amy taranaky toy raha iaby rezay.

37 “Jerosalema, Jerosalema, mpamono ty mpaminany noho mpitoraky vato ze olo irahy aminao any iha! Impiry aho ro nita hamory ty ananao, manahaky renin’akoho mamory ty anany ambany elatsiny ao rey, fe tsy nahefa nareo. 38 Hengà eo nareo noho ty tranonareo!* 39 Satria ambarako anareo fa tsy hahita ahy sasy nareo manomboky henanizao zisiky hivolananareo hoe: ‘Enganè mba hahazo fitahia azy avy amy anaran’i Jehovah iny!’”